Oi Laloa Baibel be Anina Bada Gauna, A?

LAGANI 200 bona ma haida gunanai, Mary Jones be Llanfihangel dekenai ia vara. Unai Wales hanua be Atlantic davarana kahirakahira ai ia noho. Iena tamana bona sinana be ogogami taudia bona turituri gaukara idia karaia. Idia ogogami dainai idia dekenai Baibel ta ia noho lasi. To edia natuna kekeni dekenai Baibel sivaraidia bona idia lalodia tao Baibel siridia idia hadibaia, bona unai amo ia ese Dirava ia lalokau henia bada. Nega momo Mary be edia dekena tauna ta ena Wales gado Baibel ia duahia, bona iena moni sisina ia gogoa hamatamaia, badina ia ura bada sibona ena Baibel ta do ia hoia.

Lagani 1800 ai, Mary ena lagani be 16 neganai, ia kamonai Bala taoni dekenai Wales gado Baibel haida idia hoihoilaidia, unai taoni ena daudau be kilomita 40. Ia gari lasi, to ia laloa unuseniai do ia raka lao. Unai ia karaia, bona tamaka lasi danu ororo ia raka hanaidia. To ia ginidae neganai unai Baibel iboudiai idia hoihoilaidia ore. Danu, Mary ia davaria ia gogoa monina be hegeregere lasi.

Unai hanua ena pasto tauna be ia itaia Mary ese Baibel ia ura henia bada bona Baibel ia diba momo, unai dainai pasto ena lalona ia marere. Mary ia hekwarahi bada to ena ura ia davaria lasi dainai ia tai neganai, unai pasto tauna ese ia hebogahisi henia bada bona sibona ena Baibel ia henia, bona ia hamaoroa, ia gwau: “Oi duahia namonamo, oi stadilaia namonamo, bona ena hereva helagadia oi lalodia tao badina idia be anina bada gaudia dainai, bona ena hahediba hereva hegeregeredia oi mauri.”

Gabeai, unai sivarai idia gwauraia Committee of the Religious Tract Society of London ena hebou ta dekenai. Unai hebou dekenai idia laloa Wales taudia sibodia lasi, to tanobada taudia iboudiai dekenai gado idauidau Baibel do idia henidia. Unai dala maragina ai lagani 1800 murinai idia karaia Baibel oreadia momo idia hamatamaia. Unai murinai, gado idauidau dekenai Baibel momo idia karaia.

Hari inai nega lalonai, lagani 1884 ai idia hamatamaia Watch Tower Bible and Tract Society oreana be gado 200 bona ma haida ai Baibel bona Baibel stadilaia bukadia idia printaia. Tanobada hegegemadai, ia ese hari inai nega ena gado ai New World Translation of the Holy Scriptures ena buka 72 milion idia hariharilaidia. Unai Baibel be Heberu bona Greek gado gunana dekena amo idia hahanaia, bona hari unai New World Translation buka ibounai eiava ena kahana haida be gado 18 dekenai idia hahanaia vadaeni bona hari idia hahanaia noho ma gado 12 dekenai.

Hari inai nega lalonai kahirakahira taunimanima iboudiai be Baibel idia abia diba dainai, edena bamona oi laloa? Oi laloa Baibel be anina bada gauna, a? Oiemu Baibel ta ia noho oi laloa bada bona oi duahia totona, a?

[Picture Credit Line on page 3]

From the book The Story of Mary Jones and Her Bible