Mai Kwalimu ida Basileia Sivaraina Idia Hariharilaia

“DAHAKA Dainai Mauri be Hekwakwanai amo Ia Honu?—Hekwakwanai Lasi Paradaisona Ia Vara Diba, A?” Unai be Basileia Sivaraina Namba 34 ena ladana. Tanobada hegegemadai lalonai, April bona May 1995 ai, unai rau hani pepapepadia be gado 139 ai idia hariharilaia. Jamaica ai idia noho Witness taudia ese unai hariharilaia gaukarana be inai bamona idia gwauraia, “unai lagani ai ia vara gauna namo hereana ta.” Belgium ena Witness taudia idia gwau: “Tadikaka ia hamoalea bada herea.” Unai be Czechia ai idia noho Iehova ena Witness taudia edia nega ginigunana, unai bamona Basileia Sivaraina hariharilaia gaukara idia karaia diba. Brens ia gwau: “Unai hariharilaia gaukarana idia karaia mai edia ura bona mai edia moale ida.” Tano idauidau momo amo unai bamona ripoti ai kamonai.

Basileia Sivaraina Namba 34 ena sivarai be mai anina bada, tomadiho ena kara dika idia lalohisihisilaia bona idia taitailaia taudia dekenai. (Esekiela 9:4) “Nega ena dokona dekenai, metau dikadia momo do idia vara” dainai edia mauri idia dika taudia ia hamoalea. (2 Timoteo 3:1) Unai pepapepa ese Baibel ena hereva ia herevalaia, ia hahedinarai nega daudau lasi Dirava ese mauri ena hekwakwanai do ia hanamodia. Hekwakwanai lasi paradaisona be momokani do ia vara. (Luka 23:43) Basileia Sivaraina idia duahia taudia momo ese ena sivarai idia abia dae. Togo ai, tau ta be Witness tauna ta dekenai ia gwau: “Ta ese umui gwauraia herevadia ia gorea diba lasi.”

Momokani, taunimanima momo ese Basileia Sivaraina hariharilaia gaukarana idia itaia. Denmark dekenai, ruma tauna ta be pepapepa ia hariharilaia Witness tauna dekenai ia gwau: “Hari sibona United States amo lau mai. Lau rakatania gwauraia neganai, tau ta be unai pepapepa lau ia henia. Hari sibona lau ginidae, bona karaharaga unai pepapepa tamona be Denmark gado ai lau dekenai oi mailaia!”

Mai Edia Ura ida Hariharilaia Gaukara Idia Durua

Tanobada hegegemadai Iehova ena Witness taudia be mai edia ura ida unai pepapepa hariharilaia gaukarana ai idia vareai. Basileia Sivaraina idia hariharilaia huadia lalonai, Austria, El Salvador, Haiti, Hungary, Italy, New Caledonia, bona ma tano momo dekenai pablisa be momo herea, guna edia momo be unai hegeregerena lasi.

Zambia dekenai sekit naria tauna ta ese ena lagani toi kekenina, Deborah, ia hadibaia dainai ruma ta ruma ta dekenai buka bona magasin ia hariharilaia diba. Basileia Sivaraina Namba 34 hariharilaia negana ai, Deborah ese pepapepa 45 bona ma haida ia hariharilaia. Ena sinana be Basileia Sivaraina idia abia dae taudia haida ida Baibel stadi ia hamatamaia.

South Africa dekenai kekeni badana ta ese iena sikuli turana ta, Cashia, dekenai pepapepa ta ia henia. Cashia ese unai pepapepa ia duahia bona ia gwau: “Unai be namo momokani—tanobada paradaisona dekenai mauri hanaihanai! Dahaka dainai guna ta ese lau ia hamaoroa lasi?” Baibel stadi ia hamatamaia. Wiki ta murinai Cashia be pepapepa ma ta ia abia. Pepapepa iharuana be Cyprus dekenai ia noho Roman Katolik kekenina ta amo ia abia, revareva amo idia ruaosi idia tura heheni. Ena turana be Cashia dekenai ia hahedinaraia Roman Katolik Oreana ena hahediba herevadia be koikoi, ma ia hamaoroa iena ura be Iehova ena Witness taudia ida Baibel do ia stadilaia. Momokani, unai ese Cashia ia hagoadaia iena stadi do ia karaia noho totona.

Lagani 10 merona ta Switzerland ai be ena sinana ida pepapepa hariharilaia gaukara idia karaia. Pepapepa ta ia henia hahine matamatana ta dekenai bona ia ia hagoadaia do ia duahia namonamo. Hahine ese unai mero ia nanadaia bema pepapepa ena laulau ese ia hahedinaraia gauna​—tanobada dekenai mauri hanaihanai​—⁠herevana ia abia dae, eiava. Mero ena haere be dahaka? “Oibe, lau diba momokani do ia vara.” Bena unai hahine ese ia hahedinaraia hereva momokani ia tahua badina be sibona ena tomadiho lalonai kerere momo idia noho. Idia lou henia neganai, Baibel stadi idia hamatamaia.

Maoromaoro Kara ta Idia Karaia

Nega haida taunimanima be Basileia Sivaraina idia duahia murinai, maoromaoro kara ta idia karaia. Lagani 11 kekenina ta Belgium ai be unai pepapepa ia duahia murinai, Iehova ena Witness tauna ta ia hamaoroa sitoa dekenai ia henaohenao vadaeni. Kekeni ena sinana ia ura lasi taunimanima idia diba dahaka ia karaia, to kekeni be ena lalona dekenai ena kerere ena mamina ia abia, ia ese ia duahia herevadia dainai, bona ia gwau ia ura do ia lao sitoa biaguna ia itaia totona. Gabeai ena sinana ese gwaumaoro ia henia Witness tauna ida do ia lao sitoa dekenai. Sitoa biaguna ese iena hereva ia kamonai neganai ia hoa. Basileia Sivaraina dainai kekeni be unai bamona ia kara sivaraina ia kamonaia neganai, pepapepa ta ia abia, ia sibona be unai pepapepa ena hereva ena siahu ia lalo-pararalaia totona. Hari unai kekeni ese anina bada ia havaraia Baibel stadi ia abia loulou.

Cameroon dekenai Witness hahine ese tau ta dekenai Basileia Sivaraina pepapepa ta ia rakatania. Gabeai ia gwau: “Ai lou henia neganai, ai davaria ena pepapepa ia makaia vadaeni bona ia ura henanadai haida ia gwauraia. Iena henanadai edia haere namodia ia abia murinai, ia gwau: ‘Unai hereva be momokani, tomadiho ese taunimanima edia lalohisihisi ia habadaia. Emui pepapepa ese egu lalo-parara ia habadaia, to lau ura egu diba lau habadaia.’ ” Hari ia ese Baibel stadi ia abia loulou.

Uruguay dekenai Witness tauna ta be ruma ta ruma ta dekenai ia lao bona tau ta dekenai pepapepa ta ia henia. Unai Witness tauna be ena ruma-ta-ruma-ta haroro gaukara ia karaia noho ela bona blok ia haorea bona unai tau ena ruma ena murina iduarana dekenai ia ginidae. Ia hoa, badina ruma tauna ese ia ia naria, bona pepapepa be ena imana ai ia dogoatao. Pepapepa ia duahia vadaeni bona ia ura diba ma haida ia ura ia abia. Maoromaoro Baibel stadi idia hamatamaia.

Witness Lasi Taudia Idia Heduru

Japan dekenai Witness merona be lagani 50 bamona tauna ta dekenai ia lao bona unai pepapepa ia hahedinaraia ia dekenai. Unai tau ese ia nanadaia, ia gwau: “Matakepulu taudia oi davaria neganai, unai pepapepa be edena bamona oi gaukaralaia?” Witness merona ia gwau ia diba lasi. Unai tau ese ia noia do ia naria, bena ena ruma lalonai ia vareai lou. Basileia Sivaraina pepapepana ta ia mailaia bona ia gwau: “Pepapepa ta lau abia vadaeni. Lau laloa ia namo herea bona anina bada herevadia idia noho, unai dainai matakepulu taudia edia revareva Braille dekenai lau torea hanai vadaeni. Mani inai oi gaukaralaia matakepulu taudia durua totona.” Unai tau ese Basileia Sivaraina be Braille dekenai hahanaia gaukarana ai hora momo ia haorea, matakepulu taudia ese ena sivarai namona idia reaia lasi totona.

Slovakia ai, tau ta be unai pepapepa ia ura dikadika dainai, kopi 20 ia karaia bena unai kala lasi gaudia ia hariharilaia. Switzerland dekenai, pablisa ta ese Basileia Sivaraina pepapepana ruma bese ta dekenai ia rakatania bena edia ruma ena atai kahana dekenai idia noho taudia ia vadivadi henia danu. Ia diho neganai, unai ruma bese ena mero ta ia mai, ma pepapepa 19 ia noia. Unai mero ena sikuli ai, stiuden taudia be tanobada ena hekwakwanai bona edia hanaia daladia tahua karana torelaia gaukarana idia abia. Ia ura Basileia Sivaraina pepapepadia do ia abia, ena klas taudia ta ta edia.

Ta Idia Reaia Lasi

Unai pepapepa hariharilaia gaukara lalonai, idia hekwarahi bada ta idia reaia lasi totona. New Caledonia dekenai Witness taudia rua be gunika kahana ai ia noho besena ta dekenai idia lao, Basileia Sivaraina idia hariharilaia totona. Idia lao neganai, dala ta idia itaia, ena toana be taunimanima idia rakalaia lasi, to idia laloa namona be do idia lao bona do idia itaia bema ena dokona ai taunimanima idia noho, eiava. Motuka idia rakatania, bena unai dala maragina ai idia raka lao, bona sinavai idia hanaia, ela bona ruma ta idia davaria. Unuseniai tau ta bona ena hahine idia davaria; Iehova ena Witness taudia idia diba lasi, to Basileia Sivaraina pepapepana ta idia abia dae. Gabeai, pablisa taudia ese idia lou henia neganai, idia hoa, badina unai taudia ese dala bona nese hanai maragidia haida idia hanamoa vadaeni, Witness taudia be ruma dekenai edia motuka idia taria lao diba totona. Baibel stadi idia karaia matamaia.

Poland dekenai Witness tauna ta be ruma haginia gabuna ta ia rakaia hanai, Basileia Sivaraina pepapepana be ruma tauna ta dekenai ia henia totona. Ruma haginia gabuna ia rakaia hanai lou neganai, gaukara taudia ese ia idia raraia. Vadaeni, idia ta ese ia boiria, ia noia idia ia laloaboio lasi. Idia dekenai ia lao neganai, edia gaukara idia hadokoa, bona pepapepa ena sivarai ia kikilaia neganai, idia hakala henia namonamo. Idia ese Basileia Sivaraina pepapepadia bona magasin idia abia dae, bena gabeai, ia lou henia neganai, buka danu idia abidia dae.

Basileia Sivaraina Namba 34 pepapepadia handred milioni momo be gado momo lalodiai idia hariharilaia. Iena sivarai be mai ena siahu bada. Taunimanima momo ia hadibadia vadaeni hekwakwanai lasi paradaisona do ia vara diba. Aiemai guriguri be kara namo taudia do idia kamonai noho ela bona “manau taudia” ihuanai tanobada dekenai do idia noho bona “do idia helai namonamo, mai moale bona mai maino danu.”—Salamo 37:11.

[Box on page 31]

Magasin Hariharilaia Noho!

April bona May 1995 ai Basileia Sivaraina Namba 34 hariharilaia gaukarana be mai kwalimu ida ia vara. Unai hua rua lalonai, Gima Kohorona bona Noga! magasin momo herea hariharilaia gaukarana danu ia vara. Haheitalai ta be Czech Republic ai ia noho tadikakana, ia gwau April lalonai Basileia Sivaraina pepapepa 250 bona magasin 750 ia hariharilaia. Guadeloupe dekenai, Saturday, April 15, idia abia hidi, magasin hariharilaia dinana badana ai idia halaoa. Unai dina dekenai Guadeloupe pablisa taudia kahirakahira ibounai be haroro gaukara idia karaia! April lalonai, Slovakia dekenai magasin momo idia hariharilaia, edia momo ese hua gunadia ta ta ai idia hariharilaia gaudia edia momo ia hanaia. Tano momo dekena amo unai bamona ripoti ai abidia.

Unai dainai April bona May 1996 lalonai danu magasin gaukara do umui goadalaia be namo, ani? Kongregesen ese magasin dinadia badadia do idia hegaegaelaia diba. Tadikaka haida be heduru painia gaukara do idia karaia diba. Unai dala bona dala ma haida amo magasin hariharilaia gaukarana do umui goadalaia diba, bona Basileia Sivaraina Namba 34 ena sivarai namona do umui halasia noho. Bena, lagani gunanai bamona, Iehova ese iseda haroro goadagoada karana do ia hanamoa.​​—⁠2 Timoteo 4:​22.