Tanobada Lalonai Ita Raka mai Eda Aonega Ida
“Murimuri taudia vairadiai do umui raka noho mai emui aonega ida.”—KOLOSE 4:5, NW.
KERISTEN taudia ginigunadia Roma basileiana hanuadia ai idia noho ese kaivakuku tomadiho henidia karadia, lebulebu karadia, bona tomadiho koikoi karadia idia itadia loulou. Kolose, Asia Maragina ena hanua ta, idia noholaia taudia ese Frugia taudia edia dirava hahinena tomadiho henia karadia bona edia meamea karadia, bona Helene taudia edia aonega herevadia, bona Iuda taudia edia tomadiho dalana be idia diba. Aposetolo Paulo ese Keristen kongregesen ia sisiba henia, unai “murimuri taudia” vairadiai ‘do idia raka noho mai edia aonega ida.’—Kolose 4:5, NW.
2. Dahaka dainai Iehova ena Witness taudia hari inai negai be murimuri taudia vairadiai do idia raka mai edia aonega ida be namo?
2 Hari inai negai, Iehova ena Witness taudia ese unai bamona karadia idia davaridia. Unai dainai idia danu be Keristen oreana momokanina murimurinai idia noho taudia vairadiai do idia kara mai edia aonega ida be namo. Tomadiho oreadia taudia, politikol oreadia taudia, bona niuspepa bona TV taudia momo ese idia inai henidia. Unai taudia haida ese dala idauidau amo Iehova ena Witness taudia edia ladana idia hadikaia toho, taunimanima ese do idia lalo-dika henidia totona. Taunimanima ese Keristen taudia ginigunadia na tomadiho oreana kavakavana bona dikana idia gwauraia; unai hegeregerena, hari inai negai Iehova ena Witness taudia idia lalo-dika henidia bona idia lalodia kerere.—Kara 24:14; 1 Petero 4:4.
Lalo-Dika Koua Dalana
3 Keristen taudia korikoridia idia diba tanobada ese do ia lalokau henidia lasi, badina be “Satani ese tanobada taudia ibounai ia gunalaia noho.” (1 Ioane 5:19) To, Baibel ese Keristen taudia ia hagoadadia, taunimanima ta ta do idia veridia Iehova dekenai bona ena tomadiho goevana dekenai. Inai ita karaia, iseda haroro gaukarana amo bona iseda kara namo amo danu. Aposetolo Petro ia gwau: “Dirava idia diba lasi taudia edia vairanai kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinanai.”—1 Petero 2:12.
3, 4. (a) Dahaka dainai tanobada ese Keristen taudia korikoridia do ia lalokau henidia lasi, to dahaka do ita karaia toho be namo? (b) Iehova ena Witness hahinedia Nazi dibura rumana ta ai idia koudia be buka torea hahinena ta ese edena bamona ia gwauraidia?
4 Iena buka ladana Forgive—But Do Not Forget lalonai Sylvia Salvesen ese Witness hahinedia, ia ida Nazi dibura rumana ta ai idia koudia hahinedia, ia gwauraidia, ia gwau: “Unai hahine ruaosi, Käthe bona Margarethe, bona ma momo danu, ese lau idia durua bada, edia abidadama amo sibona lasi, to dala idaudia ai danu. Dabua goevadia idia abidia emai toto kumidia totona . . . Emai namo idia tahua, bona edia lalo-namo be edia kara amo idia hahedinaraia.” “Murimuri taudia” ta ena hahenamo herevana namo hereana unai!
5, 6. (a) Hari inai negai Keriso ese dahaka gaukara ia karaia noho, bona dahaka do ita laloa boio lasi be namo? (b) Tanobada taudia be edena bamona do ita lalodia be namo, bona dahaka dainai?
5 Bema murimuri taudia ita kara henidia mai eda aonega ida, unai amo lalo-dika do ita koua diba. Momokani, hari inai negai iseda Pavapava, Keriso Iesu, ese bese idauidau taudia ia hapararadia noho, “mamoe naria tauna ese mamoe bona nanigosi ia hapararaia bamona.” (Mataio 25:32) To oi laloaboio lasi Keriso be Kota Biaguna; ia ese ena lalona ia hadaia daidia be “mamoe” bona daidia be “nanigosi.”—Ioane 5:22.
6 Namona be unai ese iseda lalohadai Iehova ena orea murimurinai idia noho taudia ediai do ia hamaoromaoroa. Reana ita gwau idia be tanobada taudia, to “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Namona be taunimanima do ita lalodia mamoe ai do idia lao diba taudia, nanigosi do ita gwauraidia be dika. Hereva momokani be guna idia dadaraia mai edia dagedage ida taudia haida be Witness taudia hari. Bona idia momo be hebogahisi karadia ese edia lalodia idia anidia, haroro herevadia idia do abidia dae lasi neganai. Unai bamona karadia ta ena laulau be rau 18 ai oi itaia.
Ita Haroro Goadagoada, to Ita Doridia Lasi
7 Pope John Paul Iharuana ese Iehova ena Witness taudia bona tomadiho oreadia ma haida ia gwauraidia dika, ia gwau: “Taunimanima idia doridia bamona. Ruma ta ruma ta ai idia lao, eiava raka hanai taudia be dala daigunidia ai idia koudia, edia orea ai do idia havareaidia totona; aposetolo bona misinari taudia edia lalo-siahu idia tohotohoa koikoi unai.” To ita henanadai, bema eda kara amo ‘aposetolo bona misinari taudia edia lalo-siahu ita tohotohoa koikoi,’ daidia ese idia tohotohoa momokani? Katolik taudia, Protestan taudia eiava Otodoks taudia bogaragidiai haroro goadalaia lalohadaina korikorina be lasi.
8 To unai bamona samani herevadia hakoikoidia totona, namona be nega ibounai taunimanima do ita kara henidia mai eda hebogahisi bona mai eda hemataurai ida. Iakobo ia gwau: “Sedira umui ta be mai ena aonega bona mai ena diba. Bema tau ta be inai bamona neganai, namona be iena aonega do ia hamomokania iena mauri namona bona iena kara namodia dekena amo.” (Iakobo 3:13) Aposetolo Paulo ia gwau ‘do ita heai lasi’ be namo. (Tito 3:2) Anina be, ita haroro henia tauna ena tomadiho do ita gwauraia dika lasi, to ena lalohadai do ita tahua mai eda ura bona mai eda momokani ida. Bena Baibel ena sivarai namona do ita hamaorolaia. Bema ita goada karaia bona tomadiho idaudia taudia ita kara henidia mai eda hemataurai ida, unai amo ita durudia do idia kamonai totona, bena reana Baibel ena hereva ena namo do idia lalo-pararalaia. Reana unai dainai idia haida ese “Dirava do idia hanamoa.”—1 Petero 2:12.
9. (a) Paulo ena sisiba Kolose 4:5 ai be edena bamona do ita badinaia diba? (b) Iena sisiba Kolose 4:6 ai be edena bamona do ita badinaia diba?
9 Aposetolo Paulo ia gwau: “Murimuri taudia vairadiai do umui raka noho mai emui aonega ida. Nega namona do umui hoia, umui sibomui emui.” (Kolose 4:5, NW) J. B. Lightfoot ia gwau Paulo ena hereva gabena ena anina be inai: “Nega namona ta do umui reaia lasi, emui hereva bona emui kara amo Dirava ena gaukara do umui durua.” Oibe, namona be do ita hegaegae, nega namona ai do ita hereva bona do ita kara totona. Unai aonega ena anina ma ta be hora namodia ai ruma ta ruma ta ai do ita lao. Bema iseda hereva idia dadaraia, badina be idia laloa bada lasi dainai a, eiava badina be nega dikana ai ita ginidae dainai, a? Paulo be ma ia gwau: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kolose 4:6) Unai totona, namona be do ita laloa namonamo guna bona eda dekena taudia do ita lalokau henidia momokani. Namona be nega ibounai Basileia Sivaraina do ita gwauraia hedinarai mai eda gado namo ida.
Ita Matauraidia bona ‘Ita Naria Hegaegae Kara Namodia Ibounai Do Ita Karaia Totona’
10 Baibel ena hahegani ita negedia diba lasi. To, Keristen kara maoromaorona idia hadikaia lasi karadia ita heailaidia be anina lasi. Aposetolo Paulo ia gwau: “Oiemu [Keristen] taudia [Krete ai] do oi hadibaia lou, idia ese gavana bona gavamani ena siahu taudia do idia kamonai henia. Edia oda hereva do idia badinaia, bona do idia naria hegaegae kara namodia ibounai do idia karaia totona. Tau ta idia ese do idia gwauraia dika lasi, do idia heai lasi, to do idia manau. Nega ibounai taunimanima ibounai do idia kara manada henidia.” (Tito 3:1, 2) Baibel tahua namonamo tauna E. F. Scott ese unai siri inai bamona ia gwauraidia: “Keristen taudia ese siahu taudia do idia kamonai henidia sibona lasi, to do idia noho hegaegae danu, kara namodia iboudiai karadia totona. Inai . . . ena anina be, nega korikori ai Keristen taudia ese edia hanua taudia na heduru karadia ai do idia gunalaidia. Lahi, dai-hanai goreredia, hisihisi idauidau do idia vara loulou; unai negadiai taunimanima namodia iboudiai do idia ura edia dekena taudia do idia durudia.” Tanobada hegegemadai hisihisi badadia idia vara vadaeni bona Iehova ena Witness taudia ese heduru gaukarana idia gunalaia. Edia orea taudia mo sibodia lasi to murimuri taudia danu be idia ese idia durudia.
11, 12. (a) Keristen taudia ese siahu taudia edena bamona do idia kara henidia be namo? (b) Siahu taudia kamonai henidia anina be dahaka, Kingdom Hall haginidia negadiai?
11 Hari siri ese danu idia hahedinaraia gau badana be siahu taudia do ita matauraidia. Keristen taudia matamatadia tuari karadia amo idia gini siri dainai kota biagudia vairadiai idia hedinarai, be do idia naria namonamo be namo, murimuri taudia vairadiai do idia raka mai edia aonega ida totona. Edia toana, edia kara, bona unai siahu taudia idia hereva henidia dalana amo, idia ese Iehova ena orea taudia edia ladana idia hanamoa diba o idia hadikaia diba. Namona be ‘idia mataurai henia tauna dekenai do idia matauraia,’ bona sibodia edia kara ena badina do idia gwauraia hedinarai mai edia hemataurai bada ida.—Roma 13:1-7; 1 Petero 2:17; 3:15.
12 Kaunsolo taudia danu be “siahu taudia.” Kingdom Hall momo ita haginidia dainai, elda taudia be kaunsolo taudia ida idia herevahereva. Nega momo badu idia davaria. To bema kongregesen edia gwaukau taudia ese siahu taudia idia kara namo henidia bona kaunsolo ena hereva idia badinaia neganai, unai badu idia haorea diba. Nega momo haida idia haroro henidia namonamo diba, Iehova ena Witness taudia bona edia haroro herevana be guna idia diba momokani lasi taudia unai.
‘Bema mai Dalana, Iboudiai ida Do Ita Noho mai Eda Maino Ida’
13 Paulo ese Keristen taudia Roma ai idia noho ia sisiba henidia, ia gwau: “Tau ta do umui kara dika henia lasi, iena dika davana; to taunimanima iboudiai vairadiai kara namodia do umui karaia. Bema mai dalana, taunimanima iboudiai ida do umui noho mai emui maino ida. . . . Dika ena davana do umui karaia lasi; badu do ia noho; badina be ia torea vadaeni: ‘Iehova ia gwau, “Dika ena davana be egu imana ai, lau ese do lau karaia.” ’ To, ‘bema emu inai tauna ia hitolo, aniani do oi henia; bema ia ranu mase, ranu do oi henia; unai do oi karaia be lahi gidadia iena kwarana latanai do oi atodia.’ Dika ese oi do ia hadarerea lasi, to kara namo amo dika do oi hadarerea.”—Roma 12:17-21, NW.
13, 14. Paulo ese Keristen taudia Roma ai dahaka sisiba ia henidia, bona unai sisiba be edena bamona do ita badinaia diba, murimuri taudia do ita kara henidia negadiai?
14 Momokani, ita Keristen taudia korikoridia be haida ese idia inai henia. Unai siri amo Paulo ese ia hahedinaraia aonega dalana be edia badu be hebogahisi karadia amo do ita koua. Lahi gidadia bamona, reana unai hebogahisi karadia ese badu tauna ena badu do idia havevea ore, bona ena lalona do idia veria dainai Iehova ena orea taudia do ia lalo-namo henidia, bona sivarai namona do ia tahua matamaia reana. Unai do ia vara neganai, kara namo ese dika do ia hadarerea.
15 Bema ta ena adavana be hereva momokani ia do abia dae lasi neganai, ia be murimuri taudia vairadiai ia raka mai ena aonega ida be mai anina bada. Baibel ena hahegani idia badinadia taudia iboudiai, tatau, hahine, tama, sina, bona natu danu, ese unai amo edia kara idia hanamoa, bona unai natu be idia kamonai namonamo bona sikuli ai diba idia tahua goadagoada. Namona be murimuri tauna ese Baibel ena hahegani edia anina namona kamonai tauna enai be ia itaia diba. Inai dala amo reana haida do idia helalo-kerehai, edia ruma bese taudia, Keristen taudia, edia kara dainai.—1 Petero 3:1, 2.
“Taunimanima Ibounai Dekenai Kara Namodia Do Ita Karaia”
16 Iseda dekena tauna do ita kara namo henia bada dalana be mauri sivaraina do ita abia lao ia dekenai bona ia be Iesu Keriso ena amo Iehova ida do idia herohemaino dalana do ita hadibalaia. (Roma 5:8-11) Unai dainai aposetolo Paulo ia gwau: “Namona be Dirava do ita hanamoa, Iesu ena ladana dainai. Bona inai hanamoa Dirava do ita henia nega ibounai, boubou gauna bamona.” (Heberu 13:15) Paulo be ma ia gwau: “Kara namodia do umui laloaboio lasi, bona kohu lasi taudia danu umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.” (Heberu 13:16) Namona be do ita haroro sibona lasi, to “kara namodia” do ita lalodia boio lasi danu be namo. Idia be iseda boubou gaudia haida, Dirava ese ia moalelaidia bada gaudia.
16, 17. (a) Dirava ese dahaka boubou gaudia ia moalelaidia bada? (b) Iseda ekalesia taudia bona murimuri taudia danu edena bamona do ita kara namo henidia be namo?
17 Iseda kara korikori be iseda ekalesia taudia ita kara namo henidia; reana edia lalodia idia metau, o idia gorere, o lauma dalanai o tauanina dalanai idia dabu. Paulo ese unai ia hahedinaraia, ia gwau: “Dala ita davaria neganai, taunimanima ibounai dekenai kara namodia do ita karaia. To Keriso idia abidadama henia taudia do ita durua bada herea be namo.” (Galatia 6:10; Iakobo 2:15, 16) To inai hereva, “Taunimanima ibounai dekenai kara namodia do ita karaia,” be do ita laloaboio lasi be namo. Hebogahisi karana ta, eda varavara ta dekenai o eda dekena tauna dekenai o eda gaukara hebou tauna ta dekenai ita karaia, ese ena lalo-dika ita edai do ia haorea diba, bona ena lalona do ia kehoa diba, hereva momokani do ia abia dae totona.
18 Unai do ita karaia totona, murimuri taudia do ita tura henidia momokani be badina lasi. Unai bamona heturana ese ita ia hadikaia diba. (1 Korinto 15:33) Bona tanobada tura henia dalana ita tahua lasi. (Iakobo 4:4) To eda Keristen kara namodia ese eda haroro gaukarana idia durua diba. Tano haida ai taunimanima na edia ruma ai hereva henidia be auka. Ruma haida be mai edia sekuriti gaudia dainai ruma taudia ita hereva henidia diba lasi. Tano haida ai telefon amo ita haroro diba. Tano momo ai dala ai ita haroro diba. To, tano iboudiai, bema taunimanima ita gado namo henidia, bona ita kara henidia mai eda hebogahisi ida, bona ita durudia, unai ese dala ia kehoa, edia lalo-dika ita edai do ita haorea bona do ita haroro henidia namonamo totona.
Eda Inai Taudia Edia Hereva Ita Koua
19 Iehova ena Witness taudia be taunimanima hamoaledia taudia lasi bona taunimanima gari henidia taudia lasi. (Hereva Lada-isidia 29:25; Efeso 6:6) Idia diba ena be takisi monidia idia henia bona idia noho namonamo, to edia inai taudia ese do idia koikoilaidia bona do idia gwauraidia dika. (1 Petero 3:16) Unai idia diba dainai, Daniel idia tohotohoa toho; iena inai taudia idia gwau: “Inai Daniel samania badina ta do ita davaria lasi, to reana ena Dirava ena taravatu dainai ta do ita davaria.” (Daniel 6:5) Baibel ena hahegani do ita utudia lasi taunimanima hamoaledia totona, to ita do idia dagedage henia dalana be ita tahua lasi. Dala ita tahua, ita be mai eda maino ida do ita noho bona aposetolo ena sisiba do ita badinaia; ia gwau: “Dirava ia ura be emui kara namo dekena amo kavakava taudia edia hereva kava do umui koua.”—1 Petero 2:15.
20. (a) Dahaka ita diba momokani, bona Iesu ese ita edena bamona ia hagoadaia? (b) Murimuri taudia vairadiai edena bamona do ita raka noho diba mai eda aonega ida?
20 Ita diba momokani tanobada amo ita gini tabe be Baibel ena hereva hegeregerena. Keristen taudia aposetolo edia negai idia noho edia sivarai ese eda lalohadai ia hamomokania. Iesu ena hereva ese ita idia hagoadaia; ia gwau: “Tanobada dekenai umui be hisihisi do umui abia. To, do umui goada noho, badina be lau ese tanobada lau halusia vadaeni.” (Ioane 16:33) Ita gari lasi. “Bema kara namodia umui karaia noho mai goada danu, daika ese umui do ia hadikaia diba? Ta lasi, ani? To, bema kara maoromaoro umui karaia, bona unai dainai hisihisi umui abia neganai, vadaeni do umui moale, badina Dirava ena hanamoa do umui abia. Tau ta do umui gari henia lasi, bona do umui laloa hekwarahi lasi. To emui kudouna dekenai Keriso do umui abia dae, ia tamona do umui matauraia, emui Lohiabada. Bema haida ese emui abidadama bona lalona namo totona umui idia nanadaia neganai, nega ibounai do umui naria hegaegae idia do umui haere henia totona. To mai hemataurai bona manau danu do umui haere.” (1 Petero 3:13-15) Inai bamona do ita karaia neganai, murimuri taudia vairadiai do ita raka noho mai eda aonega ida.
Riviu
◻ Dahaka dainai Iehova ena Witness taudia be murimuri taudia vairadiai idia raka mai edia aonega ida be namo?
◻ Dahaka dainai Keristen taudia korikoridia idia diba tanobada ese do ia lalokau henidia lasi, to dahaka do idia karaia toho be namo?
◻ Tanobada taudia be edena bamona do ita lalodia be namo, bona dahaka dainai?
◻ Dahaka dainai iseda ekalesia taudia bona murimuri taudia danu do ita kara namo henidia be namo?
◻ Bema murimuri taudia vairadiai ita raka mai eda aonega ida, unai ese ita edena bamona ia durua iseda haroro gaukarana ai?
1. Keristen taudia ginigunadia ese dahaka dahaka idia itadia, bona Paulo ese kongregesen Kolose ai edena bamona ia sisiba henia?
7. Pope be edena bamona ia gwaugwau, bona ita be edena bamona ita henanadai?
8. Eda ruma ta ruma ta lao henia gaukarana be edena bamona do ita karaia be namo, bona unai dainai dahaka do ia vara reana?
10. (a) Aposetolo Paulo ese Keristen taudia Krete ai idia noho edena bamona ia sisiba henidia? (b) Iehova ena Witness taudia ese Paulo ena sisiba edena bamona idia badinaia namonamo?
15. Edena negai Keristen taudia do idia naria namonamo momokani be namo, murimuri taudia vairadiai do idia raka mai edia aonega ida totona?
18. (a) Dahaka dika amo do ita siri be namo? (b) Iseda Keristen kara namodia be edena bamona ita gaukaralaidia diba iseda haroro gaukarana durua totona?
19. (a) Taunimanima hamoaledia dalana ita tahua lasi dainai, ita diba dahaka do ia vara? (b) Daniel ena kara be edena bamona do ita tohotohoa toho bona Petro ena sisiba be edena bamona do ita badinaia toho be namo?
[Picture on page 18]
Lauri kahanai: Keristen taudia France ai ese edia dekena taudia idia durudia, abata ta ia ore murinai
[Picture on page 20]
Keristen hebogahisi karadia ese lalo-dika idia haorea diba
[Picture on page 23]
Namona be Keristen taudia “do idia noho hegaegae kara namodia ibounai do idia karaia totona”