Basileia Haroro Ripoti

Guna Idia Inai Heheni Taudia be Hari mai Lalo-Tamona ida Iehova Idia Hesiai Henia

BRANKO ia gwau: “Bosnia dekenai, lau be mai egu ipidi ida gadi gaukara lau karaia neganai, unai be nega ginigunana Iehova ena Witness taudia edia ladana lau kamonai.”a

Branko be tuari lalonai bero idia abia taudia idia atoa hospital ta dekenai gadi gaukarana ia karaia. Doketa ta be Witness taudia ida Baibel ia stadilaia. Hanuaboi ta ai ia gaukara neganai, ia ese Baibel amo ia dibaia gaudia momo be Branko ia hamaorolaia.

Branko ese unai hanuaboi ai ia kamonai gaudia dainai, maoromaoro ena ipidi ia atoa diho. Witness taudia ia hereva henia, ia ura ma diba haida ia abia. Gabeai, Branko be Europe ena tano ma ta ai ia lao neganai, Kingdom Hall ia tahua, bena Iehova ena Witness taudia edia Yugoslavia kongregesen ta ai edia hebou dekenai ia lao. Unuseniai Branko ese Slobodan ia davaria.

Slobodan danu be Bosnia amo ia mai tauna bona guna, Branko hegeregerena, unai tuari tamona lalonai ia tuari​—⁠to unai be Branko ena orea idia tuari henia taudia edia orea lalonai. Guna Slobodan be Serb taudia edia orea lalonai Croat taudia ia tuari henia. To Branko bona Slobodan idia hedavari negana ai, Slobodan be ia bapatiso vadaeni Iehova ena Witness tauna. Iena inai tauna gunana, Branko, ia hamaoroa bema ia ura neganai Baibel do idia stadilaia hebou. Idia stadi hebou neganai, Branko ese Iehova ena kara ia dibaia, bona iena lalokau Dirava dekenai ia bada ia lao. Unai ese Branko ia doria ela bona ena mauri be Havaraia Tauna dekenai ia gwauhamatalaia. October 1993 ai ranu bapatiso amo ena gwauhamata ena toana ia hahedinaraia.

Edena bamona Slobodan be Iehova ena Witness tauna ta ai ia lao? Guna Bosnia ena tuari gabuna ia rakatania vadaeni. Ena be Witness taudia edia buka haida ia duahia, to Dirava ena Hereva ia tahua momokani lasi ela bona lagani 1992 ai Witness taudia rua be ena ruma dekenai idia lao neganai. Daika ese Slobodan ia vadivadi henia, bona ia ura ia ida Baibel ia stadilaia? Bosnia amo ia mai bona guna ia maragi negana ai Muslim tomadiho dalana ia badinaia tauna Mujo ese. Guna Mujo bona Slobodan be inai heheni besedia taudia, to Baibel stadi idia karaia hebou loulou lalonai, dina ta ta iboudiai idia hebou, edia abidadama hagoadaia heheni totona.

Guna ena ladana idia gwauraia Yugoslavia tanona dekenai, tuari dainai taunimanima handred tausen momo idia mase. To hari Branko, Slobodan, bona Mujo ese sivarai namona harorolaia ful-taim gaukarana idia karaia, Iehova ena Witness taudia edia kongregesen ta lalonai. Bese o kopi idaudia inai henia karana idia rakatania vadaeni, bona hari edia Havaraia Tauna, Iehova, idia kamonai henia dainai maino idia tahua.

To, badina be dahaka edia kara idia haidaua? Badina be Iehova idia lalokau henia, Baibel idia matauraia, bona idia ura bada ena hereva momokani do idia badinaia dainai. Buka Helaga ia hereva hegeregerena, “Dirava ena hereva be ia mauri noho, bona ia be mai ena siahu . . . iseda lalona bona iseda kudouna ena ura ibounai ia tahua diba.”​—Heberu 4:​12.

[Footnotes]