Iehova ese Hesiku Tauna Ia Hagoadaia
“Manoka bona hesiku taudia be [Iehova] ese ia hagoadaia noho, bona goada lasi taudia edia goada ia habadaia noho.”—ISAIA 40:29.
1. Dirava ese ia havaraia gaudia lalonai ia noho siahuna ena haheitalai oi gwauraia.
IEHOVA ena siahu be hetoana lasi. Bona ia havaraia gaudia lalonai ia noho siahuna ia bada herea momokani danu! Atom maragina—gau iboudiai edia badina—ia bada lasi dainai, idia bilioni bilioni 100 be ranu ena hetuturu tamona lalonai idia noho.a Dina lalonai atom hakapua karana ese ia halasia siahuna dainai, tanobada dekenai mauri gaudia iboudiai idia mauri noho diba. To dina ena siahu ibounai amo, hida be do ia hegeregere tanobada ai mauri gaudia do idia noho totona? Tanobada ese dina ia havaraia siahu ena kahana maragina sibona ia abia. To, dina ena siahu ena kahana maragina, tanobada ia botaia gauna, ese tanobada ena faktori ai idia gaukaralaia siahuna ibounai ia hereaia nega momo amo.
2. Isaia 40:26 ese Iehova ena siahu be edena bamona ia gwauraia?
2 Herevana ita be atom eiava unives ita lalohadailaia, Iehova ena siahu bada herea dainai ita hoa. Unai dainai Iehova ia gwau diba: “Emui matana do umui negea, guba do umui itaia. Daika ese hisiu ia karaia? Dirava ese edia orea be ta ta, dekena amo idia ia mailaia hedinarai, bona idia ta ta ibounai edia ladana ia atoa noho. Iena siahu be bada herea dainai, hisiu ta ia boio diba lasi”! (Isaia 40:26) Oibe, Iehova ena “siahu be bada herea,” bona ia be unives ia havaraia siahuna ena Badina.
Sibodia Edia Goada be Hegeregere Lasi
3, 4. (a) Reana edena gaudia dainai do ita hesiku? (b) Edena henanadai ita lalohadailaia be namo?
3 Dirava ena siahu be mai hetoana lasi, to taunimanima idia hesiku diba. Ita lao henia gabudia iboudiai dekenai, hesiku taudia ita itaia. Idia noga neganai idia hesiku, gaukara eiava sikuli idia lao henia neganai idia hesiku, ruma dekenai idia giroa neganai idia hesiku, bona mahuta patana dekenai idia hekure neganai idia hesiku sibona lasi to edia goada ia ore vaitani. Haida idia ura gabu ma ta dekenai idia lao bena laga-ani namona sisina do idia abia diba. Ita Iehova ena hesiai taudia be nega haida ita hesiku danu, badina be iseda mauri ibounai lalonai Dirava ita badinaia bona ena anina be ita gaukara goadagoada. (Mareko 6:30, 31; Luka 13:24; 1 Timoteo 4:8) Danu, gau ma haida ese iseda goada idia haorea.
4 Ena be ita be Keristani taudia, to taunimanima momo idia davaria hekwakwanai ita davaridia danu. (Iobu 14:1) Gorere, moni hekwakwanai, eiava mauri ena hekwakwanai ma haida ese lalo-manoka, goada ia haorea gauna, idia havaraia diba. Unai hekwakwanai sibona lasi, to kara maoromaoro dainai dagedage idia abia taudia edia hahetoho idauidau idia davaria danu. (2 Timoteo 3:12; 1 Petero 3:14) Dina ta ta ai inai tanobada amo hekwakwanai ita abia bona haida be iseda Basileia harorolaia gaukarana idia koua toho dainai, reana ita haida ita hesiku bada bona ita laloa Iehova ena hesiai gaukara amo do ita laga-ani sisina be namo. Danu, Satani Diabolo ese iena dala iboudiai ia gaukaralaia iseda Dirava badinaia karana do ia hadikaia totona. Vadaeni, ita hesiku lasi bona iseda gaukara do ita rakatania lasi totona, lauma dalanai goada be edena bamona ita abia diba?
5. Keristani hesiai gaukara karaia totona, dahaka dainai taunimanima edia goada be hegeregere lasi?
5 Lauma dalanai goada ita abia totona, Iehova, siahu ibounai Havaraia Tauna, ita tabekau henia be gau badana. Aposetolo Paulo ia hahedinaraia, Keristani hesiai gaukarana dekenai goevadae lasi taudia edia goada be do ia hegeregere lasi. Ia gwau: “Inai diari ai abia vadaeni taudia, be hodu, manoka gaudia sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.” (2 Korinto 4:7) Horoa Keristani taudia edia gaukara be ‘taunimanima idia haroro henia ela bona Dirava ena turana ai idia lao.’ Edia bamodia, edia helaro be tanobada ai do idia noho taudia, ese idia durudia. (2 Korinto 5:18; Ioane 10:16; Apokalupo 7:9) Ita goevadae lasi taudia be Dirava ena gaukara ita karaia lalonai dagedage ita davaria dainai, sibona eda goada amo unai gaukara ita karaia diba lasi. Iehova ese ena lauma helaga amo ita ia durua, bena iseda manoka ese iena siahu ia hahedinaraia. Bona inai gwauhamata, ‘Iehova ese kara maoromaoro taudia do ia durua momokani,’ be ita ia hagoadaia bada!—Salamo 37:17.
‘Iehova ese Iseda Goada Ia Henia’
6. Edena dala ai Baibel ese ita ia hamaoroa Iehova be iseda goada ena Badina?
6 Iseda guba Tamana ena “siahu be bada herea” bona ita ia hagoadaia haraga diba. Ita ia hamaoroa: “Manoka bona hesiku taudia be [Iehova] ese ia hagoadaia noho, bona goada lasi taudia edia goada ia habadaia noho. Uhau taudia idia manoka diba, bona tau matamatadia edia goada do ia ore, do idia moru diba. To Lohiabada dekenai idia abidadama henia taudia ese, edia goada do idia hamatamataia lou. Idia be hanina dekena amo, do idia roho daekau, ugava bamona. Idia be do idia heau, bona do idia manoka lasi. Idia be do idia raka lao, bona do idia moru lasi.” (Isaia 40:29-31) Hekwakwanai idia bada idia lao dainai, reana nega haida iseda hemami be iena goada ia ore vaitani heau helulu tauna ena hemami hegeregerena, ia laloa iena aena ese ia idia huaia lao noho diba lasi. To mauri ena heau helulu ena dokona gabuna be kahirakahira, bona ita heau noho be gau badana. (2 Sivarai 29:11) Iseda Inai Tauna, Diabolo, “be laiona mai ena boiboi bada bamona” ia raka loaloa, bona ia ura ita ia koua. (1 Petero 5:8) Namona be ita laloatao, ‘Iehova be iseda goada bona iseda kesi,’ bona durua gaudia momo ia karaia ‘manoka bona hesiku taudia ia hagoadaia’ totona.—Salamo 28:7.
7, 8. Dahaka ese ia hamomokania Iehova be Davida, Habakuku, bona Paulo ia hagoadaia?
7 Iehova ese Davida dekenai goada ia henia, bona unai goada dainai hekwakwanai badadia ia davaria neganai ia gaukara noho diba. Unai dainai, mai abidadama bona mai lalo-goada ida, Davida ia gwau: “Bema Dirava be iseda kahana dekenai ia noho neganai, ita be do ita kwalimu. Dirava ese ita dekenai idia tuari henia taudia do ia halusia.” (Salamo 60:12) Iehova ese Habakuku ia hasiahua danu, iena peroveta gaukarana ia karaia haorea totona. Habakuku 3:19 ai ia gwau: “Lohiabada ese lau dekenai goada ia henia noho. Ia ese egu aena ia hagoadaia, dia ena aena hegeregerena. Vadaeni ororo ataiai gabudia dekenai lau heau lao diba.” Paulo ena haheitalai ita laloa danu be namo, ia gwau: “[Dirava] ese lau ia hasiahua, vadaeni gau ibounai lau goadalaia diba.”—Filipi 4:13.
8 Davida, Habakuku, bona Paulo hegeregerena, namona be ita be Dirava ena hagoadaia bona hamauria siahuna ita abidadama henia danu. Ita diba Siahu Ibounai Lohiabadana Iehova be iseda “goada” ena Badina dainai, namona be Dirava ese ia henia durua gaudia momo amo lauma dalanai goada do ita abia diba daladia haida ita laloa.
Ita Idia Hagoadaia Lauma Gaudia
9. Edena dala ai Keristani magasin bona bukadia ese ita idia hagoadaia diba?
9 Keristani buka bona magasin edia heduru amo Baibel stadilaia namonamo karana ese ita ia hagoadaia diba. Salamo torea tauna ese inai ane ia abia: “Inai bamona taudia be idia moale momokani: . . . Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai. Ma inai taudia be, sinavai badinai idia hadoa audia bamona, edia huahua atoa neganai, idia ese anina idia atoa bada herea. Edia raurau danu do idia kakoro lasi. Edia gaukara ibounai be ena anina ia vara, bona mai edia kwalimu danu.” (Salamo 1:1-3) Aniani ita ania be gau badana tauanina dalanai goada ia do noho totona. Unai hegeregerena, namona be lauma aniani ita ania, lauma dalanai iseda goada ia do noho totona. Dirava ese ena Hereva bona Keristani buka bona magasin amo unai aniani ia henia. Unai dainai, stadi namonamo bona laloa dobu karadia be mai anina bada.
10. Stadi bona laloa dobu karana be reana edena negai do ita karaia diba?
10 “Dirava ena laloa dobu gaudia” ita laloa namonamo be mai ahuna namona. (1 Korinto 2:10) To laloa dobu karana be edena negai do ita karaia diba? Aberahamo ena natuna Isako be ‘adorahi ta, dina ia diho kahirakahira neganai, tano palaka dekenai ia loaloa,’ gau haida ia laloa dobu totona. (Genese 24:63-67) Salamo torea tauna Davida be ‘hanuaboi lalonai Dirava ia laloa.’ (Salamo 63:6) Dirava ena Hereva be dabai, adorahi ai, hanuaboi ai—momokani, nega idauidau ai—ita stadilaia bona laloa dobu diba. Unai bamona stadi bona laloa dobu karana ese Iehova ia henia gauna, lauma dalanai ita do ia hagoadaia gauna ma ta—guriguri—dekenai ita do ia hakaua lao.
11. Dahaka dainai guriguri hanaihanai karana ita laloa bada be gau badana?
11 Dirava dekenai guriguri ita gwauraia hanaihanai ese ita do ia hagoadaia. Unai dainai namona be “guriguri do [ita] goadalaia nega ibounai.” (Roma 12:12) Nega haida, aonega bona goada ita gurigurilaia be namo, hahetoho ita haheaukalaia totona. (Iamesi 1:5-8) Dirava ena ura ia guguru dalana ita itaia neganai eiava iena hesiai gaukara do ita karaia noho diba totona ita ia hagoadaia dalana ita lalo-pararalaia neganai, namona be ia ita hanamoa bona tanikiu henia. (Filipi 4:6,7) Bema guriguri amo Iehova kahirakahira dekenai ita noho, ia ese ita do ia rakatania lasi. Davida ese inai ane ia abia: “Dirava be lauegu durua Tauna.”—Salamo 54:4.
12. Badina be dahaka Dirava ita noia iena lauma helaga ita abia totona be namo?
12 Iseda guba Tamana ese iena lauma helaga, o gaukara siahuna, amo ita ia hagoadaia bona ita dekenai siahu ia henia. Paulo ia gwau: “Unai dainai Tamana ena vairanai lau tui diho . . . Dirava lau noia, iena hairaina bona kohu momo dekena amo, umui dekenai Lauma Helaga ena siahu do ia henia. Vadaeni umui emui lalona bona kudouna do idia goada.” (Efeso 3:14-16) Namona be lauma helaga abia totona ita guriguri, bona ita diba momokani Iehova ese do ia henia. Iesu ia gwau: Bema natuna ta ia noinoi gwarume ia abia totona, iena lalokau tamana ese ia dekenai gaigai ta do ia henia, a? Lasi momokani. Unai dainai, dokonai ia gwau: “Umui laloa, umui be [goevadae lasi taudia dainai ai gwauraia diba] dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga be idia noinoi taudia dekenai do ia henidia lasi, a?” (Luka 11:11-13) Ita danu ita guriguri mai eda daradara lasi ida be namo, bona ita laloaboio lasi, Dirava ena abidadama hesiai taudia be iena lauma amo ia mai siahuna dainai “goada” idia abia.
Kongregesen ese Goada Ia Henia
13. Keristani heboudia be edena bamona ita laloa be namo?
13 Keristani kongregesen heboudia amo, Iehova ese ita ia hagoadaia. Iesu ia gwau: “Bema lauegu ladanai tau rua o toi idia hebou gabu ta dekenai, lau danu be idia dekenai lau noho.” (Mataio 18:20) Iesu be unai gwauhamata ia karaia neganai, kongregesen gunalaia taudia ese idia laloa be namo gaudia ia kikilaia. (Mataio 18:15-19) To iseda kongregesen hebou, sekit hebouhebou, bona distrik hebouhebou iboudiai dekenai, iena hereva be mai anina. Idia iboudiai be guriguri amo, iena ladana ai, ita hamatamaia bona ita koua. (Ioane 14:14) Unai bamona Keristani heboudia lao henia karana be hahenamo badana, herevana taunimanima haida sibona eiava taunimanima tausen tausen idia noho. Unai dainai hebou do ita lalodia bada, badina idia karaia lauma dalanai ita idia hagoadaia bona iseda lalokau bona iseda kara namodia idia habadaia totona.—Heberu 10:24, 25.
14. Keristani elda taudia edia gaukara amo dahaka namo ita davaria?
14 Keristani elda taudia be lauma dalanai ita idia durua bona iseda lalona idia hagoadaia. (1 Petero 5:2, 3) Paulo ese ia vadivadi henia kongregesen ia durudia bona idia ia hagoadaia, hari inai negai sekit bona distrik naria taudia ese idia karaia bamona. Iena ura badana be abidadama tamona taudia ida ia noho, idia hagoadaia heheni totona. (Kara 14:19-22; Roma 1:11, 12) Namona be iseda gabu ai idia noho elda taudia bona Keristani naria taudia ma haida ita laloa bada, badina lauma dalanai goada ita abia totona gaukara badana idia karaia.
15. Iseda kongregesen lalonai idia noho tadikaka be edena bamona ita “idia durua bada herea”?
15 Iseda kongregesen lalonai idia noho tadikaka ese ita “idia durua bada herea” diba. (Kolose 4:10, 11) Nega dikadia lalonai, unai ‘tura korikoridia’ ese ita idia durua diba. (Aonega Herevadia 17:17) Hegeregere, lagani 1945 ai, Dirava ena hesiai taudia 220 be Sachsenhausen dibura kamepa amo Nazi biagudia taudia henunai idia ruhadia neganai, idia vairanai ia noho laolaona ena bada be kilomita 200. Idia raka hebou, bona idia goada sisina taudia ese manoka taudia idia atoa treila maragidia haida lalonai bona idia veria lao. Bena dahaka ia vara? Unai laolao lalonai, dibura kamepa taudia 10,000 bona ma haida idia mase, to Iehova ena Witnes tauna ta ia mase lasi. Unai bamona sivarai be Watch Tower magasin bona buka, hegeregere Yearbook of Jehovah’s Witnesses bona Jehovah’s Witnesses—Proclaimers of God’s Kingdom, lalonai idia torea, bona unai ese idia hamomokania, Dirava ese iena taunimanima ia hagoadaia dainai idia haheauka noho.—Galatia 6:9.b
Iseda Haroro Gaukara amo Goada Ita Abia
16. Hanaihanai ita haroro karana be edena bamona lauma dalanai ita ia hagoadaia?
16 Basileia harorolaia gaukara karaia hanaihanai karana ese lauma dalanai ita ia hagoadaia. Unai gaukara ese ita ia durua Dirava ena Basileia bona nega vairai do idia noho hanaihanai hahenamodia do ita laloa totona. (Iuda 20, 21) Haroro gaukara ai ita herevalaia Baibel gwauhamatadia ese ita dekenai helaro idia henia, bona ita do idia durua, peroveta tauna Mika bamona, do ita lalo-goada totona. Ia gwau: “Ita ese Lohiabada, iseda Dirava do ita tomadiho henia, bona kamonai henia, ela bona hanaihanai.”—Mika 4:5.
17. Baibel stadi henia karana ena heduru herevadia haida be dahaka?
17 Bema nega momo Baibel ita gaukaralaia taunimanima hadibaia gaukarana ai, iseda hetura karana Iehova ida ita hagoadaia noho. Hegeregere, Diba ese Mauri Dekenai Ita Ia Hakaua Lao bukana be ma ta danu ita stadilaia neganai, idia noho to edia hereva idia torea hanai lasi Baibel siridia haida ita duahia bona kikilaia be aonega karana. Unai ese stiuden tauna ia durua bona lauma gaudia dekenai iseda lalo-parara ia habadaia danu. Bema stiuden tauna be Baibel ena hahediba herevana ta eiava haheitalai ta ia lalo-pararalaia haraga lasi, reana stadi haida lalonai Diba bukana ena karoa ta umui stadilaia diba. Ita moale bada bema ita hegaegae namonamo bona ita hekwarahi bada, taunimanima ita durua Dirava kahirakahira dekenai idia lao totona!
18. Diba bukana idia gaukaralaia namonamo dalana oi gwauraia hedinarai.
18 Lagani ta ta ai, Diba bukana idia gaukaralaia namonamo dainai, taunimanima tausen tausen be Iehova ena gwauhamata hesiai taudia ai idia lao, bona idia haida be guna Baibel idia diba lasi momokani. Hegeregere, Sri Lanka dekenai Hindu tauna ta ia do maragi neganai, Witnes hahinena ta ena hereva ia kamonai, Paradaiso ia herevalaia. Lagani haida murinai, unai hahine dekenai ia lao, bona nega daudau lasi murinai, iena adavana ese Baibel stadi ia hamatamaia ia danu. Unai tau matamata be dina ta ta iboudiai ia lao stadi idia karaia totona, bona nega kwadogi lalonai iena stadi Diba bukana dekenai idia karaia haorea. Hebou iboudiai ia lao henia matamaia, iena tomadiho gunana ia rakatania vaitani, bona Basileia pablisa tauna ai ia lao. Ia bapatiso negana ai, ia diba tauna ta ida Baibel stadi ia karaia noho vadaeni.
19. Basileia ita tahua guna lalonai, dahaka ita diba momokani?
19 Basileia tahua guna karana ese ita do ia hagoadaia moalena ia havaraia. (Mataio 6:33) Ena be hahetoho idauidau ita davaria, to ita be mai moale bona mai goada ida sivarai namona ita do harorolaia noho. (Tito 2:14) Ita momo be ful-taim painia gaukara ita karaia, bona ita haida be haroro taudia be momo lasi gabudia ai hesiai gaukara ita karaia. Herevana ita be unai dala ai eiava dala ma haida ai Basileia gaukara ita karaia, to ita diba Iehova ese iseda gaukara bona iena ladana dainai ita hahedinaraia lalokauna do ia laloaboio lasi.—Heberu 6:10-12.
Iehova Ena Goada amo Gaukara Noho
20. Edena dala ai ita hahedinaraia Iehova dekena amo goada ita tahua?
20 Momokani, namona be ita hahedinaraia goevagoeva iseda helaro be Iehova dekenai bona ia amo goada ita tahua. Unai ita karaia totona, “hesiai tauna mai ena kamonai” amo ia henia lauma gaudia iboudiai do ita gaukaralaia namonamo. (Mataio 24:45) Heduru gaudia haida be inai: Keristani magasin bona buka edia heduru amo Dirava ena Hereva be ita sibona ita stadilaia bona kongregesen lalonai ita stadilaia, mai kudou ibounai ida guriguri karana, elda taudia edia heduru lauma dalanai, iseda abidadama tamona taudia edia haheitalai namodia, bona hanaihanai haroro gaukarana ita karaia karana. Unai gaudia amo iseda hetura karana Iehova ida do ita hanamoa bona goada ita abia iena hesiai gaukara helagana ita karaia noho totona.
21. Edena dala ai aposetolo Petero bona Paulo idia hahedinaraia Dirava ia henia goadana idia abia be gau badana?
21 Ena be ita taunimanima eda tauanina ia manoka, to bema Iehova dekenai ita tabekau, ita do ia hagoadaia iena ura ita karaia totona. Petero ia diba unai heduru ita abia be namo dainai, ia gwau: “Bema tau ta ena diba be taunimanima durua, vadaeni inai diba, Dirava ese ia henia gauna do ia gaukaralaia mai ena goada ibounai, taunimanima durua totona.” (1 Petero 4:11) Bona Paulo ia hahedinaraia ia be Dirava ese ia henia goadana dekenai ia tabekau, ia gwau: “Keriso dainai lau gaukara lalonai, bema lau manoka, o haida ese lau idia hadikaia, o metau, o hisihisi, o dagedage, o hekwarahi lau davaria neganai do lau moalelaia. Badina be lau manoka neganai, unai be Dirava ena goada lau abia.” (2 Korinto 12:10) Namona be ita danu be unai abidadama ita hahedinaraia bona hesiku tauna ia hagoadaia lou Siahu Ibounai Lohiabadana, Iehova, do ita hanamoa.—Isaia 12:2.
[Footnotes]
a Unai namba, America ena namba gaukaralaia dalana ai, be 100,000,000,000,000,000,000.
b Watchtower Bible and Tract Society of New York, Inc. ese ia halasia.
Edena Bamona Do Oi Haere?
• Dahaka dainai Iehova ena taunimanima be goada bada idia abia be namo?
• Baibel ese edena bamona ia hamomokania Dirava be iena hesiai taudia ia hagoadaia?
• Iehova ese ita ia hagoadaia totona ia henia lauma gaudia haida be dahaka?
• Ita be edena dala ai ita hahedinaraia diba Dirava amo goada ita tahua?
[Picture on page 12]
Baibel amo ma haida ita hadibaia neganai, iseda hetura karana Iehova ida ita hagoadaia noho