Ita Dekenai Iehova Ena Orea be mai Anina Bada

OI ESE inai hereva, “Lau ese Dirava lau abidadama henia to dubu orea ta lasi,” be nega ta oi kamonai vadaeni, a? Unai bamona lalohadai be guna dubu lao henia karana idia moalelaia to edia tomadiho ese lauma dalanai edia dabu gaudia ia henia lasi dainai idia lalohisihisi taudia ese idia gwauraidia. Ena be tomadiho oreadia dainai idia badu, to momo idia gwau idia ura dikadika Dirava idia tomadiho henia. To, idia laloa sibodia edia dala ai Dirava idia tomadiho henia be namo, to dubu eiava orea ma ta idia bamoa be namo lasi.

Baibel be dahaka ia gwau? Dirava ia ura Keristani taudia be orea ta idia bamoa, a?

Keristani Ginigunadia be Orea ta Dainai Namo Idia Davaria

Pentekoste 33 C.E. ai, Iehova ese ena lauma helaga ia bubua, gabu idauidau dekenai idia noho taunimanima ta ta latanai lasi, to “gabu tamona dekenai,” Ierusalema ena hanua lalonai ruma ta ena atai daiutuna dekenai, idia noho hebou tatau bona hahine edia orea ta latanai. (Kara 2:⁠1) Unai nega ai, Keristani kongregesen, gabeai ia be tanobada ibounai oreana ai ia lao, be ia vara. Unai kara ese hahenamo badana ta unai hahediba taudia ginigunadia dekenai ia mailaia. Dahaka dainai? Badina ta be, mai anina bada gaukarana ta idia abia​​—⁠unai be Dirava ena Basileia ena sivarai namona do idia harorolaia ela bona “tanobada ibounai dekenai.” (Mataio 24:14) Kongregesen lalonai abidadama taudia matamatadia ese edia tadikaka, unai gaukara dekenai edia diba be bada taudia, amo unai haroro gaukara karaia dala idia dibaia diba.

Nega sisina murinai, Basileia ena sivarai be Ierusalema murimurinai idia harorolaia. Lagani 62 bona 64 C.E. huanai, aposetolo Petero ese ena revareva ginigunana be, “Ponto, Galatia, Kapadokia, Asia bona Bitunia” dekenai idia noho Keristani taudia dekenai ia torea, unai hanua ibounai be hari inai negai Turkey dekenai. (1 Petero 1:⁠1) Abidadama taudia be Palestine, Lebanon, Suria, Kupro, Greece, Krete, bona Italia dekenai idia noho danu. Lagani 60 ia lao 61 C.E. lalonai, Paulo ese Kolose taudia ia tore henia hegeregerena, sivarai namona be ‘tanobada ibounai dekenai idia harorolaia vadaeni.’​​—⁠Kolose 1:⁠23.

Orea bamoa karana ena namo iharuana be, Keristani taudia ese ta ta do idia hagoadaia heheni diba. Kongregesen idia bamoa neganai, Keristani taudia ese hagoadaia herevadia idia kamonai diba, Buka Helaga idia stadilaia hebou diba, abidadama hagoadaia ekspiriens idia kamonai diba, bona edia tadikaka danu idia guriguri hebou diba. (1 Korinto, karoa 14) Bona lo tataudia ese ‘Dirava ia henia mamoe orea do idia naridia namonamo.’​​—⁠1 Petero 5:⁠2.

Idia be kongregesen ta ena memba taudia dainai, Keristani taudia ta ta idia diba heheni bona ta ta idia lalokau heheni. Kongregesen idia bamoa be metau lasi, to Keristani ginigunadia be unai kara amo lauma dalanai idia tubu bona goada idia abia.​​—⁠Kara 2:​42; 14:27; 1 Korinto 14:26; Kolose 4:​15, 16.

Tanobada ibounai kongregesen, eiava orea, be mai anina ena badina ma ta be lalo-tamona ia habadaia. Keristani taudia ese “hereva tamona” gwauraia karana idia dibaia. (1 Korinto 1:10) Unai be mai anina bada. Kongregesen taudia ta ta edia edukeisen bona edia kastom be idauidau. Gado idauidau ai idia hereva, bona edia kara be idauidau. (Kara 2:​1-​11) Nega haida, edia lalohadai be idauidau. To, Keristani taudia ese heduru idia abia kongregesen lalonai unai gaudia idia hamaoromaoroa totona.​​—⁠Kara 15:​1, 2; Filipi 4:​2, 3.

Kongregesen ena elda taudia ese idia hamaoromaoroa diba lasi henanadai aukadia be lo loaloa naria taudia, Paulo bamona, dekenai idia henia. Henanadai badadia hahediba herevadia dekenai be Ierusalema ai ia noho hakaua oreana dekenai idia henia. Unai hakaua oreana be Iesu ena hahediba taudia amo idia karaia to gabeai idia habadaia bona Ierusalema ai idia noho kongregesen ena tatau badadia danu be ia lalonai idia vareai. Kongregesen ta ta ese idia abia dae unai hakaua oreana bona iena gwaukau taudia ese Dirava amo siahu idia abia hesiai gaukara idia naria, hesiai gaukara ena dagi abia tataudia idia abia hidi, bona hahediba herevadia idia gwauraia totona. Hekwakwanai ta be hakaua oreana ese ia hamaoromaoroa neganai, kongregesen iboudiai ese idia abia hidi gauna idia abia dae bona unai “goada henia hereva namona dekenai idia moale bada.”​​—⁠Kara 15:​1, 2, 28, 30, 31.

Oibe, aposetolo edia nega ai, Iehova ese orea ta ia gaukaralaia. To, hari be edena bamona?

Hari Ita Dekenai Orea ta be mai Anina Bada

Aposetolo edia negai idia noho Keristani taudia hegeregerena, hari Iehova ena Witnes taudia ese Basileia ena sivarai namona harorolaia gaukarana idia laloa bada. Unai gaukara idia karaia dalana ta be Baibel bona Baibel stadi durua bukadia idia hariharilaia, bona unai gaukara ia heau namonamo totona orea ta ia noho be mai anina bada.

Keristani bukadia idia hegaegaelaia namonamo be namo, edia maoro idia tahua namonamo, idia printaia, bena kongregesen iboudiai dekenai idia siaia. Danu, volantia Keristani taudia ese unai buka bona magasin be idia ura duahia taudia dekenai idia mailaia be gau badana. Basileia ena sivarai be unai dala amo taunimanima milioni momo ese idia kamonai. Sivarai namona harorolaia taudia idia hekwarahi unai haroro gaukara idia karaia namonamo totona, idia naria namonamo teritori haida idia karaia loulou bona ma kahana haida idia karaia lasi garina. Unai ia vara totona orea ta ia noho be mai anina bada.

“Dirava ese taunimanima edia toana ia laloa lasi” dainai, Baibel bona Baibel bukadia idia hahanaia be namo. (Kara 10:34) Harihari inai magasin be gado 132 ai idia halasia, bona ena turana, Awake!, be gado 83 ai idia halasia. Unai ia vara totona, idia heau namonamo gado hahanaia oreadia tanobada hegegemadai idia noho be namo.

Kongregesen ena memba taudia be Keristani heboudia bona hebouhebou badadia dekenai idia lao neganai, idia ese hagoadaia herevadia idia kamonai. Unuseniai idia ese Baibel amo heduru herevadia idia kamonai, Baibel idia stadilaia hebou, hagoadaia ekspiriens idia kamonai, bona edia tadikaka ida idia guriguri hebou. Bona edia tadikaka aposetolo edia negai idia karaia bamona, idia ese lalokau loaloa naria taudia amo abidadama hagoadaia vadivadi idia moalelaia. Unai dainai, hari inai negai Keristani taudia be ‘orea tamona, bona naria tauna tamona’ bamona idia noho.​​—⁠Ioane 10:⁠16.

Momokani, Iehova ena Witnes taudia be goevadae lasi, bona Keristani taudia ginigunadia danu be goevadae lasi. To, lalo-tamona ai idia gaukara hebou. Unai dainai, Basileia harorolaia gaukarana be tanobada ibounai lalonai idia karaia noho.​​—⁠Kara 15:​36-​40; Efeso 4:​13.

[Picture on page 31]

Hari inai negai Keristani taudia be ‘orea tamona, bona naria tauna tamona’ bamona idia noho