Iehova ese Oi Ia Hagoadaia Diba
“Ia ese hesiku tauna ia hagoadaia; bona goada lasi tauna dekenai goada ia habadaia.”—ISAIA 40:29.
1, 2. Dahaka dahaka ese Iehova ena siahu bada herea idia hahedinaraia?
IEHOVA DIRAVA “ena siahu be bada herea.” Ia karadia gaudia edia hairai ese idia hahedinaraia “ena siahu be ia doko diba lasi, . . . ia sibona be Dirava momokani.” Unai idia abia dae lasi taudia be “Lau diba lasi” herevana idia gwauraia diba lasi.—Salamo 147:5; Roma 1:19, 20.
2 Saiens taudia ese hisiu oreadia badadia idia tahudia goadagoada neganai, Iehova ena siahu ia hedinarai goevagoeva. Hanuaboi ai, ori be lasi neganai, bema guba oi raraia, salamo tauna ese ia laloa bamona oi danu oi laloa, ani? Ia gwau: “Emu guba lau itaia, oiemu ima kwakikwakidia ese idia karaia, hua bona hisiu danu oi ese oi atodia; taunimanima be dahaka oi ese oi laloa, bona taunimanima natuna be daika oi ese oi naria?” (Salamo 8:3, 4) Iehova ese ita taunimanima ia naria namonamo! Ia ese tau bona hahine ginigunadia be noho gabuna mai hairaina tanobada ai ia henidia. Ena tano be mai ena siahu tubutubu gaudia do ia havaradia, bena edia huahua namodia do idia anidia. Dirava ena siahu dainai unai gau idia vara bena taunimanima bona animal edia tauanidia idia hagoadadia.—Genese 1:12; 4:12; 1 Samuel 28:22.
3. Dahaka danu ese Dirava ena siahu ia hahedinaraia?
3 Guba gaudia bona tanobada gaudia ese ita idia hamoalea, bona Dirava ena siahu be ita dekenai idia hahedinaraia danu. Aposetolo Paulo ia gwau: “Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani . . . badina be edia matana dekenai Dirava ese ia karaia gaudia ibounai idia itaia vadaeni.” (Roma 1:20) Ma gau ta danu ese iena siahu ia hahedinaraia, unai danu do ita laloa bona ia dainai do ita tanikiu henia be namo. Gauna be Iesu Keriso. Aposetolo Paulo ia gwau, Keriso idia hasatauroa neganai ia be “Dirava ena siahu, bona Dirava ena aonega.” (1 Korinto 1:24) Reana oi henanadai, oi gwau, ‘Dahaka dainai? Unai ena anina be dahaka lauegu mauri ai?’
Siahu Iena Natuna Ena Amo
4 Dirava ese ena siahu ia hahedinaraia negana ginigunana be ia sibona ese ia havaraia Natuna tamona be ena laulau hegeregerena ia karaia neganai. Unai lauma be Iehova ena “gaukara diba momo tauna”; Dirava ena siahu bada herea ia gaukaralaia, gau oredia iboudiai karadia totona. (Hereva Lada-isidia 8:22, 30) Paulo ia gwau: “Ia dekena amo Dirava ese gau ibounai ia karaia, guba dekenai bona tanobada dekenai. . . . Keriso dekena amo gau ibounai ia karaia, do idia be Keriso ena totona.”—Kolose 1:15, 16.
5-7. (a) Gunaguna, Dirava ese ena siahu be taunimanima edia amo edena bamona ia hahedinaraia? (b) Dahaka dainai ita diba Dirava ese ena siahu amo Keristen taudia ia hagoadadia diba hari inai nega lalonai?
5 Ita danu be ‘Dirava ese tanobada dekenai ia karaia gaudia.’ Unai dainai iena siahu be ita ia henia diba, a? Nega ta ta ai ia ese siahu bada be iena goevadae lasi hesiai taudia ia henidia, iena ura do idia hagugurua totona. Mose ia diba taunimanima be vaia lagani 70 o 80 idia mauri bena idia mase. (Salamo 90:10) To Mose be edena bamona? Ena mauri laganidia iboudiai be 120, “to ena matana idia valahu-valahu lasi, bona ena goada ia ore lasi.” (Deuteronomi 34:7) Ena be Iehova ese ena hesiai taudia iboudiai ia durudia lasi, Mose bamona do idia mauri daudau bona do idia goada noho totona, to Mose sivaraina ese ia hamomokania taunimanima ia hagoadadia diba.
6 Dirava ese Abraham ena adavana ia kara henia karana amo ia hahedinaraia ia be mai ena siahu tatau bona hahine do ia hagoadadia. “Sara ese goada ia abia, vadaeni ia rogorogo. Iena rogorogo ena nega ia hanaia vadaeni, to Sara ese Dirava ia abidadama henia. Ia diba Dirava ese iena gwauhamata do ia badinaia.” Iehova ese danu hahemaoro taudia bona ma haida Israel lalonai ia hagoadadia: “Gideona bona Baraki bona Samson bona Iepeta bona Davida bona Samuela bona peroveta taudia . . . edia manokamanoka idia negea, goada idia abia.”—Heberu 11:11, 32-34.
7 Unai siahu ese ita danu ia hagoadaia diba. Hari inai negai hoa dalana amo natu do ita abidia lasi, eiava Samson hegeregerena do ita goada herea lasi. To ita goada diba, Paulo ese ita bamona taudia Kolose ai ia hamaorodia hegeregerena. Oibe, Paulo ese tatau, hahine, bona memero kekeni, hari inai negai kongregesen lalodiai idia noho taudia hegeregeredia, ia tore henidia, ia gwau: “Dirava ese umui do ia hagoadaia.”—Kolose 1:11.
8 Iesu be tanobada ai ia gaukara lalonai, Iehova ese ia hahedinaraia goevagoeva, iena siahu be ena Natuna ena amo ia gaukara. Iesu ese “[Iehova] ena siahu dekenai gorere taudia ia hanamoa.”—Luka 5:17.
8, 9. Aposetolo edia negai, Iehova ese edena bamona ia hahedinaraia ena siahu be ita bamona taudia dekediai?
9 Ia toreisi lou murinai, Iesu ese ena hahediba taudia ia hamaorodia ‘siahu do idia abia, Lauma Helaga idia dekenai do ia diho neganai.’ (Kara 1:8) Unai ia vara momokani! Pentekoste dinana 33 C.E. murinai, “aposetolo taudia mai siahu bada Lohiabada Iesu ena toreisi lou idia harorolaia.” (Kara 4:33) Dirava ese Paulo danu ia hagoadaia, ia henia gaukarana do ia karaia totona. Ia helalo kerehai bona ena matana idia kehoa lou murinai, “ena siahu ia bada daekau, bona Iesu ia harorolaia noho, ia gwau ia be Keriso momokani.”—Kara 9:22.
10. Dirava ena siahu ese Paulo edena bamona ia durua?
10 Paulo be ena misinari laolaodia toiosi lalodiai kilomita daha momo ai ia loaloa lalonai, siahu bada ia abia be namo, ena lalona do ia goada bona lauma dalanai do ia goada totona. Hisihisi idauidau ia haheaukalaidia, nega haida dibura rumadia ai idia koua, bona ena abidadama dainai idia alaia mase gwauraia. Edena bamona ia haheauka? Ia gwau: “Lohiabada ese lau ia durua, bona lau ia hagoadaia, vadaeni Sivarai Namona ibounai lau gwauraia.”—2 Timoteo 4:6-8, 17; 2 Korinto 11:23-27.
11. Paulo ia gwau ia laloa Dirava ena siahu ese Kolose taudia edena bamona ia durudia diba?
11 Unai dainai, Paulo ese ‘Keriso Iesu idia abidadama henia taudia’ Kolose ai idia noho be ia tore henidia neganai, ia hamaorodia idia be mai edia dala, ‘Dirava ese do ia hagoadadia, iena siahu dekena amo metau ibounai lalonai do idia gini goada, mai haheauka danu. Bona edia hisihisi lalonai, mai moale danu do idia noho.’ (Kolose 1:1, 11) Ena be unai hereva be Paulo ese Dirava ia horodia Keristen taudia ia tore henidia, to idia ese Keriso ena aena gabudia ai idia raka taudia iboudiai idia durudia bada diba.
Kolose Taudia Ia Hagoadadia
12 Kolose ena kongregesen be reana Keristen tauna Epafra ena haroro gaukarana amo idia haginia. Toana be, lagani 58 C.E. bamona ai, Paulo be dibura rumana ai Roma ai idia koua sivaraina ia kamonai neganai, Epafra ia ura do ia vadivadi henia bona ena tadikaka Kolose ai edia lalokau bona edia gini auka sivaraina namona amo do ia hagoadaia. Reana Kolose ena kongregesen ena hekwakwanai haida danu ia hamaorolaia. Unai dainai, Paulo ia ura kongregesen taudia do ia tore henia, do ia hagoadadia bona do ia sisiba henidia totona. Unai revareva ena karoa ginigunana ese oi danu ia hagoadaia diba, badina be ia hahedinaraia Iehova ese ena hesiai taudia edena bamona ia hagoadadia diba.
12, 13. Dahaka dainai Paulo ese Kolose taudia ia tore henidia, bona ena revareva dainai dahaka idia karaia?
13 Paulo ese unai tadikaka bona taihu be ‘Keriso Iesu idia abidadama henia taudia’ ia gwauraidia neganai idia abia mamina, be mani oi laloa. Keristen taudia ai idia lao negana amo, ‘Dirava ena taudia ibounai idia lalokau henidia’ bona sivarai namona ena huahua idia havaraia dainai, ia hanamodia! Ta ese iseda kongregesen bona ita ta ta be unai bamona ia gwauraia diba, a?—Kolose 1:1-8.
14. Paulo ena ura bada Kolose taudia dekediai be dahaka?
14 Ia kamonai sivaraina ese Paulo ena lalona ia hamarerea bada dainai, Kolose taudia ia hamaorodia guriguri ia hadokoa lasi idia dainai. Ia gwau, ia noinoi Dirava ese ‘iena ura dalana do ia hadibadia, bona Lauma Helaga ena diba bona diari do ia henidia, bena ena ura hegeregerena do idia noho,’ bona ‘edia mauri ese kara namodia edia anina do idia havaraia, bona Dirava ena diba bona diari ese do idia hatubudia daekau. Dirava ese do ia hagoadadia, vadaeni iena siahu dekena amo metau ibounai lalonai do idia gini goada, mai haheauka danu. Bona edia hisihisi lalonai, mai moale danu do idia noho.’—Kolose 1:9-11.
Hari Inai Negai Danu Taunimanima Ia Hagoadadia
15 Paulo ena haheitalai be namo herea, ani? Namona be iseda tadikaka tanobada hegegemadai be do ita gurigurilaidia, do ita noinoi, edia hisihisi lalonai do idia haheauka bona do idia moale noho. Iseda tadikaka kongregesen ta ai eiava tano ta ai idia noho edia hekwarahi sivaraina do ita kamonai neganai, namona be Paulo ena kara hegeregerena idia dainai do ita guriguri. Reana kongregesen ta ita kahirakahira dekenai be abata o tano-laga dainai idia hekwarahi eiava lauma dalanai idia hekwakwanai. Eiava Keristen taudia be tuari ia vara tanona ta ai idia haheauka noho. Namona be Dirava do ita noia, do ia durudia, ‘ena ura hegeregerena do idia noho,’ bona do idia haheauka noho lalonai Basileia huahuana do idia havaraia noho, bona edia diba do idia habadaia. Unai dala amo ena hesiai taudia ese iena lauma ena siahu idia abia bena ‘ia hagoadadia.’ Momokani, eda Tamana ese eda noinoi do ia kamonai bona ia hegeregerena do ia kara.—1 Ioane 5:14, 15.
16, 17. (a) Paulo ia torea hegeregerena, dahaka dainai Dirava ita tanikiu henia be namo? (b) Edena dala ai Dirava ese ena orea taudia ia hamauridia bona edia dika ia gwauatao?
16 Paulo ese Kolose taudia ia hamaorodia, ‘Tamana idia tanikiu henia be namo, badina be ia ese ia hagoevadia bena idia hegeregere Dirava ena taudia danu ahuna do idia davaria diari ena Basileia dekenai.’ Namona be ita danu ese eda Tamana do ita tanikiu henia, badina be ena Basileia lalonai eda ahuna ita abia, guba ai eiava tanobada ai. Paulo ese ena tadikaka, Dirava ese ia horodia taudia, ia tore henidia, ia gwau: “Dirava ese dibura ena siahu dekena amo ita ia hamauria vadaeni, bona iena Natuna, iena lalokau, ena Basileia lalonai ita ia abia vareai vadaeni. Dirava ena Natuna ese ita ia hoia lou, bona iseda kara dika ia gwauatao, iena rarana dekena amo.”—Kolose 1:12-14.
17 Herevana iseda helaro be guba ai do ita noho eiava tanobada ai, to dina dina iboudiai Dirava ita tanikiu henia, badina be ena Natuna lalokauna ena boubou, mauri davalaia gauna, ita abidadama henia dainai, inai tanobada dikana ena dibura amo ita ia hamauria vadaeni. (Mataio 20:28) Lauma amo ia horodia Keristen taudia be Iesu ena boubou dainai hahenamo hereana ta idia davaria—‘Dirava ena Natuna, iena lalokau, ena Basileia lalonai ia abidia vareai.’ (Luka 22:20, 29, 30) To hari inai negai “mamoe idaudia” danu be ena boubou dainai hahenamo idia davaria diba. (Ioane 10:16) Dirava ese edia dika ia gwauatao bena ia vairanai idia maoromaoro dainai ena turana ai ia halaodia. “Basileia ena Sivarai Namona” harorolaia gaukarana ena kahana badana idia karaia. (Mataio 24:14) Bona edia helaro namona be Keriso ena Lagani 1,000 Lohia Negana dokona ai do idia maoromaoro vaitani bona edia tauanidia do idia goevadae. Apokalupo 7:13-17 ena hereva ese ia hamomokania Dirava ese do ia hamauridia bona do ia hanamodia, ani?
18. Dahaka herohemaino be Dirava ese ia karaia noho?
18 Paulo ena revareva dainai ita diba tau hereadaena ese ita ia durua bada herea. “Dirava ese maino karaia dalana ta ia laloa. Inai maino be ia bona tanobada taudia bona guba taudia edia huanai. Keriso ena rarana satauro dekenai ia bubua dekena amo Dirava ese ibounai danu maino ia karaia, bona ia dekenai idia mai dalana ia ese ia kehoa vadaeni.” Dirava ena palani be, ia ese ia karadia gaudia iboudiai be ia ida maino ai do ia hatamonadia lou, gwau-edeede be Eden ai ia do vara lasi neganai hegeregerena. Unai herohemaino be gau iboudiai havaradia totona ia hagaukaraia Tauna ena amo ia karaia noho.—Kolose 1:20.
Dahaka Totona Ita Ia Hagoadaia?
19 Ita, Dirava ida maino ita karaia taudia, be mai eda maduna. Gunaguna ita be mai eda kara dika bona ita bona Dirava be mai eda padana. To hari, Iesu ena boubou ita abidadama henia bona kara dika ita laloa noho lasi dainai, ‘Dirava vairanai ita gini, helaga, goevagoeva bona kerere ta lasi.’ (Kolose 1:21, 22) Dirava be kamonai witness taudia gunadia dainai ia hemarai lasi; unai hegeregerena, ia hemarai lasi eda Dirava do ita gwauraia. (Heberu 11:16) Ta ese ita ia samania diba lasi, Dirava ena ladana hereadaena ita abia kerere, eiava iena ladana be tanobada dokodia ai harorolaia garina ita gari!
19, 20. Dahaka ita karaia noho dainai ita helaga bona ita goevagoeva?
20 Kolose 1:23 ai Paulo be ma ia gwau: “To umui ese Keriso do umui abidadama henia noho, bona do umui gini goada. Sivarai Namona ena hereva do umui dogoatao namonamo, bona iena davana namona do umui laloa bona naria, haida ese emui lalona do idia ania garina.” Iehova do ita badinaia noho bona ena Natuna lalokauna ena aena gabudiai do ita raka noho be mai anina bada. Ruaosi ese ita idia durua bada vadaeni! Namona be Paulo ena sisiba badinaia karana amo do ita hahedinaraia ita lalokau henidia.
21. Dahaka dainai hari inai negai ita moale bada diba?
21 “Sivarai Namona” be ‘tanobada ibounai dekenai haida ese idia harorolaia vadaeni’ herevana idia kamonai neganai, Keristen taudia Kolose ai idia moale bada. Witness taudia milion hani mai kahana ese Basileia ena sivarai namona idia harorolaia tano 230 ai sivaraina danu ese moale bada ia havaraia. Lagani ta ta iboudiai taunimanima kahirakahira 300,000 bese iboudiai edia amo be Dirava ida maino idia karaia!—Mataio 24:14; 28:19, 20.
22. Hisihisi ita ania neganai danu, Dirava ese ita edena bamona ia durua diba?
22 Ena be Paulo ese Kolose taudia ia tore henidia neganai ia be dibura rumana ai ia noho, to ena noho ia maumauraia lasi. Ia gwau: “Mai moale danu, umui dainai hisihisi lau davaria noho.” Paulo be ‘haheauka bona hisihisi lalonai mai moale danu noho’ karana ena mamina ia diba. (Kolose 1:11, 24) Bona ia diba sibona ena goada amo ia kwalimu lasi. Iehova ese ia hagoadaia! Unai hegeregerena, ena be hari inai negai Witness taudia tausen momo be dibura rumadia ai idia koudia bona idia dagedage henidia, to Iehova ena hesiai idia lao henia noho mai edia moale ida. Idia diba Dirava ena hereva Isaia 40:29-31 ai be momokani: “Ia ese hesiku tauna ia hagoadaia . . . Iehova idia naria taudia ese goada do idia abia lou.”
23, 24. ‘Hunia hereva’ helagana, Kolose 1:26 ai ia gwauraia gauna, be dahaka?
23 Keriso ena sivarai namona harorolaia gaukarana be mai anina bada Paulo dekenai. Ia ura ma haida ese Keriso ena gaukara ena anina Dirava ena palani lalonai do idia laloa bada, unai dainai ia gwau ia be ‘hunia hereva’ helagana, “gunaguna . . . hunia dekenai ia noho, . . . to harihari Dirava ese iena bese taudia dekenai ia hahedinaraia.” (Kolose 1:26) Gwau-edeede be Eden lalonai ia vara neganai, Iehova ese nega vairai do ia vara gauna namona ta ia gwauhamatalaia, ia gwau ‘hahine ena garana ese gaigai ena kwarana do ia haberoa.’ (Genese 3:15, NW) Unai ena anina be lagani handred momo lalodiai ia hehuni. Bena Iesu ia mai neganai, “iena Sivarai Namona dekena amo mauri hanaihanai ia hedinaraia.”—2 Timoteo 1:10.
24 Oibe, inai “hunia hereva” helagana ena anina be Keriso bona ena Basileia herevadia. Paulo ese “guba taudia” ia gwauraidia, anina be Basileia lalonai Keriso ida do idia lohia hebou taudia. Idia ese hahenamo momo be “tanobada taudia” do idia henidia, tanobada ai do ia noho hanaihanai paradaisona do idia noholaia taudia unai. Unai dainai oi diba Paulo ese unai “hunia hereva ena hairai herea” ia gwauraia be mai anina bada.—Kolose 1:20, 27.
25. Kolose 1:29 hegeregerena, dahaka lalohadai do ita badinaia be namo?
25 Paulo ese ena ahuna Basileia lalonai be ia laroa. To ia diba, ia naria noho lalonai do ia noho kava lasi be namo. Ia gwau: “Unai totona lau hekwarahi, bona lauegu goada ibounai lau gaukaralaia noho. Keriso ese inai goada bona siahu lauegu lalona dekenai ia havaraia noho.” (Kolose 1:29) Keriso ena amo Iehova ese Paulo ia hagoadaia, hahemauri gaukarana do ia karaia totona. Ia ese ita danu ia hagoadaia diba. To namona be ita ta ta be siboda do ita henanadai, ‘Sivarai namona harorolaia urana lau ura bada, hereva momokani lau dibaia matamata neganai lau ura bada hegeregerena, a?’ Emu haere be dahaka? Dahaka ese ita ta ta ibounai ia durua diba, Iehova ena siahu be ita lalonai ia gaukara hegeregerena ‘do ita hekwarahi noho, bona eda goada ibounai do ita gaukaralaia noho’ totona? Hereva gabena ese unai do ia herevalaia.
4. Dirava ese ena siahu be ena Natuna ena amo edena bamona ia hahedinaraia?
15. Paulo ena lalohadai hegeregerena lalohadaina edena bamona ita hahedinaraia diba?
Inai Oi Dibaia A?
◻ Dahaka dainai ita diba momokani Iehova ese ena siahu ia gaukaralaia diba, taunimanima durudia totona?
◻ Dahaka ia vara dainai Paulo ese Kolose karoa 1 ena hereva ia torea?
◻ Kolose 1:20 ai ia gwauraia herohemainona be Dirava ese edena bamona ia karaia noho?
◻ Ena siahu dainai, Iehova ese ita eda amo dahaka ia karaia guguru diba?
[Map on page 8]
(For fully formatted text, see publication)
KOLOSE