Iehova Ena Witness Taudia Tanobada Hegegemadai—Poland

LAGANI 1989 ena siahu bona keru edia nega huanai, Baltic Davarana amo ia lao Black Davarana ai Komiunis gavamanidia idia ore matamaia. Politikol dalana dekenai Ist bona West ia hapararaia gauna idia kokia noho neganai, Eastern Europe besedia be sibodia edia dala idia tahua matamaia. Unai tano ta be Poland, mai ena ororo maragi namodia, taora gabudia, bona ororo badadia.a

Poland taudia be gaukara goadagoada taudia, bona hairai gaudia havaraia gaukara bona moale havaraia kara idia diba momo taudia bona saiens taudia badadia haida be Poland amo idia mai. To unai sibona lasi, Dirava ena Basileia ena sivarai namona harorolaia taudia edia orea ia bada noho.

Gari Lasi Dekenai Idia Hahedinaraia Koikoi Ia Noho

Poland dekenai taunimanima momo idia ura Baibel amo hereva momokani idia diba. To edia varavara eiava dekena taudia ese haida idia koudia. Hegeregere, Wrocław gabuna ai, ena ruma bese taudia bona ena turadia amo dagedage ia davaria neganai, kamonai hahine ta be Iehova ena Witness taudia ida ena Baibel stadi karana ia rakatania. To, ena natuna kekenina ese Gima Kohorona lalonai tomadiho koikoi ia hahedinaraia kara sivaraidia ia duahidia. Unai amo hereva momokani ia ura henia matamaia.

Baibel ia stadilaia hua 6 muridiai, unai kekeni be iena lalona ia hadaia tomadiho koikoi ibounai do ia rakatania totona. Iena dubu naria tauna ia lao henia ena lalohadai ia hadibaia totona. Unai tauna ese ia hamaoroa inai ia torea: “Lau, K​—​— P​—​—, ese Katolik tomadihona lau dadaraia.”

Murina Sunday ai, unai toretore be dubu lalonai idia duahia. Kekeni ena tubuna tau ia mase rea, bona kekeni ena tubuna hahinena ia tai. To, dubu taudia ma haida be mai moale ida idia hoa bona idia gwau: “Vadaeni, ta ia gari lasi to ia gwau iseda dubu lalonai koikoi be momo.” Unai gari lasi kekeni badana be hari bapatiso ia abia vadaeni taihuna ta lauma dalana dekenai, bona iena hanua lalonai Baibel stadi 7 ia hamatamaia.

‘Edia Huahua Amo’

Wiki ta ta iboudiai idia printaia gauna, Kujawy i Pomorze, ese “Edia Huahua amo Idia Do Umui Diba” ripotina idia karaia. Kahana ta dekenai, unai sivarai ia gwau Kerisendom lalonai tomadiho taudia be “idia abidia dae tomadiho ena hahegani idia matauraidia momokani lasi. Edia kara be idau momokani Iehova ena Witness taudia amo. Iehova ena Witness taudia be edia hereva hegeregerena idia karaia, bona edia hereva be Baibel ena hahegani herevadia.”

Sibodia idia gwauraidia Keristen taudia bona Witness taudia edia kara idia idau ia herevalaia murinai, unai ripoti be ma ia gwau: “Inai taudia be sedira edia abidadama ena hereva badadia bona hahegani idia diba lasi, bona nega momo idia badinadia lasi. . . . Edia lalohadai bona kara amo, Iehova ena Witness taudia ese idia hahedinaraia edia hereva bona edia kara be idia hegeregere, unai amo idia hamomokania idia be ‘peroveta koikoi taudia’ lasi, to, edia huahua amo idia ita diba. ‘Au ginigini ese vain ena anina ia atoa lasi, bona ava ginigini be fig huahua ena anina ia atoa lasi.’ (Mataio 7:​15-20).”

Hahine ta ese wiki ta ta iboudiai idia printaia gauna, Przyjaciółka, dekenai revareva ia siaia, ia lalohisihisi badina ena natuna merona ese Katolik Dubuna ia rakatania bona Iehova ena Witness ta ai ia lao. Edita tauna ena sisiba be dahaka? Ia gwau: “Bema emu natuna merona be Iehova ena Witness taudia ia bamodia hamatamaia, edia abidadama dekenai diba ia abia bona ia abia dae, unai be ia sibona, bona namona be oi abia dae bona oi matauraia. . . . Unai tomadiho oreana ena kara badadia be namo herea bona taunimanima edia noho dalana idia durua bada, hegeregere idia gini hebou tamona karana bona edia orea idia lalo-tamona momokani kara be idau. Idia be kara momokani taudia bona taunimanima ese idia abia dae taravatudia, idia noho hebou totona, idia badinadia namonamo, bona danu, edia hereva momokani hegeregerena mauri dalana idia karaia, idia abidia dae hahegani idia karaia. Unai kara be mai anina bada.”

[Footnotes]

[Box on page 9]

TANO RIPOTINA Hesiai Laganina 1993

HARORO TAUDIA EDIA NAMBA BADANA: 113,551

WITNESS TAUNA TAMONA INAI NAMBA AI: 339

MEMORIAL AI IDIA HEBOU TAUDIA: 235,642

PIONEER TAUDIA EDIA AVERES: 7,961

BAIBEL STADI EDIA AVERES: 79,131

BAPATISO ABIA MATAMATA TAUDIA: 8,164

KONGREGESEN EDIA MOMO: 1,397

BRENS OPESI: Nadarzyn

[Picture on page 9]

Poland ena brens opesi Lodz dekenai lagani 1948 ai

[Picture on page 9]

Kadi badana ida idia haroro, June 1948 ai, guna idia gwauraia East Prussia gabuna ai

[Picture on page 9]

Poland Betele taudia 72, January 1993 ai

[Picture on page 9]

Brens matamatana Nadarzyn ai