Ena be Ita be Kahu Mo, to Do Ita Goada Karaia!

“Ita ia karaia dalana ia diba namonamo, ia laloatao ita be tano kahuna mo.”​—SALAMO 103:14.

1. Baibel ia gwau Dirava ese taunimanima tano kahuna amo ia karaia; unai be saiens taudia edia hereva hegeregerena a? Mani oi gwauraia.

ISEDA tauanina be kahu. “Iehova Dirava ese taunimanima tano ena kahu amo ia karaia, bona mauri ena laga ena udu baubau lalonai ia hiriria vareai, vadaeni taunimanima be mauri tauna ia karaia vadaeni.” (Genese 2:7) Unai hereva bona saiens taudia edia hereva ta be hegeregere. Idia gwau taunimanima ena tauanina ai idia davaridia gaudia 90 mai kahana be tano kahuna ai idia davaridia danu. Kemis tauna ta ia gwau taunimanima badana ena tauanina be 65 pesen oksijen, 18 pesen kabon, 10 pesen haidrojen, 3 pesen naitrojen, 1.5 pesen kelsiam, bona 1 pesen fosforus, bona orena be ma gau haida. Unai namba be maoro momokani eiava lasi be herevana. Hereva momokani be inai: “Ita be kahu”!

2. Dirava ese taunimanima ia karaia dalana be edena bamona oi laloa, bona dahaka dainai?

² Daika ese taunimanima be kahu sibona amo ia karaia diba? Iehova sibona ese, ani? Dirava ese ia karaia gaudia be goevadae bona mai edia dika lasi; unai dainai, taunimanima be unai dala amo ia karaia be ita maumauraia diba lasi. Momokani, gau iboudiai karadia Diravana Badana ese tano kahuna amo taunimanima be gari bona hoa dalana ai ia karaia diba dainai, Ia ena siahu, ena diba, bona ena aonega mai hetoadia lasi be ita lalodia bada.​—Deuteronomi 32:​4; Salamo 139:14.

Edia Noho Ia Senisi

³ Dirava ese kahu amo ia karadia taudia edia kara be mai edia hetoadia. To ia ura lasi unai ese do ia hametaudia eiava do ia koudia momo, eiava edia lalodia do ia hamanokadia o do ia hahisidia. To, David ena hereva Salamo karoa 103 ai ese idia hahedinaraia gau haida ese taunimanima edia lalodia idia hamanokadia bona idia hahisidia diba. Dahaka dainai? Adam bona Eva ese Dirava idia gwau-edeede henia dainai, gabeai idia havaraia besena edia noho ia idau. Unai neganai, tano kahuna amo ia karadia be mai anina matamatana.a

⁴ David ese Dirava be tano kahuna amo ia karadia taudia goevadaedia edia kara edia hetoadia korikoridia ia gwauraidia lasi, to Adam ena amo ia hanai kara dikana dainai idia vara manokadia hari. Unai dainai ia ese Iehova inai bamona ia gwauraia: “Ia ese emu kara dikadia iboudiai ia gwaudiatao, ia ese emu gorere iboudiai lalodia amo oi ia hamauria. Emu mauri ia ese mase gurina amo ia abia lou. Eda kara dika hegeregeredia ita ia kara henia lasi; eda kara kerere edia davana korikori ita ia henia lasi.” (Salamo 103:​2-4, 10) Ena be kahu amo ia karadia, to bema taunimanima goevadaedia ese Dirava idia badinaia noho, idia kara dika lasi bona idia gorere lasi, unai dainai dika gwauatao karana bona gorere hanamoa karana be anina lasi. Gau badana be, mase gurina lalonai idia diho lasi dainai, toreisi lou amo hamauridia karana be anina lasi.

5. Dahaka dainai David ena hereva edia anina ita lalo-pararalaia be auka lasi?

⁵ Ita ibounai ita goevadae lasi, unai dainai David ese ia gwauraidia gaudia be ita dekenai idia vara bona nega ibounai ita diba ita be mai eda manoka. Idia ese iseda hetura karana Iehova dekenai eiava iseda Keristen tadikaka dekediai idia hadikaia negadiai, eda lalona idia hisihisi. Ita lalohisihisi, badina be iseda kara gagevagagevadia bona Satana ena tanobada ena hekwarahi dainai nega ta ta eda lalona idia metau. Satana ena lohia negana ena dokona be ia hure mai haraga dainai, ena tanobada ese taunimanima hahekwarahidia karana ia habadaia bona Keristen taudia ia hahekwarahidia bada herea.​—Apokalupo 12:12.

6. Dahaka dainai Keristen taudia haida edia lalodia idia manoka, bona Satana ese edia lalo-manoka edena bamona ia gaukaralaia diba?

⁶ Mamina oi abia Keristen dalana badinaia karana be ia auka ia lao, a? Keristen taudia haida idia gwau hereva momokani ai idia noho laganidia idia momo idia lao lalonai, toana be edia kara gagevagagevadia danu be idia momo idia lao. To reana gauna be edia lalo-parara sibodia edia manoka dekenai be ia bada ia lao dainai, sibodia edia kerere edia mamina be ia bada ia lao, bona idia diba momokani Dirava ena taravatu goevadaedia be edia ura hegeregerena idia badinadia diba lasi. Unai be vaia, Keristen taudia edia diba Iehova ena taravatu maoromaorodia dekediai ia bada ia lao bona idia lalodia bada neganai. To, namo lasi unai diba ese iseda lalona do ia hamanokadia bada bena Diabolo ena ura do ita karaia. Nega daudau herea lalonai ia ese Iehova ena hesiai taudia edia lalo-manoka amo ia veridia toho, tomadiho momokanina do idia rakatania totona. To, idia momo ese Dirava idia lalokau henia momokani bona Diabolo idia “inai henia lalo dika” dainai, unai bamona idia karaia lasi.​—Salamo 139:​21, 22; Hereva Lada-isidia 27:11.

7. Nega haida edena dala ai ita be Iobu bamona reana?

⁷ To, reana nega ta ta ai ita Iehova ena hesiai taudia eda lalona idia manoka. Reana unai ena badina ta be iseda gaukara ita moalelaia lasi. Eiava ita gorere, eiava iseda ruma taudia o eda turadia o ita ida idia gaukara hebou taudia dekediai ita noho namonamo lasi. Kamonai tauna Iobu ena lalona ia manoka herea dainai, Dirava ia noia, ia gwau: “Sheol ai mani lau oi hunia ela bona emu badu ia ore; lau dekenai nega oi gwauraia hidi bena lau oi laloatao!” Vadaeni, bema Iobu, “kerere ta lasi bona kara maoromaoro tauna, Dirava garina ia gari bona kara dika amo ia raka oho” tauna, ena lalona be hisihisi dainai ia manoka, bema nega haida ita danu be unai bamona, unai be hoa gauna lasi, ani?​—Iobu 1:​8, 13-19; 2:​7-9, 11-13; 14:13.

8. Bema nega ta ta eda lalona idia manoka, dahaka dainai unai be toa namona reana?

⁸ Iseda lalona idia goada, badina be ita diba Iehova ese taunimanima edia lalodia ia itadia bona edia lalo-namo ia laloa! Mai edia momokani ida idia hamoalea toho taudia be do ia dadaraidia lasi. Bema nega ta ta iseda lalona idia manoka, reana unai be toa namona, ia hahedinaraia Iehova ena hesiai ita lao henia karana be ita laloa maragi lasi. Lalo-manoka ia hekwarahilaia lasi tauna be reana sibona ena manoka ia lalo-pararalaia momokani lasi. Mani inai oi laloa: “Tau ta bema ia laloa ia gini goada, namona be ia naria namonamo, do ia moru garina.”​—1 Korinto 10:12; 1 Samuel 16:7; 1 Hanua Pavapavadia 8:39; 1 Sisiga 28:9.

Idia Danu be Kahu amo Ia Karadia

⁹ Iehova ena witness taudia mai edia abidadama goadana, Keristen negana vairanai idia noho taudia unai, be Heberu karoa 11 ese ia gwauraidia. Keristen taudia, aposetolo edia negai idia noho taudia bona hari inai negai idia noho taudia danu, be idia hegeregeredia. Edia sivarai amo diba bada ita abia diba. (Heberu 13:7 itaia.) Hegeregere, Keristen taudia ese Mose ena abidadama idia tohotohoa be namo, ani? Dirava ese ia boiria, hahemaoro herevadia be lohia tauna mai ena siahu bada, Aigupito ena Farao, do ia hamaoroa totona. Hari inai negai, Iehova ena Witness taudia ese unai bamona hahemaoro herevadia be tomadiho koikoi bona Keriso ena Basileia idia inai henia oreadia oredia latadiai idia gwauraidia.​—Apokalupo 16:​1-15.

9, 10. (a) Keristen taudia ese daidia edia abidadama idia tohotohoa be namo? (b) Mose ese ena gaukara edena bamona ia laloa?

¹⁰ Mose ia hahedinaraia inai gaukara karaia be haraga lasi. Ia gwau: “Lau be daika dohore Farao dekenai lau lao, bona Israela taudia Aigupito dekena amo dohore lau hakaua siri?” Ia laloa ia hegeregere lasi. Ena bese taudia, Israel taudia unai, edia kara ia laloa momo danu; ia gwau: ‘Edena bamona, bema lau do idia kamonai henia lasi bona egu hereva do idia abia dae lasi?’ Iehova ese ia hamaoroa edena dala amo do ia hamomokania diba siahu be ia ena amo ia abia, to Mose be mai ena hekwakwanai ma ta. Ia gwau: “Lauegu Lohiabada e, lau be hereva dekenai egu malana be ia haraga lasi, . . . lau be hereva goada lasi tauna, egu malana danu ia haraga lasi, hereva dekenai danu lau daradara.”​—Esodo 3:11; 4:​1, 10.

11. Mose hegeregerena, Dirava ese ita ia henia gaukaradia be edena bamona ita lalodia reana, to bema Dirava ita abidadama henia, dahaka ita diba momokani?

¹¹ Reana nega ta ta iseda hemami be Mose ena hegeregerena. Ena be Dirava ese ita ia henia madunadia ita diba, to do ita huadia dalana be ita daradaralaia. ‘Lau be daika, ladana bada taudia, o taga taudia, o sikuli bada taudia, do lau lao henidia bona Dirava ena dala do lau hadibalaidia toho? Keristen heboudia ai do lau haere eiava Haroro Sikuli ai hereva do lau karaia negadiai, egu tadikaka be dahaka do idia laloa? Do idia itaia lau hegeregere momokani lasi, ani?’ To mani oi laloatao, Iehova ese Mose ia bamoa bona ia durua ena gaukara do ia karaia totona, badina be Mose ese ia abidadama henia. (Esodo 3:12; 4:​2-5, 11, 12) Mose ena abidadama bema ita tohotohoa, Iehova ese ita do ia bamoa bona ita do ia durua, iseda gaukara do ita karaia totona.

12. Iseda dika eiava iseda manoka dainai eda lalona idia manoka neganai, David ena abidadama ese ita edena bamona ia hagoadaia diba?

¹² Ena kara dika eiava ena manoka dainai ena lalona ia hekwarahi eiava ia manoka tauna be David hegeregerena ia hereva diba; David ia gwau: “Egu kara dika be lau diba, egu kerere be egu vairana ai nega iboudiai.” Iehova ia noia, ia gwau: “Emu vairana be egu kara dika amo oi hunia, bona egu kara kerere iboudiai oi kokidia.” Iena ura, Iehova ena hesiai do ia lao henia urana, be lalo-manoka ese ia koua lasi. “Oiemu vairana amo lau oi negea lasi; emu lauma helagana be lauegu amo oi abia oho lasi.” David be “kahu,” to Iehova ese ia rakatania lasi, badina be ia ese Iehova ena gwauhamata, “ena lalona ia manau bona ena dika amo ia helalo kerehai tauna” do ia dadaraia lasi gwauhamatana, be ia abidadama henia dainai.​—Salamo 38:​1-9; 51:​3, 9, 11, 17.

13, 14. (a) Dahaka dainai taunimanima murinai ita raka be kerere? (b) Paulo bona Petero edia sivarai ese edena bamona idia hahedinaraia idia be tano kahuna?

¹³ To, mani inai oi laloa: Namona be ita laloa unai “witness taudia hutuma bada” edia kara sivaraidia ese ita idia hagoadaia, “heau helulu ita vairanai ia noho be do ita heau mai eda haheauka ida” totona, to Baibel ese ita ia hadibaia lasi idia murinai do ita raka. Ia gwau “eda abidadama ia havaraia bona ia hagugurua” Tauna, Iesu, murinai do ita raka be namo, goevadae lasi taudia​—kamonai aposetolo taudia danu​—murinai lasi.​—Heberu 12:​1, 2, NW; 1 Petero 2:21, NW.

¹⁴ Aposetolo Paulo bona Petero, Keristen ekalesiana ena du, be nega haida idia hekwakwanai. Paulo ia gwau: “Kara namodia lau ura karaia neganai be lau karaia diba lasi. Bona kara dikadia lau ura lasi karaia neganai be lau karaia inai. Lau madi o!” (Roma 7:​19, 24) Bona nega ta Petero ese Iesu ia hamaoroa mai ena hekokoroku ida, ia gwau: “Taunimanima ibounai oi do idia rakatania, to lau be lasi.” Iesu ese Petero ia hamaoroa ia ese nega toi do ia gorea, to Petero ese ena Biaguna ena hereva ia koua; mai ena hekokoroku ida ia gwau: “Oi danu do ita mase nega tamona, to do lau hereva lasi inai bamona, ‘Lau diba lasi Iesu.’ ” To ia ese Iesu ia gorea, bena ena kerere dainai ia tai dikadika. Oibe, Paulo bona Petero be tano kahuna mo.​—Mataio 26:​33-35.

15. Ena be ita be tano kahuna, to dahaka dainai ita goada karaia diba?

¹⁵ To, ena be Mose, David, Paulo, Petero, bona idia bamona taudia ma haida be mai edia manoka, to idia kwalimu. Badina be Iehova idia abidadama henia goadagoada, bona ena be hekwakwanai haida idia vara, to ia idia badinaia. Ia idia abidadama henia, idia laloa “siahu badana” do ia henidia. Bena ia henidia dainai, idia moru vaitani lasi. Bema ita abidadama henia noho, ita diba momokani eda kara ena davana be ita do ia henia neganai, unai be inai hereva hegeregerena do ia karaia: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi.” Unai ita laloa dainai, ita goada karaia diba, herevana ita be tano kahuna mo!​—2 Korinto 4:7; Heberu 6:10.

Kahu amo Ita Ia Karaia, Anina Ita Ta Ta Dekenai be Dahaka?

¹⁶ Tama sina bona tisa momo idia diba vadaeni, edia natudia o idia hadibadia memerodia be edia tadikaka eiava idia ida idia sikuli hebou memerodia edia diba hegeregeredia idia lalodia be namo lasi, to idia ta ta ena diba ena diba hegeregerena idia lalodia be namo. Unai be Baibel ena sisiba herevana ta hegeregerena: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To iena kara tau ta ena kara danu ia hahegeregerea, unai tau do ia gwauraia kerere totona be namo lasi.”​—Galatia 6:4.

16, 17. Taunimanima ia hahemaoro henidia neganai, Iehova ese Galatia 6:4 ena hereva edena bamona ia badinaia?

¹⁷ Unai hereva hegeregerena, ena be Iehova ese ena taunimanima be orea ta bamona ia kara henidia, to idia ta ta ena kara ena kara hegeregeredia ia hahemaoro henidia. Roma 14:12 ia gwau: “Ita ibounai ta ta iseda kara Dirava vairana dekenai do ita hedinaraia.” Iehova be ena hesiai taudia ta ta iboudiai edia anina ibounai ia diba​—edia tauanidia bona edia lalodia edia toadia, edia diba, edia goada bona edia manoka, do idia karaia diba karadia, bona unai kara amo Keristen huahuadia be edena bamona idia havaradia, be ia diba. Sibodia be haida ida idia hahegeregeredia dainai edia lalodia idia metau taudia be Iesu ena hereva rua ese idia hagoadadia; herevadia be inai: moni maragimaragidia rua be dubu ena maua lalonai ia udadia vabuna herevana, bona tau ta ese tano namona ai ia hadodia uhedia parabolena.​—Mareko 4:​20; 12:​42-44.

18. (a) Ita be tano kahuna mo; dahaka dainai ita be unai ena anina ita ta ta dekenai ita diba be namo? (b) Siboda eda kara ita tahua namonamo neganai, badina be dahaka eda lalona idia metau lasi be namo?

¹⁸ Gau badana be kahu amo ita ia karaia ena anina ita siboda dekenai ita diba, bena eda diba ibounai bona eda goada ibounai hegeregeredia Dirava ena gaukara ita karaia diba. (Hereva Lada-isidia 10:4; 12:24; 18:9; Roma 12:1) Namona be ita siboda eda manoka ita diba goevagoeva, bena ita gima noho, hamaoromaorodia daladia do ita tahudia totona. Siboda eda kara ita tahua neganai, namo lasi lauma helaga ena siahu ita laloaboio, badina be ita ia durua diba, iseda kara do ita hamaoromaorodia totona. Ia amo Dirava ese guba bona tanobada ia karadia, Baibel idia torea, bona, inai ia mase gwauraia tanobadana bogaraginai, maino oreana, tanobada matamatana ena, ia havaraia. Unai dainai Dirava ena lauma helaga ena siahu be hegeregere, idia noinoilaia taudia be aonega bona goada do ia henidia, do idia kara maoromaoro noho totona.​—Mika 3:8; Roma 15:13; Efeso 3:16.

19. Ena be kahu amo ita ia karaia, to dahaka ita laloa lasi be namo?

¹⁹ Iseda lalona idia goada, badina be ita diba Iehova ia laloatao ita be tano kahuna mo! To, namo lasi unai dainai ita laloa do ita gaukara goada lasi eiava do ita kara kerere be dika lasi. Lasi bona lasi vaitani! Iehova ese ita ia hebogahisi henia dainai, ia laloatao ita be kahu mo. Ita ura lasi Dirava badinaia lasi taudia ai do ita lao; idia ese iena hariharibada be lebulebu gauna ai idia halaoa, bona eda Biaguna bona Lohiabada tamona, Iesu Keriso, idia gorea. (Iuda 4) Ena be kahu amo ita ia karaia, to namo lasi ita kara kerere. Keristen tauna ese lalohadai kereredia ia tuari henidia toho mai ena goada ida; ena tauanina ia botaia bona ia guia, ‘Dirava ena Lauma Helaga ena lalona do ia hahisia’ garina.​—Efeso 4:30; 1 Korinto 9:27.

20. (a) Edena gaukara ruaosi do ita “karaia goadagoada” be namo? (b) Dahaka dainai eda lalona idia goada diba?

²⁰ Hari, Satana ena tanobada ena dokona negana lalonai, be Basileia harorolaia gaukarana bona Dirava ena lauma huahuadia havaradia gaukarana hesikulaidia negana lasi. Namona be unai gaukara ruaosi do ita “karaia goadagoada.” Hari do ita goada karaia be namo, badina be ita diba iseda gaukara be “hekwarahi kava lasi.” (1 Korinto 15:58) Iehova ese ita do ia abia isi, badina be David ia gwau: “Ia ese kara maoromaoro tauna do ia gimaia, do ia mareremarere lasi.” (Salamo 55:22) Ita moale bada, badina be ita diba, ena be ita be tano kahuna mo, to Iehova ese dala ia kehoa iseda, ita ese goevadae lasi taudia ia henidia gaukarana hereadaena do ita karaia totona!

[Footnotes]

Oi Gwauraia Hedinarai Diba A?

◻ Genese 2:7 bona Salamo 103:14 idia gwau taunimanima be kahu amo, to edena dala ai unai siri edia anina be idauidau?

◻ Dahaka dainai Heberu karoa 11 ese Keristen taudia hari inai negai ia hagoadadia diba?

◻ Dahaka dainai Galatia 6:4 ena hereva ita badinaia be aonega karana?

◻ Heberu 6:10 bona 1 Korinto 15:58 ese ita edena bamona idia durua diba, lalo-manoka do ita koua totona?

3, 4. (a) Dirava ese taunimanima be kahu amo ia karaia neganai, dahaka ia ura lasi? (b) Salamo 103:14 ai David ese dahaka ia herevalaia, bona unai karoa ena hereva ma haida ese ita edena bamona idia durua, unai do ita diba totona?

[Picture on page 10]

Keristen taudia ese edia bamodia edia abidadama idia tohotohoa, to edia abidadama ia hagugurua Tauna, Iesu, murinai idia raka