“Dirava Gari Henia” Distrik Hebouhebouna Dekenai Mani Oi Mai!

IEHOVA ena Witness taudia edia 1994 distrik hebouheboudia edia matamaia negana be kahirakahira. June 1994 amo ela bona January 1995, dina toi edia program do idia kamonai tanobada hegegemadai, siti handred momo ai​—North America, Eastern bona Western Europe, Asia, Central bona South America, Africa, Australia, bona davara motumotudia ai.

Ena sinado be “Dirava Gari Henia.” Bema ta be ena mauri do ia boio garina ia gari, unai ena gari ena mamina be idau, Dirava ia gari henia tauna ena gari ena mamina hegeregerena lasi; inai gari ese maino bona moale ia havaraia. Baibel ia gwau: “Manau bona Dirava gari henia karana edia davana be taga bona hahenamo bona mauri.” (Hereva Lada-isidia 22:4) Edena bamona Dirava gari henia karana ese “taga bona hahenamo bona mauri” do ia havaradia? Hebouhebou ena dina toi lalodiai unai be haroro herevadia, haheitalai, bona drama ta amo do idia hahedinaraia.

Aposetolo Paulo ia gwau namona be ‘iseda guriguri hebou kara do ita hadokoa lasi.’ (Heberu 10:25) Iehova ena Witness taudia ese ena hereva idia badinaia, pura ta ta iboudiai nega toi kongregesen ai idia hebou, stadi bona tomadiho totona. To lagani ta ta amo distrik hebouheboudia idia karadia danu. Inai hebouhebou idia naria mai edia moale ida bona gabeai hua momo ai idia herevalaia. Herevana emu tomadiho be dahaka, to oi ai boiria, edia hebouhebou ai idia ida do umui hebou, bona Keristen hebamo namona do oi moalelaia bona mai anina bada herevadia do oi kamonai. Iehova ena Witness taudia emu gabu ai ese inai hebouhebou do idia karaia negana bona gabuna be oi idia hadibaia diba.