Dahaka Dainai Idia Karaia?

LAGANI ta ta tanobada hegegemadai, Iehova ena Witness taudia tausen momo be hebouhebou badadia dekenai idia lao. Unuseniai, hebamo idia moalelaia bona Baibel ena hadibaia hereva namodia idia kamonai. Haida idia hekwarahi bada unai hebouhebou dekenai idia lao totona. Hegeregere, lagani gunanai, Malawi dekenai, tau ta mai ena adavana, edia mauri lagani be 65 bamona, be edia natuna mero bona ena hahine bona beibi ida, baisikele amo kilomita 80 idia lao hebouhebou dekenai. Dabai 6 okaloka ai edia hanua idia rakatania bona hora 15 murinai hebouhebou gabuna dekenai idia ginidae.

Mozambique dekenai, grup ta be dina toi lalonai baisikele amo idia lao hebouhebou dekenai. Hanuaboi ta ai, murimuri ai idia mahuta neganai, idia kahirakahira laiona edia boiboi idia kamonai. Ena be unai animal idia noho kahana dekenai lahi audia idia negea, to laiona idia noho ela bona daba rere. Unai hebouhebou tamona dekenai ia lao Witness tauna ma ta be dala dekenai laiona ta ia itaia. Ia marere lasi ela bona laiona ia raka lao. Hebouhebou dekenai, unai Witness taudia be mai edia moale ida edia sivarai idia kikilaia, edena bamona “laiona edia uduna dekena amo” idia roho mauri.​—2 Timoteo 4:​17.

Iehova ena Witness taudia momo idia hekwarahi bada tomadiho totona hebouhebou eiava pura ta ta ai kongregesen ena hebou dekenai idia lao. Dahaka dainai? Hereva gabedia ese oi do idia durua bena do oi lalo-parara dahaka dainai hebou karana be mai anina bada.