‘Dirava Ena Hereva Badinaia’ Taudia mai Edia Moale

“Iena hereva, emui lalona dekenai ia hadoa gauna, do umui abia dae, mai emui manau danu. Inai hereva ese umui ia hamauria diba. To Dirava ena hereva do umui kamonai kava lasi, to umui badinaia danu.”​—IAMESI 1:​21, 22.

1. Iseda siri badana lagani 1996 totona be edena bamona ita laloa be namo?

‘DIRAVA ENA HEREVA DO UMUI BADINAIA.’ Unai hereva haragana be mai siahuna. Ia be Baibel ai “Iamesi Ena Revareva” amo ia mai, bona lagani 1996 ai Iehova ena Witness taudia ese edia Kingdom Hall lalodiai do idia hahedinaraia. Ia be edia siri badana unai lagani totona.

2, 3. Badina be dahaka Iamesi ese ena revareva ia torea be maoro?

² Iamesi, Lohiabada Iesu ena tadina ta, be mai ena dagi Keristani ekalesia oreana lalonai, aposetolo edia nega ai. Iesu ia toreisi lou murinai, nega ta iseda Lohiabada be Iamesi dekenai ia hedinarai bena aposetolo iboudiai dekenai danu. (1 Korinto 15:7) Gabeai, Iehova ese Petero be hoa dalana ai dibura rumana amo ia ruhaia neganai, Petero ese idia hebou Keristani taudia haida ia hamaoroa, ia gwau: “Iamesi bona iseda varavara do umui hamaoroa.” (Kara 12:17) Toana be, ena be Iamesi be aposetolo tauna ta lasi, to ia ese hakaua oreana edia hebou Ierusalema ai ia gunalaia, aposetolo bona elda taudia ese Keristani taudia ai idia lao Iuda Lasi taudia ese kopina utua karana do idia badinaia lasi herevana idia gwauraia neganai. Iamesi ese hereva badadia ia gwauraia, bena edia lalohadai, lauma helaga ese ia hamomokania lalohadaina, be kongregesen iboudiai dekenai idia siaia.​—Kara 15:​1-29.

³ Ia hedinarai Iamesi ese lalohadai maorona ia gwauraia hedinarai namonamo dainai, ena hereva be mai ena siahu. To, mai ena manau ida ia gwau ia be “Dirava bona Lohiabada Iesu Keriso edia hesiai tauna” mo. (Iamesi 1:1) Iena revareva, lauma helaga ena siahu amo ia torea revarevana, lalonai, be sisiba namodia bona hagoadaia herevadia momo, hari inai negai idia noho Keristani taudia totona. Iena revareva ia torea ore, bena lagani hani bamona murinai Roma ena tuari biaguna Cestius Gallus ese Ierusalema ia tuari henia, sivarai namona be ‘tanobada ibounai dekenai idia harorolaia vadaeni’ murinai. (Kolose 1:23) Unai be nega dikadia, bona Iehova ena hesiai taudia idia diba goevagoeva Ia ese Iuda besena ena davana ia henia gwauraia.

4. Dahaka ese ia hahedinaraia Keristani taudia ginigunadia ese Dirava ena Hereva idia abidadama henia bada?

⁴ Unai Keristani taudia ese Heberu Revarevadia iboudiai bona Greek Revarevadia momo idia abia vadaeni. Keristani Baibel torea taudia ese revareva gunadia edia hereva momo be edia revareva lalodiai idia gwauraia. Unai ese ia hahedinaraia Dirava ena Hereva idia abidadama henia. Unai hegeregerena, namona be ita ese Dirava ena Hereva ita stadilaia namonamo bona ita badinaia. Do ita haheauka totona, namona be Buka Helaga amo lauma ena goada bona boga auka do ita abia.​—Salamo 119:97; 1 Timoteo 4:13.

5. Badina be dahaka hari inai negai hahekau idauna ita abia be namo, bona edeseniai ita davaria diba?

⁵ Hari inai negai, kahirakahira “hisihisi bada herea do [ia] vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21) Do ita roho mauri totona, namona be Dirava ena hahekau ita abia. Edena bamona ita abia diba? Namona be Dirava ena lauma ese ia havaraia Herevana ena hahediba herevadia be iseda lalona ai ita abia dae. Unai ese ita do ia hakaua ‘Dirava ena hereva do ita badinaia’ totona, Iehova ena idaunegai hesiai taudia mai edia kamonai ese idia badinaia hegeregerena. Namona be Dirava ena hereva ita duahia bona stadilaia goadagoada bona ita gaukaralaia, Iehova do ita hanamoa totona.​—2 Timoteo 2:15; 3:​16, 17.

Haheauka mai Moale Ida

⁶ Iamesi be ena revareva hamatamaia herevadia ai, Dirava ena lauma huahuana iharuana, moale, ia gwauraia. Ia gwau: “Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona. Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho. Vadaeni nega ibounai metau bona hisihisi lalonai do umui haheauka noho, ela bona inai haheauka emui lalona dekenai ia goada momokani. Unai neganai emui kara be namo, bona Dirava ena dala hegeregerena do umui raka, kerere ta lasi.” (Iamesi 1:​2-4; Galatia 5:​22, 23) Dahaka dainai ia gwau hedibagani idauidau be idia dekenai idia ginidae neganai unai be “moale gauna”? Iesu be ororo ai ia haroro neganai ia danu ia gwau: “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo. Umui moale bada momokani, badina emui davana guba dekenai ia bada.” (Mataio 5:​11, 12) Mauri hanaihanai ita tahua goadagoada lalonai Iehova ese iseda hekwarahi ia hanamoa dalana ita itaia neganai, ita moale.​—Ioane 17:3; 2 Timoteo 4:​7, 8; Heberu 11:​8-10, 26, 35.

7. (a) Dahaka ese ita ia durua diba, do ita haheauka totona? (b) Iobu hegeregerena, davana namona be edena bamona ita abia diba?

⁷ Iesu ia haheauka badina be “ia diba guba ena moale be iena vairanai ia noho dainai.” (Heberu 12:​1, 2) Iesu ena boga auka bema ita laloa goadagoada, ita danu ita haheauka diba! Iamesi be ena revareva ena dokona kahanai ia gwau Iehova ese kara maoromaoro idia badinaia taudia ia hanamodia bada. Iamesi ia gwau: “Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.” (Iamesi 5:11) Mani oi laloa, Iobu be ena kara maoromaoro dainai davana namona ia abia; ena tauanina ia goada lou bona ena lalokau taudia ida mauri ia moalelaia guguru. Bema kara maoromaoro ai oi haheauka noho, hari inai negai Iehova ena hesiai oi lao henia dainai oi abia moalena be do ia bada ia lao, ela bona Dirava ena tanobada matamatana ena Paradaiso lalonai unai bamona do oi moale. Unai moale ese hari iena hesiai lao henia karana amo oi abia moalena do ia hereaia.

Aonega Tahua

⁸ Bema Dirava ena Hereva ita stadilaia goadagoada bona ita badinaia, Dirava ena amo ia mai aonegana do ita abia, bena do ita hegeregere Satani ena nega dikana, ia ore gwauraia negana, lalonai, hedibagani do ita haheaukalaidia. Unai aonega be edena bamona ita davaria diba? Iamesi ia gwau: “Bema umui ta be aonega lasi, namona be Dirava do ia noia, vadaeni Dirava ese aonega ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai, Dirava ese do ia badu henia lasi. To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao, doria mai, ia be gini gabuna lasi.” (Iamesi 1:​5, 6) Namona be ita guriguri goadagoada mai eda abidadama goadana ida, badina be ita diba Iehova ese iseda noinoi do ia kamonai bona iena nega korikori ai bona iena dala ai iseda guriguri do ia haere henia.

9. Iamesi ese Dirava ena amo ia mai aonegana bona gaukaralaia dalana be edena bamona ia gwauraia?

⁹ Iehova ena amo ia mai aonegana be harihari gauna. Iamesi ese unai bamona harihari gaudia ia gwauraia, ia gwau: “Gau namodia ibounai, bona harihari gaudia namodia momokani ibounai, be Dirava dekena amo idia diho mai. . . . Dirava ese iena kara ia senisia lasi.” Iamesi ese ena revareva ena kahana gabena ai, aonega korikori ia abia tauna ena kara ia gwauraia, ia gwau: “Sedira umui ta be mai ena aonega bona mai ena diba. Bema tau ta be inai bamona neganai, namona be iena aonega do ia hamomokania, iena mauri namona bona iena kara namodia dekena amo. Aonega tauna be do ia hekokoroku lasi, to iena diba namona ese iena aonega do ia hedinaraia. . . . Dirava dekena amo aonega ia abia tauna ena kara ginigunana be inai: Ia laloa goevagoeva. Ma iena kara haida be inai: Mai ena maino, laloa manada bona gado namo. Ia be mai ena bogahisihisi, bona kara namodia momo ia havaraia noho. Ia be maka tamona dekena amo taunimanima ibounai ia kara henidia, edia toana dekena amo lasi. Ma inai tau be Keristani koikoi tauna lasi.”​—Iamesi 1:​17; 3:​13-17.

10. Tomadiho koikoi be edena dala ai tomadiho momokani amo ia idau?

¹⁰ Tanobada ibounai ena tomadiho koikoi basileiana lalonai, Kerisendom ai bona tano idaudia ai, tomadiho taudia momo be vaia edia kara ane idia abia, haida ese idia gwauraia loulou guriguridia idia kamonaia, bona reana haroro herevana idia kamonai. Ta ese ia hagoadadia lasi helaro namona sivaraina do idia harorolaia, badina be tomadiho oreadia momo be nega vaira totona helaro namona idia abia lasi. Dirava ena Mesia ena Basileia sivaraina namona idia herevalaia lasi eiava idia lalohadailaia kerere. Iehova ese Kerisendom idia badinaia taudia ia perovetalaia, ia gwau: “Lauegu bese taudia ese, kara dika rua idia karaia vadaeni: Idia ese lau dekena amo idia raka siri, bona lau be idia edia mauri ranuna, to idia rakatania vadaeni, bona sibodia edia ranu guridia idia geia. Idia edia ranu guri dikadia, makohia gaudia, ranu be idia lalonai do ia noho diba lasi.” (Ieremia 2:13) Idia be mai edia hereva momokani ranudia lasi. Guba amo ia mai aonegana idia abia lasi.

11, 12. (a) Namona be Dirava ena amo ia mai aonegana ese ita ia ha-uraia dahaka do ita karaia? (b) Unai aonega ese ita be dahaka ia hadibaia?

¹¹ To Iehova ena Witness taudia hari inai negai be idau! Dirava ese ia henidia siahuna amo, Iena Basileia, kahirakahira do ia ginidae gauna, ena sivarai namona be tanobada hegegemadai idia harorolaia. Idia gwauraia aonega herevadia be Dirava ena Hereva amo. (Aonega Herevadia 1:20; Isaia 40:​29-31 itaia.) Momokani, diba bona lalo-parara momokani idia gaukaralaia, ita ia karaia Diravana ena palani badadia idia harorolaia lalonai. Namona be iseda ura be kongregesen taudia iboudiai be Dirava ese ‘iena ura dalana idia dekenai do ia hadibaia, bona Lauma Helaga ena diba bona diari idia dekenai do ia henia.’ (Kolose 1:9) Unai idia abia taudia, matamatadia bona burukadia, be do idia ura nega ibounai ‘Dirava ena hereva do idia badinaia.’

¹² “Dirava dekena amo aonega” ita abia ese ita ia hadibaia, kara dika haida dainai reana Dirava ese ita do ia badu henia. Iamesi ia gwau: “Lauegu varavara e, egu lalokau, inai sisiba umui laloaboio lasi. Umui ta ta ibounai ese hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi. Badina be taunimanima edia badu ese Dirava ena kara maoromaoro ia havaraia diba lasi.” Oibe, namona be Dirava ena sisiba ita kamonaia bona ita badinaia haraga mai eda ura ida. To, namona be ita naria namonamo danu, “gau maragina,” iseda malana unai, do ita gaukaralaia kerere garina. Heagi herevadia, o udu mauri herevadia dikadia, o siboda eda lalohadai aukana gwauraia karana amo, iseda malana ese lahi bamona “uda bada herea” ia araia diba. Unai dainai taunimanima ita bamoa negadia iboudiai, ita gado namo henidia bona iseda lalona ita biagua be namo.​—Iamesi 1:​19, 20; 3:5.

13. Badina be dahaka ‘Dirava ena hereva, ia hadoa gauna,’ ita abia dae be gau badana?

¹³ Iamesi ia gwau: “Unai dainai miro karadia ibounai, laloa dikadia, bona kara dikadia ibounai do umui rakatania. Dirava henunai do umui noho, bona iena hereva, emui lalona dekenai ia hadoa gauna, do umui abia dae, mai emui manau danu. Inai hereva ese umui ia hamauria diba.” (Iamesi 1:21) Inai mataganigani tanobadana mai ena hekokoroku bona mai ena matabodaga, be kahirakahira do ia ore. “To Dirava ena ura ia karaia noho tauna be do ia noho ela bona hanaihanai.” (1 Ioane 2:​15-17) Unai dainai namona be ‘Dirava ena hereva, iseda lalona dekenai ia hadoa gauna’ ita abia dae! Dirava ena Hereva ese ia henia aonegana be idau vaitani, kahirakahira do ia ore tanobadana ena dika hegeregerena lasi. Unai dika ibounai ita ura henia lasi. (1 Petero 2:​1, 2) Namona be hereva momokani ura henia mamina bona abidadama goadana be iseda lalona ai ita hadoa, unai amo iseda lalona do ita hadaia auka, Iehova ena dala maorodia amo do ita siri lasi. To Dirava ena Hereva ita kamonai mo be hegeregere, a?

‘Dirava Ena Hereva Badinaia’ Taudia ai Ita Lao

¹⁴ Iamesi 1:22 ia gwau: “Dirava ena hereva do umui kamonai kava lasi, to umui badinaia danu. Bema umui kamonai kava, umui sibona umui koia noho.” ‘Dirava ena hereva do umui badinaia’! Iamesi be ena revareva lalonai unai ia herevalaia momo. Namona be ita kamonai, bena “unai bamona” ita karaia! (Genese 6:22) Hari inai negai taunimanima momo idia gwau bema nega ta ta haroro herevana ta idia kamonai eiava tomadiho karana ta idia karaia, unai sibona be hegeregere. Reana idia laloa bema sibodia edia lalohadai hegeregeredia ‘kara namo’ idia karaia, unai sibona be hegeregere. To Iesu Keriso ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, to iena satauro do ia huaia, lauegu murina dekenai do ia raka.” (Mataio 16:24) Dirava ia ura Keristani korikori taudia ese sibodia edia ura idia dadaraia bona Iesu ese Dirava ena ura ia karaia hegeregerena, idia ese danu do idia karaia mai edia haheauka ida. Hari inai negai Dirava ena ura idia dekenai be iena ura aposetolo edia negai hegeregerena. Unai neganai, mase amo ia toreisi lou tauna Iesu ese ia haganidia, ia gwau: “Umui lao, bese ibounai be diba tahua taudia do umui halaoa.” (Mataio 28:19) Oi be unai bamona oi karaia, a?

15. (a) Iamesi ese dahaka hereva hegeregerena ia gwauraia, unai amo mai moale ida ‘Dirava ena hereva badinaia’ taudia ai ita lao dalana ia hahedinaraia? (b) Badina be dahaka Dirava tomadiho henia karana sibona be hegeregere lasi?

¹⁵ Bema Dirava ena Hereva ita itaia namonamo noho, hevarivari bamona ia ese ia hahedinaraia ita be edena bamona taudia. Iamesi ia gwau: “Taravatu namona bona goevagoeva momokani ia noho, ia ese kara dika ena siahu dekena amo ita ia ruhaia vadaeni. Tau ta bema inai taravatu ia itaia namonamo noho, bona ia badinaia noho, bona ia kamonai kava lasi, to ia karaia momokani neganai, unai tau be namo. Dirava ese unai tau, iena kara ibounai lalonai, do ia hanamoa.” (Iamesi 1:​23-25) Oibe, ia ese ‘Dirava ena hereva do ia badinaia’ mai ena moale ida. Inai danu, gau badana be iseda Keristani maurina ibounai lalonai Dirava ena hereva ita “badinaia.” Namo lasi ita be siboda ita koia, ita laloa bema Dirava ita tomadiho henia unai sibona mo be hegeregere. Iamesi ese ita ia sisiba henia tomadiho karadia haida, Keristani taudia goadadia ese reana idia reaia karadia unai, do ita karaia be namo. Ia gwau: “Keristani tauna ena kara goevagoeva bona momokani, Tamana Dirava ena vairanai be inai: Bema tamana bona sinana lasi maragidia bona vabu be mai edia hisihisi, ia ese do ia naridia. Bona tanobada ena kara mirodia dekena amo do ia raka siri.”​—Iamesi 1:27.

16. Aberahamo ese dahaka ia karaia dainai “Dirava ena turana” ai ia lao, bona dahaka ita karaia be namo, Iena turana ai do ita lao totona?

¹⁶ Bema ta ia gwau, ‘Dirava lau abidadama henia,’ unai sibona mo be hegeregere lasi. Iamesi 2:19 ia gwau: “Oi ese inai oi abidadama henia: ‘Dirava korikori be tamona,’ a? Namo, to lauma dikadia danu unai bamona idia abidadama, bona mai gari danu idia heudeheude noho.” Iamesi ia gwau: “Bema abidadama sibona ia noho, to kara be lasi, unai abidadama be anina lasi.” Bona Aberahamo ia gwauraia, ia gwau: “Ena abidadama be iena kara namona danu nega tamona idia gaukara. Bona unai dainai iena kara namodia ese iena abidadama idia hamomokania vadaeni.” (Iamesi 2:​17, 20-22) Aberahamo ese ia karaia karadia haida be inai: Ena varavara ia durudia, heabidae karana ia karaia, ia hegaegae Isako do ia bouboulaia totona, bona taunimanima vairadiai ia gwau Dirava ese ia gwauhamatalaia gauna, “hanua badana . . . mai ena nadi badina aukana,” Mesia ena Basileia, gabeai do ia vara gauna unai, ia abidadama henia momokani. (Genese 14:​16; 18:​1-5; 22:1-18; Heberu 11:​8-10, 13, 14; 13:2) Unai dainai, “idia gwau Aberahamo be Dirava ena turana.” (Iamesi 2:23) Bema taunimanima vairadiai ita gwau Iehova ena kara maoromaoro Basileiana, kahirakahira do ia ginidae gauna, ita abidadama henia bona ita helaro henia, ita danu be Dirava “ena turana” do idia gwauraia.

17. (a) Badina be dahaka Dirava ese Rahaba be “maoromaoro” ia gwauraia, bona dahaka davana ia abia? (b) Baibel ese daika daika be ‘Dirava ena hereva badinaia’ taudia ia gwauraia? (c) Iobu ese dahaka davana ia abia, bona badina be dahaka?

¹⁷ ‘Dirava ena hereva idia badinaia’ taudia be “kara namodia dainai . . . Dirava ena vairanai idia maoromaoro, abidadama sibona dainai lasi.” (Iamesi 2:24) Rahaba ese Iehova ena kara badadia sivaraidia ia kamonai bona unai “hereva” ia abidadama henia, to ia ese kara haida danu ia karaia. Israela ena hasinadoa taudia ia hunia bona edia heau mauri dalana ia karaia, bena ena tamana ena famili ia gogoa, mauri do idia abia totona. Toreisi lou neganai do ia moale bada, badina be do ia diba iena abidadama be mai ena kara dainai, iena tubuna ta be Mesia! (Iosua 2:11; 6:25; Mataio 1:5) Heberu karoa 11 ese ‘hereva badinaia’ taudia ma haida, edia abidadama be edia kara amo idia hahedinaraia taudia, ia gwauraia, bona idia ese davana namona do idia abia. Namo lasi Iobu ita laloaboio, hedibagani aukana ia davaria neganai ia gwau: “[Iehova] ena ladana lau hanamoa inai!” Ita itaia vadaeni hegeregerena, iena abidadama bona ena kara dainai davana namona ia abia. (Iobu 1:21; 31:6; 42:10; Iamesi 5:11) Unai hegeregerena, bema Iehova ena ‘hereva ita badinaia’ mai eda haheauka ida, ita do ia lalo-namo henia.

18, 19. Iseda tadikaka, nega daudau lalonai gavamani ese idia hahisia taudia, be ‘Dirava ena hereva badinaia’ taudia ai edena bamona idia lao, bona edia gaukara dainai dahaka hahenamo ia vara?

¹⁸ Idia hanai laganidia lalodiai gau momo idia haheaukalaia taudia be iseda tadikaka Eastern Europe lalonai. Gavamani ese edia taravatu momo be hari idia kokia vadaeni dainai, unai tadikaka be edia noho matamatana ai ‘Dirava ena hereva idia badinaia’ goadagoada. Kahirakahira tanodia amo misinari bona painia taudia be unai tano dekenai idia lao, hahediba bona orea haheaua gaukaradia durua totona. Watch Tower Society ena brens opesi Finland ai bona kahirakahira tanodia ma haida ai, ese ruma haginia gaukarana idia diba momo taudia idia siaia unai tano dekenai, bona tadikaka tanobada hegegemadai ese idia henia harihari monina amo, brens opesi bona Kingdom Hall matamatadia idia haginia.​—Korinto Iharuana 8:​14, 15 itaia.

¹⁹ Unai dainai, unai tadikaka, nega daudau lalonai guna idia hahisia taudia, be haroro gaukarana idia goadalaia momokani! Idia “hekwarahi,” “nega dikadia neganai” idia karaia diba lasi gaukaradia be hari do idia karaia totona. (1 Timoteo 4:10; 2 Timoteo 4:2) Hegeregere, Albania dekenai, guna gavamani ese ia koudia mai ena dagedage ida, to April 1995 ai, idia ese edia Basileia Sivaraina pepadia ladana “Dahaka Dainai Mauri be Hekwakwanai amo Ia Honu?” be iboudiai dina toi sibona lalonai idia hariharilaia ore. Unai gaukara namona be Iesu ena mase laloatao totona hebouna, Memorial, murinai idia karaia. Unai hebou dekenai idia lao taudia be 3,491, to unai tano ai idia gaukara pablisa taudia be 538 sibona.

20. Idia hanai laganidia haida ai Memorial hebouna idia lao henia taudia edia momo ese dahaka ia hahedinaraia, bona idia momo be edena bamona ita durua diba?

²⁰ Tano ma haida lalonai danu Memorial hebouna idia lao henia taudia edia momo ia daekau, unai dainai idia hanai laganidia haida ai edia momo be 10,000,000 ia hanaia. Gabu momo dekenai kamonai matamata taudia be Memorial hebouna idia lao henia bona unuseniai idia karaia karana idia itaia; unai ese edia abidadama ia hagoadaia bona hari idia be ‘Dirava ena hereva badinaia’ taudia ai idia lao. Ita ese hebou idia lao henia matamata taudia ma haida ita hagoadaia diba, unai bamona do idia karaia totona, a?

21. Iseda siri badana lagani 1996 totona ena hereva hegeregerena, namona be dahaka ita karaia, bona dahaka ahuna namona ita tahua be namo?

²¹ Gaukara goadagoada Keristani taudia aposetolo edia negai bona unai nega murinai hegeregeredia, namona be iseda lalona ita hadaia auka do ita hekwarahi ‘heau helulu ena dokona gabuna dekenai maoromaoro do ita heau henia,’ kwalimu ahuna, mauri hanaihanai, do ita abia totona. Haida ese unai mauri be guba Basileiana lalonai do idia abia, ma haida be Basileia ese do ia biagua tanobadana ai do idia abia. (Filipi 3:​12-14) Unai ahuna namona do ita abia totona do ita hekwarahi, to unai be hekwarahi mai anina namona. Namo lasi Dirava ena hereva kamonaia sibona taudia ai ita lao lou, badina be hari be ‘do ita goada, bona gaukara do ita karaia’ negana badana. (Hagai 2:4; Heberu 6:​11, 12) ‘Dirava ena hereva, iseda lalona dekenai ia hadoa gauna, ita abia dae’ dainai, namona be hari ita ese ‘Dirava ena hereva ita badinaia’ mai eda moale ida bona unai bamona do ita karaia ela bona hanaihanai.

Edena Bamona Do Oi Haere?

◻ Edena bamona ita haheauka diba mai eda moale ida?

◻ “Dirava dekena amo aonega” be dahaka, bona edena bamona ita tahua diba?

◻ Badina be dahaka ‘Dirava ena hereva do ita kamonai kava lasi, to do ita badinaia danu’ be namo?

◻ Dahaka sivarai ese ita idia hagoadaia diba, ‘Dirava ena hereva badinaia’ taudia ai do ita lao totona?

6. Hedibagani ita davaria neganai, dahaka dainai ita laloa unai be moale gauna be namo?

8. Aonega korikori be edena bamona ita davaria diba, bona guriguri ena anina be dahaka unai dekenai?

14. Edena bamona ita be Dirava ena Hereva ‘kamonaia’ bona “badinaia” taudia ai ita lao diba?

[Picture on page 17]

Namona be ita danu ese eda lalona ita kehoa, Dirava ena hahediba do ita abia dae totona

[Picture on page 18]

Iobu be ena kara maoromaoro dainai davana namona ia abia; ena lalokau taudia ida mauri ia moalelaia guguru lou