Baibel—Duahiduahi Totona Bukana

BAIBEL ita herevalaia neganai inai hereva “herea” do ita gwauraia momo. Tanobada ena sivarai dekenai buka iboudiai amo unai buka idia printaia momo. Baibel be buka ginigunana, ia be gado momo herea dekenai idia hahanaia bukana, taunimanima ese unai buka amo hereva momo herea idia gwauraia, unai buka ena siahu be bada herea, bona taunimanima ese idia matauraia bada herea bukana. Danu, buka iboudiai amo reana unai buka be nega momo herea taunimanima ese idia hepapahuahulaia. Ena be lohia taudia ese idia taravatua, idia gabua, bona idia dagedage henia bada herea to unai buka ia do noho. To, madi, “herea” herevana ta be Baibel dekenai ita atoa diba lasi. Hari ita gwau diba lasi tanobada dekenai unai be taunimanima ese nega momo herea idia duahia bukana.

Ena be edia ruma lalonai Baibel ta ia noho, to taunimanima momo idia laloa idia duahia totona idia be nega lasi. Gunaguna, duahiduahi be taunimanima momo ese idia ura henia karana. To hari, idia dekenai nega ia noho neganai taunimanima momo idia ura televisen idia raraia eiava gau ta idia karaia. Idia do duahiduahi momo taudia idia ura lasi idia duahia neganai idia hekwarahi. Baibel duahia totona emu darana do oi gaukaralaia bada, bona taunimanima momo be idia duahiduahi neganai idia duahia gauna idia lalohadailaia momo lasi.

To Baibel ia do noho lasi buka atoa gabuna dekenai ia helai kava totona. Ita duahia ena badina namodia be momo. Namona be ena sivarai haida ita laloa.

Ia Do Noho Dainai Ita Hoa Lasi!

Unai hereva “Baibel” be Greek herevana bi·bliʹa amo, anina be “buka maragidia.” Danu, ita laloa Baibel idia karaia dalana be buka momo idia haboudia tamona​—haida idia maragi momokani lasi! Lagani 1600 bona ma haida lalodiai idia toredia. Ena be toretore taudia be taunimanima, to idia ia hasiahua tauna be Guba Tauna. Baibel toretore tauna ta ia gwau: “Peroveta hereva gunadia be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.” (2 Petero 1:21) Revareva Helagadia ena peroveta herevadia dekenai idia momokani gaudia be Baibel ena hereva ma haida dekenai idia momokani danu. Dirava ena siahu amo idia karaia “buka maragidia” be Iehova Dirava ena atai lalohadai amo idia honu. (Isaia 55:9) Baibel be nega daudau ia noho dainai ita hoa lasi!

Dirava ena hesiai taudia idia laloa nega ibounai Baibel be buka badana. Idia be aposetolo Paulo bamona idia laloa, ia danu be Baibel toretore tauna ta. Ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia.” (2 Timoteo 3:16) Unai hegeregerena, hari inai negai Iehova ena Witness taudia edia abidadama ena badina be Baibel. Unai ese edia hahediba herevadia ia gwauraidia bona edia kara ia biagua. Mai edia kudou ibounai ida taunimanima idia hagoadadia dina ta ta iboudiai Dirava ena Hereva ena kahana ta idia duahia bona ena hereva idia laloa namonamo ena anina idia abia totona.​—Salamo 1:​1-3.

Baibel Duahiduahi Momo Karana

Nega gunadia ai Revareva Helagadia duahia momo karana be heduru gauna. Israel edia king dekenai hahegani idia atoa sibodia edia imana amo Mose ena Taravatu​—hari unai be Baibel ena anina bada kahana ta​—idia torea, bona dina ta ta iboudiai idia duahia bena hanaihanai idia laloatao idia dekenai Dirava ena ura be dahaka. (Deuteronomi 17:​18-20) Unai idia karaia lasi dainai king momo idia moru.

Revareva Helagadia stadilaia karana ena namo bada be buruka peroveta tauna Daniel ena sivarai amo ita haheitalaia diba. Iena nega lalonai idia noho Baibel kahadia ia stadilaidia dainai, Daniel be Babulono dekenai idia dogoatao neganai, ‘buka amo’ Daniel ia lalo-parara Ieremia ese ia torea anina bada peroveta herevana be ia guguru gwauraia.​—Daniel 9:2.

Iesu ia vara neganai, “kara maoromaoro tauna bona Dirava dekenai ia gari tauna” Simeona be mai lalo-goada danu Keriso, eiava Mesia, itaia totona ia naria. Simeona ese gwauhamata ia abia do ia mase lasi ela bona Keriso ia itaia guna. Beibi Iesu ia rosia neganai Isaia ena peroveta hereva haida ia gwauraia dainai, ia hedinarai Simeona be iena nega lalonai idia noho Baibel bukadia ia duahia momo.​—Luka 2:​25-32; Isaia 42:6.

Ioane Bapatiso ia haroro neganai, taunimanima “idia laloa daradara, bona idia laloa momo” Mesia ia mai negana dekenai. Unai ese dahaka ia hahedinaraia? Reana unai amo ita diba Iuda taudia momo be Revareva Helagadia dekenai Mesia idia perovetalaia herevadia idia duahia momo. (Luka 3:15) Unai be mai anina, badina unai negadia ai buka be momo lasi. Imana amo Baibel bukadia idia toredia mai hekwarahi bada ida, bona unai dainai edia davana be bada bona abia totona be auka. Taunimanima be edena dala ai unai buka edia hereva idia diba?

Nega momo, taunimanima vairadiai idia duahia neganai idia kamonai. Hegeregere, Mose ena hahegani be nega idia atodia, bena unai nega ai idia hebou Israel taudia vairadiai Dirava ese ia henia Taravatu ena hereva iboudiai idia duahia. (Deuteronomi 31:​10-13) Lagani 1 C.E. murinai taunimanima vairadiai Baibel duahia karana idia karaia momo. Hahediba tauna Iakobo ia gwau: “Sene negana ia mai bona hari Mose ena taravatu be idia duahia dubu ta ta lalonai Dina Helaga ibounai. Bona ena hereva be hanua ibounai lalonai idia harorolaia.”​—Kara 15:21.

Hari inai negai, ita ta ta ibounai be Baibel ta ita abia be auka lasi. Taunimanima 100 100 amo 98 98 bamona edia gado dekenai unai “buka maragidia” eiava edia kahana ta idia abia diba. Unai dainai, madi, badina taunimanima momo idia ura lasi idia diba Baibel ena hereva idia dekenai be dahaka. Ena be hari be saiens ena diba momo negana, to Dirava ena Hereva, Baibel, be “hereva momokani ita dekenai do ia hadibaia” gauna namo hereana. Ena sisiba ia noho mauri ena kara goeva dekenai, taunimanima edia kara heheni karana dekenai, bona hereva idauidau momo dekenai. Ma danu, Baibel ese gabeai maino negana do ia noho ena helaro tamona ia henia.

Nega Hanaihanai Duahia

Unai dainai Iehova ena Witness taudia edia gaukara badana ta be taunimanima idia hagoadadia Baibel idia duahia hanaihanai totona. Brooklyn, New York, dekenai edia tanobada hedikwota faktori rumana ena haba dekenai be leta badadia amo inai hagoadaia herevana idia torea: “DINA TA TA IBOUDIAI DIRAVA ENA HEREVA BUKA HELAGA DUAHIA.” Idia hanai taunimanima milion momo be unai hereva idia duahia, bona namona be idia badinaia.

Tanobada hegegemadai Iehova ena Witness taudia edia kongregesen 73,000 bona ma haida lalodiai, wiki ta ta iboudiai Haroro School idia karaia. Unai sikuli lalonai Baibel ena kahana ta idia abia hidi, taunimanima vairadiai ta ese ia duahia totona. Danu, idia mai taudia iboudiai edia gaukara ta be sibodia edia ruma dekenai, wiki ta ta iboudiai Baibel karoa haida idia duahia. Unai sediual idia badinaia taudia be gabeai Baibel ibounai do idia duahia ore.

Idia karaia dalana be unai sikuli lalonai idia gaukaralaia bukana ta ese ia gwauraia dalana. Theocratic Ministry School Guidebook ia gwau: “Emu sediual lalonai namona be nega oi atoa Baibel oi duahia totona. Namona be oi duahia ena rau ginigunana ia lao rau ginigabena dekenai. . . . To, namo lasi hereva oi duahia kava, to ena anina oi laloatao totona oi duahia. Nega oi atoa oi lalohadailaia namonamo totona.”

Iehova ena Witness taudia ese idia halasia buka ma haida danu be taunimanima idia hagoadadia Baibel idia duahia totona. Hegeregere, inai magasin ida ai halasia magasin Noga! lalonai, memero kekeni taudia idia hagoadadia inai bamona: “Oi be Bible ibounai oi duahia vadaeni, eiava? Oibe, Bible be buka badana, to namona be sisina sisina oi duahia, ani? . . . Berea taudia ‘namodia’ be ‘dina ibounai Buka Helaga idia tahua.’ (Kara 17:11) Bema dina ta ta ibounai miniti 15 oi atoa Bible oi duahia totona . . . oi ese Bible ena hereva ibounai be lagani tamona lalonai do oi duahia haorea diba.” Oibe, Iehova ena Witness taudia idia laloa hari inai nega lalonai idia noho Keristen taudia be Revareva Helagadia idia diba momo be namo, idau negadia ai Dirava ena hesiai taudia idia diba hegeregeredia.

Unai idia laloa dainai, Witness taudia be hari inai nega lalonai taunimanima vairadiai Baibel duahia karana idia habadaia. Gado idauidau dekenai, Baibel ibounai duahiduahi kaset momo idia rekodilaidia. Taunimanima momo idia durudia vadaeni Baibel duahia ena hekwakwanai haida idia hanaidia totona. Haida be unai kaset idia kamonai henidia ruma lalonai idia gaukara neganai, motuka idia taria neganai, eiava ma gau haida idia karaia neganai. Unai kaset oi kamonai henia neganai, bema oi helai bona oi sibona emu Baibel lalonai oi duahia danu be moale bada karana.

Bema dina ta ta iboudiai Baibel duahia karana oi karaia lasi, namona be oi karaia hamatamaia, ani? Dina ta ta iboudiai lalonai nega bada do ia abia lasi, to ena namo be bada, badina Revareva Helagadia oi badinaia neganai aonega kara do oi karaia bona lauma dalana ai davana namo do oi moalelaia diba. Danu, idaunegai Israel gunalaia tauna Iosua dekenai inai hahegani idia henia bona unai hegeregerena do oi karaia diba: “Inai taravatu bukana ena hereva ese emu uduna do idia rakatania lasi, bona dina ai bona hanuaboi ai oi duahia, unai amo ia lalonai ia toredia herevadia iboudiai do oi badinadia bona karadia do oi karaia; bena emu raka do ia namo bona do oi kara mai emu aonega ida.”​—Iosua 1:8.

Baibel ena rau ese idia hahedinaraia Iehova ena lalokau urana be dahaka kamonai tanobada taudia dekenai. Dirava amo ia mai Hereva ita diba namonamo neganai moale momokani do ita davaria, bona tanobada matamata namona lalonai Paradaiso dekenai mauri hanaihanai ena helaro ita abia neganai do idia doko lasi hahenamo ita abia diba. (Luka 23:43; 2 Petero 3:13) Namona be dala oi karaia Baibel oi duahia bona oi stadilaia totona, bena unai mauri namona do oi davaria.