Aneru be Ita Huanai Idia Noho, A?

Karaharaga momokani ia vara. Marilynn be gau momo ia lalohadailaia noho bona ia badinai idia noho gaudia ia lalodia lasi lalonai, tereini idia heau dalana dekenai ia raka hanai. Karaharaga, rege ta ia kamonai. Kwarana ia abia isi neganai, ia itaia ia be ia heau mai noho tereini ena vairana dekenai ia gini! Marilynn ia gari dikadika dainai ia marere diba lasi. Tereini be ia kahirakahira momokani dainai, bona ia ese tereini taria tauna ena matana bulu bona ena gari toana ena vairana dekenai ia itaia diba. Unai murinai ia vara gauna be Marilynn ese ia laloaboio diba lasi. Ia gwau: “Ia be hegeregere tau badana ta ese egu murina amo lau ia doria.” Ma ia gwau: “Tereini ena dala amo lau roho lao dala ena isena ai, kahu latanai lau moru.” Marilynn be bero sisina mo ia davaria, bena ia toreisi ia ia hamauria tauna ia tanikiu henia totona​—to tau ta ia itaia lasi! Dahaka ia laloa? Marilynn ia gwau: “Lau ia naria aneruna ese lau ia hamauria. Daika ese unai bamona ia karaia diba?”

INAI tanobada lalonai momo be Dirava idia laloa lasi to hari haraga momokani aneru idia lalodia bada. Vanegai lagani lalodiai, televisen, muvini piksa, bona Broadway drama ta ese aneru idia sivarailaidia. Aneru idia herevalaia bukadia be taunimanima momo ese idia hoidia. Aneru idia laloa bada oreadia idia noho, hebouhebou badadia idia karaia, bona nius revarevadia idia torea danu. Hebou idia hegaegaelaidia, oi do idia durua​—revareva ta ia hereva bamona​—“oiemu ‘lalona dekenai ia noho aneruna ena heduru’ ” oi abia totona.

Momo ese aneru idia lalodia bada dainai, bisinesi taudia be unai lalohadai idia gaukaralaia, gau idauidau idia hoihoilaidia totona. United States dekenai, sitoa biaguna ta ia gwau: “Mai edia aneru gaudia be idia hoia haorea haraga.” Ia ese aneru edia sivarai bukadia momo bona “aneru kaivakukudia, dabua dekenai hakapua pinedia, dolidoli, T-siedi, laulau, bona kadi” ia herevalaia. Niusi ripotilaia tauna ta ese unai gaudia amo idia abia monina ia gwauraia “guba monina.”

Aneru be idia noho herevana idia abia dae taudia be mai goada ida idia gwau unai be nega sisina sibona lalonai idia abia dae gauna lasi. Edia hereva hamomokania totona, aneru ese idia durudia sivaraidia momo idia gwauraia​—idia gwau aneru ida idia hedavari “momokani.” Haida idia gwau idia ese aneru be taunimanima ena toana bamona idia itaia. Haida idia gwau diari idia itaia, o gado ta idia kamonai, o mamina idia abia, aneru ta ia noho bamona. Marilynn bamona, momo idia gwau aneru ese ia hamauridia.

Dahaka ia vara noho? Joan Wester Anderson, “lauma taudia” danu hedavari karana sivaraidia be buka rua lalonai ia torea hahinena, be ia gwau: “Lau laloa taunimanima ese lauma idia lalodia lou.” Buka ma ta ia torea hahinena, Alma Daniel, ese unai hereva ia habadaia. Ia gwau, Dirava ese aneru ia “haganidia, taunimanima dekenai do idia hedinarai, unai amo taunimanima momo do idia hereva henidia diba. Idia ita itaia momo, badina edia ura be unai. Unai idia karaia noho.”

Unai be momokani a? Eiava, hari aneru hoalaia karana ena badina korikorina be idau? Unai ita diba totona, Dirava ena Hereva ita tahua be namo. Do ita davaria hegeregerena, aneru edia sivarai momokanina be Baibel lalonai ia noho.

[Picture Credit Line on page 2]

Pages 3 and 4: The New Testament: A Pictorial Archive from Nineteenth-Century Sources, by Don Rice/Dover Publications, Inc.