Mase Taudia be Edeseniai?

WEST Africa ena Yoruba taudia idia gwau: “Tanobada be maketi gabuna; guba be iseda noho gabuna.” Unai lalohadai be tomadiho momo dekenai idia abia. Unai lalohadai anina be tanobada be maketi gabuna bamona bona nega sisina lalonai ita vadivadi henia bena ita rakatania. Unai lalohadai dekenai, ita mase neganai ita lao guba dekenai, iseda noho gabuna korikorina.

Baibel ena hahediba ia gwau haida idia lao guba dekenai. Iesu Keriso ese iena abidadama aposetolo taudia ia hamaorodia, ia gwau: “Egu Tamana ena ruma dekenai noho gabudia be momo herea, . . . lau be do lau lao, gabu ta do lau karaia hegaegae umui emui. Bema lau lao, emui gabu ta do lau karaia hegaegae neganai lau be do lau giroa mai, lau dekenai do lau abia dae umui, vadaeni lau noho gabuna dekenai be umui danu unuseni do umui noho.”​—Ioane 14:​2, 3.

Iesu ia gwau lasi taunimanima namodia iboudiai be guba dekenai idia lao eiava guba be taunimanima edia noho gabuna. Haida be guba dekenai ia abidia lao badina tanobada do idia lohiaia. Iehova Dirava ia diba tanobada gavamanidia be tanobada taudia edia kara do idia biagua namonamo diba lasi. Unai dainai, dala ia hegaegaelaia guba gavamanina ta, eiava Basileia, ese gabeai tanobada do ia biagua bona Paradaiso ta ai do ia halaoa, guna ia ura hegeregerena. (Mataio 6:​9, 10) Iesu be Dirava ena Basileia ena Pavapava ai do ia lao. (Daniel 7:​13, 14) Ma haida be tanobada taudia amo do idia abidia hidi ia ida idia lohia totona. Baibel be guna ia peroveta, ia gwau guba dekenai idia lao taudia be “Basileia ta” ai do idia lao bona “tanobada do idia gunalaia.”​—Apokalupo 5:10.

Daidia be Guba Dekenai Do Idia Lao?

Unai guba lohia taudia be maduna badana do idia abia dainai, ita hoa lasi taravatu aukadia do idia badinadia unai dagi abia totona. Guba dekenai do idia lao taudia be Iehova dekenai diba maoro idia abia be namo bona namona be ena hereva idia badinaia. (Ioane 17:3; Roma 6:​17, 18) Namona be Iesu Keriso ese ia henia mauri davana idia abidadama henia. (Ioane 3:16) To ma gau haida idia karaia danu be namo. Namona be Dirava ese ia boiridia bona ia abidia hidi iena Natuna bagunai. (2 Timoteo 1:​9, 10; 1 Petero 2:9) Ma danu, namona be Dirava ena lauma helaga ese ia horodia bona “vara lou” bapatiso Keristen taudia ai idia lao. (Ioane 1:​12, 13; 3:​3-6) Danu, namona be Dirava idia abidadama henia ela bona idia mase.​—2 Timoteo 2:​11-13; Apokalupo 2:10.

Taunimanima momo idia mauri bona idia mase, edia namba ita duahia diba lasi, bena unai taravatu idia badinadia lasi. Idia momo be dala lasi Dirava momokanina dekenai diba idia abia totona. Ma haida ese Baibel idia duahia lasi bona Iesu Keriso dekenai diba sisina sibona idia abia eiava idia diba lasi momokani. Hari inai negai tanobada dekenai idia noho Keristen taudia korikoridia bogaragidia amo, Dirava ese haida sibodia ia abidia hidi guba maurina idia abia totona.

Unai dainai, guba dekenai idia daekau taudia edia namba be ia maragi. Iesu ese unai bamona taudia ia gwauraidia “orea maragi” ta. (Luka 12:32) Gabeai, aposetolo Ioane dekenai ia hahedinaraia guba dekenai Keriso ida do idia lohia taudia be “tanobada dekena amo ia hamauria” bona edia namba be 144,000 sibona. (Apokalupo 14:​1, 3; 20:6) Tanobada dekenai idia noho vadaeni taunimanima bilion ida unai namba ita hahegeregerea neganai, ita diba unai be namba maragina momokani.

Guba Dekenai Do Idia Lao Lasi Taudia

Guba dekenai do idia lao lasi taudia dekenai dahaka do ia vara? Tomadiho haida ese idia hahedibalaia hegeregerena, hisihisi hanaihanai gabuna dekenai hisihisi idia ania noho, a? Lasi momokani, badina Iehova be lalokau Diravana. Lalokau tama sina be lahi lalonai edia natudia idia negedia lasi, bona Iehova be unai dala dekenai taunimanima ia hahisidia lasi.​—1 Ioane 4:8.

Idia mase taudia momo be gabeai tanobada paradaisona dekenai toreisi lou do idia abia diba. Baibel ia gwau Iehova ese tanobada ia havaraia “taunimanima ese idia noholaia totona.” (Isaia 45:18) Salamo torea tauna ia gwau: “Guba be Iehova ena guba, to ia ese tanobada be taunimanima natudia dekenai ia henia vadaeni.” (Salamo 115:16) Guba lasi to tanobada be taunimanima edia noho gabuna ela bona hanaihanai.

Iesu be guna ia peroveta, ia gwau: “Nega ta do ia mai, mase guria gabu dekenai idia noho taudia ibounai ese iena gadona [unai be Iesu, “Taunimanima ena Natuna” ena] do idia kamonai. Vadaeni guria gabu dekena amo do idia toreisi.” (Ioane 5:​27-29) Keristen aposetolo Paulo ese ia hamomokania, ia gwau: “Lau be mai egu abidadama Dirava dekenai . . . Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Hisihisi auna dekenai, Iesu be helalo-kerehai kara dika tauna dekenai ia gwauhamata, ia gwau toreisi lou amo tanobada paradaisona dekenai mauri do ia abia.​—Luka 23:43.

To tanobada dekenai toreisi lou amo mauri do idia abia mase taudia momo be hari edena bamona? Iesu ena hesiai gaukara lalonai ia vara gauna ta ese ita ia durua unai henanadai ena haere ita abia totona. Iena turana Lasaro ia mase. Iesu be ia hatorea isi lou totona ia do lao lasi neganai, Iena hahediba taudia Ia hamaorodia, ia gwau: “Iseda turana Lasaro be ia mahuta noho, to lau lao, do lau haoa.” (Ioane 11:11) Unai dainai Iesu ia gwau mase be mahuta bamona, nihi lasi mahuta momokanina.

Mase Dekenai Ia Mahuta

Ma Baibel siri haida lalodiai unai lalohadai hegeregerena mahuta be mase bamona idia gwauraia. Idia gwau lasi taunimanima be mai edia mase diba lasi soulina ta, bona mase neganai lauma taudia edia gabu ai idia hanai. To, Baibel ia gwau: “Mase taudia be gau ta idia diba lasi . . . Edia lalokau bona edia badu bona edia mama be idia ore vadaeni . . . oi lao henia gabuna mase taudia edia gabu lalonai gaukara ta, lalohadai ta, lalo-parara ta, bona aonega ta be lasi.” (Kohelete 9:​5, 6, 10) Ma danu, salamo torea tauna ia gwau taunimanima be “ena tano dekenai ia giroa lou; bona unai dina dekenai ena lalohadai idia ore.”​—Salamo 146:4.

Unai Baibel siridia ese idia hahedinaraia goevagoeva mase dekenai idia mahuta taudia be ita idia itaia lasi eiava ita idia kamonai henia lasi. Hahenamo eiava dika idia henia diba lasi. Idia be guba lalonai lasi, bona sene taudia edia gabu ta dekenai idia noho lasi. Idia be mauri lasi, idia noho lasi.

Dirava ena nega korikori ai, mase dekenai hari idia mahuta noho taudia bona ia lalodia tao taudia be mase amo do idia toreisi lou bona do idia mauri paradaiso tanobadana dekenai. Unai tanobada be hari tanobada dekenai taunimanima ese idia davaria miro, hekwarahi, bona hekwakwanai amo do ia goeva. Unai nega be moale bada negana! Unai Paradaiso lalonai do idia mauri hanaihanai diba, badina Salamo 37:29 ese ita dekenai ia hamomokania, ia gwau: “Kara maoromaoro taudia ese tanobada do idia abia, do idia noholaia hanaihanai.”

[Box on page 6]

MASE TAUDIA TOMADIHO HENIDIA KARANA LAU RAKATANIA

“Lau mero neganai, egu tamana lau durua iena mase tamana dekenai boubou ia henia hanaihanai neganai. Nega ta egu tamana be gorere dikana amo ia namo lou neganai, babalau tauna ia gwau namona be tamagu be ena mase tamana dekenai nanigosi, maho, kola uhedia, bona inuinu muramurana ia bouboulaidia, ena gorere amo ia namo lou dainai ia tanikiu henia totona. Danu, egu tamana be sisiba ia abia iena mase sene taudia ia noidia ma gorere haida bona dika do ia abia lasi totona.

“Egu sinana ese boubou gaudia ia hoidia, egu tubuna tauna ena guri gabuna dekenai do idia bouboulaidia totona. Guri gabuna be aiemai ruma badinai, vaia emai gabu taudia edia kara hegeregerena.

“Emai turadia, varavara, bona dekena taudia ai boiridia unai boubou karana idia itaia totona. Egu tamana be unai kara karaia totona dabua namodia ia hahedokilaidia, bona helai gauna dekenai ia helai neganai unai boubou patana ia vaira henia; boubou patana dekenai guna idia bouboulaidia vadaeni nanigosi edia kwaradia turiadia be laini dekenai idia atodia. Egu gaukara be botolo amo uaina lau bubua kapusi maragina ta lalonai, bona egu tamana dekenai lau henia. Vadaeni, boubou totona tano dekenai ia bubua. Egu tamana be nega toi iena tamana ena ladana ia boiboilaia bona ia guriguri henia, gabeai dika ta amo ia mauri totona.

“Kola uhedia idia henia, bona mamoe tau ta idia hamasea, idia nadua, bona idia noho taudia iboudiai ese idia ania. Ane idia abia bona gaba idia botaia neganai, lau danu lau aniani bona lau mavaru. Ena be ia buruka to egu tamana be mavaru ia karaia namonamo bona mai goada ida. Nega haida ia guriguri iena sene taudia ese idia mauri noho taudia iboudiai idia hanamodia totona, bona ia hereva murinai, lau danu, be ai haere, ai gwau Ise, anina be ‘Unai ia vara be namo.’ Egu tamana lau raraia mai egu ura bada bona egu hemataurai ida bona lau ura bada egu lagani ia hegeregere neganai idia mase vadaeni sene taudia dekenai boubou karana do lau karaia.

“Ena be boubou momo idia henidia, to emai ruma bese be maino ai davaria lasi. Ena be egu sinana ena natudia mero toi idia mauri noho, to ena natudia kekeni toi idia mase; idia do maragi neganai idia mase. Egu sinana ia rogorogo lou neganai, egu tamana be boubou namo hereadia ia karaia unai natuna ia vara namo totona.

“Egu sinana ese ma kekeni ta ia havaraia. Lagani rua muridiai unai natuna ia gorere bona ia mase. Egu tamana ese babalau tauna ena hereva ia tahua; unai tauna ia gwau inai tauna ta ese unai mase ia havaraia. Babalau tauna ia gwau unai natuna ena ‘souli’ ese hari inai tauna ia tuari henia lou totona, namona be boubou dekenai ia araia noho au ta, inuinu muramura botolo ta, bona sisia maragina ta idia henia. Namona be ia araia noho auna be guri latanai idia atoa, inuinu muramurana be guri latanai idia nevaria, bona sisia maragina ia do mauri noho lalonai guri badinai idia guria. Unai idia karaia mase kekenina ena souli idia hanogaia bona ena mase ena davana ia henia lou diba totona.

“Unai inuinu muramurana ena botolo bona ia araia noho auna lau abia lao guri gabuna dekenai, bona egu tamana ese sisia maragina ia abia lao, bena babalau tauna ena hereva hegeregerena ia guria. Ai ibounai ai laloa dina 7 idia do ore lasi lalonai mase kekenina ena souli ese ia mase haraga karana ia havaraia tauna do ia hadikaia ore. Hua rua idia hanai bona unai gabu dekenai ta ia mase sivaraina be lasi. Vadaeni, egu lalohadai gunadia lau hamomokanidia lasi.

“Unai neganai egu lagani be 18. Unai nega sisina murinai lau be Iehova ena Witness taudia lau davaridia, bona Revareva Helagadia amo lau dekenai idia hahedinaraia mase taudia be namo eiava dika idia havaraia diba lasi mauri taudia dekenai. Dirava ena Hereva ena diba be ramuna bamona egu kudou lalonai ia tubu neganai, egu tamana lau hamaoroa ia ida do lau lao diba lasi mase taudia dekenai boubou henidia totona. Lau hamaoroa neganai ia badu, badina ia gwau lau ese ia lau rakatania dainai. To ia itaia neganai lau ura lasi lau davaria matamata abidadama lau dadaraia, egu tomadiho karana Iehova dekenai ia inai henia lasi.

“April 18, 1948 neganai, egu gwauhamata be ranu bapatiso amo lau hamomokania. Unai negana amo, mai moale bada bona lalo-maino ida Iehova lau hesiai henia noho, ma haida lau durudia mase sene taudia tomadiho henidia karana amo idia raka siri totona, badina idia ese ita idia durua diba lasi bona ita idia hadikaia diba lasi.”​—J. B. Omiegbe, Benin City, Nigeria amo, ese inai sivarai ia siaia.

[Picture on page 6]

Mase taudia be paradaiso tanobadana dekenai toreisi lou do idia abia neganai moale bada do idia davaria