Inai Oi Laloatao, A?

Vanegai idia halasia Gima Kohorona magasin edia namo oi abia, a? Vadaeni, mani inai henanadai amo sibona oi tohoa dahaka oi laloatao diba:

◻ Edena henanadai rua ese moni gaukara idia abia hidi gwauraia Keristani taudia momo idia durua, sibona edia lalona idia hadaia totona?

Henanadai badana ginigunana be inai: Baibel ese unai moni gaukara ia gwauraia dika, a? Henanadai iharuana be inai: Bema unai gaukara do ia karaia, Baibel ese ia gwauraia dika karana ena durua tauna ai ia lao, a?​—⁠4/15, rau 28.

◻ Edena dala ai taunimanima be “anina lasi maurina lalonai” idia noho? (Roma 8:​20, NW )

Iseda tama sina ginigunadia, Adamu bona Heva, edia kara dainai, ita be “anina lasi maurina lalonai” ita noho. Unai be “[ita sibona eda] ura dainai lasi,” eiava ita sibona ese ita abia hidi dainai ia vara lasi. Iseda tama sina ginigunadia amo ita abia. Ena be goevadae lasi maurina, kara dika, bona mase sibona idia henia hanai diba edia natudia dekenai, to Iehova ia hebogahisi dainai natudia idia havaraia dalana ia koua lasi. Mase be taunimanima ibounai ese idia abia, unai dainai ita gwau diba Dirava ese “ia karaia gaudia be anina lasi maurina lalonai ia atodia.”​—⁠5/1, rau 5.

◻ Dahaka dainai ita gwau diba vaira negana ta ai “gau dika rohorohona” be ‘dubu helaga ai do ia gini’? (Mataio 24:15)

Idaunegai ia vara gauna dekenai, ‘gau dika rohorohona Dubu Helaga ena lalonai ia gini’ matamaia dalana be lagani 66 C.E. ai General Gallus henunai Roma taudia idia karaia tuarina ai ia vara. Iseda nega ai, unai tuari hegeregerena karana​—⁠hisihisi badana ena matamana​—⁠be do vairai. (Mataio 24:21) Unai dainai “gau dika rohorohona, gabu ia hadikaia gauna,” be gabu helagana ai ia do gini lasi.​—⁠5/1, rau 16, 17.

◻ Edena dala ai moni gaukara idia karaia tamana bona sinana ese nega idia abia edia natudia totona?

Dina ta ena moni gaukara murinai ia hesiku sinana ese ena natudia ia noia diba, ia ida aniani idia hegaegaelaia totona. Saturday bona Sunday ai ena gaukara be momo tamana ese ena gaukara haida be ena natudia ida ia karaia diba.​—⁠5/15, rau 6.

◻ Iehova ena dala dekenai idia raka taudia ese dahaka idia karaia be namo? (Ieremia 7:​2, NW )

Iehova ena dala dekenai idia raka totona, gau badana be ia idia badinaia​—⁠edia lalona idia hadaia ia sibona do idia tomadiho henia. Gau badana be ia do idia abidadama henia​—⁠idia abidadama Iehova ena gwauhamata ibounai be do idia vara momokani. Iehova ena dala dekenai idia raka totona, gau badana be ia do idia kamonai henia​—⁠iena taravatu amo do idia raka siri lasi bona iena kara goeva do idia badinaia. (Salamo 11:⁠7)​—⁠5/15, rau 14.

◻ Edena maduna badadia hani be “harihari gaudia” bamona elda taudia ese idia hagugurua diba? (Efeso 4:⁠8)

Mai hebogahisi ida ita idia durua, mai lalokau ida ita idia haginia goada, kongregesen lalonai iseda lalo-tamona idia habadaia, bona mai gari lasi ida ita idia gimaia. (Efeso 4:​12-14)​—⁠6/1, rau 14.

◻ Kara bukana bona Paulo ese ia torea revarevadia ese idia gwauraia taudia handred bamona bona Paulo edia hebamo karana amo dahaka ita dibaia diba?

Namona be nega ibounai Dirava ena orea, iseda kongregesen, bona abidadama tamona taudia ida ita gaukara hebou. Nega namodia bona nega dikadia ai idia amo heduru, goada, bona hahegoada ita abia be namo.​—⁠6/1, rau 31.

◻ Dahaka gau toi ita gaukaralaia amo ma haida ita durua diba Havaraia Tauna idia laloa totona?

Iunives ia heau namonamo karana, mauri ena matamana tanobada dekenai, bona taunimanima edia harana mai ena namo idauidau ia idau momokani.​—⁠6/15, rau 18.

◻ Dahaka dainai Havaraia Tauna ena ladana ena anina ita lalo-pararalaia be gau badana?

Dirava ena ladana ese ia hahedinaraia “Ia ese Ia Halaoa” bona ia hahedinaraia goevagoeva ia be mai ena ura bona ia noho kava lasi. Ita ese ena ladana ita diba bona ita gaukaralaia karana amo, ita abia dae ia ese ena gwauhamata ia gwauraia kava lasi bona ena kara amo ena ura ia hagugurua.​—⁠6/15, rau 21.

◻ Edena dala ai natudia be stadi lalonai idia vareai diba?

Bema mai dalana, namona be natudia ta ta be mai ena Baibel bona stadi magasin. Reana natuna maragina ta oi noia diba magasin lalonai ia noho laulau ia herevalaia totona, bona stadi ia do matamaia lasi neganai, natuna maragina ta dekenai siri ta oi henia diba stadi lalonai ia duahia totona. Natuna badana oi noia diba idia stadilaia gaudia be edena bamona idia gaukaralaia do ia gwauraia totona.​—⁠7/1, rau 15.

◻ Hebou hegaegaelaia karana dekenai ruma bese ese dahaka tahua gaudia idia laloa be namo?

(1) Ruma bese taudia ta ta idia hegaegae kongregesen heboudia dekenai idia haere totona; (2) ta ta idia hekwarahi sibodia edia hereva amo do idia haere totona; (3) edia haere lalonai siri idia gaukaralaia; bona (4) idia tahua edena bamona idia sibodia edia mauri lalonai idia stadilaia gaudia idia badinaia diba.​—⁠7/1, rau 19, 20.

◻ Headava maurina namona ia havaraia dalana be dahaka?

Headava namona ena moale havaraia bona mamia totona, herevahereva namonamo karana be mai anina bada. Ena anina be lalohadai bona hemami herevalaia hebou. Bona herevahereva namonamo karana ena anina be hagoadaia, mamina hanamoa, goeva, namo, bona lalona durua gaudia herevalaia. (Efeso 4:​29-​32; Filipi 4:⁠8)​—⁠7/15, rau 21.

◻ ‘Iehova ena dala’ be dahaka? (Salamo 25:​8, 9, 12)

Unai dala be lalokau dalana. Ia be Dirava ena taravatu hegeregerena ai kara maoromaoro badinaia karana. Baibel ese unai lalokau maorona ia gwauraia “dala namo herea momokani.” (1 Korinto 12:31)​—⁠8/1, rau 12.