‘Gau Iboudiai be mai Edia Nega Korikori’
“Inai tanobada dekenai idia vara gaudia ibounai be mai edia nega korikori, bona kara ibounai danu be mai edia nega.”—HADIBAIA TAUNA 3:1.
1. Goevadae lasi taudia dekenai dahaka kara be auka, bona unai dainai nega haida dahaka ia vara?
NEGA momo, kara ta idia karaia murinai, taunimanima idia gwau, “Guna bema lau karaia haraga be namo.” Eiava reana idia gwau, “Bema lau naria sisina guna be namo.” Unai bamona hereva ese idia hahedinaraia, goevadae lasi taudia ese gau idauidau edia nega maorona idia abia hidi be auka. Unai idia karaia namonamo diba lasi dainai taunimanima edia hebamo karadia idia dika. Unai dainai taunimanima idia lalohisihisi bona idia badu. Bona ia havaraia dika badana be, taunimanima haida edia abidadama Iehova bona ena orea dekenai ia hamanokaia.
2, 3. (a) Dahaka dainai aonega dalana be ita ese Iehova ia gwauraia nega korikoridia ita abia dae? (b) Baibel ena peroveta herevadia idia guguru negadia be edena bamona do ita laloa maoromaoro?
2 Iehova ena aonega bona lalo-parara be taunimanima edia ia hereaia momokani dainai, bema Ia ura, kara idauidau ibounai dainai do idia vara gaudia ia itaia diba. ‘Matamanai dokona ia gwauraia’ diba. (Isaia 46:10) Unai dainai, ia ura karaia gaudia edia nega hereadaena ia abia hidi diba. Vadaeni, namona be eda nega abia hidi namonamo diba lasi karana ita abidadama henia lasi, to aonega dalana be Iehova ese ia gwauraia nega korikoridia ita abia dae!
3 Hegeregere, lo Keristani taudia be mai edia kamonai ida idia naria noho, Baibel ena peroveta herevadia be Iehova ena nega korikorina ai do idia guguru. Iena hesiai gaukara lalonai idia bisi bada bona Lalohisihisi ena Ane 3:26 ena hakaua herevana idia laloa noho, ia gwau: “Lohiabada ese ita do ia hamauria totona, do ita naria noho be namo, do ita naria mai abidadama danu be namo.” (Habakuku 3:16 itaia.) Unai nega lalonai, idia abia dae danu, herevana Iehova ese ia gwauraia kota karana ia vara “haraga lasi, . . . to do ia vara momokani.”—Habakuku 2:3.
4. Edena dala ai Amosa 3:7 bona Mataio 24:45 ese ita idia durua, mai eda haheauka ida Iehova ita naria totona?
4 To, bema Baibel ena hereva haida eiava Watch Tower buka bona magasin lalonai unai hereva idia gwauraia herevadia ita lalo-pararalaia namonamo lasi, ita haheauka lasi be maoro, a? Aonega dalana be, Iehova ese unai gaudia do ia hahedinaraia negana korikorina do ita naria noho. Badina “kara ibounai Lohiabada Dirava ia ura karaia gwauraia neganai, ia ese iena hesiai taudia, peroveta taudia ia hamaorodia guna.” (Amosa 3:7) Unai be gwauhamata namo hereana! To namona be ita lalo-parara Iehova ese do ia karaia gaudia be ia abia hidi negana ai do ia hahedinaraia. Unai dainai Dirava ese “hesiai tauna mai ena kamonai, bona mai ena kara maoromaoro” oreana dekenai siahu ia henia, Iena taunimanima dekenai “aniani neganai edia [lauma] aniani do ia henia” totona. (Mataio 24:45) Unai dainai, ena be gau haida edia anina ia hedinarai goevagoeva lasi, to ita laloa momo lasi, eiava ita lalo-hekwarahi lasi be namo. Ita abia dae, bema mai eda haheauka ida Iehova ita naria noho, ia ese “hesiai tauna mai ena kamonai” oreana amo, aniani maorona be “aniani neganai” do ia henia.
5. Hadibaia Tauna 3:1-8 ita laloa neganai, edena bamona ita ia durua?
5 Aonega tauna King Solomona ese gau idauidau 28 ia herevalaia, idia ibounai be “mai edia nega korikori.” (Hadibaia Tauna 3:1-8) Solomona ena hereva ena anina ita lalo-pararalaia neganai, ita ia durua kara haida edia nega maorona bona nega kererena dekenai Iehova ena lalohadai ita diba totona. (Heberu 5:14) Bena unai hegeregerena iseda mauri do ita haidaua diba.
“Taitai be mai Ena Nega, Bona Kiri be mai Ena Nega”
6, 7. (a) Dahaka gaudia dainai laloa namonamo taudia be hari idia “taitai”? (b) Tanobada taudia ese dahaka idia karaia, dika idia laloa lasi totona?
6 Ena be “taitai be mai ena nega, bona kiri be mai ena nega,” to ita ibounai ese kiri ena nega ita ura henia, ani? (Hadibaia Tauna 3:4) To madi, ita noholaia tanobadana ena dika dainai, ita taitailaia gaudia be momo. Televisen, reidio, bona niuspepa dekenai idia halasia nius momo herea ese lalohisihisi idia havaraia. Mai eda gari ida ita lalohisihisi, badina ita kamonai matamata taudia ese sikuli dekenai edia turadia idia pidia mase, tama bona sina ese edia natudia idia hadikaia, teroris taudia ese kerere lasi taudia idia hamasea eiava idia haberoa, bona idia vara kava dikadia ese taunimanima idia hamasea bona kohu bada idia hadikaia. Hitolo ese ia hadikaia natudia bona edia hanua amo idia heau mauri taudia edia laulau televisen dekenai ese iseda lalona idia veria. Guna ita diba lasi herevadia, hegeregere bese idauna hamasea ore karana, AIDS, jem tuaridia, bona El Niño ese hari—dala idauidau ai—iseda lalona bona kudouna ai lalo-hekwarahi idia havaraia.
7 Ita diba momokani, hari inai negai tanobada be dika bona lalohisihisi idia havaraia gaudia amo ia honu. To, toana be moale karadia idia havaraia bisinesi be unai dika idia laloa bada lasi, bona idia ese anina lasi bona mamina lasi gaudia, nega momo matabodaga bona dagedage idia hahedinaraia gaudia idia halasia, unai amo taunimanima ma haida ese idia haheaukalaia noho hisihisina do ita laloa lasi. To namo lasi ita daradara bena ita laloa unai bamona moale karadia lalonai idia hedinarai hekwarahi lasi maurina mai ena hevaseha hereva bona kiri kavakava be moale korikorina. Lasi, badina Dirava ena lauma ese ia havaraia moalena be Satani ena tanobada ese ia havaraia diba lasi.—Galatia 5:22, 23; Efeso 5:3, 4.
8. Keristani taudia idia laloa hari be taitai ena nega eiava kiri ena nega? Mani oi herevalaia.
8 Tanobada ena dika ita itaia dainai, ita lalo-parara hari inai negai moale ita tahua goadagoada be namo lasi. Inai nega be nega maorona lasi moale karadia sibona ita tahua totona eiava “ita moalelaia” gaudia do ita atoa guna bona lauma gaudia ita atoa murinai. (Hadibaia Tauna 7:2-4 itaia.) Aposetolo Paulo ia gwau namona be “tanobada ena gau namodia idia abia noho taudia be do idia noho, inai gaudia be anina lasi bamona.” Badina be dahaka? “Badina be inai tanobada, hari ia noho toana bamona, be kahirakahira do ia ore.” (1 Korinto 7:31) Dina ta ta iboudiai, Keristani taudia momokanidia ese iseda nega ena anina idia laloa bada.—Filipi 4:8.
Ena be Ita Taitai Noho, to Ita Moale Momokani!
9 Tanobada ibounai Abatana ena negai idia noho taudia ese mauri ena anina idia laloa bada lasi. Idia ese dina ta ta edia gaukara idia karaia noho sibona bona “kara dika be bada herea” dainai idia taitai lasi bona “dika be gabu ibounai dekenai” ia vara idia laloa lasi. (Genese 6:5, 11) Iesu ese unai nega dikana ia herevalaia, bona ia gwau iseda negai danu taunimanima be unai bamona do idia karaia. Ia gwau: “Badina be unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana. Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao. Taunimanima ena Natuna do ia mai neganai danu unai bamona do ia vara.”—Mataio 24:38, 39.
10. Hagai ena negai Israela taudia be edena dala ai idia hahedinaraia Iehova ena nega korikoridia idia laloa bada lasi?
10 Lagani 1,850 bamona Abata murinai, Hagai ena negai, Israela taudia momo danu ese idia hahedinaraia lauma gaudia idia laloa bada lasi. Sibona edia ura gaudia idia tahua goadagoada dainai, idia lalo-parara lasi edia nega ai Iehova ena ura idia tahua guna be gau badana. Sivarai ita duahia, ia gwau: “ ‘Inai taunimanima idia gwau Lohiabada ena Dubu Helaga haginia negana be ia do ginidae lasi.’ Ma Lohiabada ese peroveta tauna Hagai dekena amo taunimanima ia hamaoroa, ia gwau, ‘Egu bese taudia e, badina dahaka umui be ruma namo herea edia lalonai umui noho, to egu Dubu Helaga be ia do dika noho? Lau Siahu Ibounai Lohiabada ese umui lau hamaoroa inai, emui mauri dalana do umui laloa.’ ”—Hagai 1:1-5.
11. Edena henanadai be sibona dekenai ita henia be namo?
11 Hari inai negai ita Iehova ena Witness taudia, eda maduna bona hahenamo Iehova vairanai be Hagai ena negai idia noho Israela taudia edia bamona, iseda mauri dalana do ita laloa mai eda momokani ida be namo. Ita be tanobada ena dika bona unai kara ese Dirava ena ladana ia hadikaia dainai ita “taitai,” a? Taunimanima ese Dirava idia gorea eiava ena hakaua hereva maoromaorodia idia dadaraia neganai, ita lalohisihisi, a? Lagani 2,500 gunanai, Esekiela ese matahanai lalonai ia itaia maka idia abia taudia bamona ita kara, a? Baibel ese idia ia herevalaia, ia gwau: “Lohiabada ese [torea gaudia ia abia tauna] ia hamaoroa, ia gwau, ‘Ierusalema hanua do oi raka hanaia, bona kara dika rohoroho ibounai, hanua lalonai idia karaia noho, dainai idia taitai noho, bona idia lalohisihisi noho taudia edia bagudia dekenai maka do oi atoa.’ ”—Esekiela 9:4.
12. Esekiela 9:5, 6 ena anina hari inai nega taudia dekenai be dahaka?
12 Tuari kaia idia abia tatau 6 ese idia abia hahegani ita duahia neganai, do ita itaia unai sivarai be hari mai anina bada ita dekenai, ia gwau: “Unai maka ia atoa noho tauna ena murinai, hanua do umui raka hanaia, bona taunimanima do umui alaia mase. Ta do umui bogahisihisi henia lasi, bona ta do umui hamauria lasi, tau burukadia, uhau, kekeni badadia, memero, kekeni, bona hahine danu. To iena baguna dekenai maka idia abia taudia do umui alaia lasi. Egu Dubu Helaga dekena amo inai kara do umui karaia hamatamaia.” (Esekiela 9:5, 6) Ia mai haraga hisihisi badana amo do ita roho mauri dalana tamona be, ita lalo-parara hari inai nega be taitai ena nega.
13, 14. (a) Iesu ena hereva hegeregerena edena bamona taudia idia moale? (b) Mani oi hahedinaraia dahaka dainai oi laloa unai kara be Iehova ena Witness taudia huanai idia hedinarai.
13 To momokani, ena be Iehova ena hesiai taudia be tanobada ena dika dainai idia “taitai,” to unai ese edia moale ia koua lasi. Lasi! Tanobada oreadia ibounai amo edia orea be moale bada oreana. Iesu ese ia hahedinaraia edena bamona taudia idia moale, ia gwau: “Idia diba lauma gaudia idia tahua be namo taudia (NW ) . . . , tai noho taudia . . . , dagedage lasi taudia . . . , kara maoromaoro idia ura dikadika idia karaia taudia . . . , bogahisihisi henia taudia . . . , lalona goevagoeva taudia . . . , maino idia karaia taudia . . . , kara maoromaoro idia karaia dekena amo hisihisi idia abia taudia be idia [moale].” (Mataio 5:3-10) Gau momo herea ese idia hamomokania unai kara be Iehova ena Witness taudia edia orea lalonai idia hedinarai, ma tomadiho oreana ta be unai bamona lasi.
14 Lagani 1919 ai, tomadiho momokani idia haginia lou murinai, Iehova ena moale besena idia “kiri” be mai ena badina. Idia ese lagani 600 B.C.E. murinai Babulonia amo idia giroa taudia edia moale bada be lauma dalanai idia mamia, idia gwau: “Lohiabada ese ita ia abia mai lou Siona dekenai neganai, ita be nihi ita abia noho taudia bamona. Unai neganai ita kiri bada, bona mai moale bada danu ane ita abia! . . . [Iehova] ese kara badadia momokani ita totona ia karaia. Unai dainai ita be mai moale bada danu.” (Salamo 126:1-3) To ena be lauma dalanai Iehova ena Witness taudia idia moale bada, idia ese hari inai nega ena anina idia laloa bada noho. Tanobada matamatana do ia vara momokani bona tanobada taudia ese “mauri korikori do idia abia momokani” negana ai, taitai be do ia ore bona ena gabu ai kiri do ia noho ela bona hanaihanai.—1 Timoteo 6:19, NW; Apokalupo 21:3, 4.
“Rosia Kara be mai Ena Nega, Rosia Lasi be mai Ena Nega”
15. Dahaka dainai Keristani taudia ese edia turadia idia abia hidi namonamo?
15 Keristani taudia ese edia turana idia abia hidi namonamo. Idia ese Paulo ena sisiba idia laloa noho, ia gwau: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.” (1 Korinto 15:33) Bona aonega tauna King Solomona ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.”—Aonega Herevadia 13:20.
16, 17. Iehova ena Witness taudia edia lalohadai turadia abia hidi karana, hetura karana, bona headava dekenai be edena bamona, bona dahaka dainai?
16 Iehova ena hesiai taudia ese idia bamona idia karaia taudia, Iehova bona ena kara maoromaoro idia ura henia taudia, be edia turadia ai idia halaoa. Idia ese edia turadia idia laloa bada bona edia hebamo idia moalelaia, to idia aonega bona hari inai negai tano haida dekenai taunimanima momo edia lalohadai kererena tau bona hahine edia hetura karana dekenai idia abia dae lasi. Idia laloa lasi unai bamona hebamo karana be ta ia hadikaia diba lasi moale karana sibona, to idia laloa ia be headava dekenai idia do ia hakaua dalana badana bona namona be headava totona tauanina, hemami, bona lauma dalanai idia hegeregere—bona Baibel ena hereva ta ese edia headava ia koua lasi—taudia sibona be unai bamona hebamo karana lalonai idia vareai.—1 Korinto 7:36.
17 Haida idia laloa unai bamona lalohadai hetura karana bona headava dekenai be idaunegai taudia edia lalohadai bamona. To Iehova ena Witness taudia ese edia turadia idia abia hidi eiava hetura karana bona headava idia laloa neganai, ma haida edia lalo-ani karadia idia dadaraia. Idia diba aonega ena maoro be ia havaraia gaukarana ese ia hamomokania. (Mataio 11:19, NW ) Iehova be gau iboudiai ia diba namonamo dainai, idia ese ena sisiba idia laloa bada, ia gwau “Keristani tauna sibona” idia adavaia be maoro. (1 Korinto 7:39; 2 Korinto 6:14) Idia headava haraga lasi, badina idia laloa lasi headava maurina ia dika neganai do idia hadokoa eiava adavana idia rakatania be maoro. Adavana namona idia tahua neganai idia laloa namonamo, badina idia lalo-parara headava gwauhamata idia karaia murinai, Iehova ena taravatu do idia badinaia be mai anina bada, ia gwau: “Unai dainai idia be rua lasi, edia anina be tamona. Dirava ese ia hakapua taudia, be taunimanima ese do idia hapararaia lasi.”—Mataio 19:6; Mareko 10:9.
18. Dahaka be heduru namona headava lalonai moale havaraia totona?
18 Headava be mauri ibounai lalonai do ita badinaia gwauhamatana bona ita palanilaia namonamo be gau badana. Tau be ia sibona dekenai ia nanadaia diba, ‘Momokani ia be adavana namona lau totona, a?’ To unai hegeregerena, gau badana be ia henanadai, ‘Momokani lau be adavana namona ia totona, a? Lau be lo Keristani tauna bona lauma dalanai ia do lau durua diba, a?’ Idia headava gwauraia taudia ruaosi edia maduna be Iehova vairanai lauma dalanai do idia goada, unai amo Dirava ena lalo-namo ia abia diba headava goadana idia havaraia totona. Keristani headava taudia tausen momo ese idia hamomokania diba, ful-taim hesiai gaukara lalonai abia karana lasi to henia karana be gau badana dainai, ia be heduru namona headava lalonai moale havaraia totona.
19. Dahaka dainai Keristani taudia haida ese headava lasi maurina idia abia hidi?
19 Keristani taudia haida ese “rosia lasi” maurina idia abia hidi ena anina be sivarai namona dainai headava lasi maurina idia abia hidi. (Hadibaia Tauna 3:5) Ma haida be idia headava lasi ela bona lauma dalanai idia hegeregere neganai, adavana namona idia abia diba. To, headava ena kara bona hahenamo idia ura henia to adavana ta idia do davaria lasi Keristani taudia ita laloa danu be namo. Ita diba momokani Iehova ia moale bada, badina idia ese Ia henia hakaua herevadia idia hadikaia lasi, idia headava diba totona. Namona be Dirava idia badinaia dainai ita ese ita lalodia bada danu bona heduru maorona idia dekenai ita henia.
20 Idia headava taudia danu be nega haida do idia “rosia lasi” be maoro, a? Toana be dala ta ai ia maoro, badina Paulo ia gwau: “Varavara taudia e, lauegu hereva ena anina be inai: Nega be kwadogi. Unai dainai inai nega kwadogina ia noho lalonai, tatau mai edia adavana be adavana lasi taudia bamona do idia noho be namo.” (1 Korinto 7:29) Unai hegeregerena, nega haida tiokratik maduna idauidau idia huaia totona headava ena moale bona hahenamo be murinai idia atoa be namo. Unai idia laloa maoromaoro neganai, unai kara ese headava ia hamanokaia lasi to ia hagoadaia, badina unai ese tau bona hahine ia hadibaia loulou nega ibounai Iehova be edia headava hagoadaia tauna badana ai idia halaoa be gau badana.—Hadibaia Tauna 4:12.
21. Dahaka dainai headava taudia edia lalohadai natudia havaraia karana dekenai ita maumauraia be maoro lasi?
21 Danu, headava taudia haida ese natudia idia havaraia lasi, Dirava dekenai edia hesiai gaukara idia karaia namonamo diba totona. Unai ena anina be gau namona ta idia reaia, bona Iehova ese davana namona do ia henidia. Ena be Baibel ia gwau sivarai namona dainai ta ia headava lasi be kara namona, to unai badina tamona dainai headava taudia ese natudia idia havaraia lasi ia herevalaia lasi. (Mataio 19:10-12; 1 Korinto 7:38; mani Mataio 24:19 bona Luka 23:28-30 itaia.) Unai dainai, headava taudia be edia noho dalana bona edia lalona ena mamina hegeregerena unai idia abia hidi be namo. Bona herevana headava taudia ese dahaka idia abia hidi, ta ese ia gwauraidia dika be maoro lasi.
22. Dahaka ita diba be gau badana?
22 Oibe, “tanobada dekenai idia vara gaudia ibounai be mai edia nega korikori, bona kara ibounai danu be mai edia nega.” Unai hegeregerena, “tuari be mai ena nega, maino danu be mai ena nega.” (Hadibaia Tauna 3:1, 8) Hari be tuari ena nega eiava maino ena nega ita diba be gau badana, bona unai ena badina be hereva gabena ese do ia hahedinaraia.
Anina Oi Gwauraia Diba, A?
◻ Dahaka dainai gau badana be ita diba “idia vara gaudia ibounai be mai edia nega korikori”?
◻ Dahaka dainai hari inai nega be ‘taitai ena nega’?
◻ Dahaka dainai Keristani taudia idia “taitai,” to idia moale momokani danu?
◻ Edena dala ai Keristani taudia haida ese idia hahedinaraia idia laloa hari inai nega be “rosia lasi” ena nega?
9. Abata ia do vara lasi negana lalonai mauri be edena bamona, bona hari unai ena anina ita dekenai be dahaka?
20. Dahaka dainai idia headava taudia danu be nega haida idia “rosia lasi”?
[Pictures on page 6, 7]
Ena be tanobada ena dika dainai Keristani taudia idia “taitai,” . . .
. . . to tanobada taudia amo idia be moale momokani taudia
[Picture on page 8]
Ful-taim hesiai gaukara be heduru namona headava lalonai moale havaraia totona