Iesu Oi Guriguri Henia be Maoro A?

TAUNIMANIMA haida idia laloa Iesu idia guriguri henia be maoro. Germany ai memero kekeni momo idia hadibadia, namona be Iesu do idia guriguri henia guna bena do idia aniani.

Baibel ese ia hahedinaraia Iesu be mai ena dagi bada hereana guba ai. Anina be ita guriguri henia be maoro, a? Reana oi ese Iesu oi guriguri henia badina be oi lalokau henia, to Iesu ese unai bamona guriguridia edena bamona ia lalodia?

Inai bamona ai henanadai, badina be Baibel ia gwau Iehova Dirava be “Guriguri Kamonaia Diravana.” Unai hegeregerena, Dirava ena hesiai taudia idaunegai idia noho, Israel taudia bona ma haida, ese Iehova, Siahu Ibounai Diravana, sibona mo idia guriguri henia.​—Salamo 5:​1, 2; 65:2.

Dirava ena Natuna, Iesu, be taunimanima na kara dika bona mase amo hamauridia totona tanobada ia mai neganai, unai ia haidaua, a? Lasi. Iehova idia guriguri henia noho. Iesu be tanobada ai ia noho neganai, ia ese ena Tamana gubai ia noho ia guriguri henia loulou, bona haida ia hadibadia idia danu do idia guriguri henia. Ia ese ia gwauraia gurigurina, Lohiabada ena Guriguri idia gwauraia gauna, be mani oi laloa. Iesu ese ita ia hadibaia lasi ia do ita guriguri henia; ia gwau inai bamona do ita guriguri: “Aiemai Tamana e, guba dekenai oi noho, oiemu ladana do ai hahelagaia.”​—Mataio 6:​6, 9; 26:​39, 42.

Vadaeni, inai do ita dibaia namonamo totona, guriguri ena anina korikorina mani ita tahua.

Guriguri be Dahaka?

Guriguri iboudiai be tomadiho karadia. The World Book Encyclopedia ese inai ia hamomokania, ia gwau: “Guriguri be tomadiho dalana ta, ia lalonai ta ese Dirava ia hanamoa, o ena kerere be ia vairanai ia gwauraia hedinarai, o ia noinoi henia.”

Nega ta Iesu ia gwau: “Ia torea vadaeni, ‘Iehova emu Dirava do oi tomadiho henia; ia sibona mo ena hesiai do oi lao henia.’ ” Iesu ese unai taravatu ia badinaia dainai, iena Tamana, Iehova Dirava, sibona mo ia guriguri henia.​—Luka 4:8; 6:12, NW.

Eda Guriguri ai Iesu Ita Gwauraia

Iesu be boubou gauna ta bamona ia mase taunimanima davalaidia totona, bena Dirava ese ia hatorea isi lou bona dagi badana ia henia. Unai ibounai ese guriguri dalana maorona ia haidaua. Edena dala amo?

Aposetolo Paulo ese ia hahedinaraia Iesu ena dagi be mai anina bada guriguri ai; ia gwau: “Unai dainai Dirava ese ia abia isi, dagi bada hereana ia henia bona lada ta ia henia, lada iboudiai ia hereadia ladana; bena Iesu ena ladana dainai guba taudia bona tanobada taudia bona tanobada henuna taudia iboudiai do idia tui diho; bona mala iboudiai ese Keriso be Lohiabada do idia gwauraia, eda Tamana Dirava hanamoa totona.”​—Filipi 2:​9-11, NW.

Inai hereva, “Iesu ena ladana dainai . . . iboudiai do idia tui diho,” anina be ia do ita guriguri henia be namo, a? Lasi. Inai hereva Greek gado ai idia torea ena anina be inai: “Unai lada dainai idia tui diho taudia idia (πᾶν γόνυ) tomadiho mai edia lalo-tamona ida.” (A Grammar of the Idiom of the New Testament, G. B. Winer ese ia torea) Momokani, Dirava ese ta ena guriguri do ia abia dae totona, namona be “Iesu ena ladana dainai” Iehova Dirava do ia guriguri henia bona do ia hanamoa. Unai dainai Paulo ia gwau: “Dirava do umui noia. Bona umui noia negadia ibounai, mai tanikiu danu do umui guriguri henia.”​—Filipi 4:6.

Dala ta be gabu ta ia lao hegeregerena, Iesu be Siahu Ibounai Diravana dekenai ia lao ‘dalana.’ Iesu ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioane 14:6) Unai dainai namona be Iesu do ita guriguri henia lasi, to iena amo Dirava do ita guriguri henia be namo.a

Reana haida idia henanadai, idia gwau, ‘To Baibel ia gwau Iesu be guba ai ia noho neganai, Stefano bona aposetolo Ioane ruaosi ese idia hereva henia, ani?’ Unai be momokani, to idia guriguri henia lasi; ruaosi be matahanai ai idia itaia negadiai idia hereva henia. (Kara 7:​56, 59; Apokalupo 1:​17-19; 22:20) Mani oi laloa, ta ese Dirava ia hereva henia neganai, reana unai be guriguri lasi. Adam bona Eva be Eden ai idia kara dika murinai, Dirava ese ia hahemaoro henidia neganai idia hereva henia, ekskius idia gwauraidia, to unai be guriguri herevana lasi. (Genese 3:​8-19) Unai dainai, bema ta ia gwau Stefano o Ioane ese Iesu ia hereva henia sivaraina ese ia hahedinaraia do ita guriguri henia be namo, iena lalohadai be kerere.

Iesu Ena Ladana Edena Bamona Idia “Hahanea”?

Oi daradara noho a, badina be oi laloa Iesu oi guriguri henia be maoro, a? Hahine ta ese Watch Tower Society ena brens opesi ta ia tore henia, ia gwau: “Madi, emui hereva, Keristen taudia ginigunadia ese Iesu idia guriguri henia lasi herevana, be lau do abia dae lasi.” Ia ese 1 Korinto 1:​2 (NW) ia laloa, unai siri lalonai Paulo ese “eda Lohiabada, Iesu Keriso, ena ladana idia hahanea taudia iboudiai” ia gwauraidia. To, mani inai oi laloa: Ia torea herevana, inai hereva “hahanea” be ia ida idia hahegeregerea herevana, ena anina be guriguri sibona mo lasi.

Keriso ena ladana be edena bamona idia “hahanea”? Dalana ta be, ena orea taudia ese idia gwauraia hedinarai ia be Mesia bona “tanobada taudia edia Hahemauri Tauna,” bona ena ladana ai hoa karadia momo idia karaia. (1 Ioane 4:14; Kara 3:6; 19:5) Unai dainai, The Interpreter’s Bible ia gwau inai hereva, “eda Lohiabada ena ladana hahanea, . . . anina be ena lohia dagina gwauraia hedinarai, to guriguri henia lasi.”

‘Eda Lohiabada, Iesu Keriso, ena ladana ita hahanea’ dalana ma ta be inai: Ia ita abia dae, bona ena rarana, ia hebubu gauna, be ita abidadama henia, ia be iseda kara dika gwauatao karana ena badina. (Kara 10:43 bona 22:16 hahegeregeredia.) Bona Iesu ena amo Dirava ita guriguri henia negadiai, iena ladana ita gwauraia. Vadaeni, ena be Baibel ese ia hahedinaraia Iesu ena ladana ita hahanea diba, to ia hahedinaraia lasi ita guriguri henia be maoro.​—Efeso 5:20; Kolose 3:17.

Iesu ese Ita Ia Durua Daladia

Iesu ese ena hahediba taudia ia gwauhamata henidia, ia gwau: “Egu ladana dekenai do umui noia gaudia ibounai do lau karaia.” Anina be do ita guriguri henia, a? Lasi. Iehova Dirava ita noia​—Iesu ena ladana ai. (Ioane 14:​13, 14; 15:16) Dirava ita noia, ena Natuna, Iesu, ese ena siahu bada do ia gaukaralaia, ita do ia durua totona.

Hari inai negai Iesu ese ena orea taudia edena bamona ia hereva henidia? Paulo ia gwau horoa Keristen taudia edia ekalesia be tauanina ta bamona bona Iesu Keriso be ena kwarana bamona. “Kwarana” ese “garugaru bona varovaro” amo ena ekalesia taudia ia ubudia bona ia hakaudia. (Kolose 2:19) Unai hegeregerena, hari inai negai Iesu ese “taunimanima,” lauma dalanai idia hegeregere taudia, ia henidia, orea do idia naria bona kerere taudia do idia matahakani henidia totona. Orea taudia ta ta ese Iesu do idia hereva henia o do idia guriguri henia dalana be lasi, to namona be idia ese Iesu ena Tamana, Iehova Dirava, do idia guriguri henia.​—Efeso 4:​8-12.

Iesu be Edena Bamona Oi Matauraia?

Taunimanima hamauridia karana ai, Iesu ena gaukara be bada! Aposetolo Paulo ia gwau: “Hahemauri be ia sibona ese ia henia diba. Badina be tanobada ibounai lalonai ladana idauna ta Dirava ese ia henia lasi, ita do ia hamauria totona.” (Kara 4:12) Iesu ena ladana ena anina bada be oi lalo-pararalaia, a?

Bema Iesu ita guriguri henia lasi neganai, unai amo iena dagi ita hadikaia lasi. To, Iesu ena ladana ai ita guriguri neganai, ita matauraia unai. Natu ese edia tamadia sinadia edia hereva badinaia karana amo idia matauraidia hegeregerena, Iesu Keriso ena hahegani badinadia karana amo ia ita matauraia; ena hahegani matamatana, do ita lalokau heheni haheganina, ita badinaia neganai, ia ita matauraia bada.​—Ioane 5:23; 13:34.

Guriguri Maoromaorodia

Oi ura guriguri maoromaorodia do oi gwauraidia, a? Vadaeni, Iehova Dirava oi guriguri henia, iena Natuna, Iesu, ena ladana ai. Dirava ena ura oi dibaia, bena emu diba be emu guriguri lalodiai oi hahedinaraia. (1 Ioane 3:​21, 22; 5:14) Salamo 66:20 ena hereva amo goada oi abia: “Dirava do lau hanamoa, badina be egu guriguri ia dadaraia lasi, ena hebogahisi lauegu amo ia abia oho lasi.”

Hari ita diba vadaeni guriguri be tomadiho dalana ta, bona inai dala amo Siahu Ibounai Diravana sibona mo ita tomadiho henia be maoro. Iehova Dirava ita guriguri henia negadiai, ita hahedinaraia Iesu ena hereva ita abia dae; ia gwau: “Inai bamona do umui guriguri. ‘Aiemai Tamana e, guba dekenai oi noho.’ ”​—Mataio 6:9.

[Footnotes]