Davana Namona Hesiai Gaukara Helagana Dainai

HARRY BLOOR ESE INAI SIVARAI IA GWAURAIA

Lagani handred bamona gunanai, egu tubuna be Metodis Dubu ia goadalaia. Ia be taunimanima ese idia matauraia haroro tauna ta bona England ena uro idia karaia taoni, Stoke-on-Trent, ena dubu momo be harihari gaudia badadia amo ia durudia. Gabeai ia ogogami. Egu tamana ia ura Tubugu ia durua dainai, dala ia hegaegaelaia Tubugu ese hanua sitoa maragina ta do ia naria. Unai sitoa be mai ena laiseni bia idia hoihoilaia totona, bona Metodis taudia be unai idia dibaia neganai, Tubugu be dubu amo idia atoa siri.

TAMAGU ia badu dikadika bona ia gwauhamata tomadiho ta do ia abia dae lasi​—bona ena hereva ia badinaia. Guna ia be pulisi tauna ta, to gabeai ia be kekero muramura inua gabuna ta ena biaguna ai ia lao. Unai dainai lau be unai gabu ena bonana bona kwalahu huanai lau tubu. Tomadiho be lau diba lasi momokani, to gadara idauidau lau diba namonamo! To, Tubugu ena kara dainai Baibel lau matauraia, ena be egu diba be bada lasi.

Baibel Ena Hereva Momokani Lau Dibaia

Lagani 1923 ai, egu mauri lagani be 24 neganai, lau lao ist kahanai, Nottingham dekenai lau noho bona Mary lau tura henia, ia be Whetstone hanuana ai ia noho, kilomita 40 Leicester ena sautwest kahanai. Ena tamana, Arthur Rest, be guna unai gabu ena dubu ena ogen ia gadaralaia, to hari ia be Bible Student tauna goadana ta, Iehova ena Witness taudia idia gwauraia ladana unai negai. Nega ibounai Arthur ese ia davaria tomadiho matamatana be lau dekenai ia herevalaia​—to lau laloa bada lasi. To, July 13, 1924, Sunday adorahi ai, gavamani ena memba bona Baptis tauna badana ta ena hereva kamonaia totona, ia lau bamoa bona unai gabu ena Baptis dubuna dekenai ai lao neganai, egu lalona ia veria. Ena sinado, “Baibel Ena Diari Dekenai Pasto Russel Ena Hahediba Herevadia Ai Tahua,” lau laloa bada. Unai neganai lau torea herevadia be lau do dogoatao noho.

Bible Student taudia idia ura edia hahediba herevadia hakoikoia herevana do idia haerelaia, to Baptis taudia ese gwaumaoro idia henia lasi. Unai dainai lau badu bona lau ura gabu ma ta lau davaria, unai hebou karaia totona. Kahirakahira ia noho uma gabu ena ruma badana be namo herea unai karaia totona. Ai daroa namonamo, kahu ai kokia, uiti ena kopina kokia masini be kahana ta dekenai ai doria lao, bona gabu ia hegeregere. Helai gaudia 70 ai haboua, bona boiboi pepadia ai printaia.

Frank Freer be hereva henia totona Leicester amo ia mai neganai, helai gaudia ibounai idia honu, bona taunimanima ma 70 be idia gini noho! Frank ese Baibel ia herevalaia dalana be lau ura henia, bona idia noho taunimanima momo herea ese idia ura henia danu. Unai nega amo, Leicester kahirakahira ai Blaby dekenai ia noho Bible Student taudia edia kongregesen maragina be ia tubu haraga. Unai hebou ese egu mauri​—bona Mary ena danu​—ia haidaua. Lagani 1925 ai, ai ruaosi be Iehova ai gwauhamata henia, bapatiso ai abia, bona ai headava.

Lauma Dalanai Ai Abia Hahenamo

Murina laganina ai, Blaby Kongregesen ena hesiai gaukara gunalaia tauna ai lau idia abia hidi. Lau bona egu adavana ai ura painia taudia edia kara ai tohotohoa bona ful-taim haroro taudia ai do ai lao, to ia hedinarai haraga Mary ena gorere dainai unai sediual ia badinaia diba lasi. Ena be ia gorere ela bona lagani 1987 bena ia mase, to ia be egu bamoa namona bona gabu bona nega idauidau ai haroro gaukarana bona Baibel stadi hamatamaia gaukarana ia diba namonamo. Kahirakahira hanuaboi ta ta ibounai, ai be hebou dekenai ai lao eiava emai dekena taudia dekenai Baibel ena hereva momokani ai herevalaia.

Lau be ensinia tauna bona timba karaia masini idia karaia kampani ta dekenai lau gaukara. Egu gaukara dainai Britain ai, bona France dekenai danu lau loaloa momo, bona nega momo Mary ese lau ia bamoa. Unai laolao lalodiai ai haroro goadagoada diba.

Badina Ta Gaukara Habadaia Totona

Lagani 1925 ai, Blaby dekenai aiemai hebou karaia rumana namona ta ai haginia, bona unai gabu amo haroro gaukara namona ai hakaua. Sunday daba ibounai, basi ta ai rentaia gabu idauidau ai idia noho hanua bona taoni maragidia ai vadivadi henia totona. Lao neganai pablisa taudia be dala dekenai basi ese ia rakatania idia haroro totona, bona giroa neganai idia ia abia lou. Siahu negana ena hua namodia ai, Sunday adorahi momokani ai Baibel stadi ai karaia, stadi totona Gima Kohorona matamatana ai gaukaralaia. Unai murinai, 8 okaloka ai, Leicester ena maketi gabuna dekenai ai hebou pablik tok kamonai totona. Hanuaboi ta ai taunimanima 200 ese hereva idia kamonai. Unai gaukara ese Leicester dekenai bona ia kahirakahira idia noho kongregesen momo edia badina ia atoa.

Lagani 1926 ai, mai anina bada hebouhebouna ta be London ena Alexandra Palace bona Royal Albert Hall dekenai ai karaia. Unai neganai Joseph F. Rutherford, unai negai ia be Watch Tower Society ena presiden, ese buka ladana Deliverance ia halasia. Gwaubou herevana ladana “Hadibaia Herevana ta Tanobada Ena Lohia Taudia Dekenai” bona Tadikaka Rutherford ena pablik tok namona ladana “Tanobada Gavamanidia Idia Moru Ena Badina​—Heduru Gauna be Inai” ibounai be ia gwauraia dinana murinai niuspepa badana ta dekenai idia printaia. Taunimanima 10,000 ia hanaia be pablik tok idia kamonai, bona gwaubou pepana ena kopi 50,000,000 be tanobada hegegemadai idia hariharilaia. Unai hebouhebou ese Britain ai haroro gaukara ia haharagaia.

Hebouhebou Badana Tuari Negana Lalonai

September 1939 ai tanobada ibounai tuarina iharuana ia matamaia, bona lagani 1941 ai ia bada momokani. Dina bona hanuaboi ibounai German ena bomu idia negea peleini idia loaloa, bona tano ibounai lalonai lamepa gabua be taravatu. Aniani be hegeregere lasi, bona ia noho aniani be taravatu auka henunai idia haria. PMV haida sibona idia heau, trein danu be momo lasi. Ena be hekwakwanai badadia, toana be ai hanaia diba lasi gaudia idia noho, to September 3-7, 1941 ai, nesenel hebouhebou ai karaia.

Leicester be England ena huanai dainai, Leicester ena De Montfort Hall idia abia hidi, hebouhebou karaia totona. Lau be timba kampani dekenai lau gaukara dainai, hebouhebou idia hahedinaraia saini karaia gaukarana lau durua diba. Lau ese hebouhebou idia mai taudia edia trenspot unai taoni lalonai lau hegaegaelaia danu. Hebouhebou vairanai tiketi ai hoia bona davana sisina bada ai henia dainai, Leicester ena trein be Sunday ai idia heau danu.

Gavamani ese loaloa karana dekenai taravatu haida idia atoa dainai, ai laloa reana Witness taudia 3,000 do idia mai. To taunimanima 10,000 idia gwauhamata do idia mai neganai, emai moale be mani oi laloa! To edeseni do idia noho? Leicester dekenai idia noho taudia be mai hebogahisi ida momo idia boiria edia ruma dekenai do idia noho. Ma danu, taunimanima tausen bamona be hebouhebou gabuna amo kilomita toi ia noho uma gabu dekenai ai haginia palai rumadia dekenai idia noho. Unai gabu, ladana ai gwauraia Gideona ena Kamepa, be taunimanima ese idia herevalaia momo.

Palai ruma kurokuro badadia ai rentaia, hebouhebou ena dipatmen idauidau bona idia mai taudia hutuma bada idia noho totona. Gabeai ai lalo-parara hua ena diari lalonai reana Nazi taudia edia bomu idia negea peleini amo unai palai rumadia idia itaia diba, bona karaharaga ai hunidia. Taunimanima ese tuari, bona Witness taudia be ia lalonai idia vareai lasi karana, idia laloa bada. Unai nega lalonai Witness taudia handred momo be Baibel ena lalohadai hegeregerena gini siri karana idia abia hidi dainai, dibura dekenai idia noho.​—Isaia 2:4; Ioane 17:16.

The Sunday Pictorial niuspepa be September 7, 1941 ai, ia gwau: “Taunimanima 10,000, idia momo be matamata taudia, be wiki ta lalonai idia hebou, tuari idia herevalaia lasi eiava idia herevalaia sisina, to tomadiho idia herevalaia sibona be hoa gauna.

“Lau henanadai bema Germany dekenai Witness taudia haida idia noho. Lau idia hamaoroa, oibe, bona kahirakahira idia iboudiai, 6,000 bamona, be dibura kamepa lalonai idia noho.”

Unai toretore tauna be ma ia gwau: “Oibe, Nazi taudia be inai taudia, to Witness taudia be idia tuari henidia lasi, pepapepa idia hoihoilaia bona hereva idia kamonai sibona.”

Niuspepa momo be koikoi herevadia amo ai idia herevalaia, bona aiemai inai henia taudia ese dagedage karadia amo hebouhebou idia hadikaia toho, to idia kwalimu lasi. London ena The Daily Mail niuspepa be mai edia ura momokani ida idia hereva lasi, to idia gwau: “Gau iboudiai idia naria bona karaia namonamo.”

Idia gwau aiemai kerere dainai siti dekenai kuku be hegeregere lasi iboudiai totona. To The Daily Mail niuspepa ese ia herevalaia, ia gwau: “Leicester taudia eiava Tobacco Controller taudia be idia gwau diba lasi Witness taudia ese Leicester ena kuku idia haorea. Idia be kuku idia ania lasi.” Danu, taunimanima edia maumau herevana, Witness taudia ese unai gabu taudia edia aniani idia haorea herevana idia koua, badina Witness taudia idia hahedinaraia idia ese sibona edia aniani unuseniai idia mailaia. Momokani, hebouhebou ena dokona ai, idia ese beredi 150, idia ta ta edia metau be kilo 1.8, be Leicester Royal Infirmary dekenai idia henia​—aniani be hegeregere lasi negana lalonai unai be harihari gauna badana.

Unai hebouhebou ese lauma dalanai Britain ena Witness taudia 11,000 bamona ia hagoadaia bada. Idia moale bada herea taunimanima 12,000 idia mai dainai! Hebouhebou taudia be mai edia moale ida dala gaukara badana idia karaia Leicester ai, bona siti murimuri ai idia noho hanua ai rikodi idia gaukaralaia idia haroro totona.

Hebouhebou dekenai idia henia hereva badadia be hua gunanai, Iehova ena Witness taudia edia dina ima hebouhebouna St. Louis, Missouri, U.S.A. ai idia karaia rekodi amo. Tadikaka Rutherford ena hereva “King Ena Natudia,” rekodi amo idia kamonai, be hebouhebou ena kahana badana ta. Saint Louis dekenai idia halasia bukana ladana Children ena kopi be Britain dekenai idia mailaia diba lasi dainai, gabeai Britain dekenai ena kopi idia karaia. Kopi ta be unai hebouhebou dekenai idia mai natudia ibounai dekenai idia siaia.

Lagani Ena Hebou Idauna Leicester Dekenai

Tuari murinai Basileia harorolaia taudia edia namba Britain dekenai ia bada ia lao momokani! Lagani 1980 murinai, Leicester dekenai idia noho kongregesen be 10. Bena ai idia hadibaia Iehova ena Witness taudia edia Hakaua Oreana taudia idia ura Watch Tower Bible and Tract Society ena lagani 1983 ena hebou be Leicester dekenai do idia karaia. Lau be Leicester ena siti naria tauna dainai, karaharaga hegaegae karana lalonai lau vareai, bona egu gaukara ta be De Montfort Hall lau rentaia lou.

Hakaua Oreana ena memba 13 be Society ena hedikwota Brooklyn amo unai hebou dekenai idia mai. Idia mai taudia ibounai 3,671​—idia be tanobada hegegemadai amo idia mai, bona idia momo be nega daudau orea lalonai idia noho taudia​—be gabu idia hahonua. Taunimanima ma haida 1,500 be kahirakahira ia noho Assembly Hall ai program idia kamonai.

Albert D. Schroeder ese unai hebou ia gunalaia, ia be tuari negana lalonai Leicester ena hebouhebou ai karaia neganai, Watch Tower Society ena brens opesi London ai ia naria. Tadikaka Schroeder be lagani 1941 ena hebouhebou ia laloa bona ia henanadai: “Hari umui mai taudia hida be unai negai umui noho danu?” Idia noho taudia edia kahana ta bona ma haida ese edia imana idia abia isi. “Ia! Umui abidadama noho taudia ibounai dekenai inai be hedavari lou negana namona!” Momokani unai hebou ai laloaboio diba lasi.

Hari egu mauri lagani be 98 neganai, lau be emai kongregesen ena seketere tauna bona pablik tok lau henidia noho, ena be lau henia neganai lau helai. Lagani 1987 ai Mary ia mase murinai, Bettina, lagani momo Mary bona lau ai diba vabu ta, lau adavaia. Lau moale bada lau idia naria namonamo, tauanina bona lauma dalanai. Ena be Mary ena gorere dainai bona hari lau buruka dainai, lau hekwarahi, to lau davaria hesiai gaukara helagana lalonai gaukara bada lau karaia ese davana namona ia henia.​—1 Korinto 15:⁠58.

[Picture on page 26]

Lagani 1920 murinai haroro gaukara totona ai hegaegae

[Picture on page 26]

Laulau haida Leicester ena hebouhebou amo