‘Taunimanima Idauidau Ibounai’ Haroro Henia Belgium Ai

APOSETOLO Paulo ese Dirava ena Keristen horoa taudia ia hadibadia ‘Dirava ia ura taunimanima idauidau ibounai ese mauri do idia davaria, bona hereva momokani do idia diba.’ Unai dainai do idia guriguri idia be ‘mai maino danu do idia noho totona’ bona Basileia ena sivarai namona be kamonai taudia ibounai dekenai do idia harorolaia.​—1 Timoteo 2:​1-4.

Hari, ‘taunimanima idauidau ibounai’ dekenai sivarai namona harorolaia be mai anina bada Iehova ena Witness taudia Belgium dekenai. Guna mai edia gado idauidau tano oreadia toi sibona idia noho​—Flemish (Dutch), French, bona German​—to hari Belgium dekenai, gado idauidau taudia bona bese idauidau taudia momo idia noho. Unuseniai Arab, Turkey, India, China, Filipino, Africa, bona America taudia momo idia noho, to ma bese haida idia noho danu.

To, Iehova ena Witness taudia Belgium ai be edia Keristen tadikaka tanobada hegegemadai bamona idia hekwarahi, sivarai namona be ‘taunimanima idauidau’ dekenai idia harorolaia totona. Unai bese idauidau edia huanai haroro gaukara idia karaia be edena bamona? Bona edia lalohadai Bible ena hereva dekenai be dahaka?

Aonega Gaukaralaia Neganai Anina Namona Ia Havaraia

Basileia ena sivarai namona be ‘taunimanima idauidau ibounai’ dekenai ita herevalaia neganai moale ita davaria. Tano idauidau taudia be dala ai, maketi gabudia ai, PMV basi ai, peleini ai eiava bouti dekenai ita davaridia diba. Aonega ita gaukaralaia neganai, Basileia harorolaia taudia ese hamatamaia hereva namodia idia gwauraia diba bona unai amo anina namona ita davaria diba.

Basi stopu gabuna ta dekenai, Witness hahine ta ese mai moale danu Africa hahine ta ia hereva henia. Unai hahine be gabeai ia moale badina Dirava ena Basileia sivarai namona ia kamonai dainai. Ia ese Gima Kohorona bona Noga! magasin ia abidia bona iena address be unai Witness hahine dekenai ia henia. Unai Witness hahine ia gwau daudau lasi murinai do ia vadivadi henia, maoromaoro unai hahine ia gwau: “Lasi! Lasi! Namona be dina korikori bona nega korikori ita atoa, ruma dekenai oi do lau naria totona.”

Dina toi murinai, unai Witness hahine be ia davaria unai hahine ena address ia haboioa. To ia ese unai hahine ia noho street ladana ia laloatao, unai dainai ia lao unai street dekenai idia noho rumadia ibounai dekenai, bona ia tahua. Unai street ena dokona dekenai ia ginidae neganai hahine ia davaria lasi. Unai gabu ia rakatania gwauraia neganai, maoromaoro, ia tahua hahinena be hegeregere hoa dalanai ia hedinarai kava bamona bona iena vairana dekenai ia gini noho! Bible stadi ta ia hamatamaia.

To kastom idauidau karadia, abidadama idauidau bona edia sene karadia idauidau be edena bamona? Hegeregere, Hindu tomadiho idia abidadama henia karana be edena bamona? Pioneer ta be Reasoning From the Scriptures bukana dekenai guna ia duahia herevana ta ia laloatao. Unai hereva ia gwau: “Namo lasi Hindu tomadiho edia hahediba hegonudia ita herevalaia, to namona be Buka Helaga ena hereva momokani ita gwauraia hedinarai. . . . Hereva momokani be kara maoromaoro idia hitololaia taudia bona idia ranu maselaia taudia dekenai ita gwauraia hedinarai neganai do idia kamonai.”

Unai pioneer kekeni ese India hahine ta ladana Kashi ia davaria neganai unai bamona ia karaia, bona unai hahine ese Bible stadi karana ia abia dae. Kashi ena diba Bible dekenai ia bada ia lao bona nega sisina murinai, ia diba gaudia be ena turadia dekenai ia herevalaia. Nega ta unai pioneer ese ambassador ta ena adavana ia hedavari henia, bona unai hahine ia henanadai ia gwau: “Oi be Kashi dekenai Bible oi hadibaia kekenina, a?” Unai hahine ma ia gwau: “Ia be tisa namo herea momokani! Mani oi laloa, ia be Hindu tomadiho hahine bona lau be Katolik tomadiho hahine, to ia ese Bible ena hereva lau dekenai ia hadibaia!”

Filipino taudia do oi hedavari henidia neganai maoromaoro do oi diba idia be Bible idia ura henia momokani. Idia be kudou-namo taudia bona heabidae taudia. Filipino hahine ta be magasin rua ia abidia, to ia be Katolik hahine dainai unai magasin ia negedia. Pura haida murinai magasin rua ma ia abidia, bona ena baege dekenai ia atodia. Hanuaboi ta ai ia ura duahiduahi. Unai dainai buka ia tahua noho lalonai, ia ese unai magasin rua ia davaridia. Ena be ena lalona ia ura momokani lasi to ia duahia sibona, ia duahia noho lalonai iena ura ia bada noho unai magasin dekenai. Daudau lasi murinai, Witness ta be ena ruma dekenai ia vadivadi, bona unai hahine ese henanadai momo ia henia. Bible siridia ese ena lalona ia veria, bona hari ia ese hereva momokani ia davaria vadaeni.

‘Emu Aniani Oi Negea’

Tano idauidau taudia be Belgium dekenai idia lao badina bisinesi karadia totona eiava unuseniai diba momo embassy taudia edia gaukara gabudia 150 idia noho dainai eiava European Community Commission dekenai idia gaukara dainai. Idia momo be lagani haida sibona idia noho. Reana idia ita haroro henidia hamatamaia bona Bible stadi ita karaia hamatamaia neganai huahua namodia ita davaria lasi. To Bible ese ita ia hadibaia, ia gwau: “Emu aniani be davara ai oi negea, badina dina momo murinai do oi davaria lou.”​—Kohelete 11:1

America hahine ta be hanaihanai magasin matamatadia ia abia Witness hahine ta dekenai. Nega ta unai Witness hahine ese nega hanaihanai Bible stadi karana ena hahenamo ia gwauraia ia dekenai, bona ia hamaoroa Bible stadi do idia karaia hebou. Unai hahine ese Bible stadi karana ia abia dae bona Bible dekenai ena diba ia bada ia lao haraga. Daudau lasi murinai tomadiho momokani bona tomadiho koikoi edia idau ia diba. Unai dainai iena ruma dekenai idia noho tomadiho koikoi ese idia gaukaralaia kaivakuku idauidau iboudiai ia kokidia bona ia negedia. Vadaeni nega ia ginidae do ia giroa lou United States dekenai. Unai anina be lauma dalanai ia tubu daekau ena dokona be unai, a? Unai Witness hahine be ma Witness hahine ta ese United States amo telefon dekenai ia rini henia bona ia hamaoroa ia ese guna ia stadi henia hahinena be ena Bible stadi karana ia do karaia noho bona ia gwauhamata Iehova dekenai bona bapatiso ia abia vadaeni, unai Witness hahine be ia moale bada momokani!

Unai bamona danu ia vara unai India hahine, Kashi dekenai, bona guna ai gwauraia Filipino hahinena dekenai ia vara danu. Kashi ia giroa lou India dekenai neganai, ia bona ena adavana be edia Bible stadi karana idia karaia noho. Daudau lasi murinai ia bona ena adavana be edia mauri idia gwauhamatalaia Iehova dekenai bona haroro gaukara lalonai idia vareai. Idia noho gabuna dekenai Witness taudia ta be lasi dainai, idia ura Kongregesen ena Buka Stadi be edia ruma dekenai do idia karaia. Kashi be heduru pioneer gaukara ia karaia, ena tauanina ena goada hegeregerenai, bona ia ese Bible stadi 6 ia karaia noho. Unai hegeregerena, unai Filipino hahine be ia lao United States dekenai, ia stadi noho bona ia gwauhamata Iehova dekenai bona ia bapatiso, bona regular pioneer ia karaia noho. Unai bamona moale anina namodia be Belgium dekenai Basileia ena sivarai namona idia harorolaia taudia dekenai idia vara noho, idia be mai moale ida taunimanima be edia teritori dekenai idia haroro henidia noho.

Gado Idauidau Hekwarahilaia

‘Taunimanima idauidau ibounai’ haroro henia gaukarana hagugurua totona, branch opesi ese Bible bukadia be gado idauidau 100 mai kahana ai idia abidia be namo. Belgium ena kongregesen iboudiai dekenai gado 10 idia gaukaralaia. Kongregesen 341 lalonai, tano idauidau gadodia 61 idia noho. Unuseniai Basileia idia harorolaia taudia iboudiai be 26,000, bona unai 26,000 taudia iboudiai amo 5,000 be idau tano taudia. Kongregesen ta lalonai tano idauidau 25 amo idia mai tatau bona hahine idia noho. To unai tadikaka edia lalokau bona lalo-tamona karana ese Keristen momokani hahediba taudia edia kara ia hahedinaraia momokani.​—Ioane 13:​34, 35.

Belgium dekenai taunimanima momo be gado idauidau momo dekenai sivarai namona idia ura kamonai henia, unai dainai, pablisa taudia haida idia ura gado aukadia idia diba, hegeregere, Turkey, Arab, bona China gadodia.

Arab taudia edia huanai idia gaukara taudia ese idia davaria edia mauri lalonai idia vara gaudia be Bible amo idia gwauraia hedinarai neganai idia kamonai. Basileia ia harorolaia pablisa tauna ta be Arab ena profesa tauna ta ida hereva namodia idia kikilaia hebou, bona idia herevahereva murinai lagani toi lalonai ia ese unai profesa tauna ia davaria lou lasi. Unai dainai nouti ia torea bona Bible ena henanadai haida ia rakatania unai profesa tauna ia abia totona. Unai ese hari profesa tauna ena lalona ia veria dainai ia ura Witness danu Bible ena hereva ia tahua namonamo. Bible lalonai ia davaridia herevadia ia hoalaia bada, unai dainai ia bona ena adavana be nega haida idia atoa Bible idia duahia hebou totona, to idia be Muslim tomadiho taudia.

Siti badadia dekenai idia ura China taudia idia durudia taudia be hekwakwanai ma ta idia davaria. China taudia momo be Dirava be Havaraia Tauna herevana idia abidadama henia lasi eiava Bible be Dirava ena Hereva idia abidadama henia lasi. To, unai hereva ena badina idia ura tahua. Idia duahiduahi neganai idia ura idia duahia gauna ena anina idia diba momokani. Idia dekenai idia rakatanidia Bible bukadia eiava Bible ena kahana momo be dina momo lasi lalonai idia duahia haorea diba, unai be vaia edia kara. Bema edia kudou be maoro neganai, Dirava ena Hereva siahuna ese idia ia durudia diba.

China hahine ta be Havaraia Tauna herevana ia ura lasi abia dae. To edia stadi iharuana ai ia gwau: “Hari Iehova Dirava dekenai lau abidadama, badina bema Bible be taunimanima 40 ese lagani 1,600 lalonai idia torea, bona ena hereva badana ida idia hegeregere, unai anina be Iehova Dirava ese Bible idia torea taudia ia hakaudia noho.”

Witness hahine ta ese China hahine ta ia hedavari henia taunimanima udaia PMV basi (tram) dekenai. Unai hahine ese Witness hahine ia henanadai henia, ia gwau: “Oi be Keristen ta, a? Bena ia gwau, sibodia idia gwauraia Keristen taudia haida edia hereva be ta bona ma haida edia hereva ma idia idau unai dainai unai koikoi karana ia moalelaia lasi. Unai Witness hahine be iena hereva ia hamomokania, to ia hahedinaraia Bible be sibona ena hereva ia hakoikoia lasi. Unai neganai unai hahine be PMV basi (tram) amo ia diho gwauraia. Ia ese ena address be unai Witness hahine dekenai ia henia, bona unai Witness hahine ese ia vadivadi henia neganai, unai hahine be mai moale ida ia hereva badabada, ia gwau: “Unai be lauegu nega ginigunana PMV basi (tram) dekenai lau guia iunivesiti dekenai lau lao totona. Unai be hoa gauna, ani?” Ena be hua haida sibona lalonai Bible ia stadilaia bena murinai ia giroa lao China dekenai to ia moale bada.

Unai bamona ekspiriens ese Belgium Witness taudia idia hadibaia namonamo. Bible ia gwau: “Daba ai oiemu uhe oi hadoa, bona do oi hesiku lasi ela bona adorahi, badina oi diba lasi inai be namo eiava unai be namo, eiava unai ruaosi do idia namo.” (Kohelete 11:6) Ena be idia hekwarahi, gado idauidau, kastom idauidau bona sene karadia idauidau dekenai to anina namona idia davaria. Kudou-namo taudia idia kamonai dainai ita diba “Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.”​—Kara 10:​34, 35.