Gima Kohorona Bona Noga!—Hereva Momokani Idia Gwauraia Gaudia

“Iehova e, hereva momokani Diravana e, lau oi hamauria vadaeni.”​—SALAMO 31:5.

1, 2. (a) Taihu ta ese Gima Kohorona lalonai ia duahia herevana ta edena bamona ia laloa? (b) Eda magasin be edena bamona ita henanadailaidia?

KERISTEN hahinena ta ese revareva ia torea, ia gwau: “Tanikiu bada herea, Gima Kohorona ena hereva ladana ‘Lalohisihisi Neganai Heduru Oi Davaria Diba’ dainai.a Umui gwauraidia gaudia momo be egu lalona ena mamina hegeregerena; toana be unai hereva be lau umui tore henia. Lau duahia neganai lau tai. Lau moale bada, badina be umui be egu lalona ena mamina umui diba! Dirava lau tanikiu henia bada, badina be lau be Iehova ena Witness taudia ta. Mauri hanaihanai Paradaiso lalonai gwauhamatana bona eda lalona hagoadaia herevadia ita davaridia gabuna tamona be inai! Tanikiu bada herea.”

² Nega ta emu lalona ena mamina be unai bamona a? Nega ta oi laloa Gima Kohorona eiava Noga! edia hereva ta be idia torea oi sibomu emu a? Dahaka dainai taunimanima ese eda magasin idia ura henidia? Ma haida be edena bamona do ita durudia diba, edia hahemauri herevadia amo namo do idia abia totona?​—1 Timoteo 4:16.

Hereva Momokani Idia Gwauraia

³ Iehova be “hereva momokani Diravana.” (Salamo 31:5) Iena Hereva, Baibel, be hereva momokani bukana. (Ioane 17:17) Lalo-momokani taudia ese hereva momokani idia kamonai henia. (Ioane 4:​23, 24 itaia.) Gima Kohorona bona Noga! idia duahidia taudia milion milion ese idia lalodia bada, badina be idia be kara maoromaoro bona hereva momokani bukadia. Momokani, tau ta ese Baibel ena hereva momokani ia badinaia dainai, Gima Kohorona ia halasia matamaia.

4, 5. (a) Dahaka ia vara dainai C. T. Russell ese Gima Kohorona ia halasia? (b) “Hesiai tauna mai ena kamonai bona mai ena kara maoromaoro” ese Gima Kohorona edena bamona ia gaukaralaia?

⁴ Lagani 1876 ai, Charles T. Russell be Nelson H. Barbour ida idia gaukara hebou matamaia. Russell ese Barbour moni ia henia, iena tomadiho magasin Herald of the Morning printaia gaukarana hamatamaia lou totona. Barbour be edita badana bona Russell ese ia durua. To lagani ta mai kahana murinai, Barbour ese August 1878 ena Herald lalonai hereva ta ia torea, Keriso ena mase ena hahemauri siahuna herevana ia gorea. Unai dainai, Herald gabena lalonai Russell ese unai hahemauri herevana hamomokania herevana ta ia torea, ia gwau unai hereva be Buka Helaga “ena hahediba herevadia bada hereadia ta.” (Mataio 20:28) Russell ese Baibel ena hereva amo Barbour ena lalohadai ia hamaoromaoroa toho loulou, bena ena lalona ia hadaia Herald do ia rakatania vaitani. June 1879 amo ena ladana be unai magasin lalonai ia hedinarai lou lasi. Bena hua ta murinai, hari tau matamatana ese Zion’s Watch Tower and Herald of Christ’s Presence ia halasia matamaia. (Hari unai magasin ena ladana Motu gado ai be Gima Kohorona Iehova Ena Basileia Ia Harorolaia.) Matamana amo hari magasin ese Baibel ena hereva ia hamomokanidia.

⁵ Idia hanai laganidia 114 lalodiai, Gima Kohorona, diba momo loeana ta bamona, ese Baibel ena hahediba herevadia ia hamomokanidia. Unai bamona ia karaia noho dainai, duahia taudia milion milion ese ena hereva idia abia dae bona idia laloa bada. Iesu ena mase ena hahemauri siahuna herevana ia hamomokania noho. (June 15, 1992 gauna itaia.) Bona “hesiai tauna mai ena kamonai bona mai ena kara maoromaoro” bona ena Hakaua Oreana ese idia gaukaralaia noho, Iehova ena Basileia harorolaia bona lauma anianina be nega korikori ai hariharilaia totona.​—Mataio 24:​14, 45.

6, 7. Golden Age idia halasia taudia idia gwau edia lalohadai be dahaka, bona dahaka ese ia hahedinaraia lalo-parara taudia ese ena hereva idia abia dae?

⁶ Noga! magasin be edena bamona? Idia halasia matamaia negana amo, ia danu ese hereva momokani ia gwauraia. Matamana ai ena ladana idia hatoa The Golden Age, bona edia lalohadai be taunimanima do idia hariharilai henidia. Ginigunana, October 1, 1919 gauna, lalonai idia gwau: “Idia karaia, hari inai negai idia vara gaudia badadia edia anina be Dirava ena aonega ena diari ai do idia gwauraidia hedinarai, bona lalo-parara taudia vairadiai do idia hamomokania vaitani taunimanima hanamodia bada negana be ia kahirakahira.” Lalo-parara taudia ese The Golden Age ena hereva idia abia dae. Lagani haida lalodiai, ena momo ese Gima Kohorona ena momo ia hanaia.b

⁷ Taunimanima ese Gima Kohorona bona Noga! idia ura henidia, badina be Baibel ena hereva momokanidia bona peroveta herevadia edia anina be tanobada ai idia momokani daladia idia gwauraidia hedinarai. To unai sibona lasi; idia hanai laganidia 15 bamona lalodiai idia ura henidia, gau ma ta dainai danu.

Taunimanima Edia Noho Idia Hanamoa

⁸ Iesu Keriso ia mase bona ia toreisi lou, bena lagani 30 bamona idia ore murinai, Baibel torea tauna Iuda ia laloa momo, badina be lebulebu taudia be Keristen oreana lalonai idia rau vareai hehuni vadaeni dainai. Ena be ia ese hahemauri herevana be Keristen taudia ia tore henidia gwauraia guna, to lauma helaga ese ia hadibaia hegeregerena, ia laloa namona be do ia sisiba henidia, unai lebulebu taudia edia lalo-ani dikana do idia dadaraia. (Iuda 3, 4, 19-23) Vadaeni, Iuda ese nega korikorina ai ena Keristen tadikaka ia sisiba henidia; unai amo ia durudia momokani.

9. Iseda magasin edia hereva idia hegaegaelaidia negadiai, dahaka idia laloa?

⁹ Unai hegeregerena, iseda magasin edia hereva hegaegaelaidia gaukarana be mai hekwarahina. Hari inai nega be ia idau, bona taunimanima idia abia be namo heduruna bona edia ura gaudia danu idia idau, lagani 15 bamona idia lao vadaeni neganai bamona lasi. Vanegai, distrik naria tauna ta ia gwau: “Lagani 1960 vairanai lau be Witness tauna ai lau lao neganai, ai ese Baibel stadi amo Baibel ena hahediba herevadia taunimanima ai hadibalaidia momo. . . . To hari, hekwakwanai bona hekwarahi momo be taunimanima edia mauri lalodiai idia vara dainai, ai ese noho dalana maorona ai hadibalaidia be namo.”

10. Dahaka dainai lagani 1914 amo ema bona hari taunimanima edia noho ia dika ia lao be ita hoalaia lasi be namo?

¹⁰ Baibel ese ‘nega dokona’ ia perovetalaia, ia gwau: “Kara dika taudia bona koikoi taudia ese edia kara dika bona edia koikoi do idia habadaia.” (2 Timoteo 3:​1, 13) Unai dainai, dokona negana be lagani 1914 lalonai ia matamaia negana amo taunimanima edia noho be ia dika ia lao be ita hoalaia lasi be namo. Satana ena nega be kwadogi herea dainai, ena badu be taunimanima latadiai ia halasia badabada. (Apokalupo 12:​9, 12) Unai dainai taunimanima ese kara maoromaoro bona famili naridia karadia bona tomadiho idia lalodia lasi, lagani 30 o 40 idia lao vadaeni neganai idia lalodia hegeregerena. Raskol karadia be momo dainai, sekiuriti daladia, unai nega gunana lalonai idia lalodia lasi daladia, be idia tahudia noho.​—Mataio 24:12.

11. (a) Taunimanima ese dahaka dahaka idia lalodia momo, bona unai dainai “hesiai tauna mai ena kamonai bona mai ena kara maoromaoro” oreana ese dahaka idia karaia? (b) Unai hereva ta ese emu noho ia hanamoa sivaraina mani oi gwauraia.

¹¹ Unai dainai taunimanima momo ese lalo-metau, edia noho hebou karadia, bona famili karadia be idia lalodia hanaihanai. Unai dainai hesiai tauna mai ena kamonai bona mai ena kara maoromaoro oreana ese sisiba herevadia namodia, taunimanima durudia momokani bona edia noho hanamoa herevadia, be Gima Kohorona bona Noga! lalodiai idia halasidia. Mani idia haida oi lalodia.

12. (a) Dahaka dainai mai edia natudia to mai edia adavadia lasi taudia herevadia be lagani 1980 ai idia hegaegaelaidia? (b) Taihu ta ese edena bamona ia hahedinaraia unai hereva ia moalelaidia bada?

¹² Famili karadia. Ripoti tanobada hegegemadai amo ese idia hahedinaraia tatau bona hahine, mai edia natudia to mai edia adavadia lasi taudia, idia momo daekau haraga; unai dainai unai bamona taudia sisiba henidia herevadia idia hegaegaelaidia, The Watchtower, September 15, 1980 gauna, ena. Edia ura be (1) unai taudia do idia durudia, edia hekwakwanai idau hereadia do idia kwalimulaidia totona, bona (2) taunimanima ma haida do idia hadibadia, unai bamona taudia do idia bogadia hisi bona do idia naridia namonamo totona. (1 Petero 3:8; Iakobo 1:27) Duahia taudia momo ese revareva idia toredia, idia gwau unai hereva idia moalelaidia bada. Hahine ta ia gwau: “Magasin ena vairana lau itaia neganai lau tai, bena lau kehoa bona ena hereva lau duahia neganai, egu lalona ai Iehova lau tanikiu henia bada, unai hereva be nega korikorina ai ia halasia dainai.”

13. Lagani 1981 ai, Awake! lalonai, lalo-metau be edena bamona idia herevalaia goevagoeva, bona duahia hahinena ta ese edena bamona ia herevalaia?

¹³ Lalo-metau. Lagani 1960 amo lalo-metau be Watchtower bona Awake! lalodiai idia gwauraia. (1 Tesalonika 5:14) To September 8, 1981 ena Awake! lalonai, lalo-metau haorea dalana be dala matamatana ai idia herevalaia. Nega daudau lasi hahenamo revarevadia momo be tanobada hegegemadai amo idia siaidia Watch Tower Society dekenai. Taihu ta ia gwau: “Egu lalona ena mamina be pepa ai edena bamona do lau hahedinaraia diba? Egu lagani be 24, bona lagani 10 lalodiai egu lalona be nega momo ia metau loulou. To hari lau ese mamina lau abia, lau be Iehova kahirakahira momokani lau noho, bona ia lau tanikiu henia, inai lalokau herevadia amo lalo-metau taudia ia durudia dainai.”

14, 15. (a) Eda magasin lalodiai, memero kekeni hadikadia karadia be edena bamona idia gwauraidia? (b) Edena hereva magasin lalonai ese hosi-gui tauna ta Australia ai ia hahoaia?

¹⁴ Noho hebou karadia. Baibel ia gwau “nega dokonai” taunimanima “ese idia edia ura sibona do idia tahua, . . . lalokau do idia diba lasi, . . . do idia lebulebu, do idia dagedage, kara namodia do idia ura henia lasi.” (2 Timoteo 3:​1-3) Unai dainai, hari inai negai memero kekeni momo be matabodaga karadia amo idia hadikadia be hoa gauna lasi. October 1, 1983 ena Watchtower lalonai unai kara idia herevalaia hedinarai. Lagani 8 idia ore murinai, October 8, 1991 ena Awake! ena hereva idia hegaegaelaidia namonamo, hebogahisi bona helaro be unai bamona idia hadikadia taudia henidia totona bona taunimanima ma haida edia lalodia hadiaridia totona, idia ese do idia durudia diba totona. Unai hereva dainai duahia taudia momo herea ese Society idia tore henia. Ta ia gwau: “Lalo hagoadaia herevadia bona Baibel siridia unai hereva lalodiai idia gwauraidia ese egu lalona idia hanamoa lou. Badina be hari lau diba Iehova ese lau ia dadaraia lasi, bona lau mo sibogu lasi to ma haida danu be inai dika ai davaria vadaeni.”

¹⁵ Hosi-gui tauna ta Melbourne, Australia ai ese Watch Tower Society ena opesi Sydney ai be telefon amo ia hereva henia, ia gwau hosi haheaudia helulu oreadia edia kara dikadia ia badulaidia. Ma ia gwau March 8 Awake! magasin ena hereva “Rape​—A Woman’s Nightmare” (Reipi​—Hahine Idia Garilaia Bada Karana) ia duahia neganai magasin ena namo ia hoalaia. Miniti 30 lalodiai ia henanadai loulou bona idia henia haeredia ia moalelaidia bada.

16. Edena bamona do oi hahedinaraia diba eda magasin oi lalodia bada?

¹⁶ Oi be edena bamona? Gima Kohorona eiava Noga! ena hereva ta ese emu noho ia haidaua a? Bema unai bamona, eda magasin dainai Dirava oi tanikiu henia bada. Edena bamona do oi hahedinaraia diba oi lalodia bada? Namona be magasin ta ta iboudiai do oi duahidia bona do oi hariharilaidia badabada danu. Hariharilaidia gaukarana be edena bamona do ita habadaia diba?

Hariharilaidia!

¹⁷ Kongregesen iboudiai ese do idia karaia diba karadia be October 1952 ena Informant (Iseda Basileia Gaukara) ese ia gwauraidia, ia gwau: “Magasin hariharilaidia daladia namo hereadia be ruma ta ruma ta ai bona sitoa ta sitoa ta ai. Unai dainai Society ia gwau namona be Magasin Dinadia ai unai dala ai do ita hariharilaidia loulou.” Unai sisiba be do mai anina. Kongregesen ese pura ena dina ta be Magasin Dinana do idia gwauraia diba, unai dina ai magasin amo do idia haroro. Kongregesen momo ai, Saturday be dina namona. Oibe, namona be kongregesen ta ta ese dina haida o adorahi haida do idia gwauraidia hidi, magasin be ruma ta ruma ta ai, sitoa ta sitoa ta ai, bona dala ai do idia hariharilaidia, bona ura taudia dekediai do idia laohaidia loulou. Bona oi, Basileia harorolaia tauna e, edena bamona do oi heduru diba?

18, 19. (a) Bema magasin oi lalohadailaidia guna, unai ese oi edena bamona do ia durua do oi hariharilaidia totona? (b) Magasin oi hahedinaraidia negadiai, hereva haragadia bona kwadogidia amo oi herevalaidia ena namo be dahaka? (c) Dahaka ese ia hahedinaraia magasin be taunimanima edia ruma lalodiai ita havareaidia be namo?

¹⁸ “Gima Kohorona” bona “Noga!” oi lalohadailaidia guna. Oi duahidia guna. Hereva ta oi duahia neganai, oi be sibona oi henanadai, oi gwau, ‘Inai hereva be daika ese do ia ura henia?’ Hereva haida oi lalodia, idia amo ta do oi veria do ia ura henia totona. Magasin Dinana ai oi heduru, bona magasin haida oi abidia loaloa, bena do oi hariharilaidia diba, do oi laolao negadiai o sitoa do oi lao negadiai, bona oi ida idia gaukara taudia, o emu dekena taudia, o oi ida umui sikuli hebou taudia, o emu tisi taudia, do oi hereva henidia negadiai.

¹⁹ Hereva haragadia gwauraidia. December 1, 1956 ena Watchtower ia gwau: “Magasin be taunimanima oi henidia toho negadiai, oi hereva daudau lasi be namo. Magasin momo do oi hariharilaidia be namo. Idia sibodia do idia ‘hereva.’ ” Pablisa haida idia kwalimu, badina be lalohadai ta be magasin amo idia abia hidi, hereva momo lasi amo idia gwauraia, bena magasin idia hahedinaraidia. Ta ese magasin be ena ruma lalonai ia abidia vareai murinai, reana idia ese ruma taudia ma haida danu do idia “hereva” henidia. Ireland ai, iunivesiti haneulatona ta ese September 1, 1991 ena Gima Kohorona, ena tamana ese Witness ta ena amo ia abia dae gauna, ia duahia neganai, hereva heheni daladia herevadia bona hereva ma haida ese ena ura idia havaraia. Ia duahia murinai, maoromaoro Witness taudia ia rini henidia. Nega daudau lasi Baibel stadi idia hamatamaia, bena July 1993 lalonai ia be bapatiso ia abia, “Dirava Ena Hahediba” Distrik Hebouhebouna ai. Namona be magasin be ruma lalodiai do ita havareaidia, bena unuseniai idia ese taunimanima do idia “hereva” henidia diba! Sekit naria tauna ta ena sisiba herevana be inai: “Magasin be emu baege lalona amo oi kokidia.” Momokani, ena be emu hereva ese ruma tauna do ia ha-uraia lasi, to magasin edia vairadia ai idia noho laulaudia ese reana.

20, 21. (a) Edena bamona oi hegaegae bena oi karaia be namo? (b) Magasin momo hariharilaidia totona, oi be dahaka do oi karaia be namo?

²⁰ Oi hegaegae, hereva idauidau herevalaidia totona. (1 Korinto 9:​19-23 itaia.) Hereva kwadogidia haida oi hegaegaelaidia. Magasin ena hereva ta oi abia hidi, ia amo tatau edia lalodia veridia totona, ma ta be hahine edia lalodia veridia totona. “Matamata Taudia Idia Henanadai” herevana ta be memero kekeni oi haheitalaidia be namo reana. Magasin Dinana ai sibona lasi, to reana adorahi ai danu magasin be ruma ta ruma ta ai do oi hariharilaidia be namo.

²¹ Oi laloa guna hida do oi hariharilaidia toho. April 1984 ena Iseda Basileia Gaukara pepana lalonai be hereva ta ladana “Magasin ese Mauri Lao Henia Dalana Idia Hahedinaraia.” Ia gwau: “Pablisa ese magasin 10 hua ta ta lalodiai hariharilaidia dalana do idia tahua be namo reana; pioneer taudia ese 90. Momokani, pablisa haida ese unai namba do idia hanaia diba, unai dainai atai nambana ta do idia laloa. To ma haida be idia gorere o edia teritori ia auka o gau ta ese ia koudia, unai dainai henu nambana ta do idia laloa bena do idia tahua. To Iehova vairanai edia gaukara be hegeregere. (Mat. 13:23; Luka 21:​3, 4) Gau badana be ita ta ta be namba ta do ita laloa guna bena do ita tahua.”

22. Edena dala ai do ita hahedinaraia diba eda hereva momokani magasinidia dainai Iehova ita tanikiu henia?

²² Iehova, “Hereva Momokani Diravana,” ita tanikiu henia bada, badina be ia ese hesiai tauna mai ena kamonai bona mai ena kara maoromaoro oreana bona ena Hakaua Oreana ia hagaukaradia, hari magasin namodia be ita idia henia totona! (Salamo 31:5) Iehova do ia ura noho neganai, hari magasin ese taunimanima do idia durudia momokani noho. Iehova ena taravatu namodia bona ena hahediba herevadia maorodia do idia gwauraidia noho. Bona peroveta herevadia edia anina idia vara be do idia herevalaia noho, badina be unai ese ia hahedinaraia Dirava ena Basileia ia lohia noho bona Iehova tomadiho henidia taudia momokanidia momo herea ese iena ura tanobada ai idia karaia noho. (Mataio 6:10; Apokalupo 11:15) Gima Kohorona bona Noga! be gau namo hereadia. Dala do ita davaria negadia iboudiai, hari magasin mai edia anina bada be lalo-manau taudia do ita henidia be namo.

[Footnotes]

Emu Haere be Dahaka?

◻ Dahaka ese ia hahedinaraia Gima Kohorona bona Noga! be hereva momokani magasinidia?

◻ Gima Kohorona bona Noga! ese taunimanima edia noho edena bamona idia haidaudia?

◻ Edena dala ai kongregesen ese magasin momo do idia hariharilaidia?

◻ Dahaka sisiba herevadia ese oi idia durua diba, magasin momo do oi hariharilaidia totona?

3. Dahaka dainai Gima Kohorona bona Noga! idia duahidia taudia momo ese idia lalodia bada?

8. Dahaka dainai Iuda ese haida ia tore henidia, bona ia gwau kongregesen lalonai dahaka do idia dadaraia be namo?

17. Edena dala ai kongregesen ese magasin momo do idia hariharilaidia?

[Box on page 22]

Taunimanima Edia Mauri Idia Haidaudia Herevadia

Lagani haida lalodiai, Gima Kohorona bona Noga! idia duahidia taudia momo ese unai magasin edia hereva haida dainai edia tanikiu revarevadia idia toredia. Idia lalodia bada herevadia haida be henuai. Unai hereva o edia hereva idaudia ese emu noho idia haidaua vadaeni a?

Gima Kohorona

“Dirava ena Heduru Oi Abia Dae Emu Kerere Hehunidia Oi Halusia Totona” (December 1, 1985)

“Dirava Badinaia Karadia Tama Sina Burukadia Dekenai Karaia” (December 1, 1987)

“Mai Ena Badina Dainai Diba Abia” (November 1, 1992)

Noga!

“Natuna Ta Ia Mase Neganai” (Issue Number 1, 1988)

Lalo-Metau Oi Haorea Diba!” (Issue Number 2, 1988)

“Daidia ese Iseda Natudia Idia Naridia?” (Issue Number 3, 1988)

[Picture on page 23]

Canada ai​—ruma ta ruma ta ai idia haroro mai edia magasin

[Picture on page 24]

Myanmar ai​—mauri lao henia dalana idia hahedinaraia magasinidia ia henia