Gima Noho Miusik Dikadia Garina!

“Umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.”​—EFESO 5:​15, 16.

1. Dahaka dainai ita gwau diba miusik be “harihari gauna namona”?

“MIUSIK . . . be harihari gauna namona Dirava ena amo.” Lulu Rumsey Wiley be ena buka Bible Music lalonai unai bamona ia hereva. Idau nega amo, Dirava garina idia gari tataudia bona hahinedia be unai idia diba. Miusik dekena amo, taunimanima be edia hemami idia hahedinaraia diba​—unai be edia moale, lalohisihisi, badu, bona lalokau. Unai dainai Baibel torea negana lalonai, miusik be mai anina bada, bona unai buka helaga lalonai nega momo idia kikilaia.​—Genese 4:21; Apokalupo 18:22.

² Iehova tomadiho henia lalonai miusik namona be mai anina bada. Iehova Dirava hanamoa hereva badadia be guna miusik dekenai idia anelaidia. Salamo torea tauna David ia gwau: “Lau ese Dirava ladana be egu ane ai do lau hanamoa.” (Salamo 69:30) Sibodia idia noho neganai ane amo idia guriguri. Asaf ia torea, ia gwau: “Hanuaboi ai lauegu gitara bamona gauna ena rege lau laloatao, lauegu kudouna dekenai lau laloa namonamo, bona lauegu lauma lau tahua namonamo.” (Salamo 77:6) Iehova ena dubu lalonai, miusik gadaralaia taudia momo idia hegaegaelaidia. (1 Sisiga 23:​1-5; 2 Sisiga 29:​25, 26) Nega ta ta ai, miusik karaia taudia momo idia haboudia, dubu idia hahelagaia negana bamona, miusik gadaralaia totona, kibi hiriria taudia 120 idia haboudia hegaegae. (2 Sisiga 5:​12, 13) Unai miusik namona ena rege ita diba lasi, to The Music of the Bible bukana ia gwau: “Ita diba helaga negadia dekenai Dubu lalonai miusik idia karaia ena rege be namo momokani . . . Bema ita ta be unai nega lalonai ita noho, reana unai kara ita raraia neganai ita hoa unai rege hereadaena dainai.”a

Miusik Idia Hadikaia

³ To, nega haida miusik be unai dala namona amo idia gaukaralaia lasi. Sinai Ororona ai, miusik idia gaukaralaia golo boromakau tomadiho henia karana ena moale idia habadaia totona. (Esodo 32:18) Nega haida inuinu kekero bona ariara karana be ane amo miusik idia hadikaia. (Salamo 69:12; Isaia 23:15) Israel besena kahirakahira dekenai idia noho kaivakuku tomadiho besedia danu be Dirava ia henia miusik ena namo idia hadikaia. The Interpreter’s Dictionary of the Bible bukana ia gwau: “Foenike bona Suria lalodiai, idia ura henia bada miusik kahirakahira iboudiai be natuna havaraia dirava hahinena, Ishtar, tomadiho henia karana ia gwauraia. Unai dainai, sihari kava karana idia karaia gwauraia neganai, nega momo unai ane idia abia.” Idaunegai Greek taudia danu be “kara bodaga mavaru” ena miusik idia gaukaralaia.

3, 4. Dirava ena taunimanima bona kaivakuku idia tomadiho henia dekena taudia be edena dala amo miusik idia gaukaralaia kerere?

⁴ Oibe, miusik be mai ena siahu taunimanima edia lalohadai ia veria, bona edia lalohadai ia haidaua totona. Lagani ten haida gunanai, John Stainer ia torea bukana, The Music of the Bible, lalonai ia gwau: “Hari inai nega lalonai, diba iboudiai amo Miusik ena diba be mai ena siahu bada taunimanima dekenai.” Unai dainai, miusik be Dirava idia gari henia memero kekeni ia hakereredia diba.

Naria Namonamo

⁵ Bema oi be mero o kekeni ta, oi diba vadaeni oiemu lagani hegeregere taudia momo dekenai miusik be gau badana​—pop bona rock miusik idia ura henia dikadika. Taunimanima idia gwau “memero kekeni be miusik idia abia be gau badana.” Idia gwau United States lalonai, lagani 6 lalodiai ela bona sikuli idia haorea neganai, memero kekeni be dina ta ta iboudiai hora hani dekenai rock miusik idia kamonai henia! Ita gwau lasi oi dekenai hemami namona bona moale ia henia gauna oi moalelaia be ia dika. Momokani, miusik ia Havaraia Diravana, Iehova, ia ura lasi memero kekeni idia vaira auka bona idia lalohisihisi. To, iena taunimanima ia haganidia inai bamona: “Iehova umui moalelaia! Kara maoromaoro taudia e, umui moale bada!” (Salamo 32:11) Memero kekeni dekenai iena Hereva ia gwau: “Tauhau e, emu tauhau negana lalonai oi moale, emu tauhau dinadia ai oiemu kudouna ese oi do ia hamoalea be namo.”​—Kohelete 11:9.

6. (a) Miusik idia abia hidi neganai dahaka dainai memero kekeni idia naria namonamo be gau badana? (b) Dahaka dainai hari inai negai idia kamonai henia miusik ena dika be uru gunadia idia kamonai henia miusik ena dika ia hanaia?

⁶ To, miusik namona sibona oi abia hidi be mai ena badina. Aposetolo Paulo be Efeso 5:​15, 16 dekenai ia gwau: “Umui emui kara umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.” Reana memero kekeni haida do idia maumau, inai kekeni ta bamona, ia gwau: “Aiemai tamana bona sinana be idia mero bona kekeni neganai, idia ura henia miusik idia kamonai henia. Dahaka dainai ai ura henia miusik ai kamonai henia diba lasi?” Reana gunaguna emui tamana bona sinana idia kamonai henia miusik haida be namo lasi danu. Unai nega lalonai, taunimanima idia ura henia miusik edia hereva momo ese kamonai taudia edia lalohadai idia veria sihari kava bona heudahanai lalohadaidia idia abia totona. Gunaguna hehuni dalana amo edia lalohadai idia veria, to hari inai negai unai kara idia gwauraia hedinarai momokani. Toretore tauna ta ia gwau: “Hari inai negai natudia be idia itadia gaudia bona idia kamonai henia herevadia momo be idia hedinarai vaitani.”

Rap Miusik—Gwau-Edeede Havaraia Miusik

⁷ Namona be taunimanima momo idia ura henia dikadika rap miusik oi laloa. Time magasin ia gwau rap miusik be “tanobada hegegemadai idia abia dae, ena rege ia kwalimu” bona Brazil, Europe, Japan, Russia, bona United States dekenai idia ura henia bada. Nega momo ena rege be idauidau momo lasi, unai ane idia herevalaia sibona, idia anelaia lasi, gaba toua bada bamona rege haida sibona idia karaia. To unai rap miusik regena idia ura henia bada dainai bisinesi badana ia vara. Japan kekenina ta ia gwau, “Lau mavaru neganai, lau moale bona egu mamina be gau ta ese lau ia koua lasi.”

7, 8. (a) Rap miusik be dahaka, bona dahaka dainai taunimanima momo ese idia ura henia? (b) Ena mauri lalonai rap miusik ia laloa bada tauna ena toana be dahaka?

⁸ Rap miusik ena hereva dainai idia ura henia​—nega momo unai be hereva mirodia bona memero kekeni edia hehuni herevadia. Ia be rock miusik ena hereva bamona lasi, nega momo rock miusik be memero kekeni edia turana karana ia herevalaia, to rap miusik be mai anina bada sivaraidia ia herevalaia. Rap miusik haida amo kara maoromaoro lasi karadia, idau bese dadaraia karadia, bona polisi edia dagedage karadia idia gwauraia hedinarai. To, nega haida, unai hereva be hereva dikadia momokani amo idia gwauraia. Rap miusik amo mauri ena kara goeva dabua, iduari namona, bona mahuta hebou karadia dekenai idia gwau-edeede henia. Unai dainai ita hoa lasi, taunimanima momo edia mauri lalonai rap miusik be gau badana. Unai miusik idia abia dae taudia edia toana be idia hereva neganai edia imadia idia hamareredia momo, memero kekeni edia hehuni herevadia idia gwauraia, bona piripou badadia idia karaia, edia sneaker tamaka edia varo idia kwatudia lasi, golo seini, baseball gadaralaia tauna ena kwara gauna, bona dina ena mata galasi idia karaia.

9, 10. (a) Memero kekeni be edena bamona idia diba rap miusik be “Lohiabada ia ura henia” eiava lasi? (b) Keristen memero kekeni haida be reana dahaka idia laloa bada lasi?

⁹ Efeso 5:​10 ai, Keristen taudia ese hahegani idia abia “Lohiabada ia ura henia karadia do [idia] tahua” noho totona. Rap miusik toana ia hedinarai vadaeni, to bema unai miusik oi abia dae oi laloa “Lohiabada ia ura henia”, a? Keristen mero o kekeni ese tanobada taudia momo danu idia dadaraia mauri dalana do ia tohotohoa be ia namo, a? Idia karaia rap concert ena sivarai ia torea tauna ta ia gwau: “Rap ane idia abia taudia idauidau be idia helulu heheni, edia ane hereva amo daika be hereva dikadia bona sihari kava karadia gwauraia hedinarai momokani karana dekenai do idia uini totona. . . . Taunimanima vairanai memero bona kekeni be edia mavaru dekena amo mahuta hebou karana idia haheitalaia.” Unai concert biaguna ta be idia gadara grup ta ia herevalaia, ia gwau: “Kahirakahira edia hereva iboudiai be (miro herea).”

¹⁰ To, unai hanuaboi dekenai idia gadaralaia rap miusik ena dika be rap miusik ma haida edia dika ia hereaia lasi. Concert rumana ena biaguna ia gwau: “Unai idia karaia rap miusik bona sitoa amo memero kekeni idia hoia gaudia be idia tamona.” Madi, ia hedinarai unai concert dekenai idia lao memero kekeni 4,000 bamona amo haida be sibodia idia gwauraia Iehova ena Witness memero kekeni! Satana be “lauma dikadia edia biaguna” be reana idia laloa bada lasi. “Inai lauma [eiava, edia lalohadai ia biagua gauna] ese Dirava idia kamonai henia lasi taudia edia lalona dekenai harihari ia gaukara noho.” (Efeso 2:2) Bema rap miusik oi abia dae eiava emu mauri lalonai rap miusik karana oi tohotohoa, daika oi hesiai henia? Momokani, rap miusik haida edia hereva be dika bada lasi. To Keristen ena kara goeva ia hadikaia diba miusik ita ura henia be lalohadai kererena, ani?

Heavy Metal Miusik​—Sihari Kava, Dagedage, bona Satana Tomadiho Henia

¹¹ Taunimanima momo be heavy metal miusik idia ura henia. Heavy metal be rege bada hard rock miusik sibona lasi. The Journal of the American Medical Association magasin lalonai, ripoti ia gwau: “Heavy metal miusik . . . ena rege be ia bada bona rege tamona botaia loulou, bona ena hereva momo be inai: badu heheni, mata-bodaga, bona nega haida Satana tomadiho henia karadia.” Oibe, taunimanima momo idia ura henia bada rock miusik edia ladadia ese edia dika idia hahedinaraia. Unai ladana haida lalodiai hereva be “mase muramurana,” “ipidi,” bona “mase.” To, thrash metal, punk rock bamona, bona death metal (unai be heavy metal to “mase” herevana ia gwauraia) miusik edia dika be heavy metal miusik ena dika idia hanaia. Idia be heavy metal miusik amo idia vara. Unai band be “taunimanima ania karana” bona “edia mase gwauraia” herevadia idia gwauraia momo.

11, 12. Heavy metal miusik be dahaka, bona ena dika haida be dahaka?

¹² Taunimanima idia gwau heavy metal miusik ena siahu dainai memero kekeni be sibodia idia hamasea, idia lalo-metau, bona drag idia ania. Dagedage karana ia havaraia dainai, reidio dekenai ia hereva tauna ta ia gwau “unai miusik be namo emu tamana bona sinana oi alaia neganai.” To, tama sina momo​—polisi taudia danu​—idia gari badina unai miusik be Satana tomadiho henia karana ia gwauraia. Unai kara ia tahua tauna ta ia gwau Satana tomadiho henia karana idia tohoa memero kekeni haida be unai orea dekenai idia vareai dalana be heavy metal miusik idia kamonai henia.”

13. Heavy metal miusik abia dae ena dika be dahaka?

¹³ To, Keristen memero kekeni be ‘Satana ena koikoi idia diba vadaeni’ be namo. (2 Korinto 2:11) “Badina be iseda tuari be . . . lauma dikadia danu, guba dekenai idia noho.” (Efeso 6:12) Bema ita abia dae miusik dekena amo demoni be iseda mauri lalonai ita boiridia mai, unai be kavakava karana! (1 Korinto 10:​20, 21) To, Keristen memero kekeni haida be unai miusik idia ura henia bada. Idia haida be idia ura henia miusik idia kamonai henia totona idia koikoi. Kekeni ta ia gwau: “Nega haida, lau be hanuaboi ibounai lalonai heavy metal miusik lau kamonai henia. Heavy metal miusik idia kikilaia [fan] magasin lau hoidia bona egu tamana bona sinana amo lau hunidia totona tamaka ena kadibod mauana lalonai lau atodia. Lau diba Iehova ese lau ia moalelaia lasi.” Noga! magasin ena sivarai ta dainai ena lalona ia hamaoromaoroa. Unai miusik be memero kekeni hida ia do guidia noho?

Hadoa Gauna Hegeregerena Oi Gogoa

¹⁴ Unai miusik ese oi ia hakererea diba ena siahu oi gwauraia maragi lasi. Momokani, ane ta oi kamonai henia dainai, reana oi ura lasi taunimanima ta do oi alaia eiava oi ura lasi sihari kava karana oi karaia. To, Galatia 6:8 ia gwau: “Bema tauanina ena ura ia hadoa neganai ia be mase do ia abia.” Bema oi kamonai henia miusik be tanobada gauna, tauanina ena ura dikadia, bona demoni gauna, oi do ia hagoadaia diba lasi. (Iakobo 3:15 itaia danu.) Taunimanima idia gwau miusik ena profesa ta, Joseph Stuessy, ia gwau: “Herevana edena miusik ita kamonai henia, to ia ese iseda lalohadai, lalona, ura bona kara ia haidaua diba . . . Bema tau ta ia gwau, ‘Lau be heavy metal miusik lau kamonai henia diba to lau ia hakererea diba lasi,’ ia maoro lasi. Unai miusik be dala idauidau ai taunimanima ia hakereredia ena bada be idauidau.”

14, 15. Dahaka dainai ita gwau diba miusik dikadia kamonai henia karana be oi ia hagoadaia diba lasi? Haheitalai ta oi gwauraia.

¹⁵ Keristen merona ta ia gwau: “Lau be thrash metal miusik lau laloa bada dainai egu kara bona lalohadai toana idia idau momokani.” Daudau lasi murinai ia ese demoni dainai hekwakwanai ia davaria. Ia gwau: “Lauegu miusik kaset, compact disc, bona rekod lau negedia murinai demoni be lau idia rakatania.” Mero ma ta ia gwau: “Guna lau kamonai henia miusik be lauma dikadia, drug, eiava sihari kava sivaraidia idia kikilaia. Ena be memero kekeni momo idia gwau unai gaudia be siahu lasi idia dekenai, to idia be mai edia siahu. Kahirakahira lau idia veria hereva momokani dekena amo.” Aonega herevana ta ia gwau: “Tau ta ese lahi be ena kemena ai bema ia abia loaloa, ena dabua do ia araia lasi, a?”​—Hereva Lada-isidia 6:27.

Gima Noho

¹⁶ Paulo be Efeso Keristen taudia ia tore henidia, ia gwau: “Unai dainai, Lohiabada ena ladana dainai umui lau sisiba henia, harihari ia lao, Dirava diba lasi taudia bamona umui noho lasi. Idia edia laloa be anina lasi. Edia laloa be dibura. Dirava ena mauri be idia davaria diba lasi, badina be ia dekena amo edia laloa idia koua, bona iena dala idia diba lasi.” (Efeso 4:​17, 18) Unai hereva be ia momokani hari inai negai idia torea miusik, idia gadaralaia bona idia anelaia taudia momo dekenai, ani? Hari inai negai, miusik idauidau momo be “inai tanobada ena dirava,” Satana Diabolo, ena siahu idia hahedinaraia bada.​—2 Korinto 4:4.

17. Memero kekeni be edena bamona idia diba miusik be ia namo eiava ia dika?

¹⁷ Baibel be “nega dokodia” ia perovetalaia neganai, ia gwau: “Kara dika taudia bona koikoi taudia ese edia kara dika bona edia koikoi do idia habadaia.” (2 Timoteo 3:​1, 13) Hari, oi gima noho miusik namodia sibona oi abia hidi totona be gau badana. Nega momo, unai miusik ena ladana dainai oi diba ia be namo lasi. Iobu 12:11 ia henanadai inai bamona: “Taiana dekenai hereva ena mamina ita abia, uduna dekenai aniani ena mamina ita abia hegeregerena, ani?” Unai hegeregerena, miusik do oi tohoa, sisina oi kamonai henia ia namo eiava ia dika oi tahua totona. Unai miusik regena ena mamina oiemu kudouna dekenai be dahaka. Tauanina ena ura dikana ia havaraia​—lebulebu urana ia havaraia, a? (Galatia 5:​19-21) Ane ena hereva be edena bamona? Ia be sihari kava karana, drag ania, eiava ‘hemarai kara karadia’ idia herevalaidia, a? (Efeso 5:12) Baibel ia gwau Dirava ena taunimanima huanai unai bamona karadia do idia “herevalaia lasi”, unai dainai ane amo unai gaudia ita herevalaia loulou be namo lasi. (Efeso 5:3) Unai miusik ena kumia gauna dekenai laulau toana be edena bamona? Unai laulau ese lauma dikadia hereva henia karana eiava sihari kava urana ia hahedinaraia, a?

18. (a) Memero kekeni haida be reana idia abia dae miusik dekenai dahaka do idia karaia be namo? (b) Dahaka ese memero kekeni ia durudia miusik namodia idauidau idia ura henia totona?

¹⁸ Reana oi abia dae miusik haida oi dadaraia be namo. Bema oi abia vadaeni rekod, teipi, bona disc dekenai sihari kava karadia bona demoni sivaraidia idia gwauraia, namona be kara haraga oi negedia. (Kara 19:19 itaia danu.) Ita gwau lasi miusik oi moalelaia diba lasi; taunimanima momo idia ura henia miusik haida be idia dika lasi. Hari, memero kekeni haida be miusik idauidau idia moalelaia, hegeregere classical, folk, light jazz, bona ma haida. Kingdom Melodies kaset teipidia be memero kekeni momo edia lalona idia veria orchestral miusik idia moalelaia totona.

19. Dahaka dainai miusik sibona laloa bada karana be namo lasi?

¹⁹ Miusik be harihari gauna Dirava ena amo. To, taunimanima momo be idia laloa kerere bona bada dainai dika idia davaria. Idia be idau negai Israel taudia bamona, idia moalelaia gaudia be “gitara maragidia bona badadia, tareko bona ivilikou, . . . to Iehova ena gaukara idia laloa lasi.” (Isaia 5:12) Emu lalona oi hadaia miusik oi laloa sisina totona bona Iehova ena gaukara oi laloa bada totona. Naria namonamo, miusik namodia sibona oi abia hidi. Unai neganai Dirava ia henia harihari gauna, miusik, do oi gaukaralaia kerere lasi, to oi gaukaralaia namonamo diba.

[Footnotes]

Inai Oi Laloatao, A?

◻ Dahaka dainai ita gwau diba miusik be harihari gauna Dirava amo?

◻ Idaunegai, miusik be edena bamona idia hadikaia?

◻ Keristen memero kekeni dekenai rap bona heavy metal miusik edia dika be dahaka?

◻ Keristen memero kekeni be dahaka idia karaia diba miusik namodia sibona idia abia hidi totona?

2. Baibel torea negana lalonai, miusik be edena dala amo idia gaukaralaia Iehova hanamoa totona?

5. (a) Memero kekeni momo be miusik idia laloa ena bada be dahaka? (b) Memero kekeni edia moale karadia dekenai Dirava ena lalohadai be dahaka?

16. Hari inai negai, miusik idia torea, idia gadaralaia bona idia anelaia taudia momo edia kara be dahaka?

[Picture on page 23]

Baibel torea negana lalonai, nega momo miusik idia gaukaralaia Iehova idia hanamoa totona