Lohia Tauna ese Ena Vaira Negana Ia Laloa

WEST Africa ena lohia tauna ta be iena gabu ai idia noho taudia ese idia lalokau henia bada bona idia matauraia. Mauri lagani 78 ia abia neganai, ena turadia, ena ruma bese bona lalo-namo taudia haida idia hebou ia idia hanamoa totona. Ena hereva lalonai, lohia tauna be unai bamona nega lalonai idia herevalaia momo lasi herevana ta ia gwauraia. Iena lalohadai, mase murinai taunimanima be do idia mauri noho ia gwauraia.

Ia gwau inai tanobada maurina murinai, “mauri matamatana ta ia noho, ia lalonai, koikoi, mama eiava mataganigani be lasi.” Ia gwau, unai mauri be “hehuni gabuna,” bona kara maoromaoro taudia sibona ese do idia noholaia bona Dirava ida do idia kara heheni.

Vaia, Africa taudia ese unai bamona lalohadai idia abia dae. Africa taudia edia sene tomadiho lalonai, idia gwau mase be ta ena mauri ena dokona lasi, to ia be ia hanaia lao lauma edia gabu dekenai ia mauri noho totona. Tau ta ia mase neganai, ita itaia diba tanobadana amo ia hanaia lao ita itaia diba lasi tanobadana dekenai. Lauma ai ia lao neganai, vadaeni ia ese ena sene taudia idia noholaia gabunai ia vareai.

West Africa taudia momo idia laloa sene taudia eiava sene taudia edia lauma be edia ruma bese, tanobada dekenai idia noho taudia, idia naridia. Buka ladana West African Traditional Religion ia gwau: “Tanobada dekenai idia noho eiava lauma edia gabu dekenai idia noho, to sene taudia edia kara ia idau lasi. Tanobada dekenai idia noho neganai, [sene taudia] be taunimanima badadia edia ruma bese lalonai. Hari ita itadia diba lasi, to idia be do taunimanima badadia lauma edia noho gabuna dekenai. Edia ruma bese ena namo idia laloaboio lasi.”

Unai dainai, inai sivarai matamanai ai herevalaia lohia burukana ia laloa ena sene taudia do ia hedavari henidia bona nega tamona do idia gaukara hebou lauma edia gabu dekenai. Ia gwau: “Lau abia dae momokani, mase murinai do ita mauri bona egu lohia gaukara do lau karaia noho diba.”

To Sunday Times niuspepa ia gwau, lohia tauna ena hereva gabena amo ia hahedinaraia mase murinai do ita mauri be “reana ia abia dae momokani lasi.” Idia hebou taudia ia hamaorodia, ia kamonai buka ta ese mase murinai ena mauri ia gwauraia. Lohia tauna be lagani ima lalonai unai buka ia tahua noho. Ia ura dikadika ia duahia dainai, bema ta ese unai buka ia mailaia ia dekenai, K1,800.00 bamona do ia henia.

Lohia tauna be unai bamona do ia hekwarahi lasi bema ia davaria haraga diba bukana ta ia tahua neganai. Ita davaria haraga bukana be tau ta ese ia torea lasi, to iseda Havaraia Diravana ese ia torea. (1 Tesalonika 2:13) Unai buka be Baibel. Ia ese mase murinai ta ia mauri noho herevana dekenai, dahaka hereva ia gwauraia?