“Dirava Hanamoa mai Moale Ida” Hebouhebouna—Do Oi Lao Henia, A?

MOALE! Hari inai nega dikana lalonai unai hereva ita kamonai neganai ita hoa, ani? Momokani, niuspepa ese idia gwauraia gaudia ese moale idia havaraia lasi. Tuari idia vara, hitolo be gabu momo dekenai ia vara, moni gaukarana davaria be auka, tanobada idia hamiroa bona idia hadikaia, politikol oreadia idia gini auka lasi, raskol karadia be momo​—⁠unai gau ese ita idia hamoalea lasi, ani?

Hari inai negai taunimanima momo ese moale sisina mo idia davaria. To moale korikori be haida mo ese idia davaria, bona idia davaria negadia momo ai, ia noho daudau lasi.

To Baibel ese iseda nega ia perovetalaia, ia gwau: ‘Lohiabada Dirava ese inai hereva ia gwauraia: Kamonai! Egu hesiai taudia be do idia moale. Kamonai! Egu hesiai taudia ese ane do idia abia, edia moale be bada dainai.’ (Isaia 65:​13, 14) Unai be edena bamona ia vara diba?

Unai do oi diba totona, oi ai boiria, Iehova ena Witness taudia edia hebouhebou ta do oi lao henia. Unai hebouhebou be lagani 1995 lalonai do idia karadia. Edia sinado be “Dirava Hanamoa mai Moale Ida,” bona vareai be davana lasi. Dina-toi hebouhebouna ena program lalonai, Baibel ena hereva do idia harorolaia, do idia haheitalaia, bona do idia herevalaia hebou. Program ibounai lalonai moale do idia herevalaia momo.

Hebouhebou be United States lalonai do idia matamaia June lalonai, bena tanobada hegegemadai taoni idauidau dekenai do idia karaia, ela bona lagani 1996 ena matamana. Reana ta be emu noho gabuna kahirakahira dekenai do idia karaia. Iehova ena Witness taudia emu gabu dekenai idia noho be do oi nanadaia be namo, ani? Mai emai gado namo ida oi ai boiria do oi lao henia.