Fundamentalism Ia Bada Ia Lao

FUNDAMENTALISM​—⁠idia hanaia haraga lagani 10 haida lalonai, ia be orea maragina sibona Protestan oreana lalonai. To gau momo idia idau vadaeni! Tomadiho ia herevalaia tauna, Bruce B. Lawrence, ia torea ia gwau lagani 30 gunanai, momo idia diba lasi lagani 2000 C.E. be kahirakahira neganai fundamentalisma be mai anina bada gauna ai do ia lao bona niuspepa, reidio, bona televisen ese do idia herevalaia momo bona iunivesiti dekenai do idia stadilaia.

To, unai bamona ia vara vadaeni. Niuspepa ese idia ripotilaia taunimanima be mai dagedage ida dala dekenai idia raka hebou, ala-ala, bogana lalonai natuna hamasea karana inai henia oreadia, tomadiho oreadia ese gavamani idia doria kara ta abia hidi totona, bona ariara dekenai Dirava idia gwauraia dika buka idia gabudia karadia be fundamentalism idia abia dae taudia edia kara. Italy dekenai wiki ta ta ai moni gaudia ia sivarailaia niuspepana Mondo Economico ia gwau, gabu iboudiai dekenai fundamentalism ese “Dirava ena ladana ai ia dagedage noho.”

Fundamentalism taudia be mai goada ida edia lalohadai idia badinaia auka, hehuni dalanai idia gwaubou bona dagedage bona ala-ala karadia idia karaia. Taunimanima be inai bamona oreadia Comunione e Liberazione Roman Katolik dubu lalonai, Gush Emunim Iuda tomadiho lalonai, bona Christian Coalition North American Protestan dubu lalonai idia vara momo dainai idia gari. Badina be dahaka fundamentalism ia bada ia lao noho? Dahaka ese ia hasiahua? Reana ia be taunimanima edia mauri ia stadilaia French tauna, Gilles Kepel ese ia herevalaia bamona “Dirava ena badu davana,” a?

[Footnotes]

[Picture Credit Line on Page 3]

Nina Berman/Sipa Press