Emui Diari Umui Hahedinaraia!

BURUKA tauna ese gwauhamata Mesiana do ia itaia negana ia ginidae vadaeni! Lauma helaga ese Simeona ia hadibaia vadaeni “do ia mase lasi ela bona [Iehova] ena Keriso do ia itaia guna.” (Luka 2:​26) To Simeona be dubu helaga dekenai ia vareai bena Maria bona Iosepa ese beibi Iesu idia henia ia dekenai bona ia rosia neganai, ia moale bada herea! Dirava ia hanamoa, ia gwau: “Lohiabada e, oiemu hesiai tauna harihari mase dekenai mai maino danu do lau lao . . . egu matana ese oiemu Hamauria Kara ia itaia vadaeni . . . Diari ta oi havaraia vadaeni inai, bese idauidau dekenai diari do ia henia totona, bona ia ese hairai bada, be oiemu bese Israela taudia dekenai do ia henia.”​—Luka 2:​27-​32; Isaia 42:​1-6 itaia.

Iesu ena mauri lagani be 30 neganai bapatiso ia abia dinana amo ela bona ena mase dinana, ia hamomokania ia be tanobada ena “diari.” Edena dala amo? Ia ese Dirava ena Basileia bona Iena palani ia harorolaia neganai, lauma diarina ia halasia. Danu, ia hahedinaraia tomadiho koikoi hadibaia herevadia idia kerere, bona ia hahedinaraia goevagoeva edena kara be dibura karadia. (Mataio 15:​3-9; Galatia 5:​19-​21) Unai dainai, mai ena maoro ida Iesu ia gwau diba: “Lau be tanobada ena diari.”​—Ioane 8:​12.

Lagani 33 C.E. ai Iesu ia mase. Unai neganai diari ia ore, a? Lasi vaitani! Tanobada dekenai Iesu ia do noho neganai, ia ese ena hahediba taudia ia hamaoroa, ia gwau: “Umui emui diari taunimanima edia vairana dekenai unai bamona do umui hedinaraia.”​(Mataio 5:​16) Unai dainai, Iesu ena mase murinai, ia murinai idia raka taudia ese unai diari idia hahedinaraia noho.

Hari inai nega ai Iesu idia tohotohoa Keristani taudia ese edia haroro gaukarana amo Iehova ena diari idia hahedinaraia. Idia be ‘diari taudia bamona idia noho,’ bona idia hamomokania Keristani maurina korikorina idia haheitalaia.​—Efeso 5:8.

This article is repeated in w97 6/1.