Duahia Taudia Edia Henanadai
Iesu be Iese bona David edia amo ia vara; vadaeni, dahaka dainai ia be unai tubuna ruaosi edia “ramuna” idia gwauraia?
Oi diba au ta ena ramuna be ia vara guna bena ena badina bona ena rigidia be gabeai idia tubu. Unai hegeregerena, toana be Iese (eiava ena natuna David) be ramu idia gwauraia be maoro, unai ramu amo Iesu be gabeai ia vara. To, Isaia 11:10 ia gwau do ia mai Mesiana be “Iese ena ramuna,” bona Roma 15:12 ese ia hahedinaraia unai hereva ese ia perovetalaia tauna be Iesu Keriso. Gabeai Apokalupo 5:5 (NW) ese ia gwauraia, “Iuda iduhuna ena Leona, David ena ramuna.” Unai bamona idia gwauraia be mai badina.
Nega momo Baibel ese au herevana ta amo gau ta ia laulaulaia. Nega haida badina be au nadinadina ta be ia tubu lalonai, ena ramuna idia tubu guna, bena rigi o huahua, ramu ese idia durudia gaudia, be gabeai idia tubu. Unai hegeregerena, Isaia 37:31 ia gwau: “Iuda iduhuna taudia, do idia roho mauri bena do idia noho taudia, edia ramudia do idia diho bona edia huahua do ia daekau.”—Iobu 14:8, 9; Isaia 14:29.
Bema gau ta ese au ta ena ramuna ia hadikaia, au ibounai be unai dika ena mamina ia abia. (Mataio 3:10; 13:6 itadia.) Unai hegeregerena, Malaki ia gwau: “Guba oreadia edia Iehova ia gwau: ‘. . . Hari do ia mai dinana ese do ia aradia ore, bena idia dekenai ramu ta eiava rigi ta do ia noho lasi.’ ” (Malaki 4:1) Anina be do ia haoredia vaitani. Tama sina (ramu) do ia haoredia, bona edia natudia (rigi) danu.a Inai ese ia hahedinaraia tama sina be mai edia maduna edia natudia maragidia dekediai; natu maragidia be edia tamadia sinadia edia ladadia Dirava vairanai hegeregerena reana namo eiava dika do idia davaria ela bona hanaihanai.—1 Korinto 7:14.
Isaia 37:31 bona Malaki 4:1 edia hereva edia badina be inai: Rigi (bona rigi maragidia ai idia noho huahuadia) be ramu ese ia hamauridia. Inai bema ita laloa, Iesu be “Iese ena ramuna” bona “David ena ramuna” ai ia lao dalana be do ita lalo-pararalaia.
Tauanina ai, Iese bona David be Iesu ena tubuna; idia be ramu bona ia be rigi. Isaia 11:1 ese Mesia ia perovetalaia, ia gwau: “Iese ena badina amo rigi maragina ta do ia daekau; bona iena ramuna amo rigi matamatana ta do ia tubu bona huahua do ia havaraia.” Unai hegeregerena, Apokalupo 22:16 (NW) ai, Iesu be sibona ia gwauraia “David ena natuna.” To ia ese danu sibona ia gwauraia “David ena ramuna.” Dahaka dainai?
Iesu be Iese bona David edia “ramuna” idia gwauraia, badina be ia ena amo edia iduhu ia mauri noho. Hari idia noho taudia ta lasi ia hamomokania diba ia be Levi, o Dan, o Iuda iduhuna tauna, to ita diba momokani Iese bona David edia iduhu ia mauri noho, badina be hari inai negai Iesu be guba ai ia mauri noho.—Mataio 1:1-16; Roma 6:9.
Iesu ese danu guba Pavapavana dagina ia abia. (Luka 1:32, 33; 19:12, 15; 1 Korinto 15:25) Anina be ia ese ena tubuna danu ia hereadia. David ia peroveta, Iesu be ena Lohiabada ia gwauraia.—Salamo 110:1; Kara 2:34-36.
Iesu Keriso ese Hahemaoro Tauna dagina danu ia abia. Lagani 1,000 lalodiai, iena boubou ena anina amo ia ese Iese bona David do ia hanamodia. Iesu dainai idia be tanobada ai do idia mauri, bona ia be edia “Tamana Hanaihanai” ai do ia lao.—Isaia 9:6.
Unai hegeregerena, ena be Iesu be Iese bona David edia iduhu amo ia vara, to ia abidia dagidia dainai bona do ia karaia karadia dainai, ia be hegeregere do idia gwauraia “Iese ena ramuna” bona “David ena ramuna.”
[Footnotes]
a Idaunegai Kanana taudia ese mase gurina ta latanai idia torea herevana be unai hegeregerena. Ia gwau do idia kehoa taudia be “henuai ramu do idia abia lasi, bona ataiai huahua do idia havaraia lasi!”—Vetus Testamentum, April 1961.
[Picture Credit Line on page 31]
Pictorial Archive (Near Eastern History) Est.