Iehova Ena Ura Idia Badinaia
Mose Bona Arona—Mai Boga-Auka ida Dirava Ena Hereva Idia Harorolaia Taudia
INAI laulau oi laloa: Lagani 80 tauna Mose bona ena kakana, Arona, be tanobada dekenai siahu herea tauna—Aigupito ena Farao—vairanai idia gini. Aigupito taudia dekenai, ia be edia dirava ia laulaulaidia sibona lasi. Idia abia dae ia be dirava ta danu. Idia laloa Horus, ena kwarana be manu ena kwarana diravana, be ia lalonai ia mauri. Horus, Isis, bona Osiris, be toi tamona diravana badana Aigupito edia dirava idauidau huanai.
Farao dekenai idia lao kahirakahira taudia be karaharaga ena kwara gauna do idia itaia, gaigai kwarana ena laulau be ena huana amo ia daekau. Idia laloa Farao idia inai henia taudia dekenai unai gaigai ese lahi ia kanudia bona idia ia hadikaia diba. Hari Mose bona Arona be unai dirava pavapavana vairanai idia gini, guna ia do kamonaia lasi noinoi bada hereana idia gwauraia—hesiai Israela taudia do ia siaia lao edia Dirava, Iehova, ena aria karaia totona.—Esodo 5:1.
Iehova ia gwau vadaeni, Farao ena lalona be do ia auka. Unai dainai, Mose bona Arona be ena gwau-edeede haerena dekenai idia hoa lasi, ia gwau: “[Iehova] be daika? Badina be dahaka iena hereva dohore lau kamonai? Israela taudia lauegu imana dekena amo dohore lau negea, badina be dahaka? [Iehova] be lau diba lasi, Israela taudia danu lauegu imana dekena amo dohore lau negea lasi momokani.” (Esodo 4:21; 5:2) Unai amo, hepapahuahu karana ia matamaia. Farao idia itaia lou neganai, Mose bona Arona be Farao dekenai idia hahedinaraia goevagoeva siahu ibounai Dirava momokanina totona idia hereva.
Hoa Karana ta Ia Vara
Iehova ese ia hadibaia hegeregerena, Arona ese hoa karana ta amo ia hahedinaraia Iehova ena goada ese Aigupito ena dirava koikoidia edia goada ia hereaia. Ia ese ena itotohi ia negea diho Farao ena vairana dekenai, bena maoromaoro gaigai ai ia lao! Unai hoa karana ia daradaralaia dainai, Farao be ena meamea pris taudia ia boiria.a Idia be demoni edia siahu idia gaukaralaia, bena edia itotohi be gaigai ai idia lao danu.
Bema Farao bona ena pris taudia idia moale, edia moale ia ore haraga. Edia hoa toana oi laloa, Arona ena gaigai ese edia gaigai, ta ta, ia hadonoa neganai! Idia noho taudia ibounai idia itaia Aigupito diravadia ese Dirava momokanina Iehova idia hereaia lasi.—Esodo 7:8-13.
Ena be Farao ese unai ia itaia, to ena lalona ia auka noho. Dirava ese Aigupito dekenai hisihisi 10 ia siaia murinai sibona bena Farao ese Mose bona Arona ia hamaoroa: “Umui toreisi, lauegu orea taudia edia huanai dekena amo umui raka siri, umui bona Israela taudia ibounai. Umui lao, [Iehova] dekenai do umui tomadiho, umui emui noinoi hegeregerena.”—Esodo 12:31.
Ita Dibaia Gaudia
Dahaka ese Mose bona Arona ia durua Aigupito ena Farao goadana dekenai idia lao totona? Matamanai, Mose ia laloa ia hegeregere lasi, ia gwau: “Lau be hereva goada lasi tauna, egu malana danu ia haraga lasi.” Ena be Iehova ese ia hamaoroa do ia durua, to ia noinoi, ia gwau: “Mani emu kara idau tauna ta do oi siaia.” Mose ia ura dikadika Iehova be ma tau ta ia siaia. (Esodo 4:10, 13) To, herevana, Iehova ese manau tauna Mose ia gaukaralaia, aonega bona goada ia henia ena gaukara ia hagugurua diba totona.—Numera 12:3.
Hari iseda negai, Iehova Dirava bona Iesu Keriso edia hesiai idia lao henia taudia ese ‘bese ibounai be diba tahua taudia do idia halaoa’ haheganina idia badinaia. (Mataio 28:19, 20) Iseda gaukara ita hagugurua totona, iseda Baibel diba bona iseda goada ita gaukaralaia namonamo. (1 Timoteo 4:13-16) Namona be iseda manoka gaudia ita laloa momo lasi, to mai abidadama ida Dirava ese ita ia henia gaukarana ita abia dae. Ita dekenai diba bona goada do ia henia, iena ura ita karaia diba totona.—2 Korinto 3:5, 6; Filipi 4:13, NW.
Mose ese taunimanima bona demoni ia tuari henidia dainai, goada bada herea ia abia be namo. Unai dainai, Iehova ese ia hamaoroa: “Oi kamonai, lau ese Dirava hegeregerena oi do lau halaoa Farao ena vairana dekenai.” (Esodo 7:1) Oibe, Dirava ese Mose ia hagoadaia bona ia dekenai siahu ia henia. Iehova ena lauma ia abia dainai, Mose be mai ena badina lasi Farao bona ena turadia gari henia totona.
Ita danu be Iehova ena lauma helaga, o ena siahu, ita gaukaralaia iseda hesiai gaukara ita karaia totona. (Ioane 14:26; 15:26, 27) Iehova ena heduru ita abia dainai, Davida ena ane ena hereva hegeregerena ita laloa: “Ia sibona lau abidadama henia, vadaeni do lau gari lasi. Taunimanima sibona be edena bamona lau idia hadikaia diba?”—Salamo 56:11.
Iehova be Mose ia hebogahisi henia dainai, sibona ia rakatania lasi ena gaukara karaia totona. To, Dirava ia gwau: “Oi dekenai do lau hamaoroa hereva ibounai dohore oi gwauraia, be oiemu kakana ese Farao dekenai do ia hamaoroa.” (Esodo 7:1, 2) Iehova ese ena lalokau Mose dekenai ia hahedinaraia, Mose ia karaia diba lasi gaukara do ia henia lasi!
Iseda Keristani tadikaka, Atai Herea Diravana, Iehova, ena Witness taudia, edia maduna idia abia dae taudia unai, edia hebamo be Dirava ena harihari gauna. (1 Petero 5:9) Ena be hekwakwanai do ita davaria, to namona be Mose bona Arona bamona—mai boga-auka ida Dirava ena hereva ita harorolaia.
[Footnotes]
a Heberu gado ai, unai hereva ‘meamea pris taudia’ idia hahanaia neganai, babalau taudia edia orea ta ia kikilaia; idia gwau edia siahu be demoni ena siahu ia hanaia. Idia laloa unai taudia ese demoni idia doria bona idia do idia kamonaia, bona idia dekenai demoni be siahu lasi.
[Picture on page 25]
Mose bona Arona be mai boga-auka ida Farao vairanai Iehova ena hereva idia gwauraia