Ia Noho Hanaihanai Hetura Karana Oi Moalelaia Diba

HETURA karana koua gaudia idia noho. Momokani, Baibel ia gwau inai “nega ena dokona” lalonai lalokau, hebogahisi, bona helaga karadia do idia badinaia lasi. (2 Timoteo 3:​1-5; Mataio 24:12) Unai kerere idia vara dainai taunimanima momo herea be sibona idia noho bona idia lalohisihisi, guna unai bamona ia vara lasi. Hahine ta ia gwau: “Egu noho gabuna be Noa ena lagatoi bamona. Bema oi headava lasi, oi guia diba lasi.” To, ita gwau diba lasi unai be sibodia idia noho dainai idia lalohisihisi taudia ta ta iboudiai edia kerere. Tanobada ena kahana haida dekenai, ia noho hanaihanai hetura karana idia koua gaudia be inai: Nega momo taunimanima be gabu ta amo idia lao ma gabu ta dekenai, ruma bese idia parara, siti lalodiai taunimanima idia herevahereva lasi bona kara dika be bada, bona laga-ani negadia be hegeregere lasi hebamo karadia totona.

Hari inai negai siti lalonai ia noho tauna ese wiki tamona lalonai taunimanima momo herea ia itaia diba. Edia momo ese guna lagani 1700 lalonai hanua dekenai ia noho tauna ese lagani ta eiava iena mauri ibounai lalonai ia itaia taudia edia momo ia hanaia! To, hari inai negai hetura karadia momo be momokani lasi. Taunimanima momo be nega ibounai edia bamodia ida idia hebamo heheni bona moale karadia idia tahua. To, ita diba, bema bamona dikadia ida moale karadia ita karaia, unai be hegeregere au ginigini amo lahi ita karaia bamona. Hadibaia Tauna 7:​5, 6 ia gwau: “Aonega taudia ese oi do idia gwau henia be namo. To kavakava taudia ese oi do idia hanamoa be dika. Kavakava tauna ia kiri neganai, unai regena be au ginigini lahi lalonai edia regena bamona. Unai kiri be anina lasi.” Au ginigini ese nega sisina lalonai lahi hururuhururu bona regerege bada do ia havaraia, to ia hegeregere lasi ita do ia hasiahua. Unai hegeregerena, regerege bada, kiri momo bamodia ese nega sisina lalonai iseda lalona do idia haboioa reana, to iseda sibona noho lalohisihisina do idia haorea lasi, tura korikoridia ese idia karaia bamona.

Oiemu ura dainai sibona oi noho be sibona noho lalohisihisina amo ia idau. Ita be nega haida ita ura sibona ita noho be namo ita laga-ani totona, unai amo iseda turadia ita durudia diba. Momo be sibodia idia noho idia lalohisihisilaia neganai, maoromaoro televisen idia raraia o kompiuta gadara idia gadaralaia. Tahua ripoti ta ese ia hahedinaraia sibona noho dainai idia lalohisihisi taudia momo ese televisen idia raraia. To, unai tahua gaukara idia karaia taudia idia gwau, sibona ita noho dainai ita lalohisihisi neganai, nega daudau lalonai televisen raraia karana be kara dikana momokani. Ita raraia neganai, gau ta ita karaia lasi, ita hesiku bona lalohadai idauidau ita lalohadailaia kava. Unai be taunimanima tura henidia dalana ida ia hegeregere lasi.

Sibona ita noho negadia ai bema iseda nega ita gaukaralaia namonamo, unai be mai anina bada negadia. Unai ita karaia diba, bema ita duahiduahi, revareva ita torea, gau ta ita karaia, bona ita laga-ani. Sibona ita noho negadia namodia lalonai Dirava ita guriguri henia, Baibel ita stadilaia, bona ita laloa dobu. (Salamo 63:⁠6) Unai dala amo Iehova Dirava, iseda Turana hereadaena, kahirakahira dekenai ita lao.

Hetura Karadia Sivaraidia Baibel Lalonai

Taunimanima momo ita tura henidia be namo, to Baibel ese ita ia hadibaia “turana ta ia noho, iena turana kara, ese tadikaka ta ena lalokau ia hereaia noho.” (Aonega Herevadia 18:24) Namona be ita ta ta ibounai be mai eda turana korikoridia haida; idia ese ita idia laloa bada, edia hetura karana ese ita ia hamoalea, ia hagoadaia, bona ia hamainoa. Ena be hari inai negai unai bamona hetura karana ita davaria be auka, to Baibel lalonai haheitalai haida idia noho. Hegeregere, hetura karana hereana be Davida bona Ionatana huanai. Unai hetura karana amo dahaka ita diba? Badina be dahaka edia hetura karana be ia noho hanaihanai?

Badina be, Davida bona Ionatana be mai anina bada gaudia idia ura henia. Gau badana momokani be idia ese Iehova Dirava badinaia karana idia laloa bada. Ionatana ia itaia Davida ese Dirava ia abidadama henia bona Iehova ena bese taudia naria totona ia tuari; unai dainai “Ionatana ese Davida ia lalokau henia, ia sibona ia lalokau henia hegeregere.” (1 Samuela 18:⁠1) Oibe, Dirava lalokau henia karana ese tura ia hatamonadia.

Ionatana bona Davida be taunimanima goadadia bona edia mauri lalonai Iehova ena taravatu idia badinaia. Unai dainai idia hemataurai heheni diba. (1 Samuela 19:​1-7; 20:​9-14; 24:⁠6) Bema iseda turadia be Baibel ena taravatu idia badinaia, unai be hahenamo bada herea ita dekenai.

Ma gau haida ese Davida bona Ionatana edia hetura karana idia hanamoa. Edia hetura karana lalonai idia momokani bona idia hereva maoromaoro, ta ta dekenai edia lalohadai dobudia idia kikilaia. Ionatana ese Davida ia lalokau henia dainai, Davida ena ura ia tahua guna bona ia sibona ena be gabeai. Ena be Dirava ese Davida ia gwauhamata henia pavapava dagina do ia henia, to Ionatana ia mama lasi; Davida ena lalona ia hagoadaia bona lauma dalanai ia durua. Bona Davida ese iena heduru ia abia dae. (1 Samuela 23:​16-18) Baibel ese ia gwauraidia maoro daladia ai, Davida bona Ionatana ese edia lalokau ta ta dainai idia hahedinaraia. Edia hetura karana maorona ia vara, badina be ta ta edia kara idia abia dae bona idia lalokau heheni. (1 Samuela 20:41; 2 Samuela 1:26) Edia hetura karana ia makohi diba lasi, badina idia ruaosi ese Dirava idia badinaia hanaihanai. Ita danu bema unai dala ita badinaia, ita be haida ida do ita hetura heheni momokani diba bona eda hetura karana do ia noho hanaihanai diba.

Hetura Daladia

Oi be tura korikoridia oi tahua noho, a? Reana haida be gabu kahirakahira dekenai do oi davaridia. Oi hedavari henidia loulou taudia be oiemu turadia ai idia lao diba, bona reana idia be oiemu hetura karana idia abia be namo. Namona be Paulo ena sisiba hegeregerena iseda hetura karana iseda Keristani tadikaka bona taihu dekenai, do ita “habadaia” be namo. (2 Korinto 6:​11-13) To, bema ta dekenai hetura karana namona oi havaraia lasi, oi lalohisihisilaia lasi. Oi be ta ida do umui hetura heheni momokani totona nega bada do oi gaukaralaia, bona hebamo karadia haida be hetura karadia namodia ai do idia lao lasi. (Hadibaia Tauna 11:​1, 2, 6) Hetura karana korikorina ita moalelaia totona, namona be ita sibona do ita laloa bada lasi, bona Iesu ena sisiba do ita badinaia: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”​—⁠Mataio 7:⁠12.

Daidia be oiemu hetura karana idia abia be namo? Oiemu mauri lagani hegeregere taudia sibona lasi, to uru gabedia taudia bona uru gunadia taudia be edena bamona? Davida bona Ionatana, Ruta bona Naomi bona Paulo bona Timoteo edia hetura karadia lalonai idia ta ta edia lagani be idauidau. (Ruta 1:​16, 17; 1 Korinto 4:17) Oi ese vabu eiava headava lasi taudia oi tura henidia diba, a? Vanegai sibona idia mai bona oiemu noho gabuna dekenai idia noho taudia danu oi lalodia. Reana edia gabu idia rakatania o edia mauri idia haidaua dainai edia turadia momo o iboudiai edia hebamo karana idia haboioa. Oi naria lasi haida ese oi do idia tahua. Bema oi be Keristani tauna ta, Paulo ena sisiba oi badinaia, ia noho hanaihanai hetura karana karaia totona: “Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.”​—⁠Roma 12:⁠10.

Hetura karana be henia karana bamona ita laloa diba. Iesu ia gwau bema henia karana ita karaia, taunimanima ese ita dekenai do idia henia. Danu ia gwau henia karana ena moale be bada, abia karana ena moale be maragi. (Luka 6:38; Kara 20:35) Oi ese tano idauidau taudia oi hedavari henidia, a? Iehova ena Witness taudia edia intenesenel hebouheboudia ese idia hahedinaraia, noho daladia idauidau taudia be Dirava idia tomadiho henia mai edia lalo-tamona ida dainai, ia noho hanaihanai hetura karana korikorina idia havaraia diba.

Hetura Karana Oi Naria

Madi, ena be oi laloa ta be oiemu turana to nega haida oi ia hahisia. Oi laloa ia be oiemu turana, to ia ese udu mauri hereva dikana o oi hamaoroa hunia gauna be ma haida ia hamaorodia, eiava ia totona oi karaia karadia be ia laloa lasi​—⁠unai ese oi ia hahisia bada diba. Unai ia vara neganai, dahaka oi karaia diba?

Haheitalai namona oi hahedinaraia. Oi naria namonamo, emu turana ena lalona do oi hahisia kava garina. Gabu haida dekenai, taunimanima ese edia turadia edia kerere idia kirikirilaia. To, ena be turadia idia gwau idia “hevaseha sibona,” to hebogahisi lasi karadia eiava koikoi karadia ese tura do ia hatamonadia lasi.​—⁠Aonega Herevadia 26:​18, 19.

Oi gaukara goada emu hetura karana oi naria totona. Nega haida lalohisihisi ia vara badina be ta ese ena turana ena manoka ia laloa lasi. Bema emu turana ta be ia gorere, eiava hekwakwanai badana ta ia lalo-hekwarahilaia noho, reana emu hebamo do ia moalelaia momokani lasi. Unai nega lalonai, namona be ena hekwakwanai oi lalo-pararalaia toho bona oi durua.

Hekwakwanai be manau dalanai umui hamaoromaoroa haraga. Bema mai dalana, umui ruaosi sibona huanai umui karaia. (Mataio 5:​23, 24; 18:15) Namona be oiemu turana oi hadibaia oi ura do umui hetura heheni noho. Tura korikoridia ese ta ta edia dika idia gwauatao. (Kolose 3:13) Oi be unai bamona do oi hetura a​—⁠emu hetura karana ese tadikaka ta ena do ia hereaia, a?

Turana karaia daladia oi duahia bona oi laloa be ena matamana sibona. Bema ita be sibona ita noho dainai ita lalohisihisi, namona be kara maorodia ita karaia, bena sibona do ita noho daudau lasi. Bema tura korikoridia ita tahua, do ita davaridia diba. Idia haida ida mai anina bada turana karana do ita karaia. To, ta ese Dirava, iseda Turana hereadaena, ena gabu do ia abia diba lasi. Iehova sibona mo ese ita ia diba, ia lalo-pararalaia, bona ita ia durua momokani diba. (Salamo 139:​1-4; 23, 24) Unai sibona lasi, iena Hereva ese nega vaira totona helaro namona ia gwauraia​—⁠tanobada matamatana ia gwauhamatalaia, ia lalonai tura korikoridia do ita tura henidia diba, ela bona hanaihanai.​—⁠2 Petero 3:⁠13.

[Pictures on page 5]

Davida bona Ionatana ese hetura karana korikorina idia moalelaia, bona ita danu ita moalelaia diba