Mase Taudia be Ita Idia Itaia Diba, A?

HAHINE ta ese ena adavana ia alaia mase. Lagani 7 muridiai nihi ta dainai ia gari bada badina ia laloa unai be ena mase adavana ena badu toana. Unai hahine ese ena natuna kekenina ia siaia ena adavana ena guri gabuna latanai boubou inuinu gauna ta ia bubua, ena adavana ena “lauma” ena badu ia koua totona.

Kekeni tamana ia hamasea hahinena be unai kekeni ena sinana bona unai sinana ese boubou ia siaia, unai dainai natuna kekenina ia diba lasi dahaka do ia hereva tamana ena lauma dekenai. Hehuni gabuna amo, ena taihuna maragina ese ia raraia noho. Ia mai bona iena taihuna ida idia guriguri edia tamana dekenai, tamana ese ia durudia alaia karana ena davana idia henia totona.

Unai kara be The Libation Bearers lalonai ia herevalaia, unai be lagani 2,400 bona ma haida gunanai idia torea Greek drama ta. Hari inai negai danu, tanobada ena gabu haida dekenai, guri gabudia ai unai bamona boubou idia henidia; Africa dekenai nega momo unai ia vara.

Hegeregere, Nigeria dekenai ia noho tauna Ibe ena sivarai oi laloa. Ena natudia toi idia mase, bona ia lao sene karadia ia karaia babalau tauna dekenai; unai babalau tauna ese Ibe ia hamaoroa natudia idia mase kava lasi​—Ibe ena mase tamana ia badu badina dala maorona ai idia guria lasi.

Ibe ese unai babalau tauna ena sisiba ia badinaia, bena ena tamana ena guri gabuna latanai nanigosi ia bouboulaia bona gin bona uaina ia bubua. Ena tamana ena lauma ia boiboi henia, gwauatao totona ia noinoi, ia hadibaia ia lalokau henia momokani, bona ia dekena amo hahenamo ta ia noia.

Ibe ia laloa ena tamana ese ia ia itaia bona ia kamonai diba. Ia laloa ena tamana be ia mase lasi to ia mase neganai ita itaia diba tanobadana amo ia “hanai” ita itaia diba lasi tanobadana ta dekenai. Ibe ia laloa ena tamana be hidio bona rara tanobadana ia rakatania bona lauma edia tanobada dekenai ia vareai, unai be sene taudia edia gabu.

Ibe be inai bamona ia laloa: ‘Ena be egu Tamana be inai tanobada ai ia noho lasi, to lau ia laloatao noho bona egu namo ia tahua. Bona hari ia be mai ena siahu bada herea laumana ta dainai, lau ia durua bada diba; guna lau ia durua bada diba lasi badina ia be tanobada tauna sibona. Ma danu, lau totona maoromaoro Dirava ia hereva henia diba badina Dirava danu be lauma ta. Reana hari egu Tamana ia badu, to bema lau matauraia namonamo, lau do ia gwauatao bona lau do ia hanamoa.’

Africa dekenai sene tomadiho karadia idia karaia taudia momo idia laloa mase taudia be tanobada taudia idia itaia bona idia be mai edia siahu edia mauri daladia ai. Sibodia idia gwau idia be Keristen taudia danu be unai idia karaia. Hegeregere, nega momo dubu lalonai hahine ia headava murinai, ena tamana sinana ena ruma ai ia lao sene karadia ena hahenamo ia abia totona. Unuseniai sene taudia idia boiboi henidia, bona inuinu boubou gauna ta be idia totona idia bubua. Taunimanima momo idia laloa bema unai idia karaia lasi neganai headava lalonai dika bada do ia havaraia.

Idia laloa sene taudia, eiava sene laumadia, ese tanobada dekenai edia ruma besedia idia mauri noho bona idia namo totona dala idia karaia. Unai lalohadai dainai idia laloa sene laumadia be siahu bada turadia, idia dainai uma aniani momo idia gogoa diba, taunimanima edia mauri namona idia karaia diba, bona taunimanima idia durudia dika idia davaria lasi totona. Taunimanima idia durudia. To bema taunimanima ese idia lalodia lasi eiava idia habadudia, dika idia henidia​—gorere, ogogami, bona mase danu. Unai dainai, boubou bona sene karadia amo, taunimanima idia hekwarahi noho mase taudia ida idia turana noho totona.

Oi laloa mase taudia be mai edia siahu mauri taudia edia mauri daladia ai, a? Nega ta ia mase lalokau tauna ena guri gabuna ai oi gini bona hereva haida oi gwauraidia, badina oi laloa oi ia kamonai henia diba, a? Mase neganai ia vara gauna ese ia hahedinaraia mase taudia be ita idia itaia bona ita idia kamonai henia eiava lasi. Baibel ena hereva unai anina bada herevana dekenai mani ita tahua.