Iehova Ena Witness Taudia Tanobada Hegegemadai—Bahamas

BAHAMAS ena Komonwelt be motumotu badadia bona maragidia 3,000, Florida bona Cuba padadiai. Gabu ena lata be 900 kilomita. Taunimanima 267,000 ese unai motumotu idia noholaidia, bona unuseniai Basileia harorolaia taudia idia momo idia lao. Edia haroro gaukarana be Isaia 42:​10-12 ese ia gwauraia karana bamona: “Ane matamatana umui abia, Iehova ena; tanobada dokona amo ia umui hanamoa. . . . Motumotu danu, mai noholaidia taudia ida. . . . Ororo doridia amo do idia lolo. Idia ese Iehova do idia imodaia, bona motumotu ai hanamoa herevadia do idia gwaurai henidia.”

Abidadama Matamatana Idia Tohoa

July 1992 ai, regular pioneer ta ese buka ta ladana Mauri Hanaihanai Paradaiso Lalonai be bisinesi tauna ta ia henia. Ia duahia murinai, ia laloa, ‘Inai tomadiho do lau tahua be namo.’ Sunday gabedia rua ai, Iehova ena Witness taudia edia hebou ia lao henidia, Kingdom Hall rua ai. Unai murinai, ta ese Baibel stadi be ia ida idia hamatamaia. To, pura 6 murinai gau ta ese ena abidadama matamatana ia tohoa​—vara dinana moalelaia karana unai.

Iena famili be unai kara idia goadalaidia, to Dirava ena Hereva ura henia bada urana ese ia hagoadaia, ena Baibel stadi do ia karaia noho totona. Ena diba Baibel ena hereva dekenai ia bada ia lao neganai, ena diba vara dinana moalelaia karadia bona tanobada ena holide dekediai bona Iehova ena lalohadai idia dekediai danu be ia bada ia lao.

Ena adavana ese Tama ena Dina totona pati ia hegaegaelaia neganai, ia be mai ena hemataurai ida ia hamaoroa do ia vareai lasi. Hahine ia laloa ia lalokau henia noho lasi, bona ena tomadiho ia laloa bada to ia bona ena natuna ia lalodia maragi. Ia gado namo henia, ia hamaoroa Baibel amo ia dibadia herevadia ese idia durua noho, tau namona bona tama namona ai do ia lao totona. Gabeai, Baibel ena hereva momokani ia ura henia dalana be ena adavana ese ia lalo-pararalaia, bona hari ia be ena famili ida Baibel stadi idia karaia. Lagani gunana ai, “Dirava Ena Hahediba” Distrik Hebouhebouna ai ia moale bada, badina be ena adavana bona ena natuna ese ia idia itaia, bapatiso ia abia neganai!

Idau Bese Taudia ese Ane Matamatana Idia Kamonai

Haiti taudia hutuma be Bahamas ai idia noho. Idia danu be Basileia ena hereva momokani anena matamatana idia kamonai be namo. Witness taudia Bahamas ai idia moale, badina be Haiti-America taudia, tatau rua mai adavadia, idia mai dainai. Idia ese Haiti taudia edia grup matamatadia Grand Bahama bona Abaco motumotudia ai idia hagoadadia.

Bahamas ai, July 31 bona August 1, 1993 ai, distrik hebouhebouna ginigunana Creole gado ai idia karaia, Haiti taudia, Basileia ena sivarai idia ura henia taudia, durudia totona. Taunimanima 214 idia hebou bona toi ese bapatiso idia abia. Haiti taudia momo be hereva momokani Bahamas ai idia dibaia, bena sibodia edia motumotu idia lou henia eiava tano idaudia idia lao henidia, bona Witness taudia haida ida Iehova hanamolaia anena idia abia.

[Box on page 8]

TANO RIPOTINA

Hesiai Laganina 1993a

HARORO TAUDIA EDIA NAMBA BADANA: 1,294

WITNESS TAUNA TAMONA INAI NAMBA AI: 197

MEMORIAL AI IDIA HEBOU TAUDIA: 3,794

PIONEER TAUDIA EDIA AVERES: 186

BAIBEL STADI EDIA AVERES: 1,715

BAPATISO ABIA MATAMATA TAUDIA: 79

KONGREGESEN EDIA MOMO: 22

BRENS OPESI: NASSAU

[Footnotes]

[Picture on page 9]

Kingdom Hall ginigunana, bona brens opesi bona misinari rumana

[Picture on page 9]

Witness taudia ese sivarai namona idia harorolaia goadagoada

[Picture on page 9]

Milton G. Henschel bona Nathan H. Knorr, lagani 45 gunanai misinari taudia ida idia gini hebou, Nassau ai

[Picture on page 9]

Brens opesi matamatana, February 8, 1992 ai idia hahelagaia