Rara Lasi Opereisen—“Medikol Dalana Badana Ta”
INAI hereva kwarana “ ‘Rara Lasi’ Opereisen” henunai, Maclean’s magasin ia gwau Canada ena kahana momo dekenai idia noho doketa taudia be “idia hanaia lagani ima lalodiai, dala matamatadia idia davaria dainai, idia gwauraia rara lasi opereisen be medikol dalana badana ta ai ia halaoa.” Idia ta be Winnipeg’s Health Scences Centre ena anestetik henia doketa, Brian Muirhead. Dahaka ese ia doria rara gaukaralaia lasi dalana ta ia tahua totona?
Lagani 1986 lalonai, Dr. Muirhead be ia auka bada opereisen ta ia karaia mauri lagani 70 tau burukana ta dekenai, ena bogana lalonai toto amo rara ia diho, to ia be Iehova ena Witnes tauna bona Baibel ena hahediba herevadia ia abia dae dainai, ia noidia rara henia lasi medikol heduruna ia abia totona. (Kara 15:28, 29) Maclean’s ia gwau, Dr. Muirhead ese “momo idia gaukaralaia lasi dalana ia gaukaralaia, saline be gorere tauna ena tauanina lalonai ia atoa vareai, iena rara ia bada daekau totona. Unai karaia dalana ia kwalimu, bona unai ese Muirhead ena lalohadai ia hagoadaia, ia gwau, ‘ai be rara henia hanai karana momo herea ai karaia noho. Lau laloa hari dala idaudia ai tahua be namo.’ ”
Rara lasi opereisen tahua goadagoada karana ia vara “badina idia gari nega vairai rara idia henia taudia be momo lasi—bona gorere taudia momo be rara henia hanai karana amo gorere dikadia abia garina idia laloa.” Dala matamata idia tahua doketa taudia dainai, Iehova ena Witnes taudia sibona lasi, to taunimanima ma haida ese namo idia abia. Maclean’s ia gwau: ‘Nega momo rara henia lasi opereisen dainai rara henia hanai karana be anina lasi, bona ta be gorere ia noho rarana amo dika do ia abia lasi.’ To ia “goeva” rara ese gorere ia henia diba, nega sisina lalonai gorere tauna ena tauanina ena goada ia hamaragia karana amo.
Iehova ena Witnes taudia ese rara gaukaralaia lasi karadia idia abia dae momokani, to dahaka dainai? Reana oi ura How Can Blood Save Your Life? buklet oi duahia. Iehova ena Witnes taudia be mai edia moale ida ta do idia henia oi dekenai.