Mai Edia Ura ida “Idia Naria Noho”
“Dirava ese ia karadia gaudia ibounai ese . . . edia matana idia negea noho, idia naria noho, unai Dirava ena natudia do idia itaia totona.”—ROMA 8:19.
1. Keristani taudia ginigunadia bona hari inai negai idia noho Keristani taudia edia noho be edena dala haida ai idia hegeregere?
HARI inai negai Keristani taudia momokanidia edia noho be Keristani taudia ginigunadia edia noho hegeregerena. Unai nega ai, peroveta herevana ta ese Iehova ena hesiai taudia ia durua, Mesia do ia hedinarai negana idia diba totona. (Daniela 9:24-26) Unai peroveta herevana tamona ia gwau Ierusalema do idia hadikaia ore, to gau ta ese Keristani taudia ia hadibaia lasi edena nega ai unai do ia vara. (Daniela 9:26b, 27) Unai hegeregerena, Dirava ena heduru amo, lagani 1800 murinai idia noho Baibel Stiuden taudia be peroveta herevana ta dainai kara ta idia naria. Daniela 4:25 ia gwauraia “lagani 7” be “idau bese edia nega” ida idia hahegeregerea neganai, idia laloa Keriso be lagani 1914 ai Basileia siahuna do ia abia. (Luka 21:24; Esekiela 21:25-27) Ena be Daniela bukana lalonai peroveta herevadia momo idia noho, to hari inai negai idia noho Baibel stiuden taudia be unai hereva amo Satani ena nega ena oromana ibounai do ia ore negana korikorina idia davaria diba lasi. (Daniela 2:31-44; 8:23-25; 11:36, 44, 45) To, unai be kahirakahira do ia vara, badina ita be “dokona negana” ai ita noho.—Daniela 12:4.a
Keriso Ena Noho Negana Lalonai Oi Noga Noho
2, 3. (a) Keriso be king siahuna ai ia noho negana lalonai ita noho herevana ia hamomokania gauna badana be dahaka? (b) Dahaka ese ia hamomokania Keristani taudia be Iesu Keriso ena noho negana lalonai idia noga noho be namo?
2 Momokani, peroveta herevana ta dainai, lagani 1914 ai Keriso be Basileia siahuna ia do abia lasi neganai, Keristani taudia idia naria noho vadaeni. To Keriso ese iena noho negana bona inai nega oromana ena dokona ena “toana” ia herevalaia neganai, do idia vara gaudia ia gwauraia. Bona unai gaudia momo be iena noho negana ia matamaia murinai do idia hedinarai. Unai gaudia—tuari, aniani lasi, tano mareremarere, daihanai goreredia, taravatu utua karadia idia bada, Keristani taudia dagedage henia karadia, bona tanobada hegegemadai Basileia sivarai namona harorolaia gaukarana—be hamomokania gaudia badadia; idia hamomokania hari Keriso ena noho negana, king siahuna ia abia negana, lalonai ita noho.—Mataio 24:3-14; Luka 21:10, 11.
3 To, Iesu ena hahediba taudia dekenai iena sisiba ena anina badana be inai: “Umui naria namonamo, umui noga noho, . . . umui naria noho.” (Mareko 13:33, 37; Luka 21:36) Unai noga karana ena sisiba herevadia ibounai ita duahia namonamo neganai, ia hahedinaraia Keriso ena hereva ena badina badana be iena noho negana ia matamaia ena toana ita naria totona lasi. Lasi, ia be ena hahediba taudia momokanidia ia hagania iena noho negana lalonai idia naria noho. Keristani taudia momokanidia be dahaka do idia naria noho?
4. Iesu ese ia gwauraia toana amo dahaka do ita diba?
4 Iesu ese ena peroveta hereva badana amo inai henanadai ia haerelaia: “Oiemu hereva gauna [Iuda besena ena oromana ena dokona ia kahirakahira neganai idia vara karadia] edena negai do idia vara? Do oi giroa mai, bona tanobada dokona danu, ena toana be dahaka?” (Mataio 24:3) Ia gwauraia toana amo Keriso ena noho negana do ita diba sibona lasi, to inai nega dikana ena oromana ena dokona ia mai kahirakahira neganai dahaka do idia vara do ita diba danu.
5. Iesu be edena bamona ia hahedinaraia ena be lauma dalana ai ia noho vadaeni, to ia be do ia “mai”?
5 Iesu ese ia hahedinaraia, iena “noho” (Greek gado, pa·rou·siʹa) negana lalonai, mai ena siahu bona hairai ida do ia mai. Unai bamona do ia “mai” (Greek herevana erʹkho·mai amo idia mai hereva idauidau edia anina hegeregerena) ia herevalaia neganai, ia gwau: “Vadaeni Taunimanima ena Natuna ena toana guba dekenai do ia hedinarai. Unai neganai tanobada ena bese ibounai do idia tai, badina be Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu. . . . Fig auna dekena amo inai parabole do umui diba: Au ena rigina ese ranu ia abia, bona ena raurau matamata idia kehoa neganai, umui diba vadaeni lai be dina diho kahana dekena amo kahirakahira do ia mai. Inai dainai, umui danu ese inai gau ibounai idia vara do umui itaia neganai, do umui diba Taunimanima ena Natuna be ia kahirakahira vadaeni, iduara dekenai ia noho. . . . Unai dainai do umui naria, badina be umui emui Lohiabada do ia mai negana be umui diba lasi. . . . Unai dainai, do umui hegaegae, badina be Taunimanima ena Natuna do ia mai ena hora be umui diba lasi.”—Mataio 24:30, 32, 33, 42, 44.
Dahaka Dainai Iesu Keriso Do Ia Mai?
6. ‘Babulonia Badana’ hadikaia ore karana be edena bamona do ia vara?
6 Ena be Iesu Keriso be lagani 1914 amo King ai ia lao bona ia noho vadaeni, to orea bona taunimanima ta ta do ia hahemaoro henia bena kara dika taudia dekenai edia davana dikana do ia henia. (2 Korinto 5:10 itaia.) Kahirakahira Iehova ese politikol lohia taudia edia lalona ai ‘Babulonia Badana,’ tanobada ena tomadiho koikoi basileiana, hadikaia urana do ia atoa. (Apokalupo 17:4, 5, 16, 17) Aposetolo Paulo ia gwau Iesu Keriso ese “Tau Dika Rohorohona”—Kerisendom ena dubu idia gunalaia bona hereva momokani idia dadaraia oreana do ia hadikaia ore. Unai Kerisendom be ‘Babulonia Badana’ ena kahana badana ta. Paulo ia gwau: “Tau Dika Rohorohona do ia hedinarai. To Lohiabada Iesu mai diaridiari bona mai hairai bada danu do ia mai neganai, ia ese unai Tau Dikana do ia alaia mase.”—2 Tesalonika 2:3, 8.
7. Taunimanima ena Natuna be mai ena hairai ida do ia ginidae neganai, edena bamona hahemaoro do ia karaia?
7 Kahirakahira, Keriso ese bese ibounai taudia do ia hahemaoro henidia, iena tadikaka tanobada dekenai idia kara henia hegeregerena. Sivarai ita duahia, ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai be iena vairana dekenai do idia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be iena idiba kahana dekenai do ia atoa, nanigosi be iena lauri kahana dekenai do ia atoa. . . . Lohiabada ese [mamoe] dekenai do ia haere, do ia gwau, ‘Umui lau hamaoroa momokani, inai lauegu tadikakana ogogami herea taudia dekenai unai bamona umui karaia neganai, be lau dekenai umui karaia vadaeni danu.’ . . . Unai dainai, [nanigosi] be davana ia dika hanaihanai gabuna dekenai do idia lao. To kara maoromaoro taudia be mauri hanaihanai gabuna dekenai do idia lao.”—Mataio 25:31-46.
8. Keriso do ia mai bona Dirava badinaia lasi taudia do ia hahemaoro henidia karana be Paulo ese edena bamona ia herevalaia?
8 Mamoe bona nanigosi parabolena ese ia hahedinaraia hegeregerena, Iesu ese Dirava badinaia lasi taudia ibounai do ia hahemaoro henidia auka. Paulo ese hisihisi idia abia noho tadikaka ia hadibadia Dirava ese idia dekenai “mauri namona do ia henia. Inai be do ia vara, Lohiabada Iesu bona iena aneru mai siahu bada danu guba dekena amo do idia mai neganai. Mai lahi siahu bada danu, Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia. Edia davana be inai: Idia be Lohiabada ena vairana, bona iena hairai siahuna dekena amo daudau do idia noho. Inai anina be, Dirava ese idia do ia hadikaia ore momokani, bona inai bamona do idia noho hanaihanai. Oibe, Keriso do ia mai Dinana dekenai, inai taudia madi do idia dika. Unai Dina neganai Dirava ena abidadama taudia ibounai ese Keriso do idia hanamoa, bona hairai bada do idia henia.” (2 Tesalonika 1:7-10) Unai kara idauidau ibounai be kahirakahira do idia vara dainai, namona be abidadama ita hahedinaraia noho bona Keriso ena mai ita naria noho, ani?
Keriso Do Ia Hedinarai Negana Idia Naria mai Edia Ura Ida
9, 10. Dahaka dainai tanobada dekenai idia do noho horoa taudia be mai edia ura ida Keriso do ia hedinarai negana idia naria noho?
9 ‘Lohiabada Iesu do ia mai’ kara dika taudia do ia hadikaia ore totona sibona lasi, to kara maoromaoro taudia edia ahuna do ia henia totona danu. Keriso ena horoa tadikaka oredia tanobada dekenai be reana Keriso ia do mai lasi neganai hisihisi idia ania noho, to guba hairaina ena helaro dainai idia moale. Aposetolo Petero be horoa Keristani taudia dekenai inai hereva ia torea: “Keriso danu umui hisihisi hebou dainai do umui moale. Badina be gabeai, Keriso ena hairai ia hedinaraia neganai, do umui moale bada herea.”—1 Petero 4:13.
10 Horoa taudia edia lalona idia hadaia vadaeni mai abidadama ida do idia noho ela bona Keriso ‘danu do idia haboua,’ bena edia abidadama, ‘ena goada idia tohoa’ gauna, dainai “Iesu Keriso ia hedinarai dinana dekenai mataurai bona hairai bona hanamoa do [idia] davaria.” (2 Tesalonika 2:1; 1 Petero 1:7) Unai bamona abidadama horoa Keristani taudia be inai hereva amo ita gwauraidia diba: “Keriso ena sivarai . . . be umui ese umui abia dae goada, bona umui hamomokania vadaeni. Unai dainai umui ese Lohiabada Iesu Keriso ena mai umui naria noho, bona Lauma ena harihari gauna ta dekenai umui dabu lasi.”—1 Korinto 1:6, 7.
11. Keriso do ia hedinarai negana idia naria noho lalonai, horoa Keristani taudia be dahaka idia karaia?
11 Horoa orena taudia be Paulo bamona idia laloa, ia gwau: “Lau laloa hari inai nega ita abia noho hisihisi be bada lasi, to gabeai do ita abia Dirava dekena amo hairaina be bada herea.” (Roma 8:18) Edia abidadama be nega duahia karana amo idia hamauria noho lasi. Iehova ena hesiai gaukara idia karaia goadagoada noho, bona unai be haheitalai namona edia bamodia, “mamoe idaudia” dekenai. (Ioane 10:16) Unai horoa taudia idia diba inai nega ena oromana dikana be kahirakahira do ia ore, bona idia ese Petero ena sisiba idia badinaia, ia gwau: “Do umui laloa namonamo, bona do umui naria namonamo. Do umui noho hegaegae, bona Iesu Keriso do ia hedinarai neganai do umui abia hanamoa, be do umui naria noho.”—1 Petero 1:13.
‘Dirava ese Ia Karaia Gaudia Ibounai Idia Naria Noho’
12, 13. Taunimanima be edena dala ai “mauri anina lasi idia davaria,” bona mamoe idaudia be dahaka idia ura dikadika?
12 Mamoe idaudia taudia danu be gau ta totona mai edia ura ida idia naria noho, a? Oibe. Paulo be Iehova ena lauma amo ena “natudia” ai halaoa taudia bona guba Basileia lalonai Keriso ida do idia lohia taudia edia helaro namona ia herevalaia murinai, ia gwau: “Dirava ese dina ta iena natuna korikori taudia do ia hedinaraia. Unai dainai Dirava ese ia karadia gaudia ibounai . . . idia naria noho, unai Dirava ena natudia do idia itaia totona. Badina Dirava ese unai ia karadia gaudia be mauri anina lasi idia davaria, sibodia edia ura dainai lasi, to Dirava ena ura dainai. To dala namona ta Dirava ese ia laloa: Dirava ese dina ta ia karadia gaudia be do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia, ma Dirava ese edia dala do ia kehoa, vadaeni kwalimu momokani do idia abia.”—Roma 8:14-21; 2 Timoteo 2:10-12.
13 Adamu ena kara dika dainai, iena bese taudia ibounai be “mauri anina lasi idia davaria,” kara dika bona mase ena igui lalonai idia vara unai. Idia be unai igui amo sibona idia ruhaia diba lasi. (Salamo 49:7; Roma 5:12, 21) Mamoe idaudia idia ura dikadika “Dirava ese . . . [idia] do ia ruhaia, dika ena bodaga dekena amo”! To unai kara ia do vara lasi neganai, Iehova ena dina bona nega hegeregerena, gau haida do idia vara be namo.
14 Namona be ‘Dirava ena natuna korikori taudia’ oredia do idia ‘hedinarai’ guna. Unai ena anina be dahaka? Dirava ena nega korikori ai, mamoe idaudia do idia diba horoa taudia be “maka” idia abia momokani vadaeni bona hairai idia abia Keriso ida do idia lohia totona. (Apokalupo 7:2-4) ‘Dirava ena natuna korikori taudia’ amo idia toreisi lou vadaeni taudia be do idia ‘hedinarai,’ Keriso ida Satani ena tanobada oromana dikana idia hadikaia ore neganai. (Apokalupo 2:26, 27; 19:14, 15) Unai murinai, Keriso ena Lagani 1,000 Lohia Negana lalonai, idia be hahelaga dagina ai do idia ‘hedinarai,’ bona Iesu ena mauri davalaia boubouna ena namo be Dirava ese “ia karaia [taudia]” dekenai do idia halasia. Unai kara amo Dirava ese taunimanima “do ia ruhaia, dika ena bodaga dekena amo,” bena “Dirava ena natuna edia hairaina bamona do idia abia, ma Dirava ese edia dala do ia kehoa, vadaeni kwalimu momokani do idia abia.” (Roma 8:21; Apokalupo 20:5; 22:1, 2) Unai hahenamo namodia dainai, mamoe idaudia be ‘Dirava ena natuna korikori taudia do ia hedinaraia’ negana “idia naria noho” mai edia ura ida be ita hoalaia lasi, ani?—Roma 8:19.
Iehova Ena Haheauka Dainai Hahemauri Ia Vara
15. Iehova ia gwauraia gaudia edia nega ita laloa neganai, dahaka ita laloaboio lasi be namo?
15 Iehova be Nega Naria Tauna Hereadaena. Ia gwauraia gaudia be nega maorona ai do idia vara. Gau haida be reana ita ta ta sibona eda lalohadai hegeregerena idia vara lasi. To, mai abidadama ida ita abia dae momokani diba, Dirava ena gwauhamata ibounai be do idia guguru. (Iosua 23:14) Reana momo edia lalohadai be ia kara haraga lasi. To, namona be iena dala ita lalo-pararalaia bona iena aonega ita laloa bada. Paulo ia gwau: “Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba? Iena dala be daika ese do ia davaria diba? Buka Helaga ia torea bamona, ia gwau: ‘Lohiabada ena laloa be daika ia diba? Daika ese ia sisiba henia diba?’ ”—Roma 11:33, 34.
16. Daidia be Iehova ena haheauka dainai hahenamo do idia abia?
16 Petero ia gwau: “Lauegu lalokau taudia e, inai gaudia [“guba” bona “tanobada” gunana do idia hadikaia ore bena Dirava ese ia gwauhamatalaia “guba matamata” bona “tanobada matamata” ese edia gabu do idia abia karadia] umui naria noho dainai, do umui noho namonamo. Mai goevagoeva bona kerere lasi danu Dirava ena vairanai do umui noho. Bona Dirava danu mai maino danu do umui noho. Do umui laloaboio lasi, Lohiabada ese umui ia naria noho, mai haheauka danu. Ia ese nega namona umui dekenai ia henia noho inai, iena hamauria do umui davaria totona.” Iehova ena haheauka karana dainai, ma taunimanima milioni momo dekenai dala ia kehoa “Dirava ena Dina” amo do idia roho mauri totona. Unai dina be “henaoa tauna ia ginidae bamona,” ta ia laloa lasi negana ai do ia mai. (2 Petero 3:9-15) Iena haheauka karana dainai ita be mai eda dala ‘mai gari bona mai heudeheude danu eda hamauria do ita tahua noho.’ (Filipi 2:12) Iesu ia gwau namona be ita sibona ‘do ita naria namonamo’ bona ita noga noho, bema ita ura hahemaoro negana ai “Taunimanima ena Natuna ena vairana dekenai do [ita] gini” bena iena lalo-namo do ita abia bona ita kwalimu.—Luka 21:34-36; Mataio 25:31-33.
Mai Haheauka ida Oi Naria Noho
17. Edena hereva, aposetolo Paulo ese ia gwauraia herevana, do ita badinaia be namo?
17 Paulo ese ena horoa tadikaka ia hamaorodia namona be ‘idia itaia gaudia do idia laloa lasi, to matana dekenai idia itaia lasi gaudia do idia laloa.’ (2 Korinto 4:16-18) Ia ura lasi gau ta ese guba helarona idia laloa karana do ia koua. Herevana ita be horoa Keristani taudia eiava mamoe idaudia, to namona be ita vairanai ia noho helaro namona ita laloa noho, bona ita hesiku lasi. Namona be “mai laloa goada danu ita naria” noho, bona ita hahedinaraia “ita be Dirava ena dala do ita rakatania lasi. Ita be boio taudia lasi. Lasi, to ita be abidadama taudia dainai, mauri do ita abia.”—Roma 8:25; Heberu 10:39.
18. Dahaka dainai mai eda abidadama ida dina bona nega be Iehova ena imana dekenai ita rakatania diba?
18 Mai abidadama ida dina bona nega be Iehova ena imana dekenai ita rakatania diba. Iena gwauhamata be ‘do idia vara momokani,’ iena nega ia makaia hegeregerena. (Habakuku 2:3) Ita naria noho lalonai, Paulo ena sisiba Timoteo dekenai be mai anina bada. Ia gwau: “Keriso Iesu ese taunimanima ibounai dohore ia kota henia, mauri noho taudia, bona idia mase vadaeni taudia danu. Unai dainai Dirava ena vairanai, bona Keriso Iesu ena vairanai danu, oi dekenai lau hereva goada henia, inai bamona: Keriso Iesu be do ia giroa mai, bona iena Basileia do ia gunalaia dainai, oi lau oda henia, Sivarai Namona do oi harorolaia goadagoada, nega namodia neganai, bona nega dikadia neganai danu. . . . Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.”—2 Timoteo 4:1-5.
19. Inai nega lalonai Iehova ena orea taudia ese dahaka idia karaia be namo, bona dahaka dainai?
19 Iseda mauri—ita sibona eda bona iseda dekena taudia edia mauri—be do ita haboioa diba. Paulo ia gwau: “Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.” (1 Timoteo 4:16) Nega be ia kwadogi momokani, inai nega dikana ena oromana ia ore gwauraia. Mai eda ura ida unai hoa karadia ita naria noho lalonai, namona be ita laloatao inai nega be Iehova ena dina bona nega, iena taunimanima ese Basileia sivarai namona do idia harorolaia totona. Namona be iena ura hegeregerena unai gaukara idia hagugurua. “Vadaeni unai murinai,” Iesu ia hereva bamona, “dokona do ia ginidae.”—Mataio 24:14.
[Footnote]
a Watchtower Bible and Tract Society of New York, Inc. ese ia halasia bukana Diba ese Mauri Dekenai Ita Ia Hakaua Lao, karoa 10 bona 11 itaia.
Riviu
◻ Nega duahia karana dekenai, edena dala ai iseda noho be Keristani taudia ginigunadia edia noho bamona?
◻ Dahaka dainai Keristani taudia ‘do idia naria’ noho, Keriso ena noho negana lalonai danu?
◻ Dahaka dainai taunimanima be mai edia ura ida ‘Dirava ena natuna korikori do idia hedinarai’ negana idia naria noho?
◻ Dahaka dainai mai eda abidadama ida dina bona nega be Iehova ena imana dekenai ita rakatania diba?
14. ‘Dirava ena natuna korikori taudia do idia hedinarai’ ena anina be dahaka, bona edena dala ai unai kara amo Dirava ese taunimanima “do ia ruhaia, dika ena bodaga dekena amo”?
[Picture on page 17]
Keristani taudia be Keriso ena mai idia naria noho lalonai idia noga noho be namo
[Picture on page 18]
Horoa orena taudia be Iehova ena hesiai gaukara lalonai idia gaukara goadagoada noho, bona nega duahia karana ai edia abidadama idia haginia lasi