Lagani 1996 Ena “Dirava Ena Maino Gwauraia Taudia” Hebouhebouna
IDAUNEGAI Iehova ena bese taudia be lagani ta ta ai aria badadia toi idia karaia. Unai hegeregerena, hari inai negai Iehova ena ladana idia abia taudia be lagani ta ta ai hebouhebou badadia toi idia karaia. Dina-tamona hebouhebouna ai, dina rua lalodiai idia karaia sekit hebouhebouna ai, bona dina toi o hani lalodiai idia karaia distrik hebouhebouna ai, idia hebou mai edia moale ida. Hari lagani, distrik hebouhebou ena sinado be “Dirava Ena Maino Gwauraia Taudia.”
Unai sinado be hegeregere momokani! Iseda Dirava, Iehova, be “maino Diravana,” oibe, “maino ia henia Diravana.” Iseda Hakaua Tauna, Iesu Keriso, be “Maino ena Lohia,” bona Iehova ena hesiai taudia ese idia mailaia herevana be Dirava ena maino herevana. (Filipi 4:9, NW; Roma 15:33; Isaia 9:6; Nahumu 1:15) Hebouhebou ena program namo hereana idia hegaegaelaia vadaeni. Ena hereva ese iboudiai do ia durua, Dirava ena maino ena anina bada do idia laloa bada totona.
Hari lagani lalonai, hebouhebou 7 be Papua New Guinea lalonai do idia karaia. Hebouhebou ta be reana oiemu gabu kahirakahira do idia karaia. Namona be Iehova ena Witness taudia oiemu gabu ai oi nanadaia, unai hebouhebou be edena gabu ai bona edena dina ai do idia karaia, bena dala oi karaia do oi lao henia totona. Maino korikori, do ia noho daudau mainona, idia ura henia taudia iboudiai be unai hebouhebou ai do idia abia dae mai edia moale ida.