Hagoadaia Herevadia—Gau Namo Hereadia

ITA momo be nega haida ai ita dabu momokani vadaeni​—⁠reana moni ai ita dabu lasi to lalo-goada ai ita dabu. Ita lalohisihisi bada bona ita lalo-metau danu. To, unai bamona negadiai reana ita be mai eda dala ita do idia durua diba gaudia namo hereadia do ita abia. Gaudia be hagoadaia herevadia.

Hagoadaia herevadia ese ta ena lalona idia hagoadaia bona helaro idia henia. Unai dainai, iseda lalona idia manoka eiava idia metau neganai, hagoadaia herevadia ita abia be namo. Edeseniai ita abidia diba?

Baibel ese ita ia hadibaia Iehova be “bogahisihisi bona durua ibounai ia henia Diravana.” (2 Korinto 1:⁠3) Ma ia gwau: “Dirava be daudau lasi ita ta ta dekenai.” (Kara 17:27) Unai dainai heduru bona hagoadaia herevadia ita abia diba. Iehova ese iseda lalona be dala hani amo ia hagoadaia; mani do ita lalodia.

Dirava Ita Tura Henia Karana Amo

Goada ita abia dalana badana be Iehova Dirava tura henia karana amo. Iseda lalona idia goada, badina be ita be mai eda dala unai bamona do ita kara. Mani oi laloa, edena tanobada lohiana bema ita rini henia neganai iseda hereva do ia kamonaia eiava do ia gwau iseda hekwakwanai do ia lalodia? Iehova ena siahu ese edia siahu ia hereaia momokani. To, ia manau​—⁠ia ura bada goevadae lasi taudia ogogamidia ia durua. (Salamo 18:35) Iehova ese ita ia lalokau henia guna danu. Ioane Ginigunana 4:10 ia gwau: “Lalokau ena anina be inai: Ita ese Dirava ita lalokau henia lasi, to Dirava ese ita ia lalokau henia. Bona ia ese iena natuna ia siaia, ia sibona be iseda dika gwauatao dalana totona.” Ma danu, mai ena lalokau ida Iehova ese ita ia veria mai iena Natuna dekenai.​—⁠Ioane 6:⁠44.

Dirava ena lalokau oi abia dae bona tura henia karana amo lalo-goada oi tahua, a? (Iamesi 2:23 itaia.) Haheitalai ta be inai: Bema oi be mai emu turana namona ta, bona oi be ia ida umui ruaosi sibona umui helai hebou bona oi ese emu lalo-hekwarahi bona oi laloa momo gaudia, oi ura henia gaudia bona oi moalelaia gaudia, be oi hamaorolaia mai emu gari lasi, unai be moale negana, ani? Iehova ese oi ia boiria, ia dekenai unai bamona do oi karaia totona. Guriguri amo oi hereva henia negana ena lata dekenai taravatu ia atoa lasi​—⁠bona momokani, ia kamonai. (Salamo 65:2; 1 Tesalonika 5:17) Iesu ia guriguri loulou mai lalona ibounai ida. Iena aposetolo 12 ia abia hidi gwauraia neganai, hanuaboi ibounai lalonai ia guriguri guna.​—⁠Luka 6:​12-16; Heberu 5:⁠7.

Nega ta ta ai, ita ta ta ibounai be mai eda dala ita siboda ita noho bona Iehova ida ita herevahereva. Uindo vairanai ita helai mai regerege lasi neganai, eiava metairametaira ita raka loaloa neganai, guriguri amo iseda lalona be Iehova dekenai ita kehoa diba. Unai kara ese iseda lalo-hekwarahi ia hamaragia diba bona iseda lalona ia hagoadaia diba. Ita laloa dobu neganai bema Iehova ese ia karaia gaudia ta ita raraia​—⁠herevana unai gau be guba, au, eiava manu​—⁠to reana unai gau dainai ita diba Iehova ese ita ia lalokau henia bona eda namo ia tahua.​—⁠Roma 1:20.

Dirava Ena Hereva Ita Stadilaia Karana Amo

Ita siboda ese Baibel ita stadilaia neganai, Iehova ena kara idia hedinarai momokani ita dekenai. Baibel ese ia hahedinaraia loulou Iehova be ‘hebogahisi bona hariharibada Diravana, ia be badu dekenai ia haraga lasi, to hebogahisi bona lalokau dekenai ia be haraga.’ (Esodo 34:6; Nehemia 9:17; Salamo 86:15) Iehova ena ura korikorina ta be ia ura iena hesiai taudia tanobada ai ia hagoadaia.

Iehova ena hereva Isaia 66:13 dekenai mani oi laloa, ia gwau: “Sinana ese iena mero ia hamoalea bona hagoadaia bamona, lau ese umui do lau hamoalea bona hagoadaia.” Iehova ese hahine ia karaia dalana dainai, hahine ena lalokau iena natuna dekediai be sibona ena ura dadaraia bona noho hanaihanai lalokauna. Sina mai lalokauna ese ena natuna mai berona ena lalona ia hagoadaia dalana bema oi itaia, Iehova ena hereva, ia ese ena orea taudia edia lalona do ia hagoadaia herevana, ena anina oi lalo-pararalaia.

Unai bamona hagoadaia karadia sivaraidia momo be Baibel lalonai. Kwini Iesebele ia gwau Elia do ia alaia mase; unai neganai Elia ia gari bena ena mauri totona ia heau. Ena lalona ia metau herea dainai, tano gagaena ai ia raka lao, ela bona dina ta ia ore. Toana be ranu bona aniani ia laohaia lasi. Ia lalohisihisi bada dainai, Elia ese Iehova ia hamaoroa ia ura do ia mase. (1 King Taudia 19:​1-4) Vadaeni, Iehova ese dahaka ia karaia, ena peroveta tauna ena lalona hagoadaia totona?

Elia ia daradoko, ia laloa ia be anina lasi, bona ia gari, to Iehova ese ia gwau henia lasi. Lasi, to Elia ese “gado maragina, hereva manoka” ia kamonai. (1 King Taudia 19:12) Bema 1 King Taudia karoa 19 oi duahia, Iehova ese Elia ena lalona ia hagoadaia bona ia hanamoa bona ena abidadama ia hagoadaia dalana do oi itaia. Elia ena lalona ia hekwarahi bada, to Iehova ese ia hagoadaia momokani, do ia gaukara noho totona. (Isaia 40:​1, 2 itaia.) Daudau lasi iena gaukara ia karaia lou.

Unai hegeregerena, Iesu Keriso ese ia murinai idia raka taudia ia hagoadaia. Isaia ese Mesia be inai bamona ia perovetalaia: “Lohiabada Dirava . . . ese lau ia siaia vadaeni, kudouna idia makohia taudia, do lau hanamoa lou, . . . taitai taudia ibounai do lau durua bona hagoadaia totona.” (Isaia 61:​1-3) Iesu be tanobada ai ia noho neganai, ia hahedinaraia goevagoeva ia ese unai hereva ia hamomokania. (Luka 4:​17-21) Bema mamina oi abia ta ese emu lalona do ia hagoadaia be namo, Iesu ese edia lalona idia hisihisi bona idia dabu taudia ia kara henidia mai ena manau bona mai ena lalokau ida karadia do oi laloa be namo. Momokani, Baibel stadilaia namonamo karana ese iseda lalona ia hagoadaia bada diba.

Kongregesen Ena Amo

Keristani oreana lalonai, hagoadaia herevadia bona karadia namo hereadia be momo. Dirava ese ena lauma amo aposetolo Paulo ia hasiahua, inai hereva ia torea totona: “Umui ta ta dekenai goada do umui henia, bona durua do umui henia.” (1 Tesalonika 5:11) Kongregesen heboudia ese iseda lalona be edena bamona idia hagoadaia diba?

Momokani, Keristani heboudia ita lao henidia ena badina badana be ‘Dirava ese ita do ia hadibaia’ totona, bona ia bona ena kara be ita do idia hadibalaia totona. (Ioane 6:45) Unai hahediba idia henia, taunimanima hagoadaia totona. Kara 15:32 ia gwau: “Iuda bona Sila . . . edia hereva goada dekena amo varavara idia hagoadaia.”

Nega ta inai oi davaria a​—⁠Keristani hebouna ta oi lao henia neganai emu lalona ia metau, to emu ruma oi lou henia neganai emu lalona ia metau lasi? Reana haroro herevana ta, eiava haere ta, eiava guriguri herevana ta ese emu lalona ia hagoadaia bona ia hamoalea. Unai dainai, Keristani heboudia oi reaia lasi.​—⁠Heberu 10:​24, 25.

Iseda tadikaka bona taihu edia hebamo haroro gaukarana ai bona nega idaudia ai danu ese eda lalona ia hagoadaia diba. Heberu gado herevadia haida edia anina be “kwatua hebou,” to gabeai unai hereva idia gwauraia, “goada” eiava “hagoadaia” idia herevalaia neganai​—⁠unai ena badina be, gau haida ita kwatua hebou neganai idia goada idia lao. Unai be momokani, kongregesen lalonai danu. Hebamo heheni karana ese ita ia hagoadaia. Bona lalokau ese ita ia hatamonaia, ia be kwatua hebou gauna hereadaena.​—⁠Kolose 3:⁠14.

Nega haida iseda tadikaka eiava taihu edia abidadama ese ita ia hagoadaia. (1 Tesalonika 3:​7, 8) Nega haida edia lalokau ese. (Filemona 7) Bona nega haida, Dirava ena Basileia sivaraina harorolaia gaukarana lalonai idia ida ita gaukara hebou dainai, goada ita davaria. Bema oi manoka bona oi ura ta ese oi do ia hagoadaia haroro gaukarana do oi karaia totona, namona be dala oi karaia, pablisa burukana ta eiava Basileia harorolaia gaukarana ia manadalaia pablisa tauna ta ida do umui gaukara hebou totona, ani? Bema unai bamona oi karaia, goada bada do oi davaria.​—⁠Hadibaia Tauna 4:​9-12; Filipi 1:⁠27.

‘Hesiai Tauna mai Ena Kamonai Bona mai Ena Kara Maoromaoro’ Ena Amo

Iseda tomadiho amo goada abia daladia be daika ese ia hegaegaelaia? Iesu ese orea ta ia abia hidi, lauma aniani be “aniani neganai” do ia henia totona; unai orea be ‘hesiai tauna mai ena kamonai bona mai ena kara maoromaoro’ ia gwauraia. (Mataio 24:45) Aposetolo edia negai, unai orea, Dirava ese ena lauma amo ia horoa Keristani taudia, be idia gaukara. Hakaua oreana ena elda taudia Ierusalema dekenai ese hahediba bona hakaua herevadia be revareva amo idia siaia lao kongregesen dekediai. Unai dainai dahaka ia vara? Baibel ia gwau kongregesen ese unai bamona revarevana ta idia davaria neganai, “revareva idia duahia, bona inai goada henia hereva namona dekenai idia moale bada.”​—⁠Kara 15:​23-31.

Unai hegeregerena, hari inai dina gabedia dikadia lalonai, hesiai tauna mai ena kamonai bona mai ena kara maoromaoro ese lauma aniani ia henia; unai aniani ese Iehova ena orea taudia ia hagoadaia bada. Unai aniani oi ania a? Oi abia be haraga, badina be hesiai oreana ese buka bona magasin amo ia halasia tanobada hegegemadai. Gima Kohorona bona Noga! magasin, bona buka, buklet, bona pepapepa danu, Watch Tower Society ese ia printaia gaudia, ese idia duahidia taudia momo momo herea edia lalona idia hagoadaia vadaeni.

Sekit naria tauna ta ia gwau: “Iseda tadikaka bona taihu kahirakahira iboudiai idia ura idia kara maoromaoro, to nega momo lalo-hekwarahi, gari, bona inai lalohadai, idia be hegeregere lasi lalohadaina, idia hekwarahilaia. Iseda magasin edia hereva ese idia momo idia durua, edia mauri bona edia lalona idia biagua lou totona. Edia hereva ese danu elda taudia idia durua, hagoadaia herevadia mai anina do idia henia totona.”

Magasin bona buka idauidau, hesiai oreana mai ena kamonai ese ia henia gaudia, oi gaukaralaia guguru. Unai magasin, buka, bona idia printaia gaudia ma haida edia hereva ese nega dikadia ai iseda lalona idia hagoadaia diba. To, bema oi be mai emu dala lalohisihisi tauna ta ena lalona do oi hagoadaia, Baibel ena hereva unai magasin lalodiai oi gaukaralaia, unai do oi karaia totona. Magasin lalodiai idia torea herevadia momo be pura momo eiava hua momo lalodiai idia tahua namonamo guna bona idia gurigurilaia, bena unai murinai idia toredia namonamo. Edia sisiba herevadia be Baibel amo, idia tohoa bona idia hamomokania vadaeni herevadia unai. Haida ese idia davaria, bema magasin edia hahegoada herevadia ta o rua be lalohisihisi taudia ida idia duahia hebou, unai ese edia lalona ia hagoadaia bada.

Bema dava bada nadidia oi davaria, do oi hunidia a, eiava haida do oi hariharilaidia? Dala oi tahua, emu tadikaka bona taihu kongregesen lalonai do oi hagoadaia. Namona be oi veridia diho lasi to oi hagoadadia, oi maumauraidia lasi to oi hanamodia. Bema unai bamona oi karaia, bona bema emu hereva be “tuari kaia ia gwadaia noho bamona” lasi, to ‘hahediba taudia edia malana’ amo bema oi hereva, reana emu hereva ese taunimanima do idia durudia diba. (Isaia 50:4; Aonega Herevadia 12:18) Momokani, reana do idia laloa oi be dava bada nadina ta bamona​—⁠badina be oiemu amo hagoadaia herevadia momokanidia idia abia!

[Box on page 20]

Dabu Taudia Hagoadaia Herevadia

GIMA KOHORONA bona Noga! magasin idia duahia taudia momo idia gwau, unai magasin edia hereva ese idia durudia, edia hetura karana Iehova ida idia hagoadaia totona. Hahine ta ia gwau: “Unai hereva lau duahia murinai, mamina lau abia Iehova be iena siahu bona iena hairai ibounai ida lau kahirakahira dekenai ia noho. Mamina lau abia ia be turana momokani.” Ma revareva ta ia gwau: “Emai kudouna bona emai lalona ai emai lalohadai Iehova dekenai idia haidaua momokani dainai, emai kara be guna bamona lasi. Unai be hegeregere ta ese emai mata galasi ia huridia goeva bamona, bena hari ai ese gau ibounai ai itaia goevagoeva diba.”

Haida be edia revareva lalonai idia gwau, unai magasin ese idia durudia edia hekwakwanai o lalohisihisi idia hamaoromaoroa totona, unai amo idia diba Iehova ese idia ta ta ia lalodia. Magasin ia duahidia hahinena ta be inai bamona ia hereva: “Tanikiu bada herea, badina umui ese ai umui hadibaia lou Iehova be iena taunimanima ia lalodia bona ia lalokau henidia bada.” Japan dekenai, iena natuna ia mase hahinena ta ese unai lalohisihisi ia herevalaia Noga! magasin be inai bamona ia herevalaia: “Unai magasin ena raudia amo Dirava ena hebogahisi bada ia hedinarai, bona lau taitai bada herea. Unai magasin be gabu namona dekenai lau atoa, sibona lau noho dainai lau lalohisihisi neganai lau abia haraga bona duahia totona.” Ta ia mase dainai ia lalohisihisi hahinena ma ta ia gwau: “Gima Kohorona bona Noga! magasin edia hereva bona buklet ta ladana Oiemu Lalokau Tauna ta Ia Mase Neganai ese lau idia hagoadaia, egu lalohisihisi negana lalonai lau haheauka noho totona.”

Buka Helaga be hahegoada ia henia gauna badana bona ginigunana. (Roma 15:⁠4) Gima Kohorona magasin ese Baibel ia badinaia bona iena hereva ibounai be ia amo. Noga! magasin danu be unai bamona. Unai dainai, unai magasin ese hahegoada bona heduru idia henia idia duahia taudia dekenai.

[Picture on page 23]

Lalona hagoadaia Diravana be guriguri kamonaia Diravana danu