Gorere Tohoa Dalana Namona A?

Tadikaka e: Emui lalohadai inai gau dekenai be mani umui hamaorogu. Toana be hahine ta ese gorere momo ia hanamodia, to ena kara ta lau daradaralaia. . . . Gorere ta hanamoa totona edena muramura bona hida do ia gaukaralaia be do ia diba totona, gorere tauna ese ena imana ia abia isi murinai, muramura botolona be ena kopina ai ia atoa, . . . bena ena imana ia veria diho toho. Ena hekwarahi, ena imana veria diho ai ia hekwarahilaia hekwarahina, ena bada hegeregerena, muramura bona hidaosi be ia ese ia gwauraia hidi. Ia gwau eleketron edia siahu be muramura amo idia aru lao, botolo ena koua gauna amo ela bona ena tauanina ena kahana ta ai, bena ia hagoadaia. Unai kara be tano henuna ranuna babalau amo tahua karana hegeregerena, a?

INAI revareva lalonai ia gwauraia karana be haida ese idia karaia, gorere bona lalo-hekwarahi idauidau tohodia totona. Herevana hida ese idia karaia, to revareva torea tauna ese ia daradaralaia be maoro, eiava?

Gorere Hanamodia Daladia Iboudiai Do Ita Abidia Dae be Namo, A?

Idaunega amo, taunimanima ese gorere edia badina bona hanamodia daladia idia tahudia. Israel taudia be namo, badina be idia diba idia be kara dika taudia, bona Dirava ese taravatu ia henidia, unai taravatu bema idia badinadia, gorere momo do idia abidia lasi, bona unai gorere do idia daihanai lasi. (Levitiko 5:2; 11:​39, 40; 13:​1-4; 15:​4-12; Deuteronomi 23:​12-14) To Dirava ena bese taudia ese doketa korikoridia edia heduru idia tahua danu.​—Isaia 1:6; 38:21; Mareko 2:17; 5:​25, 26; Luka 10:34; Kolose 4:14.

To idaunegai Babulono bona Aigupito taudia be idau vaitani! Edia “doketa” ese idia hanamodia toho negadiai, gau idauidau idia iusilaidia kerere. Aigupito revarevana ta ia gwau, matakepulu hanamoa totona doketa ta ese boroma ena matana, auri paudana, tano kakakakana, bona hani ia mikisidia, bena unai muramura be matakepulu tauna ena taiana lalonai ia bubua vareai! Revareva gunana ta ia gwau unai kara ena anina be “namo herea momokani.” Idia ura henia, reana badina be ia be hoa gauna.

Babulono taudia bona Aigupito taudia ese babalau idia gaukaralaia momo.a Doketa helagana ese gorere tauna ia hamaoroa laga be mamoe ta ena udu-baubauna lalonai do ia hiriria vareai, badina be ia laloa siahu ta be iena amo do ia aru lao, mamoe lalonai do ia vareai, bena toa do ia karaia. Bena mamoe idia alaia mase, badina be idia laloa ena asena ena toana ese do ia hahedinaraia gorere tauna ena gorere be dahaka eiava dahaka be ia dekenai do ia vara.​—Isaia 47:​1, 9-13; Esekiel 21:21.

To, idaunegai Israel ai, Dirava gari henia doketana ta ese babalau ia gaukaralaia lasi. Dirava ena hahegani be: “Umui bogaragidiai inai bamona tauna ta ia noho diba lasi: . . . meamea tauna ta, . . . eiava babalau tauna ta . . . Badina be unai bamona idia karaia taudia iboudiai be dika rohoroho Iehova vairanai.” (Deuteronomi 18:​10-12; Levitiko 19:26; 20:27) Hari inai negai unai be mai anina, Dirava ena Keristen hesiai taudia dekediai. Namona be do idia naria namonamo.

Hari inai negai taunimanima momo ese gorere edia toadia tahudia daladia matamatadia bona gorere hanamodia daladia matamatadia idia abidia dae. Namona be ta ta be sibodia edia lalodia do idia hadailaidia. (Mataio 7:1; ma danu Roma 14:​3, 4 itaia.) To, namo lasi Keristen tauna ta ese unai gau do ia lalodia momo bena unai dainai ena haroro gaukarana, taunimanima hamauridia dalana momokanina tamona, be do ia laloa maragi. (1 Timoteo 4:16) Baibel ia gwau lasi tanobada matamatana ai gorere be medikal karadia, vitamin, ava, eiava aniani amo do idia hanamodia vaitani. Dala tamona be inai: Iesu ena boubou karana dainai Dirava ese taunimanima edia dika do ia gwaudia tao.​—Isaia 33:24; Apokalupo 22:​1, 2.

Dahaka Siahu Idia Gaukaralaia?

Hidio ena goada tohoa dalana ta ai herevalaia vadaeni; Keristen tauna ese dahaka do ia laloa be namo, sibona ena lalona be unai kara dekenai do ia hadaia neganai?

Hidio ena goada o ena siahu tohodia daladia haida be doketa korikoridia ese idia badinadia, bona unai dala idia daradaralaidia taudia be momo lasi. Hegeregere, polio gorerena ese hidio ia hamanokaia diba, bona unai gorere hanamodia karadia ai doketa ese hidio bona ia marere daladia idia tahudia. Unai dala amo idia ese tauanidia kahadia idia mase taudia danu idia hanamodia. Taunimanima momo ese unai gorere hanamodia daladia idia lalo-pararalaidia.

To hidio tohoa dalana ta, inai hereva ena matamana ai ia noho revarevana ia torea tauna ese ia henanadailaia dalana, be edena bamona? Unai dala amo, aniani, ava, o vitamin idia tohodia, gorere tauna do idia hanamoa eiava do idia hadikaia. Ena imana ia toia roro, bena muramura tauna ese ia doria diho, ena hidio ena goada tohoa totona. Unai murinai gorere tauna ese muramura ta o gau idauna ta iena uduna lalonai, o ena bogana latanai, o ena imana lalonai ia atoa, bena muramura tauna ese ena imana ena hidio ia tohoa lou. Idia gwau, bema ena tauanina be unai muramura ai ia dabu, ena imana do idia tohoa lou neganai, do idia davaria ia goada ia lao vadaeni; bema ia hadikaia, ena hidio ia manoka ia lao vadaeni.b

Unai kara idia karaia toho vadaeni taudia haida be idia laloa tauanina ena siahu idauidau dainai anina ia havaraia. Idia gwau siahu idauidau idia kara heheni; ena be saiens taudia bona doketa taudia ese edia badina idia gwauraia diba lasi, to edia anina idia hedinarai.

To, buka ladana Applied Kinesiology ia gwau: “[Buka] haida idia gwau tauanina hagoadaia muramuradia tohodia dalana be, ta ese muramura be ena imana ai ia dogoatao neganai, ena hidio ena goada idia tohoa. Unai hahetoho dalana hamomokanilaia gauna be lasi. . . . Hahetoho ia karaia tauna ese unai kara bema ia abidadama henia bada, reana unai kara amo diba maoromaoro do ia davaria be auka.” ‘Unai hahetoho karana ia manadalaia tauna ese sibona ena ura hegeregerena ia haidaua sisina diba, bena unai amo gorere tauna ena hidio ena goada ena toana ia haidaua diba.’

Oi Naria Namonamo!

To hidio tohoa karadia haida ese unai idia hanaia. Hegeregere, bema taunimanima burukana ta o beibi ta be ia manoka dainai ena hidio tohoa dalana be lasi, taunimanima ma ta ese ena tauanina ia daua toho lalonai, muramura tauna ese unai taunimanima ena imana ia tohoa. Animal danu be unai bamona idia tohodia. Taunimanima ta ese ena imana gorere gauna latanai ia atoa, bena muramura tauna ese ena imana ia tohoa.

Unai kara do ai hahemaoro henia be hegeregere lasi, to reana oi henanadai, oi gwau, ‘Tauanina siahudia ese unai anina idia havaraia, a?’ Saiens taudia ese idia hamomokania vadaeni kosmik rei, maikroweivi, bona elektromagnetik reidieisen idauidau be idia noho. To mauri gaudia iboudiai, beibi bona animal danu, lalodiai be siahu ia noho a, unai siahu be idia edia amo ia aru lao bona toa be ma ta lalonai ia karaia, a? Babulono taudia idia laloa siahu be mamoe ta dekenai ia aru lao bena ia haidaua. Mani oi be sibomu oi henanadai, ‘Lau laloa hari inai negai unai bamona gauna be taunimanima bona animal dekediai ia vara diba, a? Eiava, reana unai toa edia badina be idau, a?’

Gorere hanamodia taudia haida idia gwau, idia tauadae auridia amo o auri idaudia amo taunimanima ta ena “siahu” idia hahetohoa diba. Idia gwau, idia ta ena “siahu” be gorere tauna ta ena ida idia kara heheni neganai, unai auri idia marere. Unai kara ia karaia bona ia torelaia hahinena ta ese nega haida unai dala amo gorere edia toadia ia tahudia. Ma ia gwau, ia ese taunimanima ta ta idia gegedia “siahudia” mai edia kala be ena lalona ena matana ai ia itadia diba. Ia gwau unai dala amo ta ena tauanina lalonai ia roha vareai neganai, kensa, rara ena sel, bona jems ia itadia diba, bona nega gunana danu.c

Ai gwauraia vadaeni hegeregerena, ta ena imana ena goada idia hahetohoa, ena lalo-metau ena bada hahetohoa totona. Buka ta ia gwau: “Bema oi ura ta ena lalona danu be nega tamona do oi tohoa, oi nanadaia, oi gwau, ‘Oi be mai emu hekwakwanai ta, a?’ Nega ta ta unai ese ena imana do ia hamanokaia, bema aniani ena hahegoada siahuna ai ia dabu neganai.” Haida ese unai idia gaukaralaia, ‘ta ena tauanina o ena lalona o ena abidadama ia hadikaia gauna ia vara laganina do idia davaria totona.’ Ma haida ese idia gaukaralaia, dina ta ta ai idia vara gaudia be ‘oibe eiava lasi’ herevadia amo do idia lalohadailaidia totona.

Momokani, hidio ena goada be unai dala amo idia tohoa taudia momo idia gwau edia kara be unai hegeregerena lasi, bona babalau idia gaukaralaia lasi, bona haida edia lalodia idia tohodia lasi. To, edia kara idia karaia, badina be idia laloa taunimanima ta ta lalodiai idia noho siahudia be dala idau hereadia amo idia tohodia diba, eiava sibodia idia gwauraia siahu idauna abia taudia sibodia mo ese idia tohodia diba, a?

Keristen taudia ese unai gau idia lalodia namonamo. Dirava ese Israel besena ia hamaorodia, ia gwau: “Babalau bona hebou helagana be hegeregere lasi lau dekenai.” (Isaia 1:13) Unai bese ese tomadiho momokani dalana idia rakatania neganai, ‘bagu-haoro bona meamea karadia idia karaia.’ (2 Hanua Pavapavadia 17:17; 2 Sisiga 33:​1-6) Mari amo diba idia tahua, bena “babalau” herevadia idia gwauraidia.​—Sekaria 10:2.

Reana hidio tohoa karadia haida be kerere lasi bona ta idia hadikaia lasi. To ia hedinarai goevagoeva, unai matahanai karadia bona taunimanima ta ta idia gegedia siahudia, bona tauadae aurina gaukaralaia karana, edia toadia be babalau ena toana hegeregerena. Namona be Keristen taudia ese babalau karadia idia karaia lasi. Namo lasi idia karaia toho, badina be Satana ena dobu gaudia idia dibadia toho lasi. (Apokalupo 2:24) Bema kara ta ena toana be babalau ena toana hegeregerena, namona be ia dekenai do idia naria namonamo, badina be Baibel ese ia gwauraia dika.​—Galatia 5:​19-21.

Ai ura lasi muramura taudia edia hereva bona edia kara do ai tahudia bena do ai hahemaoro henidia. Ena be reana oi laloa unai kara haida lalodiai babalau idia gaukaralaia, to ia hedinarai goevagoeva idia karadia toho taudia momo ese babalau gaukaralaia dalana idia tahua lasi. Reana badina be idia ura dikadika edia gorere do idia hanamodia dainai. To haida be gabeai idia laloa namona be do idia hadokoa, babalau ai do idia kerere garina.

Namona be ta be sibona ena lalona do ia hadaia, inai kara do ia karaia eiava lasi. To namona be Keristen taudia ese Dirava ena sisiba do idia laloatao: “Lalo-duhu tauna ese hereva iboudiai ia abidia dae, to lalo-parara tauna ese ia rakalaia dalana be ia laloa namonamo.” (Hereva Lada-isidia 14:15) Unai be mai anina, gorere hanamodia daladia heagilaidia herevadia dekediai danu.

Satana ia ura bada Dirava ena hesiai taudia be tomadiho momokani amo do ia veridia oho. Iena lalo-ani dainai bema gau idaudia idia lalodia bada, ia moale, bona bema babalau bamona karadia idia ura henidia, ia moale bada, badina be reana unai dala amo babalau lalonai do ia veridia vareai diba.​—1 Petero 5:8.

Ena be Keristen taudia be Mose ena Taravatu henunai lasi, to Iehova ena lalohadai babalau karadia dekediai be ia idau lasi. Ia ese Israel taudia ia haganidia, “bagu-haoro karadia ia karaia tauna ta, eiava meamea tauna ta, eiava mari karadia ia karaia tauna ta, eiava babalau tauna ta” be idia bogaragidiai do ia noho lasi. “Unai bamona idia karaia taudia iboudiai be dika rohoroho Iehova vairanai . . . Oi be mai emu kerere lasi do oi gini, Iehova, emu Dirava, vairanai.”​—Deuteronomi 18:​10-13.

Unai dainai, aonega dalana be inai: “Dirava ese ia henia tuari dabua ibounai” be ita Keristen taudia ese do ita dokia oho lasi, “badina be iseda tuari be . . . lauma dikadia danu, guba dekenai idia noho”!​—Efeso 6:​11, 12.

[Footnotes]

[Box on page 19]

Watch Tower Society ese taunimanima ia hadibadia lasi edena medikal karadia do idia abidia dae be namo. To, bema toana be unai kara haida be Baibel ena taravatu utudia karadia, unai ia gwauraia hedinarai. Bena idia ta ta ese idia lalohadailaia diba.