Dala Namona

IEHOVA ENA WITNESS taudia be tanobada lalonai lauma gaudia abia dae lasi karana bona taunimanima ese kara goeva idia badinaia lasi karana bona tomadiho momokani bona tomadiho koikoi idia daradaralaia karana idia laloa bada. Unai dainai, nega haida idia boiridia fundamentalism taudia. To idia be unai bamona, a? Lasi. Idia ese edia tomadiho dalana idia dogoatao auka, to idia be hari inai nega ena fundamentalism taudia bamona lasi. Idia ese politikol lohia taudia idia doridia lasi edia lalohadai ta idia abia hidi totona, bona idia ese edia lalohadai idia dadaraia taudia idia dagedage henidia lasi. Idia ese dala namona idia davaria vadaeni. Idia ese edia Gunalaia Tauna, Iesu Keriso, idia tohotohoa.

Iehova ena Witness taudia idia diba tomadiho hereva momokanina ia noho, idia diba ia be Baibel lalonai ita davaria diba. (Ioane 8:32; 17:17) To Baibel ese Keristani taudia ia hadibadia idia hebogahisi, kara maoromaoro, manau, bona idia manada​—⁠unai bamona kara ese mai goada ida edia lalohadai badinaia auka karana ia koua. (Galatia 5:​22, 23; Filipi 4:⁠5) Baibel bukana Iamesi ese Keristani taudia ia hagoadadia “Dirava dekena amo aonega” do idia abia, unai be “maino, laloa manada bona gado namo. Ia be mai ena bogahisihisi, bona kara namodia momo.” Iamesi ma ia gwau: “Maino dekena amo, kara maoromaoro do ia vara, uhe ena anina ia tubu hegeregerena.”​—⁠Iamesi 3:​17, 18.

Iehova ena Witness taudia idia laloatao Iesu be hereva momokani ia laloa bada. Pilato ia hamaoroa ia gwau: “Hereva momokani gwauraia hedinarai totona lau vara, bona lau mai inai tanobada dekenai.” (Ioane 18:37) Ena be ia be mai gari lasi ida hereva momokani ia gwauraia, to haida ia doridia lasi iena lalohadai idia abia dae totona. Lasi, to ia ese edia lalona bona kudouna ia veria. Ia diba iena guba Tamana, “namo bona maoromaoro” Diravana, ese koikoi bona kara gageva be edena bamona bona edena negai tanobada amo do ia haorea negana ia abia hidi. (Salamo 25:⁠8) Unai dainai, ia ese iena hereva idia abia dae lasi taudia ia koua lasi. To idau, unai nega ai ia noho tomadiho ena gunalaia taudia ese Iesu idia koua toho.​—⁠Ioane 19:​5, 6.

Iehova ena Witness taudia be edia tomadiho hahediba herevadia idia badinaia auka masemase, bona kara goevadia idia badinaia goadagoada. Aposetolo Paulo bamona, idia diba momokani “Lohiabada be tamona, abidadama be tamona, bapatiso be tamona.” (Efeso 4:⁠5) Idia ese Iesu ena hereva idia laloatao danu, ia gwau: “Mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.” (Mataio 7:​13, 14) To, idia ese ma haida idia doridia lasi edia lalohadai idia abia dae totona. To idau, idia ese Paulo idia tohotohoa bona idia ura ‘Dirava danu do idia turana karaia lou’ taudia idia ‘noidia.’ (2 Korinto 5:20) Unai be dala namona. Ia be Dirava ena dala.

Hari idia gaukaralaia herevana, tomadiho fundamentalism, be ia idau vaitani. Fundamentalism taudia ese dala idauidau idia gaukaralaidia​—⁠dagedage danu​—⁠taunimanima idia doridia edia taravatu idia badinaia totona. Unai idia karaia neganai, idia be politikol oreana ena kahana badana ta ai idia lao. To, Iesu be iena murinai idia raka taudia ia hamaorodia namona be idia be “tanobada ena lasi.” (Ioane 15:19; 17:16; Iamesi 4:⁠4) Unai hereva hegeregerena, Iehova ena Witness taudia be politikol hepapahuahu lalodiai idia vareai lasi momokani. Bona Italy ena niuspepa Fuoripagina ia hereva bamona, idia be “taunimanima ta dekenai gau ta idia doria lasi; taunimanima ibounai be mai edia ura kwalimu idia herevalaia gaudia do idia abia dae eiava lasi.” Unai kara dainai dahaka ia vara? Witness taudia idia gwauraia Baibel ena maino sivaraina be taunimanima idauidau ia veridia mai, guna fundamentalism idia badinaia taudia danu.​—⁠Isaia 2:​2, 3.

Tanobada ta mai Ena Kara Goeva

Witness taudia idia diba fundamentalism taudia ese idia laloa momo hekwakwanai be taunimanima ese idia hanamoa diba lasi. Tau ta oi doria diba lasi Dirava ia abidadama henia totona eiava oi ese oi abia dae gaudia ia abia dae totona. Haida idia laloa unai bamona idia karaia diba, unai dainai histori lalonai kara dika bada idia havaraia, hegeregere, Kruseid, Inkwisisen, bona America ena India taudia idia doridia edia tomadiho idia haidaua karadia. To, bema Dirava oi abidadama henia, gau ibounai be iena imana lalonai do oi atoa.

Baibel ena hereva hegeregerena, Dirava ese taunimanima dekenai ia henia negana, iena taravatu idia makohia bena unai amo hisihisi ia vara negana, be mai ena dokona. Unai nega be kahirakahira do ia ore. Iesu be Dirava ena guba Basileia lalonai King ai ia lohia noho vadaeni, bona kahirakahira unai Basileia ese taunimanima edia gavamani do ia kokia bona dina ta ta ai taunimanima lohiaia dalana do ia naria. (Mataio 24:​3-14; Apokalupo 11:​15, 18) Tanobada ibounai be paradaiso ai do ia lao bona maino bona kara maoromaoro amo do ia honu. Unai nega ai edena dala ai Dirava korikorina do ita tomadiho henia be do ita daradaralaia lasi. “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Do idia noho hanaihanai karadia, hegeregere lalokau, momokani, maoromaoro, bona kara namo ese tanobada do idia hahonua bona kamonai taudia do idia hanamoa.

Salamo torea tauna be unai nega ia laloa, bona inai ane ia torea: “Unai neganai Israela taudia ese, ta ta ibounai dekenai do idia lalokau henia, bona kara namodia be idia ta ta dekenai do idia karaia, vadaeni idia ibounai be, kara maoromaoro bona maino dekenai do idia noho hebou. Lohiabada dekenai abidadama kara, be Israela tano dekenai do ia tubu, bona Dirava, guba dekenai ia noho, ese kara maoromaoro, emai bese edia huanai do ia havaraia. Momokani, Lohiabada ese gau namodia ai dekenai do ia henia. Aiemai noho do ia hanamoa, bona aiemai tano ese ena anina do ia havaraia bada herea. Lohiabada ese taunimanima do ia durua, bona kara maoromaoro taudia do ia halaodia, bona inai kara ese, Lohiabada ena mai dalana do ia karaia hegaegae.”​—⁠Salamo 85:​10-13.

Ena be ita ese tanobada ita haidaua diba lasi, hari ita ta ta ese Dirava ena taravatu ita badinaia diba. Unai amo ita hekwarahi Dirava ia ura unai tanobada lalonai ia idia tomadiho henia taudia ai do ita lao. Unai neganai ita be Salamo torea tauna ese ia herevalaidia manau taudia bogaragidiai do ita noho, ia gwau: “To manau taudia ese noho gabuna tano do idia abia, do idia helai namonamo, mai moale bona mai maino danu.” (Salamo 37:11) Dirava ese iena ura idia karaia taudia ia durudia bona ia hanamodia, bona gau namodia ia gwauhamatalaia edia nega vaira totona. Aposetolo Ioane ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”​—⁠1 Ioane 2:⁠17.

[Picture on page 7]

Iehova ena Witness taudia ese taunimanima ibounai idia boiridia Dirava ena Basileia ena sivarai namona idia diba totona

[Picture Credit Line on Page 6]

Lamp on pages 3, 4, 5, and 6: Printer Ornaments/by Carol Belanger Grafton/Dover Publications, Inc.