Tanobada Namona—Do Ia Vara Diba, A?

BEMA oi ese Iran peroveta tauna, Zoroaster, ia harorolaia Mazda tomadiho oi abia dae, oi be tanobada do ia hairai lou ena nega oi naria noho. Bema oi be idaunegai Greece dekenai oi noho, reana oiemu ura be Mauri Namona Motumotudia dekenai do oi lao, eiava lagani 799 ia lao 700 B.C.E. ai, ane abia tauna Hesiod ia gwauraia Nega Namo Hereana do ia vara lou oi ura itaia. Guaraní Indian tauna ta South America dekenai be reana Dika Ia Vara Lasi Tanobadana ia do tahua noho. Hari inai negai oi noho dainai, reana oi laloa politikol lalohadai ta dainai eiava taunimanima ese tano, hodahoda, ranu, bona mauri gaudia edia noho hebou dalana idia laloa bada dainai, tanobada be do ia namo ia lao.

Nega Namo Hereana, Mauri Namona Motumotudia, Dika Ia Vara Lasi Tanobadana​—unai bamona ladana momo amo taunimanima ese edia ura idia hahedinaraia, idia ura tanobada namona.

Inai tanobada, iseda tanobada, be noho gabu namona lasi. Mai ena dagedage raskol karadia idia bada idia lao, ruma bese lalonai ta ta idia ala-ala heheni tuarina ia bada, bese idauna ta haorea vaitani karana, ma haida edia hisihisi laloa lasi karana, hisihisi, ogogami bona hitolo, moni gaukara lasi bona taunimanima idia gini goada hebou lasi, tano, hodahoda, ranu, bona mauri gaudia edia noho hebou karana dekenai hekwakwanai idia vara, bona taunimanima milion momo be idia hanamoa diba lasi gorere idauidau idia davaria​—idia vara noho dika gaudia idauidau be momo. Hari idia karaia noho tuaridia ia laloa neganai, nius ia torea Italy tauna ta ia gwau: “Taunimanima idia laloa iseda nega lalonai dagedage karana be ia bada herea momokani.” Idia vara gaudia dainai, oi laloa kara idauna, kara namona ita ura tahua be namo, a? Eiava Gabu Namo Hereana ta ita tahua be ura kava ta sibona, badina do ia vara diba lasi dainai, a? Ita noholaia tanobadana be tanobada namo hereana eiava?

Unai be lalohadai matamatadia lasi. Lagani handred momo lalodiai taunimanima idia ura tanobada dekenai noho hebou, kara maoromaoro, noho namo, bona lalokau idia noho. Nega ia hanai ia lao lalonai, aonega taudia haida ese tanobada do ia namo dalana idia gwauraia hedinarai. To, madi, havaraia dalana idia karaia diba lasi.

Lagani handred momo lalodiai taunimanima be Gabu Namo Hereana idia tahua, bona idia ura dikadika noho namo dalana idia davaria; unai kara amo dahaka ita diba?

[Picture on page 3]

Hari tanobada be tanobada namo hereana, a ?