Ita be Abidadama Taudia

India Dekenai Baibel Stadi amo Abidadama Idia Hagoadaia

NOT kahanai idia noho sinou ese idia koua Himalaya Ororo badadia amo ia lao saut kahanai ia noho Indian Davarana ena kone mai ena siahu dekenai, India tanona ena toana bona ena tomadiho be idauidau. Idia noho taudia bilioni ta mai kahana amo 83 pesen bamona be Hindu taudia, 11 pesen be Muslim taudia, bona oredia be sibodia idia gwauraia Keristani taudia, Sikh, Buddhist, bona Jain taudia. Ibounai ese tomadiho ena ura kwalimu idia moalelaia. The World Book Encyclopedia ia gwau, “India taudia edia mauri dalana dekenai tomadiho be mai anina bada.”

India dekenai edia noho dalana ai edia Keristani abidadama idia hahedinaraia namonamo Iehova ena Witnes taudia edia namba be 21,200 ia hanaia. Edia tadikaka tanobada ena kahana idauidau dekenai hegeregerena, Witnes taudia India ai idia laloa Dirava ena Hereva, Buka Helaga, dekenai edia abidadama ia goada ia lao totona edia dekena taudia idia durua be hahenamo ta. (2 Timoteo 3:​16, 17) Mani oi laloa edena bamona ruma bese ta India ena saut kahana Chennai dekenai ese Baibel ena hereva momokani idia abia dae.

Iehova ena Witnes taudia ida idia do hedavari lasi neganai, unai ruma bese be Katolik taudia edia charismatic oreadia idia goadalaia, idia gwau matahanai idia itaia, gado idauidau ai idia hereva, bona gorere taudia idia hanamoa. Dubu ai bona unai gabu ai edia ladana be bada, bona taunimanima ese unai ruma bese taudia haida idia gwauraia “swami,” anina be “lohiabada.” Bena nega ta Witnes tauna ta ese unai ruma bese ia vadivadi henia bona Baibel amo ia hahedinaraia Iesu be Dirava ena Natuna, Siahu Ibounai Diravana lasi, momo ese idia abia dae bamona. Unai Witnes tauna ia hahedinaraia danu Dirava ena ladana be Iehova bona Iehova ena ura tanobada totona be paradaiso hairaina ai do ia halaoa.​​—⁠Salamo 83:18; Luka 23:43; Ioane 3:⁠16.

Dirava ena Hereva idia matauraia bona idia kamonai gaudia idia ura henia dainai, unai ruma bese taudia idia ura Iehova ena Witnes taudia ida Baibel idia stadilaia. Unai dainai dubu dekenai idia bamoa taudia ese idia kirikirilaidia. To, unai ruma bese ese edia lalona idia hadaia edia Baibel stadi do idia karaia noho. Edia diba ia bada ia lao bona edia abidadama ia goada ia lao neganai, edia tomadiho koikoi karadia idia rakatania. Hari, unai ruma bese taudia toi be lalo-goada bapatiso Witnes taudia, bona dala ia kehoa negadiai sinana be heduru painia gaukara ia karaia.

Abidadama Dainai Hekwakwanai Ia Hanaia

Sunder Lal, tau matamata ta Punjab hanuana dekenai, be abidadama bada bona goada ia abia be namo, Dirava ena Basileia sivarai namona be ma haida dekenai ia harorolaia totona. (Mataio 24:14) Badina ta be, ena ruma bese bona hanua taudia ese idia abia dae dirava momo tomadiho henia karana ia rakatania, Dirava momokani, Iehova, ia tomadiho henia totona. Badina ma ta be, Sunder Lal be aena lasi.

Ela bona lagani 1992, Sunder Lal ena mauri dinadia ta ta idia idau lasi. Ia be doketa durua gaukara ia karaia bona ena ruma bese danu idia abia hidi hadibaia tauna ese ia hakaua daladia dekenai dirava idauidau idia tomadiho henia. Bena hanuaboi ta ai, trein ena heau dala ia hanaia noho lalonai ia moru. Trein be ia heau hanaia bona ena mamuna amo ena aena rua ia utua. Ena be ia mauri, to ena mauri ia idau momokani. Unai dainai ita hoa lasi, Sunder Lal ia lalo-metau bada herea bona ia ura sibona ia hamasea. Iena ruma bese ese idia durua, to ia laloa ena vaira negana be anina lasi.

Bena Iehova ena Witnes tauna ta ese Sunder Lal ia vadivadi henia bona Baibel amo ia hahedinaraia Dirava ia gwauhamata vadaeni, tanobada be paradaiso namo hereana ai do ia halaoa bona ia idia gari bona lalokau henia taudia ibounai dekenai mauri goevadaena do ia henia. Sunder Lal ese Baibel stadi ia abia dae, bona lagani tamona lalonai ia stadi mai ena ura bada ida. Ia idia boiria Keristani heboudia dekenai ia mai totona bona gabeai ena turana ena baisikele murinai ia guia bena ia lao. Ena be unai guia lao dalana be mai ena hisihisi, to ena hahenamo be bada herea. Ena Baibel stadi lalonai ia dibaia gaudia ia hamomokania, badina Dirava ena Hereva ese ia gwauraia gwauhamata idia abia dae bona Baibel ena hahediba herevadia idia badinaia taudia ma haida ia hedavari henia.

Sunder Lal ese ena dekenai taudia dekenai sivarai namona ia harorolaia matamaia, bona lagani 1995 ai ia bapatiso. Matamanai, haroro gaukara ia karaia neganai ena hanua lalonai sibona ia veria tano dekenai iduara ta iduara ta dekenai ia lao totona, unai be ia gaukaralaia dalana ia loaloa totona. To hari ia ese ena lauma tadikaka amo harihari gauna ia abia​​—⁠baisikele mai ena uili toi, idia karaia imana amo do ia “taria lao” diba totona. Unai baisikele mai ena uili toi dainai, hari ia hegeregere ia sibona ia loaloa bona kilomita 12 be kongregesen heboudia dekenai ia lao diba. Nega haida ia sibona ia taria ia lao medu mai lai bada negadiai; ma nega haida siahu neganai siahu ena bada be 43° Celsius bamona.

Hebou dekenai sibona ia lao lasi, to Sunder Lal ese Dirava momokanina Iehova dekenai edia abidadama ia goada ia lao totona heduru idia ura abia taudia ida Baibel stadi momo ia karaia danu. Momokani, guna ia stadi henia Baibel stiuden taudia 7 be idia bapatiso vadaeni, bona ma toi be matamanai ia hereva henidia to ena Witnes tadikaka ese Baibel amo idia stadi henidia.

Baibel ia gwau, “Taunimanima haida sibona be mai edia abidadama.” (2 Tesalonika 3:⁠2) To “Dirava ese ia abia hidi, mauri hanaihanai abia totona taudia ibounai” ese Dirava ena Hereva idia stadilaia hanaihanai karana amo abidadama goadana idia abia diba. (Kara 13:48) Unai bamona stadi karana dainai edia matana ia diaridiari badina helaro namo hereana vaira negana totona idia abia​​—⁠unai gauna dekenai edia namba ia bada ia lao noho India taudia ese edia abidadama idia hahedinaraia noho.

[Map on page 30]

(For fully formatted text, see publication)

AFGHANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Credit Line]

Mountain High Maps® Copyright © 1997 Digital Wisdom, Inc.