Gari Lasi Momokani Ena Badina

“REGEREGE ta ai kamonai dainai ai gini. Bena aiemai laurina kahanai ai, edia apena idia kehoa manu rua be uda amo idia raka lasi bona ai idia heau henia. Ai vairanai gatoi rua be tano ena guri maragina lalonai idia noho. Unai manu ese ai idia hagaria edia gatoi ai moidia lasi totona. Unai gatoi hairaidia mai edia toutou koremadia edia laulau do ai abia totona idia kahirakahira dekenai ai lao neganai, unai manu ese ai idia lulua. Ai laloa ‘Idia be gari diba lasi momokani.’ ”

Taunimanima hani be mai ena toutou dikkop manu ena ruma kahirakahira dekenai idia lao neganai unai sivarai ia vara. Manu maragina ma ta ena ladana be blacksmith plover. Everyone’s Guide to South African Birds bukana lalonai, manu idia stadilaia taudia Sinclair bona Mendelsohn idia gwau: “Manu tau bona hahine ese edia ruma bona gatoi idia naria namonamo, bona idia kahirakahira dekenai gau ta ia mai neganai, mai goada danu idia lulua. Ena be unai gau be bada herea to unai idia laloa lasi, mai edia boiboi bada ida idia roho lao, bona gari lasi dekenai unai gau, taunimanima danu, idia roho diho henidia, idia luludia toho totona.”

Taunimanima haida ese elefant badadia idia itaia. Idia be blacksmith plover manu edia ruma kahirakahira dekenai idia raka neganai, unai manu ese idia luludia toho. Nega momo elefant be idia kamonai bona dala idauna ta dekenai idia raka lao.

Manu be edena gabu amo gari lasi karana idia diba? Idia ia Havaraia Tauna ese unai diba ia henidia. Iehova Dirava ese unai manu maragidia dekenai diba ia henidia, bona animal badadia ese edia ruma eiava edia natudia idia hadikaia garina, unai diba idia gaukaralaia idia luludia totona.

Hahediba ta Keristen Taudia Totona

Unai kara amo Keristen taudia ese diba do idia abia, to idia dekenai gari lasi ena diba sibona idia abia be hegeregere lasi. Namona be edia Biaguna, Iesu Keriso, ena kara idia tohotohoa, ia ese gari lasi dekenai Dirava ena taravatu ia badinadia. (Heberu 12:​1-3) Gari dainai Dirava ena hesiai gaukara idia karaia lasi taudia be Baibel ese ia gwauraidia dika. (Heberu 10:39; Apokalupo 21:8) To, Iehova ia diba ita be goevadae lasi taudia, bona ia diba nega ta ta ai ita kara dika eiava ita gari dainai iena ura ita karaia namonamo lasi. (Salamo 103:​12-14) Bema tau ta ia gari dainai dala maorona ia badinaia lasi, dahaka do ia karaia diba?

Keristen tauna ese goada do ia abia hetoho do ia hanaidia totona bona Dirava ena ura ia karaia noho totona, gau badana be Dirava ia guriguri henia. Baibel lalonai ita ia hagoadaia gwauhamata herevana ia gwau Iehova ese ita do ia durua, ia gwau: “Manoka tauna dekenai siahu ia henia; bona goada lasi tauna dekenai goada ia henia. Uhau do idia manoka bona do idia hesiku, bona eregabe taudia edia goada do idia ore bena do idia moru, to Iehova dekenai idia tabekau taudia be goada do idia abia. Do idia roho edia apena amo ugava bamona. Do idia heau bona idia hesiku lasi; do idia raka bona idia hesiku lasi.” (Isaia 40:​29-31) Idia goevadae lasi taudia momo ese inai hereva idia hamomokania, ‘manokamanoka idia negea bona goada idia abia.’ (Heberu 11:34) Haheitalai namona be Keristen aposetolo Paulo, ena toretore dekenai ia gwau: “Lohiabada be lau kahirakahira dekenai ia gini bona lau ia hagoadaia, lau dekena amo haroro gaukara do ia guguru vaitani bona bese iboudiai do idia kamonai totona.”​—2 Timoteo 4:17, NW.

Kamonai matamata taudia be Iesu Keriso ena hahediba taudia ai idia ura lao neganai, hagoadaia bona heduru herevadia idia abia diba danu. Namona be South Africa tauna ta oi laloa, ena ladana be Henry, ia ese ena dubu ena moni ia naria bona pasto tauna ena ruma badinai ia noho. Henry be hereva momokani ia tahua. Ena be dubu dekenai ia be mai ena gaukara, to dina ta ai, Iehova ena Witness taudia amo davana lasi Baibel stadi ia ura abia. Gabeai, ia gwau ia ura Witness tauna ta ai do ia lao, bona ia ura diba dahaka ia karaia ia tahua gauna do ia hagugurua totona. Idia hadibaia gau ginigunana be ena dubu amo do ia siri. (Apokalupo 18:4) Pasto tauna be ena dekena tauna bona ena turana dainai, Henry ia laloa revareva amo do ia hadibaia sibona be namo lasi, to do ia vaira henia bona dubu amo ia siri ena badina do ia gwauraia hedinarai be namo. Bona gari lasi dekenai unai ia karaia.

Pasto tauna be ia hoa, bona gabeai ia ese dubu ena seamani bona dubu ena memba taudia ma haida ia hakaudia Henry idia vadivadi henia totona. Idia ura diba dahaka dainai edia dubu ia rakatania bona tomadiho ma ta ena memba ai ia lao, badina idia laloa unai tomadiho ese Dirava ena lauma helaga ia abia lasi. Henry ia gwau: ‘Guna lau haere henidia garina lau gari, badina guna lau dekenai edia siahu be bada. To heduru lau abia totona Iehova dekenai lau guriguri, bona lau ia hagoadaia dainai inai hereva momokani lau gwauraia diba: “Tomadiho orea badadia iboudiai amo, edena ta ese Dirava ena ladana, Iehova, ia gaukaralaia? Unai be Iehova ena Witness oreana, ani? Oi laloa Dirava ia ura ena ladana do idia gaukaralaia to ena lauma helaga do ia henidia lasi, a?” ’ Dubu biagudia ese iena hereva goevagoeva idia hakoikoia diba lasi. Dirava ena amo diba bona goada ia abia dainai, Henry ia moale bona harihari gari lasi dekenai Iehova ena Witness taudia ida ruma-ta-ruma-ta haroro gaukara ia karaia.

Oibe, Keristen momokani ena dala badinaia totona ita gari lasi be gau badana. Inai tanobada ena dokona be ia kahirakahira dainai, iseda abidadama do idia tohoa gaudia be momo. Satana ia ura lasi Dirava ena hesiai taudia be mauri hanaihanai ena helaro do idia abia, ia goada karaia edia abidadama karana Iehova dekenai do ia hadikaia totona. (Apokalupo 2:10 itaia.) To namona be ita haheauka noho. Ena be gari dainai ita manoka sisina, to Iehova ese ita ia durua diba ita goada lou totona. Hanaihanai ia dekena amo goada ita tahua iena ura do ita karaia noho totona. Namona be oi laloatao, Dirava ese manu ia havaraia bona idia dekenai diba ia atoa idia gari lasi totona, bona ia dekena amo gari lasi momokani karana ita diba. Oibe, namona be Keristen momokani taudia be “mai goada danu, inai bamona do [idia] hereva, ‘[Iehova] be lauegu durua Tauna, lau be lau gari diba lasi. Taunimanima edena bamona lau do idia hadikaia diba?’ ”​—Heberu 13:6.