Itaia! Kingdom Hall ta Niue Ai

NIUE be motumotu maragina ta South Pacific davarana ai, kilomita 2,160 New Zealand ena notwest kahanai. Bukabuka ta ia gwau inai ladana Niue be inai hereva rua amo idia abia: Niu, anina be “niu auna,” bona e, anina be “itaia.” Unai bukabuka ia gwau: “Gori ta be Polynesia taudia ginigunadia be unai motumotu ai idia ginidae bona niu audia idia itaia neganai, unai hereva ruaosi idia gwauraia.”

Hari inai negai, Iehova ena Witness taudia Niue ai, ese vadivadi taudia idia hamaoroa mai edia moale ida, idia gwau, “E! Fale he Kautu ha mautolu!” anina be, “Itaia! Aiemai Kingdom Hall unai!” Dahaka dainai unai ruma idia laloa bada? Iehova ena Witness taudia gabu iboudiai ese edia Kingdom Hall idia moalelaidia, bona bema idia sibodia ese idia haginidia, idia moalelaia bada. To Kingdom Hall ta be motumotu daudauna ai, South Pacific davarana ihuana ai, haginia gaukarana be hekwarahi bada. Niue ena bada be sikoea kilomita 260 sibona, bona taunimanima 2,300 sibona ese unai motumotu idia noholaia.

Idia laloa gauna be daidia ese unai Kingdom Hall do idia haginia. Niue ai kongregesen be tamona bona ia lalonai be Witness taudia 32 sibodia. Unai ruma do idia haginia totona idia abia be namo gaudia badadia, hegeregere taraka, buldosa, bona krein, be gavamani ena. Inai danu, ruma haginia kohudia iboudiai​—auri, semenisi birikidia, guhi aurina, paua bona palama kohudia, laud-spika bona unai bamona gaudia, bona helai gaudia​—be New Zealand amo do idia abia be namo, bona do ia mailaidia boutina be pura ima pura ima ai, nega tamona tamona sibona ia lao Niue. Ma danu, unai motumotu be nadi gabuna, unai dainai du edia guri geia gaukarana be do ia auka herea, bona namona be ruma idia haginia auka, lai-gubadia idia toa neganai do ia gini auka totona. Momokani, unai be hekwarahi bada gaukarana!

To, gau ta be ia idau. Iehova ena Witness taudia idia laloa Kingdom Hall be tomadiho momokanina gunalaia gabuna edia hanua ai, bona idia ese Iehova Dirava ena amo hahekau bona heduru idia tahua. (Salamo 56:11; 127:1) Keristani tadikakadia New Zealand ai, idia haida be Niue gado kongregesen taudia Auckland ai, be Niue ai idia noho Witness taudia edia orea maragina idia durua mai edia lalona ibounai ida, unai ruma do idia haginia totona.

Edia Lalona Idia Hadaia Do Idia Haginia Matamaia

June 1994 ai, Kingdom Hall ta be Rotorua, New Zealand ai, idia haginia lalonai, tadikaka idia hamaorodia, idia ura Niue ena Kingdom Hall haginia gaukarana do idia durua taudia be edia ladana do idia henia. Idia hoa, badina be Keristani tadikakadia bona taihudia 200 ese edia ladana idia henia. Idia edia amo, taunimanima 80 idia abia hidi. Idia haida be kamuta taudia, auri gaukaralaia taudia, palama taudia, guhi atoa taudia, pilasta atoa taudia, penipeni taudia, elektrisen taudia, laud-spika bona unai bamona gaudia atoa taudia, semenisi gaukaralaia taudia, biriki atoa taudia, bona leiba taudia.

Tadikaka ese ruma ena palani idia torea bona haginia dalana idia lailaia; unai idia karaia lalonai Iehova idia abidadama henia. Niue ena kongregesen ena elda ruaosi amo ta, bisinesi tauna unai, ese ruma ena kohu ibounai be bouti amo do ia mai dalana ia lailaia matamaia. New Zealand amo do idia mai gaukara taudia edia peleini bona mahuta gabudia edia davana, idia sibodia do idia henia monina, be bisinesi taudia ida ia herevalaia dainai, davana maragina idia gwauraia. Vadaeni, tadikaka ese ruma haginia dinadia idia gwauraia hidi. Unai gaukara be dina 20, March 4 ela bona March 23, 1995, lalodiai do idia karaia ore, bena Kingdom Hall do idia hahelagaia.

Pura ta ia do noho ela bona unai gaukara do idia hamatamaia neganai, gaukara gunalaia tauna be New Zealand amo ia mai, gau haida hegaegaelaia totona. Ia gwau: “Ruma haginia gabuna lau itaia neganai, egu lalona ia hekwarahi bada. Ia be nadi gabuna. Ruma ena du edia guri geia gaukarana sibona be pura rua lalonai do idia karaia.” To gabeai ia gwau, ia be Niue tadikakadia edia gaukara dalana be ia diba lasi. Ia gwau: “Niue tadikakadia be nadi edia toana idia diba goevagoeva. Idia diba nadi be edeseniai do idia botaia be namo, bena ena kahana badadia do idia makohi.” Du edia guri be dina rua lalodiai idia geia ore!

March 4 ai, New Zealand amo idia mai Witness taudia ginigunadia be peleini amo idia mai, bena semenisi gaukarana idia karaia. Unai murinai gaukara taudia edia grup ma haida, ta ta ena nega ena nega ai idia mai, edia gaukara do idia karaia totona. Gaukara dinadia be dina ena Baibel sirina herevalaia sisina karana amo idia hamatamaia, 7:00 a.m. dekenai. Tadikaka haida be hora 12 lalodiai idia gaukara, bona nega haida dina ena siahu ena maka be 36° C. Dokonai, March 23 ai, rei bona palauapalaua idia hadoa. Vaivai auna amo saini namona idia karaia, ia latanai inai hereva idia torea: “Iehova Ena Witness Taudia Edia Kingdom Hall.”

Heduru Bona Heabidae

Unai gaukara ai idia kwalimu ena badina badana ta be, Niue taudia ese idia durudia. Hanua taudia ese tadikaka edia kara idia itaia bona idia ura idia durudia, unai dainai aniani bona moni idia henidia. Momo idia laloa unai ruma haginia gaukarana be idia edia. Gavamani taudia bona bisinesi taudia ese heduru bada idia henidia. Gaukara kohudia idia henidia, bona gwaumaoro idia henidia edia faktori ta lalonai timba amo do idia karaia kohudia do idia karaia totona. Bouti kampani ese ena bouti ta ena heau dalana ia haidaua, ruma ena kohu be nega korikori ai do ia ginidae totona.

Vadivadi taudia ese Niue Witness taudia edia hekwarahi bona edia heabidae idia laloa bada. Edia ruma ai idia abidia dae bona idia dekenai idia noho gaudia be vadivadi taudia danu ese idia gaukaralaia diba. Gaukara taihuna ta ia gwau: “Niue taihudia be namo herea momokani.” Dina ta ta iboudiai dina tubua ena aniani idia nadua, bona daba daba iboudiai danu idia nanadu, 6:30 ai do idia aniani totona. Haida be 4:30 a.m. ai idia toreisi, aniani hegaegaelaia totona. Gaukara taihuna ta ia gwau: “Lau laloa Niue dekenai ai ania anianina ese ai sibona emai ruma dekenai ai ania anianina ia hereaia.”

Niue Star niuspepana, March 10 gauna, ena rau ginigunana ai unai gaukara ena sivarai idia halasia. Ena sinado be “Kingdom Hall Ginigunana Niue Ai,” bona New Zealand taudia bona Niue taudia idia gaukara lalonai idia abia laulauna idia hahedinaraia danu. Unai ripoti ia gwau ruma ena bada be sikoea mita 280 bona taunimanima 70 ia lao 100 be ia lalonai idia hebou diba. Ma ia gwau: “Unai bamona gaukarana be [pura] rua lalodiai idia haorea diba, to inai ruma haginia negana do idia halataia sisina. Hari, dina rua sibodia lalonai idia gaukara vadaeni, to ruma ena badina, ena tauanina audia bona ena toidae idia haginia vadaeni; unai gaukara idia haorea haraga.”

Bisinesi tauna ta Niue Motumotuna ai ia gwau ia ura unuseniai idia noho taudia iboudiai ese unai gaukara idia itaia bona ia amo diba do idia abia. Ma ia gwau ia ura unai ese taunimanima iboudiai do ia hadibadia, lalokau bona heduru heheni karana amo dahaka do idia havaraia diba.

Ruma hahelagaia neganai taunimanima 204 idia hebou. Hebou taudia iboudiai edia lalona ia hamarerea bada gauna ta be inai: Niue tadikakadia, taihudia, bona edia natudia danu ese Kingdom Hall haginia gaukarana be ane bona mavaru amo idia haheitalaia. Idia ese ruma haginia taudia idia tanikiu henidia bona Iehova danu, badina be iena lauma ese taunimanima edia darana, edia lalona, bona edia imana ia hasiahudia, unai gaukara do idia karaia totona.​—Isaia 40:​28-31.