Basileia Haroro Ripoti

Iehova ese Iena Taunimanima Dekenai Laga-Ani Gabuna Ia Henia

ORORO ena dala dekenai idia hesiku loaloa taudia be laga-ani gabuna mai ena ikerukeru do idia moalelaia. Nepal dekenai, unai bamona laga-ani gabudia idia gwauraia chautara. Unai bamona chautara ta be reana banyan au namodia badinai idia gini, helai bona laga-ani gabuna mai ena ikerukeru. Chautara atoa hegaegae karana be hebogahisi hahedinaraia karana, bona taunimanima be unai heduru karana idia karaia taudia momo idia diba lasi.

Nepal ena ekspiriens ese ia hahedinaraia Iehova Dirava be inai nega ena oromana lalonai idia hesiku “loaloa taudia” edia moale bona lauma dalanai edia goada ena Badina ai ia lao.​​—⁠Salamo 23:⁠2.

• Lil Kumari be Pokhara ena siti mai hairaina dekenai ia noho, bona Himalaya Ororo badadia mai edia hairai bada, sinou ese edia dorina ia koua, be do oi itaia danu. To Lil Kumari be ruma bese ena moni davaria dalana ia lalo-hekwarahilaia dainai, ia laloa nega vaira totona helaro be bada lasi. Iehova ena Witnes taihu ta ese ia vadivadi henia neganai, Baibel ena helaro namona ese ena lalona ia hamarerea bona karaharaga Baibel stadi ia abia dae.

Ena be Lil Kumari be stadi ia moalelaia, to iena stadi ia karaia noho be mai ena hekwarahi badina iena ruma bese ese ia idia koua. To ia manoka lasi. Keristani heboudia dekenai ia lao hanaihanai bona ia dibaia gaudia ia badinadia, hegeregere headava hahine ena kamonai karana ia laloa bada. Unai dainai, iena adavana bona sinana idia lalo-parara, Lil Kumari ena stadi karana ese ruma bese ibounai ia hanamoa.

Hari iena adavana bona iena varavara haida be Dirava ena Hereva idia stadilaia noho. Vanegai, Pokhara ena hebouhebou ta dekenai, Lil Kumari bona iena varavara taudia 15 ese unai program idia moalelaia. Ia gwau: “Lau egu ruma be laga-ani gabunai ia lao badina hari ai emai ruma bese be tomadiho momokani dekenai idia lalo-tamona, bona lalona ena maino korikorina lau davaria.”

• Ena be Nepal dekenai iduhu inai henia karana be taravatu, to iena siahu taunimanima edia mauri lalonai be ia do bada noho. Unai dainai, momo be Baibel ese taunimanima ibounai idia hegeregere bona toana laloa lasi karana ia herevalaia dalana idia ura henia bada. Surya Maya bona iena ruma bese be “Dirava ese taunimanima edia toana ia laloa lasi” idia diba neganai, edia mauri idia haidaua momokani.​​—⁠Kara 10:⁠34.

Surya Maya be iduhu ma ta inai henia karana bona sene bona kastom daladia goadalaia karana ena metau dainai ia lalohisihisi. Surya Maya be tomadiho goadalaia hahinena ta, bona lagani momo lalodiai iena kaivakuku diravadia dekenai heduru ia tahua. To iena guriguri ena haere ia abia lasi. Dina ta heduru totona ia noinoi neganai, iena tubuna kekenina Babita, ena mauri lagani 6, be ia kahirakahira dekenai ia lao bona ia nanadaia: “Dahaka dainai unai gau ta do ia karaia diba lasi kaivakukuna dekena amo heduru oi tahua?”

Unai nega ai Babita ena sinana be Iehova ena Witnes taihu ta ida Baibel idia stadilaia noho. Babita be mai ena ura bada ida ena tubuna hahinena be Keristani hebouna ta dekenai ia boiria mai. Surya Maya be hebou dekenai ia lao neganai ia hoa, badina iduhu idauidau amo idia mai taudia ia itaia, idia inai heheni lasi to ta ta ena hebamo idia moalelaia. Ia be karaharaga Baibel stadi totona ia noinoi. Ena be unai kara dainai ena dekena taudia ese ia idia dadaraia, to ia lalohisihisi lasi; bona ena be ena duahia bona torea karana be namo lasi to unai ese ena goada lauma dalanai ia koua lasi.

Lagani 8 idia hanaia vadaeni, bona iena famili taudia 6, iena adavana bona natudia toi danu, be Iehova ena Witnes taudia ai idia lao. Hari Surya Maya be ful-taim hesiai hahinena, regula painia ta, bona mai moale danu ma haida ia durua, Iehova sibona ese ia henia laga-ani gabuna dekenai edia maduna metauna idia kokia totona.