Kohu Hadikaia Kava Karadia Idia Ore Diba

BUKA torea taudia Jane Norman bona Myron W. Harris idia gwau: “Hanaihanai taunimanima idia laloa matamata taudia be kohu hadikaia kava karadia amo idia hahedinaraia taunimanima badadia bona edia lalohadai idia matauraia lasi bona idia badu henia.” Ena be matamata taudia momo idia laloa gau ta ese unai ia haidaua diba lasi, to unai buka torea taudia idia gwau, “idia toi toi amo tamona tamona idia laloa matamata taudia ese idia karaia kohu hadikaia kava karadia idia koua diba, bema tama sina be edia natudia idia laloa, bona bema matamata taudia ese mauri idia hesikulaia lasi.” Ena be kohu hadikaia kava karadia idia hamaragia diba, bema memero kekeni dekenai gaukara haida idia henia bona bema tama sina ese idia hakaua namonamo, to unai sibona ese unai kara ena badina do ia kokia, a?

Matamata taudia momo be sibona idia noho neganai, dika idia karaia lasi, to grup lalonai eiava rua rua idia noho neganai, idia kara kava bona kara dikadia idia karaia, ma haida ese idia laloa totona. Nelson be unai bamona, nega momo drag ia ania eiava kekero muramura ia inua neganai, kohu ia hadikaia kava, ena badu bona lalohisihisi ia hahedinaraia totona. José be Katolik Dubu lalonai tano haria karana bona gaukara taudia edia maoro herevadia ia kamonai, bona unai ese ena lalona ia veria dainai ia laloa kara kereredia ia maumauraia totona, straiki bona kohu hadikaia kava karadia idia karaia oreadia lalonai ia vareai be namo. To, Nelson bona José ese heatu bona kohu hadikaia kava karadia ia hereaia gauna namona ta idia davaria.

Kohu Hadikaia Kava Karadia Edia Badina Haida

Namona be matamata taudia haida ese kohu idia hadikaia kava ena badina ita tahua namonamo. Matamata taudia momo idia daradara bona “idia gwau tanobada be daradara bona kavakava gabuna, kavakava taudia amo ia honu gabuna.” To, ena be haida edia lalohadai be idau, ripoti ta ia gwau: “Matamata taudia ese edia mauri idia lalo-hekwarahilaia. Idia lalo-hekwarahilaia bada, ena be taunimanima badadia idia laloa idia ese unai idia laloa lasi.” Reana kohu ia hadikaia kava mero o kekeni ia lalo-parara eiava ia lalo-parara lasi, to reana unai kara amo ia hahedinaraia gau haida ia lalohisihisilaia bada, hekwakwanai haida ia hanaia diba lasi, eiava ena dabu gaudia ia abia lasi. Matamanai ita herevalaia tahua karana ia hahedinaraia, “idia haere taudia ta lasi ese kohu hadikaia kava karadia ia gwauraia maoro, unai kara idia karaia taudia danu.”

Reana mero o kekeni ese ia idia hanamoa eiava hagoadaia herevadia ia kamonai lasi. Taunimanima ese hari edukeisen idia laloa bada bona gaukara momo totona diba bada eiava masini gaukaralaia dibana be mai anina bada dainai, reana matamata taudia idia gari. Danu, tama sina, tisa taudia, eiava turadia ese reana idia maumauraidia bona idia kara auka henidia, matamata tauna ena diba idia laloa bada to ena kara idia laloa bada lasi. Momo idia gwau-edeede eiava kohu idia hadikaia kava, badina idia sibona dekenai idia moale lasi. Tama sina edia lalokau bona laloa bada karana ese unai bamona lalohisihisi ia hamaragia diba, ani?

Reana oi itaia ena be siahu taudia haida be graffiti bona kara dika ma haida idia koua toho lasi, to taunimanima momo idia do laloa noho kohu hadikaia kava karadia do idia koua be tisa taudia bona sikuli dekenai idia gaukara taudia ma haida edia maduna. The World Book Encyclopedia be pulisi gaukarana ia herevalaia neganai, ia gwau: “Kohu idia hadikaia kava taudia edia panisi be faini moni idia henia eiava dibura dekenai idia lao. Gavamani haida edia taravatu idia gwau bema natudia ese kohu idia hadikaia kava, unai be tama sina edia kerere. To kohu idia hadikaia kava taudia momo ese panisi idia abia lasi. Unai neganai pulisi ese edia gaukara idia karaia be auka bona kohu hadikaia kava karadia momo edia davana be bada lasi dainai, kota dekenai idia samania be anina lasi.” Ripoti ta ia hahedinaraia pulisi ese unai kerere idia karaia taudia amo 3 pesen sibona idia dogoatao.

Reana oi abia dae tama sina ese natudia idia naria namonamo karana be dala hereadaena kara dika ena badina koua totona. To ruma bese maurina idia dika idia lao neganai, unai gabu taudia idia hisihisi. Brazil ai, São Paulo University hahinena ta, Profesa Ana Luisa Vieira de Mattos, ia gwau, matamata taudia edia hekwakwanai edia badina haida be “tama sina ese natudia idia hakaua namonamo lasi, taravatu idia atoa lasi, idia herevahereva namonamo lasi, idia naria lasi, idia laloa bada lasi.”

Iseda nega lalonai ita itaia Iesu ena hereva idia guguru, ia gwau: “Kara dikadia danu do idia vara gabu idauidau dekenai, vadaeni taunimanima momo edia lalokau be do ia keru.” (Mataio 24:12) Bona ita iboudiai ita itaia 2 Timoteo 3:​1-4 ena hereva be ia guguru noho, ani? Aposetolo Paulo ia gwau: “Namona be oi diba, nega ena dokona dekenai, metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, bona helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi.” Momokani, ita be unai bamona taudia huanai ita noho dainai ita gwau-edeede diba. To ita hesiku lasi be namo. Taunimanima ese kohu hadikaia kava karadia idia koua diba lasi, to sibona edia mauri dalana idia haidaua taudia haida ita davaria diba, hari idia dagedage lasi eiava idia kara kava lasi. Idia ese kohu hadikaia kava karadia idia hadokoa.

Hakaua Herevadia Namodia Matamata Taudia Totona

Dahaka ese kohu idia hadikaia kava taudia bona ma haida ia durua edia kara idia haidaua totona? Ena be tisa taudia bona tama sina haida be inai idia abia dae lasi, to Baibel ena hakaua herevadia be namo herea bona hari inai negai idia be mai anina. Unai hereva idia badinaia dainai, guna kohu idia hadikaia kava taudia ese Dirava ena taravatu ta idia kamonai henia, ia gwau: “Bema taunimanima momo idia kerere, edia laloa do umui abia dae lasi.” (Esodo 23:⁠2) Dirava ena Hereva lalonai hahediba hereva momokanidia, guna idia lalo-pararalaia lasi herevadia, be hari taunimanima momo ese idia ura henia bona idia dibaia gaudia ese edia mauri idia durua. Mani José, matamata tauna São Paulo ai, ena sivarai oi laloa. Ia tubu neganai, tomadiho lalonai kaivakuku gaukaralaia karana ia abia dae. Dirava ena ladana, Iehova, bona kaivakuku tomadiho henia karana Ia ura lasi herevana ia diba neganai, José ese ena kara ia haidaua Dirava ia hamoalea totona.​—⁠Esodo 20:​4, 5; Salamo 83:18; 1 Ioane 5:​21; Apokalupo 4:​11.

Hari Nelson ese dagedage grup haida bona straiki karadia dainai lalohisihisi ia davaria loulou lasi, to ia ese helaro korikorina vaira negana totona ia davaria, bona unai dainai ia moale bada. Ia gwau: “Hari egu ruma bese ese hebamo dikana bona drag ania kava karadia dainai lau idia dadaraia lasi, to ruma dekenai lau idia matauraia bada. Nega momo egu tamana ese lau ia noia egu kakadia lau sisiba henia totona. Iehova ena Witness taudia ida Baibel lau stadilaia matamaia murinai, moale lau davaria badina hari egu mauri be mai ena anina.” Bona Dirava ena Basileia ese paradaiso ai tanobada do ia haidaua dibana ese siti merona Marco​—⁠dagedage nohona ia manadalaia merona unai​—⁠ena kudouna ia hamarerea.​—⁠Apokalupo 21:​3, 4.

Guna dagedage grup ena memba ta, dala dekenai ia heai bona kohu ia hadikaia kava tauna, mani oi laloa. Valter be tamana bona sinana lasi merona bona ia tubu neganai dika momo ia davaria, unai dainai inai diba, tanobada dikana lalonai Dirava be mai ena bese, ese ena lalona ia hamoalea. Idia ese edia mauri lalonai Baibel ena hakaua herevadia idia badinaia toho mai momokani ida bona idia ese hebogahisi bona kara namo idia hahedinaraia. Valter ia gwau: “Iesu ena gwauhamata hegeregerena, hari lau be mai egu ruma bese bada hereana, ‘tadikaka bona taihu bona sinadia bona tamadia momo.’ Bona lau ese vaira negana lau naria noho, unai nega lalonai taunimanima be Dirava ena kara maoromaoro gavamanina henunai do idia noho mai edia moale bona lalo-tamona ida.”​—⁠Mareko 10:​29, 30; Salamo 37:​10, 11, 29.

Gwau-Edeede Karana Ia Hereaia Karana Namona

Unai kohu hadikaia kava taudia gunadia ese edia dekena taudia idia hebogahisi bona lalokau henia sibona lasi, to idia ese ‘dika idia inai henia’ danu. (Salamo 97:​10, NW; Mataio 7:​12) Oi be edena bamona? Ena be oi be kohu hadikaia kava karadia edia dika idia hisihisilaia taudia ta sibona, to Dirava ena Hereva oi stadilaia karana amo do oi diba Iehova be momokani ia noho bona ia be guba Tamana mai ena lalokau bona ia ura oi ia naria. (1 Petero 5:​6, 7) Herevana oi be mai emu manoka gaudia eiava oi ogogami, to Dirava ese oi ia durua diba lauma dalanai oi goada oi lao totona. Unai be gau namo hereana ta!

Iehova bona ena Natuna, Iesu Keriso, idia ura momokani taunimanima idauidau ese Baibel ena hereva momokani idia diba. Dirava ena Hereva ese kohu hadikaia kava taudia ia durudia diba unai kara idia hadokoa totona, to unai sibona lasi. Ia ese idia ia hasiahua Dirava ia gwauraia hakaua herevadia idia badinaia goadagoada totona. Unai dainai, tadikaka bamona idia kara goeva bona kara namo taudia edia intenesenel oreana lalonai idia vareai, Iehova ena Witness taudia edia tanobada ibounai oreana unai. Efeso 4:​24 hegeregerena, unai lalo-momokani Keristani taudia ese ‘mauri matamata idia atoa, dabua matamata idia atoa bamona, edia toana be Dirava ena toana bamona, kara maoromaoro, helaga, bona momokani.’ Nega sisina murinai, tanobada be unai bamona taudia amo do ia honu, badina unai bamona taudia sibona be do idia roho mauri bona do idia noho ela bona hanaihanai.​—⁠Luka 23:​43, NW itaia.

Tanobada Matamatana, Kohu Hadikaia Kava Karadia Idia Vara Lasi Tanobadana, Do Ia Vara Diba

Oi abia dae kohu hadikaia kava karadia be do idia ore momokani diba, a? Bema oi abia dae, unai be edena bamona do ia vara? Nega sisina murinai Dirava ena Basileia ese inai tanobada dikana do ia hadikaia ore. Bema tanobada idia noholaia taudia be mai edia ura ida Dirava ena kara maoromaoro taravatudia idia utua, davana do idia abia. (Isaia 24:​5, 6 itaia.) “Kara dika tauna, be Lohiabada ese do ia hadikaia ore” neganai, kara maoromaoro taudia do ia hamauria. “Lohiabada ese tau namodia ia durua noho, bona idia ia veria mauri noho. Lohiabada ese tau dikadia dekena amo tau namodia ia hamauria noho, badina idia ese Lohiabada dekenai idia abidadama henia noho.”​—⁠Salamo 37:​38-40.

Oibe, kohu hadikaia kava karadia edia badina be do idia ore momokani. Bona taravatu utua, dagedage, gwau-edeede, bona dika karadia ibounai be do idia ore danu. To, maino, kara maoromaoro momokani, bona noho namo be tanobada matamatana ai do idia vara momokani. Isaia 32:18 ese do ia guguru momokani gauna ia herevalaia, ia gwau: “Dirava ena taudia be do idia laloa hekwarahi lasi, bona mai hadikaia gauna ta lasi do idia noho.” Oibe, lalokau bona hebogahisi idia hahedinaraia heheni taudia ese tanobada hegegemadai paradaisona mai hairaina do idia noholaia.

Taunimanima ma milioni momo hegeregerena, guna kohu idia hadikaia kava taudia ese Iehova Dirava ida hetura karana namona idia moalelaia vadaeni. Hari idia ese kohu idia hadikaia kava lasi. Dirava ena Hereva ese oi danu ia hakaua diba, ena tanobada matamatana ai do oi mauri totona, a? Idaunegai salamo torea tauna ta ena kara oi tohotohoa be namo, ia be Iehova ena hereva ia torea, ia gwau: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.”​—⁠Salamo 32:⁠8.

[Picture on page 7]

Tama sina edia hebamo bona lalokau ese matamata taudia idia gimaia