Kohu Hadikaia Kava Karadia—Dahaka Dainai?

“GAU ta do lau gwauraia lasi.” Unai hereva be haida ese leta badadia amo idia torea, São Paulo ena noho gabuna namona ta ai idia penia matamata habana dekenai. Reana oi laloa, unai be kohu hadikaia kava karana ta, bona graffiti be unai bamona.

Mani oi laloa, kohu hadikaia kava taudia ese oiemu motuka matamatana idia hadikaia. Eiava reana oi itaia, kohu hadikaia kava taudia ese taunimanima iboudiai idia gaukaralaia diba ruma o kohu​—⁠momo dekenai mai anina bada gaudia​—⁠idia hadikaia. Dahaka dainai? Oibe, ena badina be dahaka? Kohu hadikaia kava karadia idia vara momo ena badina oi laloa vadaeni, a? Gabu momo dekenai, kohu hadikaia kava taudia be mai moale ida telefon ruma maragidia idia hadikaia. Nega momo trein eiava PMV idia hadikaia. Toana be, kohu hadikaia kava taudia be gau ta idia laloa bada lasi. To ita itaia eiava ita lalohisihisilaia kohu hadikaia kava karadia be dahaka dainai idia vara?

Marco,a Rio de Janeiro merona ta, ia badu badina soka gadara ta ai ena tim ia kwalimu lasi​—⁠ena badu ia bada herea dainai ia kwalimu soka tim idia ura henia taudia idia guia basi be nadi amo ia hodoa matamaia. Eiava Claus oi laloa. Sikuli dekenai ia kwalimu lasi neganai, ia badu dikadika dainai nadi ia negea bena uindo ia hamakohidia. To, iena tamana idia noia davana ia henia neganai, Claus ena “moale” ia ore. Mero ma ta, Erwin, be sikuli dekenai ia lao bona ia gaukara danu. Taunimanima idia laloa ia bona ena bamodia be matamata taudia namodia. To, idia moalelaia karana be edia dekena taudia edia kohu hadikaia karana. Erwin ena tama sina be unai idia diba lasi. Valter be tamana bona sinana lasi merona bona São Paulo ena dala idauidau dekenai ia loaloa bona noho. Ena turadia namodia be kohu hadikaia kava taudia, bona edia kara lalonai ia vareai bona heatu gadaradia ia dibaia danu. Unai bamona haheitalai ese idia hahedinaraia taunimanima ese kohu hadikaia kava karadia idia karaia, bona ena badina, eiava idia karaia taudia edia hemami, be idauidau.

The World Book Encyclopedia ia gwau: “Kohu hadikaia kava karana be davana henia karana ta eiava politikol lalohadaina hahedinaraia dalana ta. Matamata taudia bona taunimanima badadia be nega haida unai kara idia karaia ‘moale’ idia abia totona.” To, kohu hadikaia kava karadia be matamata taudia idia karaia moale karana sibona lasi, to idia ese dika bada, eiava mase idia havaraia diba. Matamata taudia haida idia ura “moale idia abia,” bona ia mahuta tauna ta idia itaia neganai, petrol amo idia dairia bona idia gabua. Unai tauna, India tauna ta, be gabeai hospital dekenai ia mase. Ripoti ta ia gwau, “unai matamata taudia idia gwau idia laloa ta ese edia kara do ia laloa bada lasi, badina guna ma haida ese noinoi ogogami taudia haida dala dekenai idia gabua neganai, kota karana ta idia karaia lasi.” Herevana kohu hadikaia kava karadia ai ta idia hadikaia eiava lasi, to moni bona hemami daladiai ena dika be bada herea. Unai dainai, dahaka ese kohu hadikaia kava karadia ia koua eiava ia haorea diba?

Daika ese Kohu Hadikaia Kava Karadia Ia Haorea Diba?

Pulisi bona sikuli ese kohu hadikaia kava karadia idia koua diba, a? Hekwakwanai ta be reana gavamani taudia ese kara dika badadia, hegeregere drag hoihoilaia karadia eiava ala-ala karadia, dekenai nega bada idia henia, to “ta idia hadikaia lasi” kara dikadia dekenai nega idia henia lasi. Pulisi tauna ta ia gwau, matamata tauna be kerere ia karaia neganai, nega momo tama sina idia gwau “kerere be ia bamoa taudia edia, eiava sikuli ena, eiava pulisi taudia edia badina ia idia dogoatao.” Edukeisen bona pulisi edia gaukara ese reana kohu hadikaia kava karadia idia hamaragia diba; to, bema tama sina ese edia lalohadai idia haidaua lasi be edena bamona? Matamata taudia edia probation opesa ta ia gwau: “Ena badina be gau momo idia hesikulaia bona dala ia kehoa. [Natudia] be hanuaboi ai idia loaloa kava. Bona reana ta ese ia naridia lasi​—⁠bema ta ese ia naridia do idia loaloa kava lasi.”

Ena be gabu momo dekenai kohu hadikaia kava karadia be hekwakwanai badana, to unai kara be edena bamona idia haidaua diba mani oi laloa. Matamanai ita herevalaia kohu hadikaia kava matamata taudia ese edia kara idia haidaua; hari taunimanima inai henia karadia idia dadaraia vaitani. Dahaka dainai unai gwau-edeede taudia gunadia ese edia mauri dalana idia haidaua? Danu, do oi hoa bema kohu hadikaia kava karadia do idia koua sibona lasi, to do idia ore vaitani, a? Oi ai noia hereva gabena oi duahia totona.

[Footnote]