Watchtower Educational Center Hahelagaia Negana—Aria ta Iehova Hanamoa Totona

IDAUNEGAI amo ema bona hari, mai moale ida idia karaia aria be tomadiho momokanina ena kahana ta. Idaunegai Israela dekenai, aria haida be dina haida lalonai idia karaia bona Iehova idia tomadiho henia taudia tausen momo ese idia lao henidia. Solomona ese ia haginia dubu helagana idia hahelagaia ariana be dina 7 lalonai idia karaia bena unai murinai ma dina 7 lalonai Au Raurau Ruma Maragidia Ariana idia karaia. Unai ese dala ia kehoa Israela taudia dekenai Iehova ese idia ia kara namo henia daladia idia laloatao totona. “Edia ruma dekenai idia lao, mai edia moale bona mai edia lalona namo danu, Lohiabada ese iena hanamoa ibounai, be iena hesiai tauna Davida, bona iena bese Israela dekenai ia hedinaraia dainai.”​—⁠1 King Taudia 8:66.

May 17 ia lao 22, 1999 ai, Watchtower Educational Center, Patterson, New York, U.S.A. dekenai ia vara gauna idia itaia dainai vadivadi taudia ese unai idaunegai idia karaia moale aria idauidau idia laloatao. Unai pura lalonai Baibel hadibaia gaukarana habadaia totona idia haginidia ruma 28 idia hahelagaia. Dala idia hegaegaelaia hedikwota Brooklyn, Wallkill, bona Patterson dekenai idia gaukara taudia 5,400 iboudiai ese Patterson dekenai idia noho rumadia idia itaia totona. Idia vadivadi taudia huanai 500 be guna unai gabu idia haginia gaukarana idia karaia taudia, Watch Tower Society ena brens 23 amo idia mai taudia, bona haida be kahirakahira ai idia noho kongregesen taudia​—⁠iboudiai be 8,100 bamona.

Laulau Gaudia ese Vadivadi Taudia Idia Hadibaia

Vadivadi taudia ese unai hadibaia gabuna idia diba namonamo totona, laulau gaudia, vidio, bona ruma idauidau itaia daladia idia hegaegaelaia. Risepsen gabuna ai, vadivadi taudia be Iesu ena nega lalonai Ierusalema dekenai ia noho dubu helagana ena toana idia itaia. Idia noho laulau haida be Watchtower Bible School of Gilead idia haginia matamata negana ena sivarai, guna idia karaia hebouhebou badadia, kongregesen heboudia, hari inai negai taunimanima edia ruma dekenai idia karaia Baibel stadi dalana​—⁠hari pura ta ta ai milioni momo idia karaia​—⁠bona Legal Department ese unai gaukara ena dala ia kehoa totona ia karaia gaukara idauidau idia hahedinaraia, unai idia karaia badina Iesu ena oda idia badinaia.​—⁠Mataio 28:​19, 20.

Unuseniai ia noho ruma badana lalonai taunimanima 1,700 idia helai diba, bona unai hahelagaia purana lalonai idia vadivadi taudia be miniti 33 vidio ta ladana, “Not by Power​—⁠By My Spirit!” idia itaia. Unai vidio ese Watchtower Educational Center ia vara dalana ia sivarailaia. Unai vidio lalonai idia henanadai henia taudia idia gwau idia vara gaudia amo ia hedinarai goevagoeva Iehova ese unai gaukara ia gunalaia bona ena hahenamo ia henia dainai lagani 15 lalonai idia karaia gaukarana be mai kwalimu ida idia haorea. Taunimanima tausen tausen be unai gabu haginia gaukarana idia karaia. Hua haida lalonai, lagani 1994 ai, gaukara taudia 526 idia gaukara, idia 350 be ful-taim volantia gaukara idia karaia, 113 be hua haida sibona idia gaukara taudia, bona 63 be dina ta ta ai idia mai idia durua totona. Momo herea be harihari gaudia amo unai gaukara idia durua. Idia ibounai idia diba bema Iehova ena lauma ese ia durua lasi, unai gaukara idia karaia diba lasi.​—⁠Sekaraia 4:⁠6.

Unai hadibaia gabuna idia vadivadi taudia idia itaia unuseniai idia karaia gaukara ibounai be Dirava ena hadibaia herevadia hahedinaraia totona idia karaia. Sikuli rumana ena foloa ginigunana dekenai Gilead Sikuli ena vareai gabunai idia atoa gaudia ese lauma dalanai unai sikuli ese ia havaraia ahuna namona bona ena histori idia hahedinaraia. Gilead Sikuli be South Lansing, New York dekenai, idia hamatamaia bona lagani 1943 ai idia karaia klas ginigunana amo ema bona hari, stiuden ibounai 7,000 mai kahana dekenai misinari gaukara idia hadibaia. Sikuli rumana ena foloa iharuana ai idia atoa gaudia ese School for Branch Committee Members bona School for Traveling Overseers idia hahedinaraia, unuseniai edia sikuli idia karaia. November 1995 ai idia hamatamaia ema bona hari, unai sikuli ai Brens Komiti taudia ibounai 360, tano 106 amo, idia hadibaia vadaeni.

Vadivadi taudia idia loaloa neganai, idia itaia gabu momo dekenai idia be laulau sibona idia itaia lasi. Idia be dipatmen idauidau dekenai idia lao, opesi bona gaukara gabudia haida lalonai idia vareai, bona idia karaia gaukara idia itaia diba. Idia moalelaia bada gabuna ta be Audio/Video Services rumana. Unuseniai Baibel hadibaia gaukara durua totona idia gaukaralaia kohu be namo herea! Edia gaukara be laulau bona vidio kwadogidia amo idia hahedinaraia, vadivadi taudia idia hadibaia edena bamona gadona regena be kaset teipi dekenai idia atoa bona vidio idia karaia. Vidio lalonai dahaka kohu bona dabua do idia gaukaralaia tahua gaukarana ena bada idia dibaia. Idia itaia edena bamona vidio lalonai idia hedinarai kohu idia karaia hegaegae, ena be idia be dava bada lasi gaudia to edia kahana maragi ibounai idia karaia namonamo. Idia itaia edena bamona miusiki idia gaukaralaia unai amo vidio idia itaia taudia idia mamia idia be unai vidio ese ia hahedinaraia gaudia lalonai idia noho bamona. Lagani 1990 amo ema bona hari, Society ese Baibel amo idia hegaegaelaia hereva idauidau edia vidio 10 be gado 41 ai idia halasia, bona unai sibona lasi, to American Sign Language ena vidio haida idia halasia danu.

Idia vadivadi taudia momo idia itaia dipatmen be Photo Lab, Art Department, Information Services, unai dipatmen ese kompiuta treinini bona heduru ia henia, Service Department, ia be kongregesen ibounai 11,242 bona loaloa naria taudia 572 ia naria, bona Writing Correspondence, unai dipatmen be lagani ta ta ai henanadai 14,000 bamona ia haerelaia. Unai dipatmen ese revareva idauidau haerelaia totona idia karaia tahua gaukarana bona unai revareva idia torea taudia edia hekwakwanai idia laloa bada karana be vadivadi taudia ese idia hoalaia.

Idia vadivadi taudia momo be Translation Services dekenai idia lao. Idia hoa badina idia davaria idia hanaia lagani ima lalonai, Society ese gado matamatadia 102 ai Baibel idia hadibaia bukadia ia halasia. Tanobada hegegemadai, Iehova ena Witness taudia 80 pesen bamona be English gado ai lasi to gado ma ta ai Society ena buka idauidau idia duahia. Unai taudia durua totona, volantia taudia 1,700 mai kahana be tano 100 ai gado hahanaia gaukarana idia karaia. Idia ese Gima Kohorona be America, Europe, Asia, bona Africa edia gado idauidau ai idia itaia. Vadivadi taudia ese New World Translation Baibel be gado 31 ai idia itaia. Idia dibaia Watch Tower ena buka idauidau be hari gado 332 ai idia halasia bona Dirava Ia Ura Dahaka Ita Karaia? buklet be gado 219 ai idia halasia vadaeni.

Legal Department idia vadivadi henia taudia be unai dipatmen ese tanobada hegegemadai ia karaia gaukara idauidau idia itaia. Vidio ta amo, idia ese Witness loea ta idia itaia ia ese rara henia hanai kota karana ta lalonai hereva ia henia. Bona sivarai namona be taunimanima dekenai harorolaia diba dalana ia kehoa noho totona idia karaia gaukara idauidau idia dibaia. (Filipi 1:⁠7) Inai lagani lalonai March ai, distrik kota ta ena hahemaoro herevana idia hahedinaraia. Unai kota ese New Jersey, U.S.A. ai, borough of Oradell ia oda henia Iehova ena Witness taudia be ruma ta ruma ta dekenai idia haroro totona gwaumaoro pepana bona kadi idia abia loaloa taravatuna do idia kokia.

Vadivadi taudia ese unai gaudia sibona idia itaia lasi. Idia ese Precast Shop lalonai konstraksen gaudia idia itaia bona Wastewater Treatment gabuna, Powerhouse, Water-Softening Facility, bona kohu hanamoa gabudia momo dekenai idia lao. Unai be hahenamo bada herea.

Hahelagaia Program ese Dirava Ena Hadibaia Gaukarana Ia Gwauraia Momo

Idia karaia hahelagaia program be Wednesday, May 19, 4 okaloka adorahi ai idia hamatamaia. Mai moale ida idia hebou taudia 6,929 be hedikwota dekenai idia gaukara taudia, Society ese ia boiria taudia, bona Canada brens dekenai taunimanima 372 be telefon amo idia kamonai.

Unai program dekenai idia lao taudia be mai moale ida Milton G. Henschel, Watch Tower Society ena presiden, ena welkam herevana idia kamonai. Hakaua Oreana tauna ta bona program ena seamani, Theodore Jaracz, ese William Malenfant ia boiria. Ena hereva ladana “Haginia Gaukarana Lalonai Idia Vara Gau Badadia” ia henia lalonai, Watchtower Educational Center haginia gaukara idia hegaegaelaia, palania, bona haginia lalonai mai anina bada gaukara idia karaia tadikaka toi ia henanadai henia. Idia hereva henidia lalonai, idia hahedinaraia unai ruma idia haginidia lalonai, hua haida sibona lalonai idia gaukara taudia 8,700 be idia durua totona sibodia edia mai dalana ena davana idia karaia. Dirava ena hadibaia herevadia ese idia havaraia lalo-tamona bona hariharibada karana ia hedinarai goevagoeva unai!

Gabeai, hereva ta mai ena kahana hani, ladana “Dirava Ena Hadibaia Gaukarana Tanobada Hegegemadai” idia henia. Hakaua Oreana taudia hani ese idia henia. John E. Barr ia hahedinaraia Dirava ena hadibaia gaukarana be Dirava ena Hereva, Baibel amo, bona ia ese Keristani taudia ia hagoadaia ‘kara namodia edia anina idia havaraia, bona Dirava ena diba bona diari ai do idia tubu.’ (Kolose 1:10) Daniel Sydlik ia hahedinaraia Dirava ena hadibaia gaukarana be tiokratik dalanai ia heau, Keristani kongregesen ena kwarana Iesu Keriso amo ia diho mai tanobada hegegemadai idia noho tadikaka ta ta dekenai. (1 Korinto 12:​12-27) Dokona kahana rua be Gerrit Lösch bona Carey Barber ese idia henia, bona idia hahedinaraia Dirava ena hadibaia gaukarana dainai haroro taudia idia hegeregere gabu ibounai idia noho taudia idia lao henia bona Dirava ena dala dekenai do idia raka karana idia hadibaia.​—⁠Isaia 2:​1-4; 2 Korinto 3:⁠5.

Program dekenai idia lao taudia be unai hadibaia gabuna dekenai idia karaia sikuli idauidau idia diba namonamo totona, unai sikuli edia hadibaia taudia bona idia durua taudia danu idia henanadai henidia bona idia herevahereva hebou. Unai sikuli ta ta ese tanobada hegegemadai Dirava ena hadibaia gaukara lalonai idia karaia gaukarana idia hahedinaraia. Idia hahedinaraia Gilead Sikuli ai idia ese Baibel ena buka ta ta idia stadilaia, hari inai negai Iehova ena taunimanima edia sivarai idia stadilaia, bona misinari gaukara totona idia hegaegae. Brens taudia edia sikuli lalonai Brens Komiti taudia ese idia karaia gaukara idauidau ibounai idia stadilaia. School for Traveling Overseers lalonai unai tadikaka sibona idia durua totona lasi, to kongregesen be lauma dalanai do idia durua momokani dalana idia hadibadia.

Unai program namona idia koua totona, Hakaua Oreana tauna Lloyd Barry ese hahelagaia herevana ia henia, ena sinado be “Iseda Havaraia Tauna Badana ida Ruma Ita Haginia.” Ia hahedinaraia iseda Havaraia Tauna, Iehova, be ia havaraia gaudia ibounai ia moalelaia bona ita ia boiria ia ida ita moale hebou totona. (Isaia 65:18) “Gau ibounai ia karaia tauna be Dirava sibona” dainai, unai ruma haginia gaukarana ena hanamoa herevadia ibounai be Iehova Dirava dekenai ita henia be namo. (Heberu 3:⁠4) Unai bamona hereva namodia ia gwauraia murinai, ena kudouna ibounai amo guriguri ia gwauraia, bona Iehova, iseda Havaraia Tauna Badana, dekenai Watchtower Educational Center ia hahelagaia.a

Ita daradara lasi unai pura ibounai lalonai idia karaia ariana dekenai idia lao taudia ese do idia laloaboio lasi. Namona be Watchtower Educational Center oi vadivadi henia totona palani oi karaia, ani? Ai diba unai gabu dekenai oi lao bona oi itaia ese oi do ia hagoadaia iseda Havaraia Tauna lalokauna oi dibaia totona bona iena taravatu maorodia ai oi noho totona.

[Footnote]

[Pictures on page 10]

Ruma badana ia honu bona aniani daiutuna dekenai idia kamonai taudia oredia

[Pictures on page 10]

Vadivadi taudia ese edia loaloa idia moalelaia bada