Turana Lasi Hemamina ese Emu Mauri Ia Hadikaia be Namo Lasi

TURANA lasi lalohisihisina ese buruka bona matamata taudia edia mauri ia hadikaia diba. Toretore hahine Judith Viorst be Redbook magasin lalonai ia gwau: “Turana lasi hemamina be nadi badana ese kudouna ia moia bamona. . . . Turana lasi hemamina be ita dabu bada bona ita dara doko. Turana lasi hemamina be sinana lasi natuna, bona ia boio mamoe bamona, tanobada badana lalonai idia noho bona taunimanima ese edia namo idia tahua lasi bamona.”​—September 1991.

Gau idauidau dainai turana lasi hemamina oi abia diba​—turana momokani amo oi parara, oi manadalaia lasi gabuna dekenai oi noho, taunimanima ida oi herevahereva namonamo diba lasi, headava ia doko, eiava emu ruma bese tauna ta ia mase. Ena be taunimanima momo huanai idia noho, to haida be turana lasi hemamina idia abia.

Dahaka Do Oi Karaia Diba?

Bema turana lasi hemamina oi abia, oi haheaukalaia sibona, a? Sisina sisina turana lasi hemamina ese oi do ia hadikaia bona oi ura lasi oi mauri garina, kara ta do oi karaia diba, a? Oibe. Heduru hereva momo oi abia diba. Bona Baibel, Dirava ena Hereva lalonai, sisiba hereva namodia momo idia noho. Unai hagoadaia hereva ese oi idia durua diba turana lasi hemamina do oi negea totona.​—Mataio 11:​28, 29.

Hegeregere, reana oi ia hagoadaia karana ta be Ruta ena sivarai oi duahia, ia be lagani 3,000 gunanai Middle East dekenai ia noho hahinena ta. Ia be turana lasi hemamina ia abia diba. Iena adavana ia mase neganai, ena ravana hahinena ida idia lao Israel dekenai, ia manadalaia lasi gabuna unai. (Ruta 2:11) Ena be ena varavara bona ena turadia gunadia ia rakatanidia bona unai gabu matamata dekenai ia be idau hanua hahinena ta, to Baibel ia gwau lasi turana lasi hemamina ese ena mauri ia biagua. Iena sivarai Baibel buka Ruta dekenai oi duahia diba.

Ruta hegeregerena, namona be lalona hagoadaia karadia oi karaia. Emu lalohadai kara haida dekenai bona idia vara gaudia dekenai ese turana lasi hemamina ia havaraia diba. Ann be lagani hani lalodiai ena gorere bada tamana ia naria bona ia ese unai hereva ia hamomokania. Ena tamana ia mase neganai turana lasi hemamina bada ia abia. Ia gwau: ‘Lau dabu momokani mamina lau abia, lau laloa lau be anina lasi momokani​—hegeregere ta ese lau ia ura henia lasi bamona. To murinai lau lalo-parara egu mauri dalana be hari ia idau, bona lau lalo-parara turana lasi hemamina do lau negea totona, gau badana be hari egu mauri dalana do lau moalelaia toho.’ Nega haida, idia vara gaudia oi haidaua diba lasi, to emu lalohadai unai gaudia dekenai oi haidaua diba.

Bema oi gaukara noho unai ese oi ia durua turana lasi hemamina do ia maragi sisina totona, to ia haorea momokani lasi. Irene be ia headava hua 6 murinai ia vabu, bona unai hereva ia hamomokania. Ia gwau: ‘Lau gaukara lasi neganai turana lasi hemamina be ia bada, unai dainai, lau goada karaia taunimanima ma haida lau durudia edia hekwakwanai do idia hanaidia totona.’ Taunimanima ma haida oi durudia neganai moale oi davaria, bona turana lasi hemamina idia abia Keristen taudia totona Lohiabada ena gaukara bada ia noho.​—Kara 20:35; 1 Korinto 15:58.

Turadia Edia Heduru Oi Koua Lasi

The New York Times Magazine dekenai ia gwau turana lasi hemamina idia abia natudia be “turana momokani lasi ena bero” idia davaria. (April 28, 1991) Turana lasi hemamina idia abia taudia momo, matamata taudia bona buruka taudia danu, edia mamina be edia turana ta be lasi. Vadaeni, Keristen kongregesen lalonai turana momo idia noho dainai unai ese ita ia durua bada. Unai dainai, kongregesen lalonai oi tura henia taudia edia namba oi habadaia, bona dala idauidau dekenai oi idia durua toho neganai oi koudia lasi. Turana ena gaukara be inai​—hekwakwanai neganai idia heduru diba.​—Hereva Lada-isidia 17:17; 18:24.

To, namona be oi laloatao, oi lalohisihisi bada dainai, reana oiemu turadia edia heduru dalana do oi ha-aukaia. Edena bamona? Toretore tauna Jeffrey Young ia gwau: “Turana lasi hemamina idia abia taudia haida be . . . idia ura tura henia toho taudia idia koudia, idia koudia dalana ta be kiki hebou neganai idia hereva momo, eiava badu havaraia hereva eiava ia maoro lasi idia herevalaia gaudia idia gwauraidia. Turana lasi hemamina bada idia abia taudia be dala idauidau amo turana karana momokani idia hadikaia.”​—U.S.News & World Report, September 17, 1984.

Nega ta ta ai, bema taunimanima amo oi siri, emu lalohisihisi mamina do ia habadaia diba. Ena lagani 50 ia hanaia tauna, Peter, be unai bamona ia karaia. Ena adavana ia mase murinai, bona ena be ena lalona dekenai taunimanima edia heduru ia ura abia, to taunimanima amo ia siri. Ia gwau: ‘Dina haida lau ura lasi taunimanima lau bamodia, bona gabeai taunimanima amo lau siri momokani.’ Unai ese dika bada ia havaraia diba. Ena be nega ta ta ai sibona dekenai oi noho be namo, to taunimanima amo oi siri momo be oi ia hadikaia diba. (Hereva Lada-isidia 18:1) Peter ese unai ia lalo-pararalaia. Ia gwau: “Unai kara lau hanaia, bona egu mauri lau haheaukalaia, bona, egu turadia edia heduru dainai, lau ese egu mauri lau hanamoa lou diba.”

To, namo lasi oi laloa ma haida ese oi idia durua be idia edia maduna. Namo lasi idia dekenai hereva momo oi henidia oi idia durua totona. Mai moale danu edia hebogahisi karadia oi abia dae. To danu, namona be inai sisiba Hereva Lada-isidia 25:17 dekenai oi laloatao, ia gwau: “Emu dekena tauna ena ruma ai oi daekau momo lasi, do ia hesiku bena oi do ia inai henia garina.” Frances ia laloa unai be sisiba namona. Frances mai adavana be lagani 35 lalodiai idia headava bona ena adavana ia mase neganai turana lasi hemamina bada ia abia. Ia gwau: ‘Oi idia durua dalana oi hametaua lasi, namo lasi hanaihanai haida edia ruma dekenai oi lao heduru oi abia totona.’

Iehova ese Oi Ia Naria

Ena be nega haida emu turadia ese oi idia durua lasi, to Iehova Dirava be do oiemu Turana ai ia lao diba. Namona be oi lalo-parara ia ese oi ia naria. Emu abidadama ia dekenai ia goada noho, bona hanaihanai ia dekenai oi tabekau oi ia naria totona. (Salamo 27:10; 91:​1, 2; Hereva Lada-isidia 3:​5, 6) Moab hahine Ruta be unai ia karaia bona hahenamo momo ia davaria. Oibe, ia be Iesu Keriso ena tubuna hahinena ta ai ia lao!​—Ruta 2:12; 4:17; Mataio 1:​5, 16.

Hanaihanai Iehova oi guriguri henia. (Salamo 34:4; 62:​7, 8) Margaret ia gwau guriguri ese ia durua bada turana lasi hemamina ia haheaukalaia totona. Ia bona adavana be ful-taim haroro gaukara idia karaia hebou ela bona ena tau ia mase, ia mase neganai ia be do tau matamatana. Ia gwau: ‘Lau ia durua gauna be hanaihanai gado badana dekenai lau guriguri, bona Iehova dekenai lau garilaia gaudia bona egu lalo-hekwarahi iboudiai lau hamaoroa. Bona turana lasi hemamina lau abia neganai, unai ese lau ia durua lau laloa maoromaoro totona. Bona Iehova ese egu guriguri ia haerelaia neganai, unai ese lau ia hagoadaia danu.’ Ia ese heduru bada ia abia aposetolo Petero ena sisiba ia badinaia dainai. Petero ia gwau: “Dirava ena imana goadana henunai do umui manau, vadaeni iena nega namona lalonai ia ese umui do ia abia isi. Ia ese umui ia naria noho. Unai dainai emui laloa hekwarahi gaudia ibounai iena imana dekenai do umui atoa.”​—1 Petero 5:​6, 7; Salamo 55:22.

Emu turana karana Iehova dekenai do ia goada neganai, unai ese oi ia durua sibona oi lalo-namo henia totona​—turana lasi hemamina idia abia taudia momo be sibodia idia lalo-namo henia lasi. Nius totona sivarai ia torea hahine, Jeannette Kupfermann, ena adavana be kensa dainai ia mase neganai, toretore lalonai ia gwau “sibona ia lalo-namo henia lasi bona ia laloa gau ta ia karaia namonamo diba lasi.” Ia gwau: “Vabu momo be unai lalohadai idia abia dainai, lalo-metau bada idia davaria bona idia ura sibodia edia mauri idia hadokoa.”

Oi laloatao Iehova ese oi ia laloa bada. Ia gwau lasi oi ese gau ta oi karaia namonamo diba lasi. (Ioane 3:16) Gunaguna Dirava ese ena Israel bese taudia ia durudia hegeregerena oi danu do ia durua. Idia dekenai ia gwau: “Umui lau dadaraia lasi. Umui gari lasi, badina lau be umui danu lau noho. Matana umui negea kava lasi, badina be lau be emui Dirava. Lau ese umui do lau hagoadaia. Lau ese umui do lau durua momokani. Lau be egu kara maoromaoro imana idibana amo, umui do lau dogoatao auka.”​—Isaia 41:​9, 10.

Dirava Dekenai Kerere Oi Atoa Lasi

Turana lasi hemamina oi abia neganai, namo lasi oi gwau unai be Dirava ena kerere. Unai be Iehova ena kerere lasi. Hanaihanai ia ura oi bona taunimanima iboudiai be turana namodia umui abia. Dirava ese Adam ia havaraia neganai, ia gwau: “Tau sibona ia noho be ia namo lasi, lau ese durua tauna ia bamona do lau karaia.” (Genese 2:18) Bona unai ia vara Dirava ese hahine ginigunana, Eva, ia havaraia neganai. Bema Satana ia gwau-edeede lasi, unai tau bona hahine bona idia dekena amo idia vara ruma besedia be turana lasi hemamina idia davaria lasi.

Kara dika ia do noho badina Iehova ese ia koua lasi ema bona hari, bona unai dainai turana lasi hemamina bona hisihisi ma haida idia bada idia lao noho. To, laloaboio lasi, Dirava ese unai dika do ia koua, do ia noho daudau lasi. Turana lasi hemamina ena hekwakwanai oi haheaukalaia diba, bema Dirava ese iena tanobada matamatama lalonai oi totona dahaka do ia karaia oi laloatao. To unai nega oi do naria noho lalonai, ia ese oi do ia durua bona oi do ia naria.​—Salamo 18:2; Filipi 4:​6, 7.

Unai oi diba neganai oi ia hagoadaia diba. Frances (guna ena sivarai ai gwauraia) be vabu ai ia lao neganai, Salamo 4:8 ena hereva ese ia hagoadaia, hanuaboi ai unai be ia momokani, unai siri ia gwau: “Maino dekenai do lau hekure diho bona do lau mahuta, badina Iehova e, oi sibona ese lau oi gimaia dainai gari lasi dekenai lau noho.” Namona be Salamo buka dekenai idia noho hereva namodia oi lalohadailaidia loulou. Namona be Salamo 23:​1-3 ia hahedinaraia hegeregerena, Dirava ese oi ia naria dalana oi laloa noho.

Turana Lasi Hemamina Idia Abia Taudia Durudia Dalana be Dahaka?

Turana lasi lalohisihisina idia davaria taudia ita durudia dala badana be idia dekenai lalokau karana ita hahedinaraia. Nega momo Baibel ese Dirava ena taunimanima ia hagoadadia idia lalokau heheni totona, hekwakwanai idia vara neganai unai be gau badana. Aposetolo Paulo ia toretore, ia gwau: “Umui ta ta do umui lalokau henia, tadikaka edia lalokau ta ta dekenai bamona.” (Roma 12:10) Oibe, lauma siahuna amo Dirava ena Hereva idia torea, bona ia lalonai ia gwau: “Lalokau be do ia doko lasi.” (1 Korinto 13:8) Turana lasi hemamina idia abia taudia dekenai lalokau be edena bamona oi hahedinaraia diba?

Turana lasi hemamina idia abia taudia ita dadaraidia eiava ita hereva henidia lasi be namo lasi, to bema mai edia dala, edia namo idia tahua taudia dekenai hebogahisi idia hahedinaraia dalana be mai edia haheauka danu unai taudia idia durudia. Idia be Iobu bamona, idia gwau diba: “Lau ura heduru totona ia taitai tauna, bona tamana lasi merona bona durua lasi tauna lau durua. . . . Bona lau ura vabu ena lalona do lau hamoalea.” (Iobu 29:​12, 13) Keristen kongregesen lalonai, elda dagina idia abia taudia bona hebogahisi turadia be unai siri hegeregerena idia heduru diba, unai ena anina be taunimanima iboudiai idia ura abia gaudia, lalo-parara, hebogahisi, bona hagoadaia hereva idia henidia. Do idia hahedinaraia diba edia lalohisihisi mamina dainai idia hebogahisi henidia, bona idia ura neganai, edia hereva do idia kamonai henia namonamo.​—1 Petero 3:8.

Nega momo, ena be turadia be gau maragidia amo idia durudia, to turana lasi hemamina idia abia taudia ese unai kara idia laloa bada. Hegeregere, Witness tauna ta ena lalokau tauna be mase dekenai ia boio neganai, Witness taudia ma haida be hetura bona hebogahisi karadia amo namo bada idia havaraia diba. Hebogahisi karadia be maragi gaudia do ita gwauraidia lasi, hegeregere aniani totona ia ita boiria neganai, ena hereva ita kamonai henia namonamo neganai, eiava hagoadaia hereva ita henia neganai. Unai kara ese turana lasi hemamina ia abia tauna ia durua bada, ena lalohisihisi mamina do ia haheaukalaia diba totona.​—Heberu 13:16.

Ita ibounai be reana nega ta ta ai, turana lasi hemamina do ita abia. To, namo lasi turana lasi hemamina ese oiemu mauri ia hadikaia. Namona be emu mauri be mai anina bada gaukarana amo oi hahonua. Turana momokani be mai edia dala idia heduru neganai, oi koudia lasi. Iehova Dirava dekenai oi abidadama. Salamo 34:19 ena hagoadaia gwauhamata herevana oi laloatao, ia gwau: “Kara maoromaoro tauna ena hisihisi be momo, to Iehova ese iboudiai edia lalodia amo ia hamauria.” Iehova dekenai oi lao heduru do oi abia totona, namo lasi turana lasi hemamina ese oiemu mauri ia hadikaia.

[Box on page 24]

TURANA LASI HEMAMINA NEGEA DALADIA

▪ Iehova dekenai oi tabekau

▪ Lalo-maino abia totona Baibel oi duahia

▪ Keristen ena hagoadaia gaudia oi lalodia

▪ Mai anina bada gaukarana oi karaia

▪ Turana ma haida oi abia

▪ Dala oi kehoa turana taudia ese oi idia durua totona

▪ Taunimanima amo do oi siri lasi, to taunimanima lalokau henia karana oi habadaia

▪ Oi lalo-parara Iehova ese oiemu namo ia tahua

[Box on page 24]

TURANA LASI HEMAMINA IDIA ABIA TAUDIA OI DURUDIA DALANA

▪ Lalo-parara, hebogahisi, bona hagoadaia hereva oi henidia

▪ Edia hereva oi kamonai henia namonamo

▪ Gau maragidia amo oi durudia noho

[Picture on page 23]

Ena be hekwakwanai badana ia davaria, to sivarai ta lasi ia gwau turana lasi hemamina ese Ruta ena mauri ia hadikaia