Emu Natuna Oi Hamauria!

MICHAEL bona Alphina be KwaZulu-Natal ena ororo maragidia edia koura ta ai idia noho, South Africa dekenai. Guna edia natudia 7 idia naria lalonai gau momo idia hekwarahilaia. Michael be ia gaukara goada, bona ena adavana ese ia durua namonamo, inai hahegani tama dekenai ia badinaia totona: “Emui natudia do umui habadua lasi, to Lohiabada ena hadibaia hereva idia dekenai do umui hadibaia.” (Efeso 6:4) To nega haida hekwakwanai idia vara.

Hegeregere, nega momo Africa ena boromakau naria memero be ta ta edia tama sina edia boromakau idia haboua, vadaeni idia be mai edia nega bada idia gadara hebou totona. Nega haida badu havaraia karadia idia karaia bona idia ese do idia gwauraia lasi gaudia idia herevalaia. Michael ena natuna memero be edia ruma bese ena boromakau naria totona idia lao neganai, ia hamaorodia natudia haida do idia bamoa lasi. (Iamesi 4:⁠4) To, nega haida gaukara amo ruma dekenai ia giroa lou neganai, ia davaria unai natudia ida idia hebamo. Unai dainai, idia ia matahakani henia.​—⁠Aonega Herevadia 23:​13, 14.

Oi laloa Michael be ena natuna ia biagudia auka herea, a? Haida be reana unai bamona idia laloa, to Iesu Keriso ia gwau, aonega ena maoro be ia havaraia gaukarana ese ia hamomokania. (Mataio 11:​19, NW) Michael bona Alphina ese ruma lalonai lalokau idia hahedinaraia, natudia ida edia nega idia gaukaralaia hebou bona Baibel ena sivarai bona hereva momokanidia idia hadibadia.

Michael bona Alphina edia natuna kekeni be hani​—⁠Thembekile, Siphiwe, Tholakele, bona Thembekani. Idia ibounai be ful-taim Basileia sivaraina namona harorolaia taudia. Idia edia natuna memero rua be Iehova ena Witness taudia edia kongregesen gunalaia taudia. Edia natuna mero ihatoina be hesiai tauna, bona ena adavana be ful-taim sivarai namona harorolaia hahinena.

Keristani tama sina momo mai edia ruma bese badadia be natudia naria karana ai ahuna namona idia abia. To, tama sina ese idia naria namonamo natudia haida be hereva momokani idia rakatania. Ita diba edia tama sina be Iesu ena parabole ta, ia raka boio natuna parabolena, idia laloa, bona idia ura bada nega ta edia natuna mero o kekeni be do ia helalo-kerehai bona hahemauri do ia abia.​—⁠Luka 15:​21-​24.

To madi, Keristani tama sina haida be edia natudia ibounai idia haboioa inai tanobada dekenai. Africa ena kahana haida dekenai, unai kara idia lalo-hekwarahilaia bada, unuseniai natudia idia goada ela bona edia tauhau bona haneulato laganidia. Bena, unai matamata taudia edia tauanina ena ura ia bada negana ai, Satani ena tanobada ena kara mirodia ese edia lalona idia ania. (1 Ioane 5:​19) Unai dainai, Keristani tama momo be idia hegeregere lasi kongregesen elda taudia ai idia lao. (1 Timoteo 3:​1, 4, 5) Momokani, namona be Keristani tama ta do ia laloa, ena ruma bese ena hahemauri be mai anina bada gauna. Vadaeni, tama sina be dahaka idia karaia diba edia natudia idia hamauria totona?

Turana Namona ai Oi Lao

Iesu ia goevadae sibona lasi to ia be aonega bona diba dekenai taunimanima iboudiai ia hereaia momokani danu. To, ia ese ena goevadae lasi hahediba taudia be iena turana namodia hegeregerena ia kara henidia. (Ioane 15:15) Unai dainai idia ura ia ida idia noho bona ia dainai idia goada. (Ioane 1:​14, 16, 39-42; 21:​7, 15-17) Tama sina be unai amo diba idia abia diba. Tubutubu gaudia maragidia edia raurau be dina diarina namona dekenai idia tubu lao hegeregerena, natudia danu be do idia goada bema ruma lalonai lalokau bona hetura karana namona ia noho.

Tama sina e, emui natudia idia gari lasi edia lalo-hekwarahi umui dekenai idia gwauraia totona, a? Idia umui hakala henidia, a? Edia kara ena badina ta umui do gwauraia lasi neganai, edia lalohadai bona hemami umui tahua guna, sivarai ibounai umui diba totona, a? Mai emui haheauka ida Baibel herevalaia bukadia tahua karana amo umui durudia henanadai haida edia haere idia davaria totona, a?

Sina ta South Africa amo, ia gwau: “Emai kekeni ena sikuli dinana ginigunana amo, ia ai hagoadaia unai dina ena sivarai idauidau do ia herevalaia. Hegeregere, do lau henanadai: ‘Daika ida dina tubua ena nega oi gaukaralaia hebou? Emui tisa matamata ena sivarai oi gwauraia. Iena toana be edena bamona? Inai pura lalonai dahaka kara idauidau idia palania?’ Nega ta, aiemai natuna ia mai ruma bona ia gwau edia English tisa ese klas do ia abia lao muvini piksa ta do idia itaia, bena unai murinai ena sivarai do idia torea. Unai muvini piksa ena kwara herevana be namo momokani lasi. Ai tahua neganai, ai davaria Keristani taudia ese idia itaia be namo lasi. Ruma bese lalonai ai herevalaia hebou. Kerukeru aiemai natuna be tisa dekenai ia lao, ia hamaoroa do ia lao lasi piksa itaia totona, badina be ia hahedinaraia gaudia be Keristani taudia ese idia abia dae hahediba herevadia hegeregerena lasi. Tisa ese ena lalohadai ma ia laloa lou, bena aiemai kekeni ia tanikiu henia, ia gwau ia ura lasi klas do ia abia lao piksa idia itaia bena gabeai ena lalona do ia hisihisi.” Unai tama sina ese edia natuna kekeni idia laloa bada karana ese anina namona ia havaraia. Ia be moale bona lalo-goada kekenina, bona hari Watch Tower Bible and Tract Society ena South Africa brens opesi dekenai volantia gaukara ia karaia.

Taunimanima ma haida edia natudia kara henia dalana ai Iesu ese haheitalai namona ia karaia. Ia ese edia hebamo ia ura henia. (Mareko 10:​13-​16) Tama sina be natudia ida gau idauidau idia karaia hebou dainai idia moale bada be namo herea! Africa ena gabu haida dekenai, tamana ia hemarai bema taunimanima idia itaia ena natuna memero ida bolo gadara eiava ma gadara haida idia karaia. To namona be Keristani tama ta ia laloa lasi ia be tau badana dainai natudia ida gau haida idia karaia hebou lalonai taunimanima ese idia itaia be namo lasi. Tama sina idia moale edia natudia ida edia nega idia gaukaralaia be namo herea; maragidia ese unai kara idia abia be gau badana. Unai ese natudia ia durua edia lalo-hekwarahi idia herevalaia totona. Bema unai bamona lalona durua karadia idia henia lasi, natudia do idia badu eiava idia hemarai, bona unai be momokani bema nega ibounai edia kerere idia hamaoromaoroa loulou.

Paulo ese Kolose taudia ia tore henidia bona ruma bese lalonai kara heheni dalana ia herevalaia neganai, ia gwau: “Tamana bona sinana, emui natudia do umui habadua kava lasi, do idia hesiku garina.” (Kolose 3:21) Unai ese reana ia hahedinaraia nega haida matahakani henia karana ia bada herea to tura henia karana ia maragi. Idia lalokau henia bona moale henia natudia, uhau bona ulato danu, be nega momo matahakani do idia abia dae haraga.

Dirava Lalokau Henia

Tama sina ese edia natudia dekenai idia henia diba anina bada herea gauna be sibodia edia kara lalonai idia hahedinaraia lalokauna. Namona be natudia idia itaia bona idia kamonai tama sina ese Dirava lalokau henia kara bona hereva idia hahedinaraia bona gwauraia. Watch Tower Bible and Tract Society ena South Africa brens opesi dekenai ia gaukara tau matamata ta, ia gwau: “Lau do mero neganai, egu tamana lau durua ruma gaukaradia lalonai. Lau ura bada ia lau durua, badina Tamagu ese egu gaukara maragina ia laloa bada. Unai nega ia gaukaralaia lau dekenai Iehova ia herevalaia totona. Hegeregere, Saturday ta lau laloatao, ai gaukara goada emai ariara ena rei ai utua. Dina ia siahu bada herea. Tamagu ena varahu ia diho, unai dainai lau heau lao, ranu galasi rua lalonai aisi lau udaia bena lau abia lao. Tamagu ia gwau: ‘Natugu, oi itaia diba Iehova ena aonega be bada herea, a? Aisi be ranu latanai ia hure. Bema ia mutu diho, gohu lalodiai mauri gaudia ibounai do idia mase. To, aisi ese paraka ia koua! Unai ese ita ia durua Iehova ita diba namonamo totona, ani?’a Gabeai, tuari amo lau gini siri dainai lau idia hadiburaia neganai, lau be mai egu nega lau laloa totona. Hanuaboi ta egu dibura daiutuna lalonai lau lalo-metau neganai, Tamagu ena hereva lau lalodia lou. Edia anina lau dekenai be bada herea! Bema ia hegeregere, Iehova do lau tomadiho henia ela bona hanaihanai.”

Oibe, namona be natudia idia itaia tama sina edia kara iboudiai lalonai Dirava lalokau henia karana idia hahedinaraia. Namona be idia itaia Dirava lalokau henia karana bona idia ura idia kamonai henia karana ese edia lalona ia hamarerea dainai, Keristani heboudia dekenai idia lao, haroro gaukara idia karaia, bona ruma bese Baibel duahiduahi bona stadi idia karaia. (1 Korinto 13:⁠3) Gau bada hereana be inai: Namona be emui kudouna amo umui gwauraia ruma bese guriguridia ese Dirava lalokau henia karana idia hahedinaraia. Unai bamona gau namona emui natudia dekenai umui henia be mai anina bada. Unai badina dainai Iehova ese Israela taudia ia hagania, ia gwau: “Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai danu. Inai Taravatu, hari dina umui dekenai lau henia gaudia do umui laloaboio lasi. Umui emui natudia dekenai inai Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatu do umui herevalaia.”​—⁠Deuteronomi 6:​5-7; Mataio 22:​37-​40 itaia.

Dirava lalokau henia bona kamonai henia karadia ia koua gauna ta be ita abia hanai kara dika. (Roma 5:12) Unai dainai Baibel ena hahegani ta be inai: “Iehova umui lalokau henia taudia e, dika umui inai henia.” (Salamo 97:​10, NW) Nega momo lalohadai dikadia amo kara dikadia idia vara. Natuna ese unai do ia dadaraia totona, namona be ma kara badana ta ia manadalaia be namo.

Dirava Gari Henia Karana

Mai hemataurai ida Iehova ena lalona hahisia garina ita gari be lalokau ida ita hakapua, be gau namo hereana. Iesu Keriso ese haheitalai hereadaena ia hahedinaraia, ia ese ‘Iehova gari henia karana’ ia moalelaia. (Isaia 11:​1-3) Unai bamona gari be mai anina bada natuna be matamata taudia edia tauanina ena ura dikadika negana ia abia bena mahuta hebou ena ura goadana ia abia matamaia neganai. Dirava gari henia karana ese matamata tauna ia durua tanobada ena siahu, miro karadia dekenai ia veria siahuna, do ia dadaraia. (Aonega Herevadia 8:​13) Gabu haida dekenai, tama sina ese natudia idia hadibaia lasi sihari kava ena hedibagani idia davaria neganai be edena bamona do idia kara. Momo idia laloa unai gaudia idia herevalaia be maoro lasi. To tama sina ese unai idia reaia dainai dahaka ia vara?

Medikol doketa toi Buga, Amoko, bona Ncayiyana ese kekeni 1,702 bona memero 903 idia henanadai henidia Transkei hanuadia, South Africa dekenai. Magasin ta South African Medical Journal ia gwau “unai tahua gaukarana ai unai kekeni 76 pesen bona memero 90.1 pesen be sihari kava karana idia karaia vadaeni.” Unai kekeni edia mauri lagani ena averes be 15, bona idia momo idia doria mahuta hebou kara idia karaia totona. Idia 250 mai kahana be nega tamona o ma haida bogana idia abia. Unai kara ena anina dikana ma ta be momo ese daihanai goreredia idia abia.

Toana be tama sina momo idia laloa lasi natudia do idia hadibaia be namo, idia do headava lasi lalonai mahuta hebou karana idia dadaraia totona. To, unai magasin ia gwau: “Natuna havaraia bona sina dagina abia be Transkei taudia edia hahine amo idia laloa bada gaudia, bona edia tauanina ia hegaegae matamaia kekenidia ese karaharaga unai idia laloa.” Unai hekwakwanai tamona be tanobada ena kahana ma haida dekenai idia davaria danu.

Matamata taudia momo Africa dekenai idia laloa kerere be edia tama sina edia, badina be idia durudia lasi edia hemami idia lalo-pararalaia totona. Keristani tama sina haida idia hemarai dainai Memero Kekeni​—⁠Moale Umui Davaria Dalana bukana idia gaukaralaia lasi.b Rau 20-3 dekenai, tau bona hahine edia kopina gaukaralaia daladia maorodia bona tauanina ibounai ena toana ia idau dalana ia gwauraia.

Natudia ida Dirava ena lalohadai mahuta hebou karana dekenai idia herevalaia tama sina ai hanamoa. Namona be ena nega ena nega ai, natuna ese ia lalo-pararalaia diba hegeregerena ai idia herevalaia. Hegeregere, natuna ena mauri lagani idia laloa, bena reana tama sina ese tauanina ena kahana idauidau bona edia gaukara do idia herevalaia maoromaoro be namo. Bema ia gwauraia namonamo lasi, ia lalo-parara lasi natuna ese idia herevalaia gauna ena anina do ia abia lasi.​—⁠1 Korinto 14:​8, 9.

Tama ta mai ena natuna kekeni rua bona natuna merona ta South Africa amo, ia gwau: “Nega momo, lau be mai egu dala mahuta hebou karana be natuna kekeni ida danu lau herevalaia. To, lauegu hahine ese unai kahana dekenai emai natudia kekeni ia durudia bada, Memero Kekeni​—⁠Moale Umui Davaria Dalana bukana amo. [Rau 26-31 itaia.] Egu natuna merona ena lagani be 12 neganai, ia lau abia lao ororo dekenai ai raka loaloa totona. Unai nega lalonai, mero ia tubu, ena tauanina ena toana ia idau, bona gabeai headava lalonai edia gaukara maorodia ai herevalaia goevagoeva. Kopina gadaralaia kara kererena do ia dadaraia ai herevalaia danu bona lau hadibaia kekeni do ia lalodia mai hemataurai ida​—⁠iena sinana bona taihuna ia lalodia bamona.”

Ahuna mai Moalena

Ai gwauraia tama sina idia gaukara goada bona hari idia moale edia natudia naria karana amo anina namona idia abia. Idia toiosi be hari idia bada vadaeni, bona abidadama Keristani taudia idia adavaia. Edia natuna tau bona edia ravana tatau be elda taudia Keristani kongregesen lalonai, bona idia rua mai edia adavana ida be lagani momo lalodiai ful-taim haroro gaukarana idia karaia.

Oibe, edia ruma bese taudia hamauria totona idia gaukara goada tama sina be ahuna mai moalena do idia abia unai bamona Baibel hahediba herevadia idia badinaia natudia edia amo, badina be Aonega Herevadia 23:​24, 25 ia gwau: “Bema iena natuna be mai aonega danu, unai tamana ese do ia moalelaia. Oiemu tamana bona sinana do oi hamoalea.” Inai hereva ena matamana dekenai ai herevalaia ruma bese badana mani oi laloa. Alphina ia gwau: “Lauma dalanai egu natuna edia goada lau itaia neganai, egu lalona be moale amo ia honu momokani.” Ai ura bada Keristani tama sina ibounai be unai ahuna mai moalena totona idia gaukara goada.

[Footnotes]

[Picture on page 23]

Tamana be ia hegaegae diba nega bona gabu maorona ai mauri ena kara momokanidia ia herevalaia totona