Dahaka Dainai Inai Nega be Idia Dika Momokani?

OI HELAI diho niuspepa oi duahia totona o TV dekenai nius oi itaia o reidio dekenai nius oi kamonai gwauraia neganai, oi diba nius dikadia do oi kamonai, ani? Reana oi hoa lasi gabu ta dekenai idia do tuari noho sivaraina oi kamonai neganai, o raskol karadia idia do bada noho, o ogogami tanona ta dekenai doe ese dika bada ia havaraia sivaraina oi kamonai neganai.

Bema oi be gabu daudauna dekenai oi noho, reana unai sivarai ese hanaihanai oiemu lalona ia hametaua lasi. Daika ese hisihisi idia ania taudia hutuma dainai ia lalohisihisi diba? To, bema taunimanima ta ta ese idia mamia hisihisi ita itaia, lalohisihisi ena mamina ita koua be auka. Anina be, tuari ena sivarai ita duahia bona ia lalonai mase taudia edia namba ita laloa neganai mamina be idau, bona ena sinana be bomu ese edia ruma ia hadikaia neganai ia mase, lagani 9 Bosnia mero maragina, ladana Adnan, ena sivarai ita duahia neganai mamina be idau. Hua ta murinai Adnan ena tamana be hehuni gabuna amo tau ta ese ia pidia mase idia ruaosi be dala dekenai idia raka lao neganai. Wiki haida murinai, ena matana amo ia itaia sikuli gabuna dekenai ena taihuna be buleti ta ese ia pidia bona rara bada ia halusia murinai ia mase. Doketa taudia ese Adnan be daradoko dainai idia durua neganai, idia davaria ia be gau ta ia mamia lasi​—⁠gau ta ia hoalaia lasi danu. Ia mahuta lasi neganai gari bona ia itaia kara dikadia ese ena lalona idia hahisia; ena mahuta be nihi dikadia ese idia hadikaia. Adnan be namba ta sibona lasi. Ia be hisihisi ia davaria natuna ta; ita dadaraia diba lasi to ita hebogahisi henia.

Unai be momokani tanobada lalonai idia vara hisihisi ma haida dekenai danu. Doe ena sivarai ita duahia be idau; to lagani ima kekenina ena bogana be bada herea bona ena imana bona aena be puriki ta bamona, hitolo dainai kahirakahira do ia mase kekenina ena laulau ita itaia neganai ena mamina be idau. Raskol karadia edia namba ita duahia be idau; vabu burukana ta idia dadabaia, ena kohu idia henaoa, bona idia hadikaia ena sivarai ita kamonai be idau momokani. Ruma bese mauri ia dika ia lao ita duahia be idau; sinana ta be sibona ena natuna ia ubua lasi bona mai dagedage ida ia kara dika henia sivaraina ita duahia be idau momokani.

Unai bamona sivarai ita duahia neganai ita lalohisihisi bada. To unai bamona tanobada lalonai idia vara kara dikadia ta ese ita ia hahisia neganai, iseda mamina be dika momokani! Oi sibona be kara dika ta ena hisihisi oi mamia neganai, tanobada dekenai idia vara kara dikadia dainai do oi daradoko diba. Taunimanima edia histori lalonai raskol karadia, tuari, doe, bona gorere amo idia vara hisihisi idia bada idia lao be gari bada gauna. Lagani 1900 ema bona hari idia vara kara dika ita haheaukalaia karana ese iseda mauri ia haidaua vaitani​—⁠daradara, gari, bona lalo-metau mamina be bada herea.

Tomadiho idauidau taudia be inai bamona henanadai edia haere idia tahua noho, Dahaka dainai gau ibounai be idia dika momokani? Taunimanima be edeseniai idia lao noho?

Madi, hari idia noho tomadiho ese haere namodia idia henia lasi. Nega ginigunana inai magasin ena kopina dekenai ia noho henanadai oi itaia neganai, reana oi daradara​—⁠unai bamona ia vara diba. Fundamentalism lalohadai idia abia dae tomadiho be nega momo Baibel ena hereva ena anina idia haidaua bona ia herevalaia lasi gaudia idia gwauraia​—⁠hegeregere tanobada ena dokona ena dina bona hora korikorina. (Mataio 24:36 itaia.) Inai magasin idia halasia taudia idia ura Baibel ese sibona unai do ia gwauraia hedinarai. Oi dibaia Baibel ena hereva dina gabedia dekenai be momokani bona maoromaoro neganai reana do oi hoa. Bona Baibel ese tanobada ia dika ia lao ena badina sibona ia gwauraia lasi. Ia ese nega vaira totona helaro ia henia, heduru ia henia momokani helarona. Oi ai noia gabeai herevana do oi duahia bena do oi diba edena bamona unai ia karaia.

[Picture Credit Line on Page 3]

Jobard/Sipa Press