Maino Gwauraia Taudia Korikoridia be Daidia?

MAY 31, 1996 ai, niusi idia halasia oreadia ese toana be maino sivaraina bamona idia gwauraia. May 30 ai, siahu taudia ese hereva ta idia halasia, inai hereva lalonai idia gwau Benjamin Netanyahu, Israel ena praiminista ai do ia lao tauna, be “maino havaraia gaukarana lalonai do ia gaukara goadagoada noho, maino bona noho namo, Israel tanona lalonai bona ia badinai idia noho tano iboudiai ida, Palestine taudia ida danu.”

Netanyahu ena elekseni hereva idia gwauraia badabada dainai momo idia laloa reana Middle East dekenai maino do ia vara momokani. Bema ia vara, tano ma haida ese Israel do idia tohotohoa bona edia hepapahuahu do idia lalodia boio diba, a?

Momokani, maino gwauhamatalaia be auka lasi to havaraia be auka. Unai idia lalo-pararalaia dainai momo idia daradara. Niusi torea tauna Hemi Shalev ia hereva bamona, “Israel taudia edia kahana ta edia mamina be maino be kahirakahira do ia vara, bona kahana ma ta idia abia dae idia be tanobada ai hel ena tarapu dekenai idia noho.” Dokona herevana ai, ia gwau: “Haida idia moale; haida idia taitai.”

Taunimanima ena hekwarahi maino havaraia totona be unai bamona. Gunalaia tauna ta bona ia idia durua taudia idia kwalimu neganai edia inai taudia idia lusi. Moale lasi karana ese helaro namona haboioa karana ia havaraia, bona unai ese nega momo dagedage ia havaraia. Herevana ia be Middle East, Latin America, Eastern Europe, eiava gabu ma ta ai​—⁠taunimanima edia hekwarahi maino havaraia totona be idia kwalimu lasi.

Maino Momokani be Kahirakahira!

Middle East dekenai maino idia herevalaia momo noho lalonai, taunimanima be maino sivaraina ma ta idia kamonaia. Ia be niusi dekenai idia herevalaia momo politikol herevana ta lasi; ia be bese ta ta huanai maino gwaubou herevana lasi. To, unai sivarai ese Dirava ena Basileia sibona amo do ia mai mainona ia gwauraia. Unai sivarai be edeseniai idia kamonaia? Tanobada hegegemadai idia karaia Iehova ena Witness taudia edia lagani 1996/97 ena “Dirava Ena Maino Gwauraia Taudia” Distrik Hebouheboudia 1,900 bona ma haida dekenai.

Unai hebouhebou dekenai idia hahedinaraia goevagoeva taunimanima edia gavamani ta ese maino momokani bona noho namo ia mailaia diba lasi. Dahaka dainai? Badina unai idia karaia totona dina ta ta ai ita amo maino idia kokia karadia do idia hadokoa vaitani. Maino momokani ena anina be daba ibounai oi noga neganai tuari ena hahegari herevana eiava dagedage be lasi. Ena anina be raskol karadia be lasi, iseda iduara dekenai loka be lasi, dala dekenai ita raka diba mai gari lasi ida, bona ruma bese do idia parara lasi. Tanobada dekenai edena gavamani ese unai gaudia ibounai ia karaia diba? Momokani, edena tanobada gavamani ese unai do ia gwauhamatalaia diba?

Dirava ena Basileia ese unai gaudia ia karaia diba bona do ia karaia momokani. Baibel ia gwauhamata, ia gwau: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:​3, 4) Unai ese namo bada do ia mailaia hisihisi idia ania taudia dekenai!

Iehova Dirava ena gwauhamata be koikoi gauna lasi. Baibel ese ita ia hagoadaia ia gwau: “Dirava be taunimanima bamona lasi, mai ena koikoi lasi, Dirava be taunimanima ena natuna bamona lasi, mai ena laloa rua lasi. Dirava ia hereva vadaeni gauna, be do ia karaia lasi, a? Dirava ia gwauhamata neganai, iena gwauhamata do ia hamomokania lasi, a?” (Numera 23:19) Oibe, Dirava ese ia gwauhamatalaia gauna be do ia vara​—⁠iena kahana dekenai idia gini taudia ese hahenamo do idia abia.

Dirava Ena Maino Gwauraia Taudia

Taunimanima idia diba Iehova ena Witness taudia be Dirava ena Basileia idia harorolaia goadagoada taudia. Lagani ta ta ai, hora bilioni ta bona ma haida idia haorea ma haida dekenai Baibel ena hahegoada sivaraina idia harorolaia totona. Unai ese Iesu ena hereva ia hamomokania: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Witness taudia ese idia mailaia sivaraina be “Sivarai Namona” momokani, badina ia hahedinaraia taunimanima edia helaro tamona be Dirava ena guba Basileia. Ia be helaro korikorina nega vaira totona!

Hari inai negai danu Dirava ena Basileia ese ia henunai idia noho taudia huanai maino bona lalokau korikorina ia havaraia. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Iehova ena Witness taudia idia hekwarahi unai Keristani taravatu korikorina idia noholaia totona. Unai dainai, idia be tadikaka, Iuda bona Arab taudia, Croatia bona Serb taudia, Hutu bona Tutsi taudia idia noho hebou. Taunimanima momo ese idia nihilaia sibona mainona be hari tanobada hegegemadai Iehova ena Witness taudia milioni momo ese idia abia.

“Dirava Ena Maino Gwauraia Taudia” Distrik Hebouhebou ena program ese Baibel ena hakaua herevadia badinaia noho karana bona Dirava ena Basileia ena sivarai namona harorolaia noho karana ia herevalaia momo. Oi ai noia hereva gabena dekenai taunimanima milioni momo ese idia moalelaia dina toi hebouhebouna ena ripoti do oi duahia.