Tura Korikoridia Ita Abia be Namo

JENNY bona Sue be idia herevahereva bada bona edia imana danu idia gaukaralaia. Idia kiri, bona edia matana idia diari​—⁠edia kara ibounai ese idia hahedinaraia ta ta ese ia herevalaia gauna idia kamonaia namonamo. Ena be edia noho daladia be idauidau, gau momo dekenai idia lalo-tamona, bona idia hemataurai heheni bada.

Ma gabu ta dekenai, Eric bona Dennis be idia gaukara hebou noho, lagani momo lalodiai idia ruaosi be unai bamona gaukara idia karaia hebou. Idia kiki hebou bona mai moale ida idia kiri. Edia kiki lalonai, mai anina bada gaudia idia herevalaidia neganai, idia ta ta ese edia lalohadai korikorina idia gwauraia hedinarai. Idia hemataurai heheni. Jenny bona Sue bamona, Eric bona Dennis be tura korikoridia.

Ataiai ai torea sivaraidia oi duahia neganai, reana emu kudouna ia hamoalea dainai emu turadia oi laloa. Eiava, oi duahia neganai, oi ura unai bamona hetura karana oi davaria. Oi danu oi davaria diba!

Tura Korikoridia Ita Tahua Ena Badina

Hetura karadia namodia be mai anina bada iseda lalona bona tauanina idia gaukara namonamo totona. Ita sibona ita noho neganai bema ita lalohisihisi, unai be eda kerere ta ena toana lasi. Tahua gaukara idia karaia taudia haida idia gwau, sibona ita noho dainai ita abia lalohisihisina be hitolo bamona, ia hahedinaraia ita ura hebamo. Aniani ese hitolo mamina ia hamaragia eiava ia haorea hegeregerena, hebamo maorona ese sibona noho lalohisihisina ia hamaragia eiava ia haorea diba. Ita idia laloa bada turadia namodia be ita davaria diba.

Dirava ese taunimanima ia karaia neganai, idia lalonai hetura karana ena ura ia atoa. (Genese 2:18) Baibel ia gwau tura eiava bamona korikorina be “nega dika ia vara neganai, . . . iena lalokau ia hedinaraia noho.” (Aonega Herevadia 17:17) Unai dainai, tura korikoridia bema idia ura heduru idia abia, ta ta dekenai idia noinoi diba. To hetura ena anina be ta oi noia oi ia durua totona, o gaukara o gadara neganai oi ia bamoa totona sibona lasi. Tura namodia ese edia turadia idia durudia edia kara namodia idia hahedinaraia totona. Aonega Herevadia 27:17 ia gwau: “Tau ta ese ma tau ta dekena amo, diba ia davaria noho, auri ta ese ma auri ta ia segea noho bamona.” Auri ta oi gaukaralaia diba kaia matana oi segea totona; unai hegeregerena, reana turana ta ese iena turana ena diba ia habadaia diba bona lauma dalanai ia hagoadaia diba. Bema hekwakwanai dainai ita lalohisihisi, iseda turana ena hebogahisi toana bona Baibel amo ita ia sisiba henia karana ese ita do ia hagoadaia bada diba.

Baibel lalonai, idia hahedinaraia hetura karana be lalokau, diba heheni karana, lalohadai dobudia kikilaia hebou karana, bona hebamo karana dainai idia vara. Haida ese edia dekena taudia eiava idia ida idia gaukara hebou taudia, eiava ma haida idia tura henidia. Haida ese edia varavara haida be edia turadia korikoridia idia gwauraia. To hari, momo idia hekwarahi tura korikoridia davaria bona bamodia totona. Dahaka dainai unai ia vara? Hetura karana momokanina bona daudauna oi moalelaia diba, a?